Matiyut 14

Yiime Wuppiiga Yaya wareegwaarak wone

(Mrk. 6:14-29; Luk. 9:7-9)

1Ne ti eyom paga aap o Nggalileya unde mippereegwaarak Keroret nen Yetut eerit nage nogo, aruk konengge nagagerik, 2at awuri inom eeka nogo yorage logonet, “Aap Yiime Wuppiiga Yaya nogo, kanggo menggam nen eenik a'nuk, mi'nage nagagerik, eerubok mendek eerit nage yi aret kagi o,” yoragagerak.

3-5 # Unde 18:16; 20:21; Mat. 11:9; Mrk. 6:17-18; Luk. 3:19-20 At Keroret nogo nen at awuluk Piliput akweeluk kagak, kwe Keroriyat nogo wagangge mbareegi, at Yaya nen Keroret yoge logonet, “Kwe ti, woorak lek yugu kagak waganggendak me, kimbirak logorak mondok mage o.” Yogak mban eeke mbareegi, Keroret nogo nen, “Yaya warikit,” mba'nuk, pigogo keele maarogo mambiigo menggam mambereegerak kwe, it aakumi nen, “Yaya ti, Ala nen yoge kagak yoraga mendek aret o,” yogwe aruk konengge nagagerik, agabiti agagerak.

6Agabiti age nagagerik, puk wonage me, at Keroret nda'nagagerak eyom ari wage mbareegi, kwe Keroriyat aagaluk inenggela'me time kwirabik-kwirabok ari logonet, Keroret iniki ale'nggen eeppege mbareegi, 7at Keroret nen ombo owak mbangge logonet, “Nano mendek ambi nggino yo'nege keenok, ti aret wokkirigin o.”

8Yoge mbareegi, agalo nen wone aagaluk inikime muk pereegerak me, kolaga nogo nen, “Aap Yiime Wuppiiga Yaya anobak tenggap paga ndoonogo wo'niri mok o.” 9Yoge mbareegi, aap endagembogut Keroret nogo abuwa nen iniki abu maluk agagerak kwe, it laago lakome wogogwaarak inenggaanom paga ombo owak mbaneegerak me, agabiti nen, “Yo'negerak nogo aret eeri nak o,” yinuk, aap ambi nen Yaya anobak mbanogo wogori woraawak nduk, nappereegerak. 10#Mat. 17:12 Nappereegerak keele maarogo mambiigo menggam unggwi nanuk, Yaya enggaanok mba nogo 11tenggap paga ndoonogo wonok wage nagagerik, kolaga nogo wogoge mbareegi, kolaga nen wonok agalo iri nagagerak. At Keroret nen Yaya eenik agagerak awuri inom eeka yoragagerak nogo ti, ti eereegwaarak kenok yoragagerak.

12 # Nap. 8:2 Ndi, at Keroret nogo nen Yaya wake mbareegi, it Yaya oone waganggwi nogo nen wogo nogogwaarik, eebe warak nogo waganogo nggween taambunuk, Yetut yori nogogwaarak.

Aap ineebe 5.000 mbi karerogo wogoragagerak wone

(Mrk. 6:30-44; Luk. 9:10-17; Ya. 6:1-14)

13At Keroret nen Yaya wareegerak, Yetut aruk konengge nagagerik, “O yime mbo punuk, aakumi lek me, ambime na o,” yinuk, yiiro paga unggwi nage nagagerik, awo nage kagak, it aakumi nen, “Yetut nogo yiiro paga nage o,” yogwe inaruk konenggo nogogwaarik, iname lombok nen tu nggween paga Yetut noorak mbareegim nogome inaa'nduk nogogwaarak wonogwe me, 14#Mat. 9:36 at Yetut yiiro paga nen wundi nage logonet, aakumi ambik kuwak aago enegen iige nagagerik, inabuwa lombok mbake logonet, it kugi andi warak inenggela'me nogogwaarak nogo obeelom eeginabeegerak.

15Obeelom eeginake kagak, o kiip age mbareegi, at Yetut oone waganggwi nogo at owagam wogo nogogwaarik, yogo logonet, “O wurik yime abu lek o. Ndi, oonegen kunduk, muk kilu yuurak eeke me, aakumi ambik kuwak aago yi, aakumi iname time inambi onggo mbanogo na nawak nduk, nappiyet o.”

16Yogo mbareegwa, at Yetut nen, “It nappiyoorak lek o. Inambi nawak nduk, kit nen aret wogoraanip o.”

17Yorage mbareegi, it nen, “Nit yime we roti 5, ndi, ikan mbere mban porogo wonogwe o.”

18Yogo mbareegwa, Yetut nen, “Ti aret wo'niri wa'nip o.” 19Yinuk, aakumi ambik nogo, “Iri'ngga paga kwi'na'nip o,” yorage nagagerik, kwi'nogo mbareegwa, at Yetut nen roti 5 inom, ndi, ikan mbere inom, woppunuk, ena mbogut paga ni'nage nagagerik, “Nogoba Ala wa,” yinuk, roti nogo karerogo at oone waganggwi nogo wogorage mbareegi, it nen aakumi kuwak aago nogo tumburirogogwaarak. 20Tumburirogo mbareegwa, it aakumi nogo abok aret nonggo nogogwaarik, ndonggoppiyareegerak. Ndonggoppiige mbareegi, roti inom, ikan inom, ando ndiinogo pereegwaarak nogo ti, mbirim yum 12 eno korok togon aret yonggologo pereegwaarak. 21It roti nunggugwaarak nogo ti, kumi inom, elege mbuulogwe inom, ineebe ti, linggininabulik kwe, aap mban ineebe ti, lima ribu aret wogorogogwaarak.

Yi ogombaga nagagerak wone

(Mrk. 6:45-52; Ya. 6:15-21)

22Roti nonggo mbareegwa, Yetut nen at oone waganggwi nogo yiiro paga unggwi nanuk, inaa'nduk yi enebagan nen wunda nawak nduk yorage, ndi, it aakumi kuwak aago nogo iname nappiige, eereegerak. 23Eeke nagagerik, nogwe iigak, at alik tamban eerikit nduk, puurom paga laganeegerak wonage kagak, o kiip agagerak. 24O kiip age mbareegi, puurom time alik aret wonage kagak, at oone waganggwi nogo, yi yenggenak oolo muundak ari wogwe me, o wiya inaamenggwe nen mban warit nage logonet, yi kilaarak-mogonik eerogo yiiro nogo punggagak eeke logonet, yiiro tebeninaburak eeke me, 25at Yetut nogo o kilim nagake kagak yi yenggenak ogombaga inowagam wage 26inigen kogo nogogwaarik, inaganak wake logonet, inagabiti nen, “Ie! Kugi aret ubi!” yinuk, kwa yereegwaarak.

27Kwa yogo mbareegwa, at Yetut nen, “Kinogut li o.” Yorage nagagerik, “An neebe aret me, kinagabiti yugup o.”

28Yorage mbareegi, at Peterut nogo nen, “Ai, nogoba. Kat aret kenok, an yi ogombaga kowagam woraakit nduk, yo'niru o.”

29Yoge mbareegi, “Mok o,” yoreegerak.

“Mok o,” yoge mbareegi, at Peterut nogo yiiro paga nen wungge nagagerik, yi ogombaga iyok pit Yetut owagam nagagerak. 30Nage logonet, o wiya wake nogo enegen kage nagagerik, agabiti a'nuk, yi inikime yobok togon wambuurak eeke mbareegi, oone kwa ari logonet, “Ie, nogoba. Pi'nabi mok ubi!”

31Yoge mbareegi, Yetut eenggi nggerok togon pigagangge logonet, “Kat kiniki liirogon abet nombaka'lek yi, nonggop nduk kiniki mbere wonage agandik?”

32Yoge nagagerik, imbirak yiiro paga unggwogo mbareegwa, o wiya nogo abolok lek aret agagerak. 33#Nda. 2:7 Lek aret age mbareegi, it yiiro paga wonogogwaarak nogo nen Yetut ayuk wuko logonet, “Kat Ala aput abet aret keego o,” yinuk, yoreegwaarak.

O Nggenetaret paga kugi andi obeelom eeginabeegerak wone

(Mrk. 6:53-56)

34Yogo nogogwaarik, yi enebagan nen wunda woraanuk, o Nggenetaret ari wogogwaarak. 35Wogo mbareegwa, it aap time mendek nen Yetut yelok kogo nogogwaarik, o tini lombok yoranet nogo mbareegwa, aakumi andi warak abok aret wogoret, Yetut owagam piya wogogwaarak. 36Piya wogogwaarak nogo nen we ayum abo mban ineenggi pigaawok nduk, nggino yogo nagaatik, pigaganggwi iinok, it abok aret obeelom ogo nogogwaarak.

Currently Selected:

Matiyut 14: LAIDNW

Highlight

Copy