YouVersion Logo
Search Icon

Roma 2

2
At Allah nen akhuni wene inoba 'bigik, kokhik, mothogon hagakherek wene
1Iti halok he, hit nagarlak lak nerugi yi. Wene it aperek anek inoba 'bekhe dogolik, hit hinekaerek hinoba korasak erlok dek o. Itithogon wene it aperek inoba 'bekhe dogoligat, hit nen it hinom ipisak tak-tagat hagakhe lagap yoma re! Hinekaerek nen wene hinoba motok 'bakhekhe lagap o. 2Akhuni inobabut itithogon hagakharek meke, Allah nen wene inoba mothogonat 'bekherek, iluk ninilu o. 3Hit nagarlak lak nerugi. Hit nen, it aperek weak hagakhunem wene inoba 'bekhe dogolik, hit hinekaerek meneke, it hagariogei hagat, hinom ipisak tak-tagat hagakhe lagap yi re! Hit hinakla nen,
“Allah nen wene ninoba 'bigidek here'inanigin,” iluk apekhe lagap a? Dek o. Wene hinoba 'biginat o.
4“At Allah obabut hano motok, enago,” iluk, hinakla meanetdekhe lagap a? Hit hinakla nen,
“Allah obabut hano nen nit weak hagakhe lago meke here'isalok ninobabut hebelasuagaluk, ninakla kagalherek,” iluk hinokodek a? Hiniluat o. 5-6Inane holiluk hinobabut hebelu'buk yi re! O ilugun oba Allah akla aga dageiluk nen, akhuni inebe tomok inobabut hagakharek tak-tagat, thelekmaat wene inoba 'bigik, kokhik, hagasigin itinem, hit wene hinoba 'buagaluk hinekaerek nen wene hinoba 'bakhasi motok welagap yi re! 7At Allah nen, it akhuni aperek nen inebe hogorinakharek meke men, inalon halinakharek meke men, hirli agarek dek meke men, ite asuogoluk ina'it ageidek dogolik inobabut mot hagakharek meke, inebe iniluk motok dogoagaluk hagarinabigin. 8Itithogon mekeat, it akhuni aperek nen inekaerek hasik anek hagakhe dogolik, ebe wene isinem inasuk hologo hagakhidek here'isalok, weak wene anek inasuk hologo hagakharek meke iti, Allah akla aga hetpet dageilik wene kokhogon inoba 'bigin o. 9-11At Allah re, akhuni inoado baga anek ileken hisalok, aperek elokhoma 'bisigik, aperek oporlike 'bisigik, hagakherek dek iti nen, it akhuni aperek inobabut weak hagakho motok welageikharek meke inebe tomok nen, hinet warogo yi aik ti aik hoagaluk hagarinabigin. Mekeat, it akhuni aperek inobabut hano hagakho welageikharek meke, inebe tomok nen, inebe hogorinakharek meke men, inalon halinakharek meke men, inetaiken hapukhogon welageikharek meke men, wogeisagein o. Itithogon hagarinabigin iti, it alebageik meke hakene Yahudi meke men, yabokane meke hakene, akhuni itikmanke meke, inukuloak etaga tomok aperek men, inomat, ipisak tak-tagat anek hagarinabigin o.
12It akhuni itikmanke meke wene Allah nen ninasuk wakhikhe wene etnogo inokodek dogolik weak hagakharethekma nogo nen, wene iti inokodek dogoligat nuk asugun o. Mekeat he, it akhuni Yahudi meke wene iti inilu dogolik weak hagakharethekma nogo nen, wene iti baga initema waganogo wene inoba 'bigin o. 13Wene Allah nen ninasuk wakhikhe wene etnogo inilu iti baga, wene inoba meke korogo wokhekherek 'buk. Wene ebe ninasuk wakhikhe meke mothogon hagakharek meke halok, wene inoba meke korogo wokhekherek o. 14It akhuni itikmanke meke wene Allah nen ninasuk wakhikhe wene etnogo inokodek mekeat he, wene ebe isikhe meke mothogon hagakharek iti nen, inekaerek inakla wene ninasuk wakhikhe wene iti hakeneat werek o. 15-16Wene iti inetaiken oba holal waganek hakene werek iluk, it inobabut hagakharek meke baga ekagat werek. Itithogon werekma nogo nen, yabokane o ilugun hurli baga Allah nen Yesus Kristus ayoko 'bisinem, at nen akhuni inakla yi wene ti wene limago welagarek meke iti tha'bokhogonat 'bualogo wene inoba 'bigik, kokhik, hagakhunem, it inekaerek inakla wene munini ebekhe dogolik,
“An eberogonat weak hagakhima,” iluk wene inoba 'bakhigik,
“Dek, an hano hagakhima,” iluk wene inoba korigik, hagasugun o, iluk wene hano wene baga isikhemo, an nen yokhisasigi apigi.
“Akhuni Yahudi ebe Yahudi meke thani,” iluk yogeisasikhe wene
17Itithogon mekeat he, hit nen,
“Nit ninebe Yahudi ebe Yahudi meke,” iluk ekhe dogolik, hinetaiken wene Allah nen ninasuk wakhikhe wene etnogo baga hakotdiluk dogolik,
“Allah iti nit ninopase o,” iluk hogorakhekhe lagap yoma re! 18Hit nen,
“Allah akla nen he,
Yigithogon hagasuak, itithogon hagasuak, iluk akla apekherek iti ninilumo nen,
Iti hano, iti weak, iluk Allah nen ninasuk wakhikhe wene hutdiluk nen mothogon hagasusak,” ilu hutdegethep iti. 19Hit nen,
“Akhuni inileken puk meke nit nen niniki hago erlok wogosik lausak. Nen, ninebe isagal yibarlek hakenema, akhuni o mummo welageikharek meke iti erlok liarinabusak. 20Nen, wene Allah nen ninasuk wakhikhe wene etnogo nit nen hago welagorethekma re, yi wene ti wene ninilu dogolik wene eberogonat meke anek yakulisogorek iti nen, akhuni inetaiken abit meke yakulisigik, yekerugi meke wene yakulisigik, erlok usak o,” iluk ekhe lagap iti. 21Itithogon it akhuni aperek yakulisekhe dogoligat, hinekaerek yakulekhe lagap dek yoma re! Hit nen ekhe dogolik,
“Hiniki abusak waganhup o,” iluk it aperek yogeisekhe dogoligat, hit hinekaerek hiniki abusak waganhe lagap yoma re!
22“Param hagakhup o,” iluk yogeisekhe dogoligat, hit hinekaerek param hagakhe lagap yoma re!
“Kaneke alino hagarek iti na'it motok,” iluk ekhe dogoligat, yi meke ti meke usama werekma hiniki abusak waganhe lagap yoma re!
23“Wene Allah nen ninasuk wakhikhe wene at Musa nen yoknisasikhe wene etnogo an nilu o,” iluk ekhe dogoligat wene iti here'isalok weak hagakhunem, it aperek nen Allah etaga ekhe dogolik abok weak iliogei iti hit nen Allah etaga weagatdekhe lagap yoma re! 24#Yesaya 52:5 Hit hagakhe lagap iti hasik, Allah ane holal yigithogon waganek werek,
“Hit hinobabut itithogon hagasugun oba it akhuni itikmanke meke nen,
Allah etaga ekhe dogolik, abok weak ekhe dogogun o,”
iluk isikhemo wene holal waganogo 'bisukha hagat, hagakhe lagap o.
25Hit he, wene Allah nen ninasuk wakhikhe wene etnogo hologo hagakhe lagap halok he, hinoado aperlagap meke palhethep iti, hano motok usak. Meke re, wene iti hologo hagakhidek halok he, hinoado aperlagap meke palhethep iti alomarogo palhethep iti nen, palek dek meke negen welagap o. 26Nen, it akhuni itikmanke meke inoado aperlagap palek dek dogolik, wene Allah nen ninasuk wakhikhe meke etnogo hologo hagakho halok he, at Allah nen, inoado aperlagap meke palek dek mekeat he, palek meke hakene igin dek a? Palek meke hakene igin o. 27Nen, hit Yahudi meke, wene Allah nen ninasuk wakhikhe wene etnogo hit ite dogolik, hinoado aperlagap palhethep mekeat he, wene iti hologo hagakhidek, thagalogo here'isalok weak hagakhe lagap iti nen, akhuni aperek inoado aperlagap palek dek mekeat he, wene Allah nen ninasuk wakhikhe wene iti mothogon hagariogei iti nen, it nen wene hit hinoba 'bugun o. 28Akhuni Yahudi ebe Yahudi meke iti ebe re, thelekma meke iti 'buk. Nen, inoado aperlagap palharek iti ebe re, inoado aperlagap palek iti 'bugat o. 29Akhuni Yahudi ebe Yahudi meke re,
“An nebe Yahudi meke inoado aperlagap palek welagei,” iluk thuesika baga holal palogo 'begarek iti hasik 'buk. Dek o. Mekeat, inoado aperlagap palek ebe meke re, inoado aperlagap meke palu hak, Allah Agoreke nen inetaikenma meke karelogo ulakherek itiat o. Akhuni inetaikenma itithogon karelek werek halok he, akhuni aperek nen hogorinakharek 'buk. Meke re, at Allah nenat hogorinakherek o.

Currently Selected:

Roma 2: LAIDNT

Highlight

Share

Copy

None

Want to have your highlights saved across all your devices? Sign up or sign in