Matiyut 25

Komologwe ineebe 10 eereegwaarak wone

1 # Luk. 12:35 Wone ambinom yorage logonet, “An wage logominggirik, at mbogut paga mendek abu'me piyoorak ti, komologwe ineebe 10 inelampu wuninik ko'nok aap kwe kolage nogo wage me, ka wundi nogogwaarak pogom aret o. 2It komologwe ka wundi nogogwaarak nogo ti, ineebe 5 iniki lek, ndi, ineebe 5 iniki warak me, 3it komologwe iniki lek nogo nen inelampu yigani o'lu iluk toolak wonok nogogwaarak kwe, lek age kenok tooliyak ambi wonok noolik o. 4Ndi, it iniki warak nogo nen perak, inelampu paga yigani tookkologwe, ndi, lek age kenok tooliyak ambi inom kologwe, ee'nuk wundi nogogwaarak. 5Wundi nogo nogogwaarik, kwe kolage nogo waga'lek elaambirik mbareegi, it komologwe nogo, nogolumok aganake mbareegi, nogo yereegwaarak.

6Ndi, nogo iniki mbere eeke paga aap ambi nen oone nggwok paga ari logonet, Aap kwe kolage nogo wage yi aret me, wa'nip o.

7Ari mbareegi, it komologwe nogo abok aret mi'nogo nogogwaarik, inelampu keele nogo ogobakkigiko logonet, 8it iniki lek mendek nogo nen it iniki warak mendek yorogo logonet, Ninayigani abu lek age nagaarik, noguk ari me, kit kinayigani ambi wo'niraanip o.

9Yorogo mbareegwa, it komologwe iniki warak mendek nogo nen, Lek o. Ando mogonogo kit wokkirogwe, nit kologwe, eerugun kenok ti, lek arigin me, kit nen it onggo kunggo menggaarak nogo, inoona kunggola nanip o.

10Yorogo mbareegwa, kunggola nogwe iigak, at kwe kolage nogo wage nagagerik, it pipuk eereegwaarak nogo inom laago larak noorak nduk, oome unggunuk, tu nareegerak.

11 # Luk. 13:25 Tu nappunuk wonogwe me, it komologwe ando nogo wogo nogogwaarik, Ai, ninogoba. Tu paa'niyet o, 12yogo mbareegwa, at kwe kolage nogo nen it yorage logonet, Kit an neenggo'lek me, mbaganinip o, yinuk, abet aret yokkiragi, yoragagerak o,” yinuk, at Yetut nen at oone waganggwi nogo yoragagerak.

13Yorage nagagerik, at Yetut nen, “O ndi eyom paga woroorak inom, oonegen mande paga woroorak inom, nogo kit kineenggo'lek me, kiniki tum wako logonip o,” yinuk, yoragagerak.

Aap ambi ayeloman ineebe 3 nen eereegwaarak wone

(Luk. 19:11-27)

14Yetut nen wone ambinom yorage logonet, “An woraagin nogo ti, aap ambi o ambi me noorak nduk eeke logonet, at ayeloman wiirage mbareegi, wogogwaarak me, amindik-amendek unde logowak nduk, wogoragagerak nogo pogom aret o. 15It eeko logorak ineraambe yelok maloppiige nagagerik, aap ambi wu 5 juta wogoge, aap ambi wu 2 juta wogoge, ndi, aap ambi wu 1 juta wogoge, eeppege nagagerik, o ambi me nagagerak. 16Nage kagak, at wu 5 juta kolagagerak nogo nen yi mendek ndi mendek kunit nage logonet, wu 5 juta ambinom nabenggolage, 17ndi, at wu 2 juta kolagagerak nogo nen togop aret wu 2 juta ambinom nabenggolage, 18ndi, at wu 1 juta kolagagerak nogo nen perak, ame nage nagagerik, nggween kabunogo ogoba awu nogo kumaappege, eereegwaarak.

19Eeppunuk, nogo apit yippunuk wonogwe me, inogoba nogo iyok paga wage nagagerik, Nawu nogo paga it mande nabenggolagaarak kaamun? yinuk, wiirage mbareegi, 20at wu 5 juta kolagagerak nogo aa'nduk owagam wage nagagerik, Nogoba wa. Kat nen wu 5 juta aret wo'nereegindak kwe, wu 5 juta ambinom nabenggolagarak o.

21Yoge mbareegi, ogoba nogo nen, Naput wa. Kat nayeloman liirogon obeelom eeke menggendak yi, mondok op aret eekendak o. Kamendek mbuuluk paga liippunuk unde wonagandak me, nggwok apit unde logonok nduk, mippagaminggirak logonet, an kogoba nale'nggen kage minggirak nimbirak ndak-ndak kage logonok nduk, mok o.

22Yoge mbareegi, at wu 2 juta kolagagerak nogo wage nagagerik, Nogoba wa. Kat nen wu 2 juta wo'nereegindak nogo kwe, 2 juta ambinom nabenggolagarak yi ket o.

23Yoge mbareegi, ogoba nogo nen, Naput wa. Kat nayeloman liirogon obeelom eeke menggendak yi, mondok op aret eekendak o. Kamendek mbuuluk paga liippunuk unde wonagandak me, nggwok apit unde logonok nduk, mippagaminggirak logonet, an kogoba nale'nggen kage minggirak nogo nimbirak ndak-ndak kage logonok nduk, mok o.

24Yoge mbareegi, at wu 1 juta kolagagerak nogo wage nagagerik, Nogoba wa. Kat kogogumbuk logonet, awi yarulik kwe, anggen mbangge, ndi, anggen yumbunulik kwe, kuwak eeke, eeke menggendak neenu me, 25nagabiti nen nage nagagirik, kawu 1 juta wo'nereegindak nogo nggween kabunogo kumaappereegirak wonagaarak me, wonok wagarak yi, kawu unde kolet o.

26Yoge mbareegi, ogoba nogo nen, Kat nayeloman eeriyak yokkege, Neebi, mbake logonet, maluk lombok eeke menggendak yi, an awi yarulik kwe, anggen mbangge, ndi, awi yumbunulik kwe, kuwak eeke, eeke minggirak keenu me, 27an wage neenok, nawu inom, porogo logomenggaarak onggo inom, wa woraakit nen, it aakumi inawu nggwok aruwak nduk, eeko menggaarak nogo wogoragagimbok wonagagindak o.

28Yoge nagagerik, awuri yorage logonet, Aap yi, togop eekerak me, wu 1 juta nogo at eenggime nen ndinogo, at 10 juta kolegerak nogo wogo'nip o. 29#Mat. 13:12; Mrk. 4:25; Luk. 8:18 Kit kinamendek wonage kenok, ambinom lunogo wokkiramenggerak me, kilu-kilu wundigin o. Ndi, kinamendek lek kenok, mbuuluk porogo wonogwe nogo aret ndinogo kolage kaamunggup o. 30#Mat. 8:12; 22:13; Luk. 13:28 An nayeloman obeelom eeriyak kobak wonage yi, endekem o apit me leenggu maakwi, ineyak nggilik maakwi, eeko menggam time wumbinip, yoragagerak o,” yinuk, Yetut nen at oone waganggwi nogo yoragagerak.

O age yobok aakumi inowak looninaburak wone

31 # Mat. 16:27; 19:28 Yetut wone ambinom yorage logonet, “An aap aret nda'nagagirak nobanggi-nobangge li'luk eekko'nok, it malayikat abok aret ninom wage logominggirik, an wone lengganinake minggim tiyanak nogome neegak, 32#Yeti. 34:17, 20; Mal. 3:18 it malayikat nogo nen aakumi inanebunu lombok an nowagam kuwak eeppiigo mbaremengga, aap ndomba ndegeninaka nen kambin-ndomba leenogo piige menggi kwak, an togop aret leenogo piyaagin o. 33Leenogo piige logonet, it ndomba mendek kenok ti, neenggi abe'nggan piige, ndi, kambin mendek kenok ti, neenggi kwaare'nggan piige, eerigin o.

34-36 # Ayup 31:32; Yet. 58:7; Yeti. 18:7; Yak. 2:15-16 Eeke logominggirik, an nendagembogut aret me, it aakumi neenggi abe'nggan piyaminggirak nogo yorage logonet, An nogoba ale'nggen kinoba pinagi o. An mbi abu me, kit nen mbi wo'nugwi, yi abu me, yi too'niri nogwe, aap nggiru me, wo'nakwi, nayum yirik lek me, yum yippanugwi, andi warak me, pe'neya wogwe, an keele maarak me, kit neya wogwe, eeko nogogutak me, an nogoba nen o mbogut nggween awo wakkaga'lek kagak, kit aap nggwok kinendagembogut logobagip nduk, punogo pinagareegerak nogo ndak-ndak, kit mondok tiyanak logobagip nduk, wa'nip o.

37-39Yorage mbariminggi, it iniki abe koonak menggaarak nogo nen an yo'nogo logonet, Ai, ninogoba. Kat mbi abu eekkake me, mbi wokkugwi, yi abu eekkake me, tookkiri nogwe, aap nggiru me, wokkakwi, kayum yirik lek me, yippagagwi, ndi, kat andi warak keele maarak wonage me, pekkeya nogwe, eeko nogotak yo'niragandak nogo, mandenom eekkabeegurak me, yagan o.

40Yo'nogo mbaremengga, an nendagembogut nogo nen it nogo yorage logonet, Lek o. Kit nen an nawuri maluk-malak eeginabeegutak nogo ti, an aret ee'nabeegutak o, yinuk, abet aret yokkiragi, yoraagin o.

41-43Yorage logominggirik, ti'nuk, it neenggi kwaare'nggan piyaminggirak nogo yorage logonet, Kit Ala nen pulunogo pinagareegerak yi, an mbi abu ee'nake me, mbi wo'nugwi, yi abu ee'nake me, yi too'niri nogwe, aap nggiru me, wo'nakwi, nayum yirik lek me, nayum yippanugwi, andi warak keele maarak me, pe'neya nogwe, ee'nako logolik me, yime nen wundi nogo logomonggotik, at Ibilit inom, at awuri apit inom, kani omoonuk wunuk mban ari menggim an nogoba nen ogobakkigirogo piyareegim nogome aret nanip o, yinuk, yoraagin o.

44Yorage mbariminggi, it nen an yo'nogo logonet, Ai, ninogoba. Mbi abu eekkake, yi abu eekkake, aap nggiru nage, kayum yirik lek nege, andi warak keele maarak wonage, eeke keegak, mandenom ninigen keego nogogurik, yeenggwaagirulik teppagareegurak me yagan o?

45Yo'nogo mbaremengga, an nen it yorage logonet, Lek o. Kit nen it aap maluk-malak mendek yi, togop eeginaka'lek wonogogutak nogo ti, an aret ee'naka'lek wonogogutak o, yinuk, 46#Ndan. 12:2 yorage logominggirik, it aap nogo, inomaluk onggo mondok-mondok yagan wako logowak nduk, nappiyaagin kwe, it iniki abe koonak menggaarak nogo perak, ineenik mondok-mondok logowak nduk, eeginabigin o, yinuk, yoraagin,” yoragagerak.

Currently Selected:

Matiyut 25: LAIDNW

Highlight

Copy