Tepaniya 1
1
TEPANIYA WONE
1 #
2End. 22:1–23:30; 2Mbin. 34:1–35:27 Kitikiya nen Amatiya ndake, Amatiya nen Nggeraliya ndake, Nggeraliya nen Kutiya ndake, Kutiya nen Tepaniya ndake, eereegwaarak me, at aap Amon aput Yotiya nogo aakumi Yekura inowe endagembogut a'nuk, wone lengganogo yorage kagak, Aliku ALA nen Kutiya aput Tepaniya wone yoreegerak nogo yi aret.
Ala woroorak eyom paga aaninggin inoba kwippiyoorak wone
2“Yi mendek ndi mendek o nggween paga wonogwe abok aret an nen inenggaawak lek eerogo piyaagin o,”
yinuk, Aliku ALA nen aret yegerak o.
3“Aakumi inom, yi mendek ndi mendek ineenik nggween paga nugu menggaarak anebunu lombok inom, inenggaawak lek eerogo piige,
Yi towe ndi towe oolo ya'i wiganinuk nugu menggaarak inom, yi yikwe ndi yikwe niyo nggwok yenggenak laut inikime menggaarak inom, lek eerogo piige,
It aap an noone ineebi mbaka inom, aakumi o nggween paga wonogwe abok aret inom, mondok lek eerogo piige,
Eerigin o,”
yinuk, Aliku ALA nen aret yegerak o.
It Yekura mendek aaninggin inoba piyoorak wone
4-6“It aakumi Yekura menggaarak inom, it Yerutalem menggaarak abok aret inom, an neenggi omaawi paga yigirogo piyaagin o.
It kugi Mbaan ayuk wuko menggaarak ando pugu nogo nen
Inawi kirin ndoonak paga lagi nanuk, laaluguragan inom, tut inom, oonegen inom, ayuk wukwi,
Aliku ALA mugurok nogo logowok o, yinuk, Naliku ALA nendage kumbunuk nalut eeko logonet kwe,
Inagugi Milokon endage kumbunuk ayuk wukwi,
Eeko logonet kwe,
Naliku ALA kunduk, nendage kumbunuk nalut eekwi,
Naliku ALA an mu'neren nogo nogogwaarak kwe, mbo paninuk nomo agan nogwe,
Ala ngge o? yinuk, kwaa'naka'lek mbo panugwi,
Ala ari ngge o? yinuk, kin wo'naka'lek wonogwe,
Eeko menggaarak kugi Mbaan unde ineebe abok aret
Inenggaawak lek eerogo piige neenok, inendage lek aret arugun o.
7Naliku ALA nen eeppiyoorak eyom muk koorok panggo yegerak me,
It aakumi abok aret Naliku Nitok Minggirak an ALA nenggaanom paga inoone lek puk logowak o.
Ndomba warogo pogo mengga kwak, Naliku ALA nen it an napuri togop eerogo piyaawak nduk, pipuk eerogo piyareegirak me,
Eeppiya woraawak nduk, inayonggo piinok, leenogo piyareegirak o.
8Naliku ALA napuri ineebe lek eerogo piyoorak inayonggo piyareegirak ti eyom paga
It aap inoweewi inendage warak inom, it aap inendagembogut inapuri inom, it aakumi inambik eeko menggaarak mugurok nogwe nogo inom,
An nen it maluk eekwi onggo inoba kwippiige,
9Ne ti eyom paga it aap an neebe ineenggo'lek nen inagugi eeko mengga kwak it eerit nugwi,
Aakumi inoorit nugwi, wi-wi aganakwi,
Eeko logonet,
Inamendek kugun wonok inowe endagembogut awi nggwok abe wurik me yagabit eerogo pi unggwogo menggaarak nogo, aaninggin inoba kwippiyaagin o,”
yinuk, yegerak o.
10Aliku ALA nen ari logonet,
“Ne ti eyom paga tu unggwogo menggam endage Yikwe Mbanak Me nen le yogwe,
It aakumi o yaga'lelo endage Ngget Wurik Me wonogwe nogo nen leenggu maakwi,
It puut-puut teberogon wonage nogo abu iya lombok yigirogo wurabit wage oone ari nogo, inaruk konenggwi,
Eerugun o.
11Togop me, it aakumi o teberogon kobappaga wuppunuk wonogo menggaarak ti,
Aap yi mendek ndi mendek kungga inom wonogwe abok aret inenggaawak lek ogwe,
It mbuti perak wakkagak kungga nogo ineebe lek ogwe,
Eerugun me,
Le yogo logowak o.
12Ne ti eyom paga an nen ndi wuninik wonok o Yerutalem maleninabit nage logonet,
Anggur amburu abe tookwi iigak, ogogwe o'luwam linogo pege menggi kwak, it aap togop aago wonogo logonet,
Aliku ALA nen obeelom eeppinanege, maluk eerogo pinanege,
Eerigin lek, mba'nuk,
Iniki ugun kobak aago wonogwe nogo, kwaappiinok, aaninggin inoba kwippiyaagin o
13Inamindik-inamendek ambik wonage nogo abok aret kabologo waganggwi,
Inawi wurik nogo yinik-minik eerogo pugwi,
Eerugun o.
Inawi logorak wukkolamenggaarak kwe, time wonaga'lek wum aret age,
Anggur awi ineyabume yaremenggaarak kwe, anggen amburu mbiranogo nengga'lek mbo pugwi,
Eerugun o,”
yinuk, yegerak me, yokkiragi o.
14Aliku ALA nen iya lombok eeri woroorak ne nogo, abu panggo yi wagaarak me,
Puk arigin lek mbet-mbet aret eeri woraagin o.
Togop me, wone yi liirogon konenggo logonip o.
Aliku ALA eeri woroorak ne ti, aakumi iniki wakkoloorak eyom aret me,
It aap wim wakaa'ngget nogo kunduk, le yogo logogun o.
15Ne ti ari woroorak nogo ti, Aliku ALA anini eeppiyoorak eyom aret me,
Ne ti paga it aakumi iniki wakkologwe, Nonggop eeruwi o? yinuk, iniki aaninggin ndugu aago nugwi,
Ne ti paga aakumi maluk lombok eerogo piigwi, yi mendek ndi mendek pup eerogo pugwi,
Ne ti paga o apit age, o yumaak lombok eerogo pege,
Ne ti paga o ndugwi narogo pege, o ogum lombok eerogo pege,
16Ne ti paga oone nggwok eeka trompet nogo oone pu eekwi,
O kota-kota yugum pak wurik kagak wim namburi ungguwok nduk, keekok piyanggogwe,
O tum wako logorak yerek-nggorek pak wurik unggut-unggut wurik kagak aan lebeni unggwuwok nduk, inanggut-nggut wakkogwe,
Eekwi iyaagun o.
17Aliku ALA nen ari logonet,
“It aakumi nen Naliku an ALA maluk eerogo paneegwaarak me,
An nen it aakumi ti anggon-panggon lombok eerogo piige neenok, aakumi inigen mbuk yu'nduk agan nogo mengga kwak nugu logogun o.
Liirubu kale'ngga eerogo mbo pogo mengga kwak, aakumi inamiya togop aret eerogo pugwi,
Inaan wurik ogole o, yinuk, mbo pogo mengga kwak, inaanagale togop aret kilirogo mbo pugwi,
Eerugun o.
18Naliku ALA woroorak ne nogo ti, aakumi apit ineenggo'lek kobak wonogwe iigak woraagin me,
Wage logominggirik, it o nggween paga wonogwe nogo abok aret lek eerogo piyaakit nduk, eeke logonet,
It an mu'neren woroorak kwe, alik mugurok nogwe yi neebi a, yinuk, nanini kani kunik negen inoba kwippiige neenok, ineebe lek arugun me,
Inamendek mbuti perak paga, mbuti emas paga, inagap ndakkolaagun mondok lek aret o,”
yinuk, yegerak me, yokkiragi o.
Currently Selected:
Tepaniya 1: LAIDNW
Highlight
Share
Copy
Want to have your highlights saved across all your devices? Sign up or sign in
