JAHJA 11
11
Lazarus Eenigojawita
1Me idaana eka ki Lazarus, Baitani makijo ka me idaana kidi didi ti-toojogo; Marjam ma kenekame Marta ma ena makijo ka me kidi.
2Kou Marjam kodaa unu enaa odijo Jesus maida jatuumijawijake bado maida okaija ijo ka jawunata. Okai panekame Lazarus kidi didi ti-toojogo me kidi.
3Tijake panekaaneija kodaa jesuspa me aebadikumijake aeteete mana, „Ei, Kuduu, akoogei kidi didi teete,” aetai.
4Kodeja Jesus kii mana juwijake eteete mana, „Kii didi kii ko momogi ko bokai ko beu, kodeja me ka Ugatame muta etuwa-tita, daana Ugatame Joka kidi ibo ejaike-tijake, okai kou maida make,” etii.
5Jesus kidaa Marta ma, kenekame ma, Lazarus ma ipa egai.
6Lazarus didi tipi mana kidi juwijake ko okai tota makiida kodaa naago wija ma tou.
7Wadoutouga etope-taidoopa eteete mana, „Mewei, inii Judea dokoo wo niuwei,” etii.
8Tijake etope-taido eteete mana, „Ei, Kuduu, Jahudi bagee kagiine dimi teetegai tijake ito ko kouda kodaa wo uwiine, mee?” etii.
9Tijake Jesus wo eteete mana, „Beu, mee? agapeena djam wija ma gaati. Kou danite me idaana agapi jawina ti-toojogo kipo tokuu te tija, okai kii makiida ka aweida ki dojake kouja.
10Kodeja me idaana wanee jato uwina ti-toojogo okai kipo tokuu tija, okai duba aweida ko beu kouja.
11Jesus kou dani wegajake kigeena ma eteete mana, „Lazarus iniija noogei kidi uno umeete, kodeja ani matoki ete-uwiine,” etii.
12Tijake etope-taido joko eteete mana, „Ei, Kuduu, kou danite okai uno umi-toojogo ko okai didi beu kaine,” etii.
13Lazarus bokaategi mana maida make Jesus etita, kodeja okeija ka gai ko, okai kojáá uno umeete mana eneete gai.
14Tijake Jesus okeepa ewaa tapa wo eteete mana, „Lazarus bokaategi.
15Daana ikii maida make ani ideide ani kouda kodaa tou beu kouja, ikii maakodo ga-tita no te. Kodeja mewei, inii okaapa uwii no,” etii.
16Didimus eebatijawita me Tomas kidi ogaaneidoopa eteete mana, „Mewei, inii maija uwii no, okai ma enaimo bokape na enaa,” etii.
17Jesus dakii tijake ko Lazarus bokajake uno wii me oka duba umi-toojogo dou.
18Baitani makijo kodo Jerusalim kapauto, poto ko beu #11:18 kilometer wido.
19Jahudi bagee me wedaba Marta ma Marjam ma jege jabudijawiine mei, panekame maida make.
20Jesus meete mana Marta juwijake okai edoutoune uwii, kodeja Marjam owaapa animaki-toojogo.
21Tijake Martaja Jesuspa eteete mana, „Ei, Kuduu, kou danite aki jakai tou naako, anija paneka te boka-toja kodaa.
22Kodeja ito kou maija ani epi, tumaana agijo aki Ugatameepa ediimipe ko Ugatameja kaniipagi,” etii.
23Tijake Jesus wo eteete mana, „Aki paneka kidi ija kija,” etii.
24Tijake Marta eteete mana, „Ani epi wiwitiida naago kodaa okai ija kaitagi,” etii.
25Tijake Jesus wo eteete mana, „Ani ki me ija eewija ma, ajii bokouto ma. Meija maakodo nagapi, okai bokapi maija ija kaitagi.
26Daana meija ija tojake ani maakodo nagapi okai te bokaitagi imo to togoo. Kii ke aki maakodo gai, mee?” etii.
27Tijake Marta wo eteete mana, „Ii, Kuduu, ani maakodo gai aki ki Keristus, Ugatame Joka kidi, makiida meitagi wegaigai kidi,” etii.
28Okai kou mana etijake kenekame Marjam kodo gabo gabo manaa-te-uwijake eteete mana, „Kuduu meegi, mana kateete,” etii.
29Kou mana juwijake okai tibigi joonidoke tijake Jesus edou uwii.
30Kodeja Jesus kidi maki okogouda woujo kai beu gaa, kodeja Marta ma akado titaida kodaa to toojo gaa.
31Jahudi bagee Marjam ma enaimo ootojake jege ooteete bageido kede Marjam tibigi joonidoke tijake uwii ko edojake okei eepei, Marjam me okaapa jiijii taine uweete gajake.
32Marjam kodo Jesus totaida kodaa dakii tai. Edojake Jesus jumaapa mijouga kijake eteete mana, „Ei, Kuduu, kou danite aki jakai tou naako ani paneka te boka-toja,” etii.
33Marjam jiijii kodo Jesus edojake, daana Jahudi bagee maija okai ma enaimo jege ooteete, okai kegepa juwikigi tijake gaagaa tai.
34Tijake eteete mana, „Kaija emakeetega?” etijake joko eteete mana, „Ei, Kuduu, mei, do te no,” etii.
35Jesus jege tita.
36Tijake Jahudi bagee ka wegaate mana, „Edodowei, okai ipa egata na ko,” wegai.
37Kodeja me ino ka wegaate mana, „Peka wanee me idaana peka enaa jaawita me kidi bida beu, mee? kii me kidi te bokatijake kei tijawii ko,” etii.
38Me okaapa dakii tijake Jesus kegepa juwikigi umina. Me oka kodo bijo duba mogo kato ka taki atita.
39Tijake Jesus eteete mana, „Kii mogo ki wo begokijawii,” etii. Tijake bokata me kidi panekame Marta kodaa eteete mana, „Ei, Kuduu, ito ko unu umina, naago wii tojake kouja,” etii.
40Tijake Jesus wo eteete mana, „Beu, mee? anija katipa ko, aki maakodo nagape ko, Ugatameja ajiipi agijo doupage kateega,” etii.
41Tijake okei mogo kodo wo begokijawijake Jesus wado dojake kei teete mana, „Ei, Naitai, ani nagajaweege katii, aki najuwai kouja.
42Daana ani epi aki umina najuweige, kodeja ani watija topai bageido kei maida make wegaaga, aki ki nabadikumita mana kodo okei maakodo ga-tita,” etii.
43Okai kou mana wegajake, mana kuutaka wuu teete mana, „Ei, Lazarus, podomidodou,” etii.
44Tijake bokata me kidi podomai, bado ma gane ma kagaba ka etonimakita, daana ebepeka maija kagaba ka tonijawita. Tijake Jesus meidoopa eteete mana, „Jaekegajawijake uwe-tita kijoka ejaikai,” etii.
Jesus Wagiine Mana Wegai
45Marjam ma enaimo meta ka Jahudi bagee me wedaba kede Jesusja kei tita agijo kodo dojake maakodo egai.
46Kodeja me ino kede Parisi bageepa uwijake Jesusja kei tita agijo kodo eti-menii.
47Okai kouja imam iboudo ma, Parisi bagee ma, mana pikatai bagee ma kotuu timakijake wegaate mana, „Inii magijo kei tai? Kii me kidi dou beu agijoudo umina kei te-tai kouja.
48Kou danite inii inimugi etijawipe ko meido utoma maakodo egaitai, tijake Rum bagee mejake iniija ka touda ma tuma ma peu neewiitai,” wegai.
49Okei jupi ka me idaana eka ki Kajafas kidi kou taun kodo Ibo Imam kidi. Okai eteete mana, „Ikii tumaana ma gai beu.
50Ikii gai beu, inii tuma utoma peu kai kodo ma ko me idaana kei bagee maida make komoka jaawijake bokai ko epaago,” etii.
51Okai kou wegata kou ko okai kidaa ko beu, kodeja kou taun kodaa okai Ibo Imam kouja Jesus kou tuma maida make jabokai mana kodo douja dojawita.
52Daana kou tuma maida make to komoka jaawijake bokai ko beu, kodeja Ugatame jokaane wudepapa titaido kede enaida kotuu atiine tijake.
53Okai kou naago make wado okei Jesus wagiine tijake mana amo wegai joko wegai
54Okai kouja Jesus kidi Jahudi bagee jupiidaiga ewaa tapa jawina beu, kodeja okai kouda kodaa make uwijake gei tapa kapauto ka maki katouda eka Efraim uwii. Kouda kodaa etope-taido ma enaimo tou.
55Jahudi ka wadouga etigajake petii tita ga-tou naago kapauto kijake kou makijo ka bagee wedaba Jerusalim makijo wado uwii, ibo naago nai beu gaa kodaa, akaato jimubeu awiine tijake.
56Okei Jesus eubajake Ugatameja owaa duba joonidaa ti-toojogo wegaate mana, „Ikii kawe dani dimi gai? Okai ibo naago dijo doune te meitagi, mee?” wegai.
57Kodeja imam iboudo ma, Parisi bagee ma mana bida peu etimakai, me idaana Jesusja touda epi ki-toojogo niti-niimai etii, okei ejakimakaine tijake.
Currently Selected:
JAHJA 11: EKG
Highlight
Share
Copy
Want to have your highlights saved across all your devices? Sign up or sign in
