Maleyaki 1
1
MALEYAKI WONE
1At Aliku ALA nen Maleyaki yoge kagak it aakumi Iterali yoragagerak nogo yi aret.
Aliku ALA nen Iterali iniki kunik eeginabeegerak wone
2Aliku ALA nen ari logonet, “An nen it Iterali niniki kunik eeginake neegak kwe, it nen yogo logonet, Nonggoti agago iniki kunik ee'ninake me yo'nirage agaarik o? yinuk, kin wo'neegwi iigi,” yegerak o.
“At Etawu ti, Yakup oweeluk nogo lek a? Oweeluk aret kwe, an nen at Yakup niniki kunik eeke, 3ndi, Etawu perak, neebi lombok mbake, eereegirak me, at Etawu wonage menggim puut nggelok-nggobok time karume aakumi logorak lek eerogo pege logonet, yate anggween nogo karume nugu menggaarak mba'ngge nogo inawi logowak nduk, eerogo pereegirak o,” yinuk, Aliku ALA nen aret yegerak o.
4Togop me, it aakumi Erom mendek nen, “Nit ninawi lek eerogo pereegerak nogo, obaane'me wurugun aret o,” yinuk, yemenggaarak kwe, at Omaawi Lombok Menggerak Aliku ALA nen ari logonet, “It nen inawi obaane'me wuremenggaarak kwe, an nen minogo pigin o. Aakumi nen, O Erom yi, endage ti, Maluk Eeko Menggam me, Aliku ALA anini mondok-mondok inoba piige kagak menggam yi aret o, yinuk, yogo logogun o. 5Ti eeppiyoorak it Iterali mendek nen inigen kogo logonet, Aliku ALA ti, omaawi mondok iya lombok menggerak nogo, nit mban kogwe lek o. Ata, it ninaagan-ninambokan wonogwe abok aret kogwe iigo o, yinuk, yogo logogun o,” yegerak me, yokkiragi o.
Maluk kagak warogo wogogwi iinok, yoragagerak wone
6At Omaawi Lombok Menggerak Aliku ALA nen ari logonet, “Aap ambi aput nen ogoba ayuk wuke, ndi, aap ambi ayeloman nen ogoba ake eeke nogo ayuk wuke, eeko menggaarak me, an inogoba kenok, nayuk wuko logorak op aret kwe, wuka'lek nonggop nduk agaarik o. Ndi, it an nayeloman mini nake eeka aret kenok, an nayuk wuko logonet, inagabiti mbako logorak op aret kwe, mbaka'lek ti, nonggop nduk agaarik o,” yinuk, yegerak o.
“It aap an neebe unde nen aret an nendage maluk eerogo pogo agaarik o.
Nendage maluk eerogo pogo logonet kwe, Nit nonggop negen at endage maluk eerogo pogoorak me, yo'nirage agaarik? yinuk, yogwe, 7An nake warogo kani kunggo menggam eerak paga mbi abe wo'niriyak nogo kagak wo'niriyak lek nogo mendek lunogo punuk, kani kunggo logonet kwe, Nit nonggop negen eeko logonet, at ayuk lek eerogo pugwi niinok, yo'nirage agaarik? yogwe, eekwi iigirak me nduk yagi o.
8 #
Pel. 15:21
Aliku ALA ageyo ndoonak ti, iya lek o, yinuk, abe puurak kagak nomoppegak awinde-obande eerak mendek nake pi wogwe ti paga nayuk lek eerogo pogo agaarik o. It nen nake warogo wo'niriyak wonok wogo logonet, wam enegen mbuk kagak wonok niri wogwe nogo ti, maluk eekwi lek nduk yogo agaarik ya? Ndi, wam arowak langgonak inom, kugi warak inom, wonok niri wogwe nogo ti, maluk eekwi lek nduk yogo agaarik ya? It nen wam togop mendek kagak inogoba o unde menggerak nogo wogori noorak wakkaawak nda! Napuri wa, yinuk inikilom inombake, keyage warogo wogonake, eerigin mbakop? Lek aret mbaki o,” yinuk, at Omaawi Lombok Menggerak Aliku ALA nen aret yegerak o.
9“An inogoba Ala nen inabuwa mbarikit nduk, yogondak yo'niruwak nda! Wo'niri wogwe ti mendek niri wogwe iinok, Op aret niri wogop o, yinuk, keyage warogo wogonaburak mbakwi ya? Lek aret o,” yinuk, at Omaawi Lombok Menggerak Aliku ALA nen aret yegerak me, kit at eebe unde aret yokkiragi o.
10“An nake warogo kani kunggo menggam it we aanom warogo kani kunggwi iyo, it inenggela'me time aap ambi nen nawi wurik me tu narogo puwak lak, ao, mbake agarik o. It eekwi ti, an abu neebi lombok mbake me, an nake warogo wo'nugwi ti, an waagin lek aret o,” yinuk, at Omaawi Lombok Menggerak Aliku ALA nen aret yegerak me yokkiragi o. 11“Oonegen lagi wage menggim nen nok, kilu yi nage menggim kuli, yi aakumi ndi aakumi inenggela'me abok aret an nendage mondok tiyanak logogin o. Aakumi inanebunu lombok inenggela'me nendage abu tiyanak logogin me, an nendage kumbunuk, yi o ndi o abok aret nake obari abe mendek kani kunggwi, an nake abe pugwi iinok, nale'nggen nen wagangge nogo mendek wo'nugwi, eeko logogun o,” yinuk, at Omaawi Lombok Menggerak Aliku ALA nen aret yegerak o.
12“It togop aret eerugun kwe, it aap an neebe unde nen yogo logonet, Ninogoba Ala ageyo ndoonak paga yi mendek ndi mendek pi wogwe nogo ti, Ayuk lek o, yogwe, ndi, Yi mendek ndi mendek pugu nogo ti, Abe lek o, yinuk, yogwe, eekwi ti paga an nageyo ndoonak ti, enete maluk eerogo pugwi, 13ndi, it nen wone ambi yogo logonet, Yi eekwi yi ti, aaninggin ambik aret o, yinuk, laakot mbako logonet, yogwe, eeko agaarik o,” yinuk, at Omaawi Lombok Menggerak Aliku ALA nen aret yegerak o.
“It wam kugun wogo inom, inarowak langgonak inom, kugi warak inom, wonok an nake kani kunggwi iinok, an nen, Wa! yinuk, keyage warogo woorak op mbakwi ya? Mondok lek aret o,” yinuk, at Aliku ALA nen aret yegerak o. 14“An aakumi inowe nendagembogut mondok iya lombok wonage, ndi, yi aakumi ndi aakumi inenggela'me nendage tiyanak nayuk warak wonage, eeke minggirak me, it aap ambi nen aanggumi inenggela'me ngguunok abe an woorak mendek ambi wonage me, Ala ake pigi o, yinuk, kumbuk mbanogo pemenggaarak kwe, mbo punuk, obaane'me alik aga'lu mendek ogoba an Ala wo'niri wage ti, nambokan laganogo wo'nege me, at mondok pulunik aret logowak o,” yinuk, at Omaawi Lombok Menggerak Aliku ALA nen aret yegerak me, yokkiragi o.
Currently Selected:
Maleyaki 1: LAIDNW
Highlight
Share
Copy
Want to have your highlights saved across all your devices? Sign up or sign in
