Matiyut 19

Aap inakuwi mbo piigwi wone

(Mrk. 10:1-12)

1At Yetut nen wone nogo abok yorage nagagerik, o Nggalileya teppunuk, tu yi Yoraran enebagan nen o Yureya unggwi wagagerak. 2Unggwi wage mbareegi, aakumi ambik mugurok nogo mbareegwa, andi kenok, obeelom eeginabeegerak.

3Obeelom eeginake me, it aap Pariti mendek ando nogo nogogwaarik, Yetut abut mbanuwok nduk, at yogo logonet, “Alom ndogop eekwi iinok, aap nen inakuwi mbo piyoorak op o, yinuk, wone yugu Muta liiru mbaneegerak ambi wonage a, lek a?”

4-5 # Wak. 1:27; 5:2 #Wak. 2:24 Yogo mbareegwa, Yetut nen, “At o aa'nduk togon yi mendek ndi mendek wakkage logonet, aap wakkage, kwe wakkage, eerogo piige nagagerik, ari logonet, Togop me, aap nen agalo-ogoba teppiinok, akweeluk imbirak lambunna'nuk, it ineebe mbere kwe, ambit aret arugun o, yinuk, yereegerak liiru mbanak nogo, kit pekkaga'lek monggotak ya? 6Ti yoragagerak paga ineebe mbere lek ambit aret logowak nduk, Ala nen aret lambumbiige me, at Ala nen lambunogo piige nogo ti, aakumi nen ponggonogo piyoorak mage o.”

7 # Pel. 24:1-4; Mat. 5:31 Yorage mbareegi, it nogo nen Yetut yogo logonet, “Ti kenok, at Muta nen, Aap akwe mbo puurak nduk liiru mbanogo wogoge logomenggerik, mbo puurak aret o, yoragagerak ti, nonggop nduk yoragagerak?”

8Yogo mbareegwa, at Yetut nen, “Lek o. Kiniki laakot kiinok, at Muta nen kinakuwi mbo piyoorak op aret, yereegerak ti, o maan aa'nduk togon togop eeka'lek wonogogwaarak kwe, yereegerak o. 9#Mat. 5:32; Luk. 16:18; 1Kor. 7:10-11 Ndi, kinakuwi aap nen wurinaka'lek iigak, mbo piinok, alik ambi wogonakwi kiinok ti, mbabi eekwi aret o.”

10Yorage mbareegi, it Yetut oone waganggwi nogo nen at yogo logonet, “Aap inakuwi warak nen togop eekwi kenok, kumi alik wogonaka'lek mondok tawe aret logorak kogo o.”

11Yogo mbareegwa, at Yetut nen, “Aakumi abok aret wone yi waagun lek o. Ata, Ala nen, Woorak, kooneegerak mban aret waagun o. 12Aap ando inagalo inikime nen inakuwi wogonaburak lek, iniitok ndarak wonogwe o. Ndi, ando aakumi nen eeginabeegwaarak paga inakuwi wogonaka'lek aret menggaarak o. Ndi, it ando yogo logonet, Nit nen aakumi at mbogut paga mendek abu'me piigo logorak me, ninakuwi wogonaburak lek o, yinuk, miikkologwe paga inakuwi wogonaka'lek aret wonogwe me, wone yi woorak kenok, wanip o,” yinuk, yoragagerak.

Elege-aabologwe ale'nggen inoba piyareegerak wone

(Mrk. 10:13-16; Luk. 18:15-17)

13Ti'nuk, it aakumi nen at Yetut elege-aabologwe eenggi inanobak tebembiinok, tamban eeginabuwak nduk, wogoret at owagam wogo mbareegwa, at oone waganggwi nen aakumi nogo mberirogogwaarak.

14Mberirogo mbareegwa, at Yetut nen it yorage logonet, “At mbogut paga mendek abu'me logorak ti, it elege-aabologwe yogop yi kokwak aret me, an nowagam woraawam non mbambiigwi ti, mage o. Op aret yoraanip o.” 15Yorage nagagerik, eenggi inanobak paga tebembiinok, o alik me nagagerak.

Aap eenggi warak ambi eereegerak wone

(Mrk. 10:17-31; Luk. 18:18-30)

16At Yetut tu paga nage me, aap ambi imbirak lambungge nagagerik, Yetut yoge logonet, “Ngguru wae. Neenik mondok mendek kolaakit nduk obeelom mendek ngge eeri?”

17Yoge mbareegi, Yetut nen, “At ambiret mban obeelom menggerak nogo kagak, nonggop nduk, Obeelom mendek ngge eeri, yinuk, an kin wo'neege agandik? Keenik mondok mendek kolaakit, mbake keenok, Yogop ee'nu, ndogop ee'nu, wone yugu nogo aret mondok ndak-ndak eeke logot o.”

18 # Wund. 20:13-16; Pel. 5:17 Yoge mbareegi, aap nogo nen, “Wone eebe ngge eeke logorak nduk yo'negen o?”

Yoge mbareegi, Yetut nen, “Aap wariyak mage o. Kumi ugun wuri-naburak mage o. Yi mendek ndi mendek yogoot kiraariyak mage o. Pilit wone aakumi inoba piyoorak mage o. 19#Wund. 20:12; Unde 19:18; Pel. 5:16 Kinagalo-kinogoba inayuk wuko logonet, inoone liirogon konenggo logonip o. Kit kineebe kiniki kunik eekkologo monggotak pogom, kinom monggotak togop aret kiniki kunik aganako logonip o.”

20Yoge mbareegi, aap tawe nogo nen, “Wone ti, abok aret liirogon eeke minggirak kwe, ambiriluk ambi ngge eeka'lek neenok, yagan o?”

21Yoge mbareegi, Yetut nen, “Wulaga. An aap abu obeelom lombok logokit, mbake keenok, kamendek abok aret onggo mbangge logomenggendik, it inamendek lek nogo tumburira nak o. Tumburira nage keenok, kamendek abe mendek mbogut paga aret kolaamunggun o. Ti abu eeke logomenggendik perak, nimbirak nugu logowok nduk wa'nu o.”

22Yoge nogo aruk konengge nagagerik, amendek ambik me, iniki puru agan ame nagagerak.

23Nage kagak, Yetut nen at oone waganggwi nogo yorage logonet, “Aap eenggi warak kenok, at mbogut paga mendek abu'me piige menggim unggwi noorak meek negen aret kagi o, yinuk, abet aret yokkiragi o. 24#Mrk. 10:25; Luk. 18:25 Ndi, ambi yi yokkira. Unta eeruwak paga keeleluwi laanak nggwok kagak, liiru eno mbuuluk pelenak me unggwi noorak op negen kwe, aap eenggi warak kenok perak, Ala abu'me piige menggim unggwi noorak ti, meek negen aret o.”

25Yorage nogo it at oone waganggwi inaruk konenggo nogogwaarik, inagabiti ambik ogo logonet, “Ti kenok, taani inagap ndariyak o?”

26Yogo mbareegwa, at Yetut nogo enegen pegiige logonet, “Ti eeriyak nogo, it aakumi nen eeriyak meek aret kwe, Ala nen perak, yi mendek ndi mendek abok aret eeriyak op mban aret o.”

27Yorage mbareegi, at Peterut nen, “Nit yi mendek ndi mendek abok aret mbo punuk, kat ninom nugwi me, nano mendek kolamun a?”

28 # Mat. 25:31; Luk. 22:30 Yoge mbareegi, Yetut nen, “Kit an ninom nugu monggoorak yi, peebi o mbogut-nggween ngget ogobakkigike eyom paga, an aap aret nda'nagagirak nogo, tiyanak lombok wone lengganinake minggim wonage neegak, kit kunduk wone lengganinako logowam 12 nogome logonet, aap Iterali inanebunu 12 nogo inowak looninako logomunggup o. 29An nendage nggwok aruwak nduk, kinagalo-kinogoba inom, kinowe-kinawot inom, kinaaganapuri inom, kinawi wurik inom, kineyabu aago inom, mbo pugwi kiinok, obaane'me kalo logonogo wokkirage logomenggerik, mondok-mondok kineenik logobagip nduk, eekkinabigin o. 30#Mat. 20:16; Luk. 13:30 Aap ambik inaa'nduk mendek nogo ti, peebi arugun, ndi, peebi mendek nogo ti, inaa'nduk arugun o, yinuk, abet aret yokkiragi o,” yoragagerak.

Currently Selected:

Matiyut 19: LAIDNW

Highlight

Copy