Lukas 20

“Yesus, ap tha nen iteerek dogoagaluk meldageikhemo hagakhe lagan,” iluk itema waganhukha wene

(Matius 21:23-27; Markus 11:27-33)

1Yabokane iniki ageikhe baga nen, at Yesus Allah ai halekma ukisikhesik dogolik, akhuni wene hano wene yakulisigik, inasuk wakhik, hagakhunem, it ap Allah iteerek inougi koktek inom, it ap Allah ane holal waganek iteerek meke inom, ap inarluetek emenogo inom, at Yesus oba wagoukha. 2Wagoukhasik nen, men yogokhukha,

“Hat nen yi hagakhik, ti hagakhik, hagakhe lagan iti, nena meke ite agatik hagakhe lagan. Nen, ap tha nen iteerek dogoagaluk meldageikhemo welagan. Yoknisan ta,” iluk yogokhukhama, 3at Yesus nen,

“An meneke, hit nen yoknisubageik nen iluk, hinok opakiat wokhisagat o. 4At Yohanes nen ima usa'isekhe lageikhe etnogo re, Allah pogot oba meke nen yogokhikhemo usa'isekhe lageikhe a? At he, akhuni agat oba meke nen yogokhukhama usa'isekhe lageikhe a. Yoknitni ta,” iluk yogeisasikhemo, 5it-it ekhe dogolik,

“Allah pogot oba meke nen yogokhikhemo usa'isekhe lageikhe, iluk yogosumo, at nen,

Halok he, hit nen Yohanes ane eberogonat iluk hutdigidek welagagip iti nenaluk, iluk yoknisaunogo. 6Nen,

Akhuni nen yakulikhukha usa'iseskhe lageikhe, iluk umo re, eiye! It akhuni tha'bokhogonat nen,

Yohanes iti Allah aneat yoknisekhe lageikhe, iluk apegarethekma iti nen, helekit oba ninebe motok ninasinogo,” iluk isukhasik nen, 7yabokane Yesus men yogokhukha,

“Wene iti erlo nit ninokodek o,” iluk yogokhukhama, 8at Yesus nen, men yogeisasikhe,

“Halok he, iti hak an meneke,

Iti meke ite agarik hagakhe lagei iluk hit yokhisagein degat o,” iluk yogeisasikhe.

“Ap aperek anggur ai yagoma therogo welagoukha,” iluk oba lisogon yogeisasikhe wene

(Matius 21:33-46; Markus 12:1-12)

9At Yesus nen itithogon yogeisasikhesik nen, yabokane akhuni emenogo wene ageikhe oba lisogon men yogeisasikhe,

“Ap ageikhe wen waganekma anggur ai yakhikhe. Ya'iluk nen it aperek elanma hasik it inaen negen therogo dogoagaluk 'bisalok nen, o werlekma lalok iki ageikhe inomat dogoluk nen wisigiluk lageikhe. 10O etoma lageikhesik werekma, anggur eken palharek oba o arat ageikhemo, ap ayabu iteerek meke etnogo nen it ap emenogo nen eken aperek palogo wogosuagaluk, atuaneke meke ageikhe ap emenogo inoba la'i ageikhe. La'i ageikhemo, it ap wen therogo welagoukha meke emenogo inoba wageikhe meke re, ebe tugi watdiluk nen, eken palikhidek werlegat apuke la'isukha. 11La'isukhama lageikhemo, yabokane atuaneke meke ageikhe la'i ageikheat. La'i ageikhemo nen wageikhe meke re, it nen ekarli warogo tugi watdiluk nen, eken palikhidek werlegat apuke la'isukhaat. 12Iki pere baga la'isa ageikhe meke itithogon hagakhukha iti nen, yabokane atuaneke meke ageikhe la'i ageikheat. Meke re, at yabokane la'i ageikhe meke iti wageikhemo it nen itithogonat tugi mebulukhogon warogo nen, anggur yagoma nen po ula'isukha. 13Itithogon motok hagarinakhukhama nen, at kok wen iteerek meke etnogo akla nen,

Yabokane nikithogon hagasik he. An nekaerek na'but netaiken hunik meke yiat inoba la'umo re, ebe alon halogo heagei warogo waganugun apigi, iluk akla apasikhesik la'i ageikhe. 14La'i ageikhemo wagunem, it ap wen therogo welagoukha meke emenogo inileken lakhasukhasik it-it ekhe dogolik, men isukha,

Opase obolukmo wen iteerek asigin meke etnogo ebe waga ili. Halok he, wen yi nirat ite asuok nen, ebe wasuok o, iluk, 15a'but etnogo anggur ai yagoma nen po leget akhane ula'iluk nen, ebe motok wakhukha. It itithogon hagakhukha iti nen, at kok wen iteerek etnogo nen, it ap iti nikithogon hagarinabigin apegep. 16At ebe ayabu witluk nen, it inebe motogat warogo podisalok inobolukmo anggur ai yagoma etnogo therogo dogoagaluk, ap ninat meke wogeisageinat o,” iluk yogeisasikhemo, it emenogo nen,

“Eiya! Itithogon hagasusak dek o!” iluk yogokhukhama, 17#Mazmur 118:22 at Yesus nen it emenogo ileken 'birisik dogolik, men yogeisasikhe,

“It ap aperek nen holal waganogo 'bekhe dogolik,

It ap tukang o helekit meke halharek meke nen, o ebe halhe dogolik,

Helekit yi weak, iluk here'isukha meke iti o herlagaat hagatlagama o,

iluk Allah ane holal waganogo 'bisukha iti nena hasik isukha apegep. 18Ap tha nen helekit iti baga kat usa'aga halok ebe motok wuleleken tiologo 'bigin o. Nen, helekit iti tha oba thebeli aga halok he, ebe motok al debelogo wasigin o,” iluk yogeisasikhe.

“Uang pemerintah hasik kino isinem wogeisausak a? Dek a,” iluk hinok Yesus oba waganhukha wene

(Matius 22:15-22; Markus 12:13-17)

19At Yesus nen wene itithogon yogeisasikhemo nen, it ap Allah ane holal waganek iteerek meke men, it ap Allah iteerek inougi koktek emenogo men, inasuk holhukhasik nen,

“Wene iti nit ninobasik oba lisogon yoknisekhe higi,” iluk hutdisukhasik itinem, at Yesus ebe hakhauwogoluk hagakhukha mekeat he, akhuni emenogo inayuk nen huk agoukha. 20Huk agoukhasik yabokane, at nen ane igin oba wene 'biluk, at gubernur akhuni hagasik dogolik ukum inoba 'bigik, kokhik, hagakherek iteerek meke nen wene oba 'buagaluk, ap aperek inobabut hano thalek Yesus inileken waganhe dogoagaluk la'isa agoukha. 21La'isa agoukhama Yesus oba wagoukhasik nen, hinok waganhe dogolik, men yogokhukha,

“Noe! Hat wene igik, yakulisigik, hagakhe lagan iti, eberogonat anek ekhe dogolik, akhuni aperek helokhoma 'bisigik, aperek hoporlike 'bisigik, hagakhethek dek. Hane mothogon ekhe dogolik, Allah akla nen,

Akhuni nen yigithogon tigithogon hagakhe dogoak, iluk akla apekherek meke eberogonat yakulnisekhe lagan iti, nit ninilu o. 22Halok he, nit akhuni Yahudi meke hagakhorek tak-tagat, uang pemerintah hasik, kok etagapogot Kaisar wogosusak erlok a? Erlok dek a,” iluk yogokhukhama, 23at Yesus nen,

“It ap yi an nukhetdanuogoluk inane 'bitokhogon yoknekha,” iluk, ekagat hutdisalok nen, men yogeisasikhe,

24“Uang perak yabu iniki opaki hasik hagakhunem iniki oko wogeisegarek etnogo meke ageikhe inugutneani,” iluk yogeisasikhemo inuguthasukhama nen,

“Yi tha ebe elokhoken hagarek inom, etaga holal waganek inom, werek apegep,” iluk yogeisasikhemo, it nen,

“Ithi Kaisar hagarek werek o,” iluk yogokhukha. 25Itithogon yogokhukhama at Yesus nen, men yogeisasikhe,

“Halok he, Kaisar meke halok Kaisar at wogokhik, Allah meke halok he, Allah at wogokhik, hagakhe dogono,” iluk yogeisasikhe. 26Itithogon yogeisekhe lageikhemo, akhuni inil oba ane ekhe hasik, ileken waganogo wene oba 'busak dek ageikhemo, it nen,

“Wene oko mothogonat ekhe iti nayuk e!” iluk, inane dek huk agoukha.

Ap Saduki meke nen akhuni watlatluk nen iniluk asugun hasik, Yesus oba hinok waganhukha wene

(Matius 22:23-33; Markus 12:18-27)

27Itithogon werek korlek, yabokane it ap Saduki meke nen,

“Akhuni watlatluk nen, yabokane iniluk asugun motok dek,” iluk egarek meke ebetlake Yesus oba wagoukhasik oba hinok waganhe dogolik, men yogokhukha,

28 # Ulangan 25:5-6 “Noe! At Musa nen men yakulnisasikhe,

Ap ageikhe age horlalok a'buri itaginakhidekma, ebe watlaga halok he,

obolukmo a'but ageikhe itasuagaluk, he thoge iti ap iti agorat waganusak o,

iluk yoknisasikhesik holal waganogo 'bisikhemo werek o. 29Itithogon isikhe meke werekma, ap inebe 7 baga inopase opakiat nen itago welagoukha. Dogolik, inoe makusa meke iti age waganhikhesik, a'buri itaginakhidekma watlageikhe. 30Watlageikhemo nen, agot oporlik meke iti nen, he thoge iti waganhikhesik watlageikheat. 31Watlageikhemo, yabokane inagot inoporlik meke iti nen waganhikhe meke re, itithogonat a'buri itaginakhidek watlageikheat. Itithogonat, it ap inebe 7 baga iti nen, he opakiat itiat waganhukhasik, ina'buri itaginakhidekma watlarik anek wagoukha. 32Nen, yabokane, ebe yabokane he iti ebe watlageikheat. 33Halok he, it ap inebe 7 baga iti, he opakiat itiat waganik wagoukhasikmo, yabokane Allah nen akhuni warek meke inilugurinabigin itinem, he iti tha hak age asigin apegen,” iluk hinok waganhukha. 34Itithogon hinok waganhukhama, at Yesus nen, men yogeisasikhe,

“O yogotak ya agat oba ya dogolik, ap nen humi ikhigik, it aperek igisigik, hagariogei mekeat he, 35it akhuni watlatlukmo nen, Allah nen inilugurinabigin oba nen, o yabokane dogogun oba iti, erlok dogoak, iluk apekherek meke etoma dogolik, humi waganhik, it aperek igisigik, hagakhe dogogun motok dek o. 36Akhuni watlatlukmo Allah nen inilugurinabigin iti nen, inebe Allah a'buriat, it malaikat pogot oba yoko nekharek meke inom tak-tak dogolik, yabokane watlaga dogogun motok dek o. 37#Keluaran 3:6 It akhuni watlatlukmo Allah nen inilugurinakherek iti hasik, at Musa nen, o 'beroat erloma Allah ebe ileken hasikhe wene iti baga men isikhe,

Abraham men, Ishak men, Yakub men, inopase Allah at,

iluk isikhesik holal waganogo 'bisikhe iti. 38At Allah ilhanem it inebe tha'bokhogoant iniluk werek iti nen, Allah ebe re, akhuni warek meke inopase 'buk. Iniluk meke inopase o,” iluk yogeisasikhe. 39Itithogon yogeisasikhemo, it ap Allah ane holal waganek iteerek meke ebetlake nen men yogokhukha,

“Noe. Hat hane oko hano yogeisegen o,” iluk yogokhukhama, 40it aperek nen, hinok waganu inayuk ageikhemo, hinok waganhidek huk agoukha.

“At Kristus iti ebe tha apegep,” iluk yogeisasikhe wene

(Matius 22:41-46; Markus 12:35-37)

41Itithogon huk agoukha mekeat he, at Yesus nen it men yogeisasikhe,

“Kristus Allah nen ayoko 'biluk la'isigin isikhe etnogo, ebe Daud nen itago meke o, iluk iliogei iti, nikithogon halok iliogei apegep? 42-43#Mazmur 110:1 At Daud ekaerek nen Mazmur wene baga men isikhe,

Allah Etagapogot nen an noe Etagapogot yogokhe dogolik,

Akhuni hat hathili meke emenogo hisok nen al debelogo 'bisanok nen,

an nen aban hoba 'bisa'ageidek werek korlek,

an nalilu niki ebeke hurek dogolik hebe kok dogono,

iluk holal waganogo 'bisikhe iti re, 44at Daud nen Kristus ebe hasik,

Noe Etagapogot, iluk isikhe mekeat, it akhuni nen,

Kristus iti Daud nen itago meke, iluk nikithogon nen usak apegep. Itithogon usak erlok dek o,” iluk yogeisasikhe.

“It ap Allah ane holal waganek iteerek meke inobabut iti nen nukhetdinageinogo,” iluk yogeisasikhe wene

(Matius 23:1-36; Markus 12:38-40)

45At Yesus nen wene itithogon yogeisugunem, akhuni tha'bokhogonat inasuk holek werek korlek, it at ane agarumi waganhe lagoukha meke emenogo men yogeisasikhe,

46“It ap Allah ane holal waganek iteerek meke inobabut hagariogei iti nen nukhetdeinaginogo iluk, hinobabut hebelogo dogono o. It iti inobabut he, inasu uatek-puatek meke ikhalok pasar oko waganharekma etoma akhuni nen inane agugurogo heagei warinabuak nen iluk lageik, o akhuni Yahudi meke sembayan egarekma ap koktek hurek lageikharekma hureklasi ukigik, akhuni pesta kogat isago nukunem ap koktek hurek lageikharekma hurek lageik, hagakhe dogou anek warlok welageikharek iti. 47Itithogon dogolik, humi thoge meke inai halek men, inameke men, thebelekhe dogoligat he, akhuni nen, inasuk holiluk,

It hano, inakla apoagaluk sembayan uan-nagan likhalok egarek itithogon hagakhidek dogolepma, Allah nen wene alhe meke anek inoba 'biluk dogolep. Meke re, itithogon hagakharek iti nen, wene akin meke inoba 'biluk weagarinabigin o,” iluk yogeisasikhe.

Currently Selected:

Lukas 20: LAIDNT

Highlight

Copy