Wakkagagerak 34
34
Aap Tikem nen kolaga Ndina maluk eeppereegerak wone
1Ne ambi paga Yakup apuluk kwe Leya aagaluk kolaga Ndina nogo it kumi o Kanan mendek wonogwe me iniya nage nagagerik, inom wonage me, 2aap endagembogut Kewi mendek endage Kemot aput Tikem nogo nen kolaga Ndina nogo enegen kage nagagerik, wonok nanuk maluk eeppereegerak. 3Maluk eeppege nagagerik, “Yakup apuluk Ndina yi lombok kolaakit, ao,” mba'nuk, iniki perengge nagagerik, kolaga ti, iniki yanggonogo punuk, 4at Tikem nen ogoba Kemot nogo yoge logonet, “Koba wae. An nakwe ti aret koloorak mbakirak me, at aret wo'niriyak o,” yoreegerak.
5At Tikem nen kolaga Ndina maluk eeppereegerak ogoba Yakup aruk koneneegerak kwe, apuri tigitogon o karume aanggumi kambin-ndomba ndegeniren nugwi nogo waga'lek iinok, at Yakup nogo oone ambi yaga'lek iniki yungguppunuk wonagagerak.
6Waga'lek iinok, wonage kagak, at Tikem ogoba Kemot nogo, “Ninapuri inawone nonggop mbanuwok o,” yinuk, Yakup owagam ka wage nagagerik, 7imbirak wone awo mbanggwi me, at Yakup apurilogwe nogo abok aret o karume nogome nen wogo mbareegwa, “Lek o. Kinawuluk kolaga Ndina nogo aap Kemot aput Tikem nogo nen maluk eeppegerak o,” yogwe inaruk konenggo nogogwaarik, “Togop eekulik kagak ninawuluk maluk eeppegerak me, nit aap Iterali mendek abok aret ninendage maluk agago pinanigi o,” yinuk, iniki aagi age logonet, inanini ambik agagerak.
8Inanini mbakwi iigak, at Kemot nen it yorage logonet, “An naput Tikem nen kinawuluk kolaga nogo koloorak uugwe lombok mbakerak me, Koloorak op aret, yo'ninip o. 9#Pel. 7:3 Kit nen nit ninapurilogwe wogonakwi, ndi, nit nen kit kinapurilogwe wogonakwi, eeko logowok o. 10Kit ninom ninenggela'me o yime logorak op aret me, kit nen mban o ambi miikkologo logomonggotik, ye mbambunuk, logonip o. O yime ninom logonet, kiniki ugun nugwi, nggween ambi wonage kenok, ugun unde eekkolage, eeko logorak op aret o.”
11Yorage mbareegi, at Tikem nen Ndina owewologwe inom, ogoba inom, yorage logonet, “Kit nen nabuwa nomba'nuk, kolaga yi wo'nogo logonet, Ndi mendek wo'niret o, yo'nugwi kiinok aret wokkiraagin me, 12kinawuluk awu inom, agalo-ogoba iniki tebenogo mande negen wo'niroorak mbakwi nogo inom, abok aret noba panugwi kiinok, ndak-ndak aret wokkiraakit nduk, kinawuluk ti mban wo'ninip o.”
13Wone nogo yorage mbareegi, at Ndina owewologwe nogo nen, it inawuluk Ndina nogo maluk eeppereegwaarak inanini nen pilit wone at Tikem ogoba imbirak inambokan laganogo yorogo logonet, 14“Nit ninawurilogwe nen aap inagabolo mbana'lek mendek wogonaburak op yogwe niinok, ninendage maluk arukwak me, Ninawuluk kolet o, yokkiriyak meek kwe, 15ambi eekwi kiinok, E, yuurak nogo ti, nit ninagabolo mbanak ndak-ndak kit aap tigitogon kinagabolo mbanggwi kiinok perak, nit nen, E, yuurak op aret o. 16Kit togop eekwi kiinok, ninapurilogwe kit nen wogonakwi, ndi, kit kinapurilogwe nit nen wogonakwi, eeko logonet, ninom ninanebunu ambit aret logogun kwe, 17kinagabolo mbaniyak yokkirogoorak yi, kineebi mbakwi kiinok perak, ninawuluk Ndina wa nogo logomonggoorik, wonok woraagun o,” yorogogwaarak.
18Yorogogwaarak nogo it Kemot aput Tikem imbirak nen, “Op aret,” mba'nuk, 19at Tikem nogo nen, “Noreewi-nawuri abok aret an ari neenok mban konenggo menggaarak me, an eeke neenok, it eerugun aret,” mbake nagagerik, Yakup apuluk kolaga Ndina nogo koloorak lombok iniki nenggegerak me, yoreegwaarak nogo iniki yungguppegak eerulik, “Eeri naakit aret,” mbareegerak.
20Mbake nagagerik, at Kemot aput Tikem imbirak iname nogo nogogwaarik, tu unggwogwe me wone mbanggo menggam taa'nogo nen it aakumi o time mendek yorogo logonet, 21“It aap Iterali mendek ti, ninom obeelom aret wonogwe me, o yime tenak ambik wonage kenok, ninom logonet, iniki mba'nuk ugun nugwi, nggween ambi kumbunuk inawi wukkologwe, eeko logowak nduk, teppiyaawok o. Ninom togop aret logonet, nit nen it inapurilogwe wogonakwi, ndi, it nen nit ninapurilogwe wogonakwi, eeko logonet, 22ninom ninanebunu ambit aret logowok nduk, ambi eeriyak, E, yuurak nogo ti, it inagabolo mbanak ndak-ndak nit aap tigitogon aret ninagabolo mbanuwok o. 23Ti eeppunuk, ninom logonet, it inaanggumi kambin-ndomba inom, it inamindik-inamendek inom, inaanggumi alik mendek inom, nit unde arugun nogo lek mbakop? Unde arugun aret me, yagaarak nogo ti, Op aret o, yinuk, eekwi niinok, ninom aret logogun o,” yorogogwaarak.
24It tu unggwogwe me wone mbanggo menggam kuwak ari wogogwaarak nogo abok aret at Kemot aput Tikem imbirak wone yorogogwaarak nogo konenggo nogogwaarik, “Eeruwok aret o,” yinuk, it aap o time mendek abok aret inagabolo mbanit nogogwaarak.
25Inagabolo mbaninako mbareegwa, nogo mbere yippunuk, ko'lu andi nen iname lombok wonogwe me, at Yakup apuri mbere kolaga Ndina owewologwe Timeyon Lewi imbirak nen inobaloowi waganggo nogogwaarik, abera'lek me o yaga'lelo time unggwi nanuk, aap nogo tigitogon inoorogo piyareegwaarak. 26Inoorogo piinet nogo logonet, at Kemot aput Tikem imbirak inom aret inooko nogogwaarik, inawuluk kolaga Ndina nogo Tikem ame wonage me wonok wogogwaarak. 27Nogo abu aret inoorit nogo mbareegwa, at Yakup apuri ando nogo, “Ninawuluk o yime nen maluk eerogo pegaarak me,” yinuk, inanini teenogo it aap inoorit nogogwaarak nogo 28inaanggumi kambin-ndomba inom, lembu-tapi inom, keledai inom, inamindik-inamendek anggenogona wonage a, yagat endekem wonage a, abok aret kologwe, 29inayi mendek ndi mendek iname wonage nogo inom, elege-aabologwe inom, kumi inom, abok aret kugun wogonako nogogwaarik, iname piya wogogwaarak.
30Piya wogo mbareegwa, at Yakup nen Timeyon Lewi imbirak yorage logonet, “Kit eekotak paga, niniki mondok warogo panogop o. It aakumi yime menggaarak o Kanan mendek inom, Perit mendek inom, abok inenggaanom paga iri'ngga pili agaatak obari ndi wuke menggi kwak nendage maluk eerogo panogotak me, nabok mbambogo logomenggaarik, lambumbunuk, ninoori unggwi wogo logonet, nit nineebe we mbuuluk aret me, abok aret pup eerogo pinanugun kagi o.”
31Yorage mbareegi, it nen wone onggo yogo logonet, “Nit ninawuluk ti, ya wukak pogom eerogo teppuurak op me nduk yagan ya?” yinuk, yoreegwaarak.
Currently Selected:
Wakkagagerak 34: LAIDNW
Highlight
Share
Copy
Want to have your highlights saved across all your devices? Sign up or sign in
