JAHJA 1

Tota Mana

1Edoga pukipaki kidi Tota Mana muto kodo tou, daana Tota Mana muto kodo ko Ugatame ma enaimo. Tota Mana kodo Ugatame kidi ki.

2Edoga kidi okai Ugatame ma enaimo tota.

3Utoma agijo utoma okaimaidaiga ewaa awita. Okai beudaiga tumaana agijo ma ewaa kai beu.

4Ija bokouto kodo okai duba, daana ija bokouto kodo me tuma ka aweida.

5Aweida kodo bunita duba ataati timakai, daana bunita kodaa te dinijawii.

6Me idaana Ugatameja ebadikumii, eka ki Jahja.

7Okai mana wegaine mei, aweida mana jawegaine tijake, okai maida make utoma bagee maakodo ga-tijake.

8Okai ki aweida kidi ki beu, kodeja aweida mana kodo jawegaine tijake.

9Maa ka aweida puki kodo, kou ko me gakita eganimakai ka kodo, makiida mijouwe kai.

10Okai makiida tou, daana makiida ko okaija ewaa awita kodeja, makiida ka bagee kodaa edomakai beu.

11Okaija agijoopa mejake okaija bageido kodaa ejakimakai beu.

12Kodeja ejakimakija bagee utoma Ugatame jokaane ketijake boko jaduwajawii. Kou ko okaaka maakodo egata bageido no te.

13Kei bagee epamakita mana kou ko, emo ka ko beu, daana má maida make ko beu, daana me dimi ka ko beu, kodeja Ugatameepa make.

14Tota Mana kodo me kijake inii jupi tou. Okaija ajiipi agijo kodo inii jadomakai, Nakameja enaago Joka kidaa ajiipi kodo danite. Okai jikoo bokouto ma, maakodo bokouto ma ebetume.

15Jahja mana jawegajake pitokeete mana, „Kii dei anija kiteetega me kidi ki, ’Ani nemoutouga meitagi kidi ki, ani ma ko okai ki ibo kidi, ani beuda kodaa okai tota me kiija,’” etii.

16Okaija abuma bokouto kodaa inii utoma jikoo bokouto go-wo.

17Dijo douja mana kodo Musaja niimita kodeja, jikoo bokouto ma, maakodo bokouto ma Jesus Keristusja nijamejawita.

18Me idaana ma Ugatame edou beu, kodeja enaago Joka kidaa, Nakameepa to-tai me kidaa to niti-niimai.

Baptis Tei Tita Me Jahja Kidaa Mana

19Kii ke Jahjaja wegata mana, Jahudi bagee ka imam ma, Lewi tuma ma wija wido Jerusalim make ebadikumita gaa kodaa, „Aki ki meime?” egaado taine tijake.

20Okai ewaa tapa etii, beu puga te tijake, kodeja maakodo eteete mana, „Ani ki Keristus kidi ki beu,” etii.

21Tijake okei egaado teete mana, „Keetigo ko aki ki meime? Aki ki Elias, mee?” Etijake „Beu” etii. „Aki ki tikauwa ka gokobaki tijawiidaiga wegai tita me kidi, mee?” egaado tijake joko eteete mana, „Beu,” etii.

22Tijake okei egaado teete mana, „Aki ki meime kipe ga? Inii nibadikumipai bageepa ko kawe no mana wo etiitage? Aki akaato mana ko kawe no eniipage?” etii.

23Tijake joko eteete mana, „Ani ki gei tapa ka mana wuu kidi ki, Tuhanja ita doodoo jaawii, tikauwa ka gokobaki tijawiidaiga wegai tita me Jesaja kidaa wegata danite,” etii.

24Ebadikumita bagee kede ke Parisi bagee.

25Tijake okei egaado teete mana, „Kou danite aki ki Keristus beu keetigo ko, daana Elias beu keetigo ko, daana gokobaki tijawiidaiga wegai tita me kidi beu keetigo ko, magijo ka aki meido baptis etai?” etii.

26Tijake Jahja wo eteete mana, „Ani ki uwo ka baptis kitai, kodeja ikii jupi ikii ke ewo me kidi topi.

27Okai kii kidi ki ani nemouga meta me kidi. Okaija bado awii buda kodo ani jaekegai ko nadou peu,” etii.

28Kou ko Baitani make kei tidaa tita, Jarden onee auwaato kodo, Jahja meido baptis eteetigo gaa kodaa.

29Aweetaa naago kijake Jesus okaapa meete edojake kei teete mana, „Edodowei, Ugatameja Domba Joka kidi. Makiida maki utoma ka peudo wado jamotigota me kidi.

30Okai ki anija kiteetega me kidi ki, Ani nemoutouga me idaana meitagi, ani ma ko okai ki ibo kidi. Ani beuda kodaa okai ki tota me kiija.

31Ani na edou beu tita, kodeja okai kou maida make ani uwo ka meido baptis etaine mei, okai Israil bageepa ewaa ketita,” etii.

32Jahja jawegaate mana kii dani etii, „Ani Ugatameja Roh kodo wonou dani epa maida make mijouwe keete edou, tijake okai wado animakai.

33Ani okai ki egai beu kodeja, uwo ka baptis te-tijake nabadikumita me kidaa enita mana, Roh mijouwe kijake okai wado toutagi me kidi, okai kii kidaa Rohulkudus ka baptis tija kijoka, enita.

34Ani edomakijake mana jawegai, kii ke Ugatame Joka kidi.”

Tuhan Jesus Me Ida Idibi Ebukai

35Aweetaa naago kijake Jahja kidi etope-tai wija ma enaimo joonidaa ti-toojogo.

36Jesus ita jaweete edojake eteete mana, „Edodowei, Ugatameja Domba Joka kidi,” etii.

37Etope-tai wija kede kou mana kodo aajuwijake Jesus aepei.

38Jesus wouga wakouga tidoke tijake aepeete wija kede edou. Tijake eteete mana, „Ikai magijo aubaate?” etii. Tijake okejai wo aeteete mana, „Ei, Rabbi (me manaida awi-toojogo ko, Kuduu), aki kaija umeige?” aetai.

39Jesus eteete mana, „Aamewei, aadoota no.” Okei uwijake okaija umei titaida aadou; okejai wija Jesus ma enaimo okai kou naago kodo tou, meuka mijo ogoogiida gaa kodo.

40Kei wija Jahjaja mana aajuwijake Jesus aepeta kede ke idaana ki Andereas kidi, Simon Peterus kenekame.

41Edoga kidi Andereas kidaa kenekame Simon kidi edomakijake eteete mana, „Inii ke Messias edope” (tota manaida awitoojogo ko Keristus).

42Okai Simon kidi Jesuspa ouwii. Jesus edojake eteete mana, „Aki ki Simon kidi, Jahjaja joka. Aki Kepas kaabatijawiita,” (me manaida awi-toojogo ko Mogo #1:42 Peterus).

43Aweetaa to ko Jesus Galilea makijo uwiine gai. Okai Pilipus edomakijake „Naapei” etii.

44Pilipus kidi Baitsaida makijo ka me, Andereas ma Peterus ma ena makijo.

45Pilipus kidaa Natanael edomakijake eteete mana, „Inii okai ki edope, Musaja dijo douja manaidaiga ebijamakita me kidi, daana tikauwa ka gokobaki tijawiidaiga wegai tita bagee ka ebijamakita me kidi. Kii ke Nazaret ka me Jesus kidi, Jusuf jokame kidi,” etii.

46Tijake Natanael eteete mana, „Nazaret makijoopa make enaa agijo ewaa kija, mee?” Etijake Pilipusja „Mei, aki do-te no,” etii.

47Natanael okaapa meete Jesus edojake okai maida make jawegaate mana, „Edodowei, Israil bagee ka enaa me idaana kidi. Okai duba puja mana tou beu me kidi,” etii.

48Tijake Natanael wo eteete mana, „Kawe dani tijake aki nadomakai?” Etijake Jesusja wo eteete mana, „Pilipusja mana katai beu gaa kodaa, aki uta uti mijo toojogo gaa ani kadopa,” etii.

49Tijake Natanael wo eteete mana, „Ei, Kuduu, aki ki Ugatame Joka. Aki ki Israil bagee ejakimake-tai me kidi,” etii.

50Tijake Jesus wo eteete mana, „Uta uti mijo kadopa kateega kouja aki maakodo nagai, mee? Kii ma ko wo ka euga ibo agijoudo doutage,” etii.

51Tijake okai eteete mana, „Beu maa kou ani kitiine, epa damo kebadoke tijake ikii douta, daana Ugatameja jaetigo-tai bageido Me Joka maida wado uweike mijo uweike teete edouta,” etii.

Currently Selected:

JAHJA 1: EKG

Highlight

Copy