Yohanes 7
7
Yesus o Yerusalem pesta hagakhunem huk ageikhesik nen usasikhe wene
1Wene itithogon arat yogeisasikhesik nen, it ap koktek Yahudi meke nen, Yesus ebe wasuogoluk abok palhe lagoukha iti nen he, at ebe o Yudea usalok nekhe dogou a'it nen, o Galilea eloke etoma nekhe lageikhe. 2Itithogon nekhe lageikhe etanemat, it akhuni Yahudi meke haganeat orlisa haldiluk welagoukha meke inakla eberogo, pesta isago nausak oba arat hakok i ageikhe. 3-5Itithogon hakok i ageikhemo dogolik, at Yesus ekaerek agarlak lak meke meneke, inetaiken at oba hakotdigidek welagoukha iti nen he, men yogokhukha,
“Hat hagarumi hane waganiogei meke emenogo nen, hat hagakhetek meke hagakhunem inileken heoak nen, o yoma thogotdiluk o Yudea usan ta. Ap inetaga werek asuogoluk inakla apekhe dogolik halok he, limago hagakharek dek o. Halok he, hat hagakhe lagan iti, akhuni agat oba meke inebe tha'bokhogonat inilu asuagaluk winamhogon hagasi usan o,” iluk yogokhukha. 6Itithogon yogokhukhama, at Yesus nen men yogeisasikhe,
“O hibiku-yogoku hit nen hagasusak meke, erlok werek meke re, an nen hagasusak oba hakok i ageidek aban werek o. 7It akhuni agat oba meke nen hit halok he, ina'it motok, hagathinabiogei dek mekeat he, an nen,
It hagakharek iti weak motok, iluk egerek iti nen, anat ina'it motok hagatnabiogei o,” iluk yogeisasikhesik, 8ageikhe men yogeisasikhe,
“An hagasusak oba aban werek iti nen, pesta hagasugun iti hagakhunem yogotak yaat usagein dek o. Hit anek usekhe dogoni o,” 9iluk yogeisasikhesik, at o Galilea etoma huk ageikhe.
Yesus pesta orlisa halogo hagakhunem usasikhesik hagakhikhe wene
10Itithogon huk ageikhemo, at agarlak lak emenogo anek pesta etnogo hagakhunem arat usasukhasikmo nen, at Yesus yabokane akhuni inokodek werek korlek limago usasikhe. 11Etoma usasikhesik werek korlek, it ap koktek Yahudi meke pesta hagakhunem dogolik Yesus ebe herasuogoluk hinok waganhe dogolik,
“At ebe koma werek?” iluk isukhama, 12it akhuni doalegat emenogo inasuk holhukhasik nen, inane hok-hok ekhe dogolik, it aperek nen,
“At hano,” ugunem, nen, it aperek nen,
“Dek o. At weak. Akhuni nukhetdisiliogo,” iluk isukha. 13Itithogon isukha mekeat he, it ap koktek Yahudi meke inayuk nen, Yesus abok inane thelekmarogon palhidek. La'bokhogon anek isukha.
14 Pesta etnogo nilik laga korlek heisogo Yesus Allah ai halekma ukisikhesik, wene yakulisekhe lageikhe. 15Yakulisugunem, it ap koktek Yahudi meke nen hogorakhe dogolik men isukha,
“Eiye! Nayuk o. Ap yi sekolah hagakhidek mekeat, yi wene ti wene yoma nikithogon nen ilu aga apegep?” iluk isukhama, 16at Yesus nen, men yogeisasikhe,
“An nen wene yakulhisekhe lagei iti, an nakla nen kagalogo yakulhisekhe lagei dek mekeat he, at an la'ani ageikhe meke etnogo nen yoknekhe korlek yakulhisekhe lagei o. 17Tha nen Allah akla apekherek meke mothogon hagasusak warlok halok, an nen wene yakulisekhe lagei iti,
Allah nen yakulekhe korlek iliogo, igik,
Ekaerek akla nen kagalogo iliogo, igik, ekagat halok ilu asiginat o. 18Halok he, tha nen wene ekaerek akla nen kagalogo ekherek iti, akhuni nen hogorasuagaluk ekherek o. Meke re, tha nen, at la'i ageikhe meke hogorasuagaluk ekherek halok he, ekalat ekherek motok dek o. At he, eberogonat ekherek o. 19Nen, Allah nen wene ninasuk wakhikhe wene iti, Musa nen holal waganogo wokhisasikhe dek nogo? Wokhisasikheat apigi. Meke re, ap hit meke ageikhe nen wene iti mothogon hagakhidek dogolik an nasuogoluk abok palhe lagap iti nenaluk,” iluk yogeisasikhemo, 20it akhuni doalegat emenogo nen, men yogokhukha,
“A! Hat mokat obabut weak meke hakla ukekhesik thinuknuk agatik ekhe lagan a? Tha nen hasigiluk iliogo nen ekhe lagan?” iluk yogokhukhama, 21at Yesus nen men yogeisasikhe,
“An nen opaki hasik elalinat hagakhi meke re, hit tha'bokhogonat nen,
Eiye! iluk hinayuk aga iti. 22Meke re, hit hina'buri inoado aperlagap palinakhethep iti, erlo at Musa 'buk. Dek o. Erlo Musa ebe aban itaklageidek werek korlek ninopa lak nen palinakhe lagoukha mekeat o. Iti nen, Musa nen itithogon palinabusak iluk yokhisasikhemo, hiniki 7 baga Allah hasik werlegat dogolik palinakhethep iti. 23Nen, wene Allah nen ninasuk wakhikhe meke at Musa nen woknisasikhe meke iti thagalinogo iluk, iniki 7 baga Allah hasik werlegat dogolik inoado palinakhethep mekeat he, an nen niniki 7 baga Allah hasik werlegat dogolik, ap ageikhe ebe motok hano hagakhi meke re, hit nenaluk wenaknekhe lagap? 24Wene ebe thekekhogon hinokodek mekeat he, we wene thelekma meke anek hinilu dogolik, akhuni aperek wene inoba 'busak dek o. Wene thekekhogon hinilu atluk nen, weak hagakharek tak-tagat wene inoba 'bekhe dogono o,” iluk yogeisasikhe.
“At Yesus ebe ap erlo ki meke wageikhe,” iluk isukha wene
25At Yesus nen wene itithogon yogeisekho werekma, it akhuni o Yerusalem meke inebe hetlake nen men ekhe lagoukha,
“Ap wasuogoluk herariogei etnogo ebe ithi dek a? Ebe ithiat o. 26Meke re, ebe lakhani! Nayuk o. Ayuk degat dogolik, wene yoknisugunem, it nen wene oko yogokhidegat kamotdiliogei yi. It ap ninougi koktek yoma inakla nen,
Ap yi nit akhuni tilninabuagaluk Allah nen la'isigin, iluk isikhe etnogo ebe ithiat, iluk inakla apegasik nen iliogei a? 27Itithogon meke re, nit akhuni tilninabuagaluk Allah nen la'isigin isikhe etnogo ebe waga halok, erlo ka nen waga he, akhuni tha'bokhogonat inokodek dogogun mekeat he, ap yi anek he,
Ebe ap erlo etoma meke, iluk niniluat o,” iluk ekhe lagoukha.
28Itithogon ekhe lagoukhama, at Yesus Allah ai halekma ane kokhogon wene yogeisekhe dogolik, men yogeisasikhe,
“An nebe inom, nebe o etoma nen wagagi inom, hit hinilu nogo? An wagagi iti, an nabusagat nakla nen kagalogo wagagi dek o. At ane eberogonat anek ekherek meke etnogo nenat la'ani ageikhe mekeat he, at ebe hit hinokodek o. 29Itithogon mekeat, an anek he, at nenat la'ani ageikhemo, o at werekma etoma nenat wagagi iti nen, an at ebe nilu o,” iluk yogeisekhe lageikhemo, 30it akhuni nen Yesus ebe hakhauwogoluk hagakhukha mekeat he, at ebe hakhausak oba arat mot asi ageidek iti nen, ebe iniki hakhigidek kamotdisukha. 31It aperek nen hakhauwogoluk hagakhe lagoukha mekeat he, it akhuni doalegat emenogo inebe hetlake doalegat inetaiken Yesus oba hakotdisukhasik men isukha,
“Ap ithi elalin meke hagakhe re, erlok dek apegep? Nen, akhuni tilninabuagaluk Allah nen la'isigin isikhe etnogo witluk nen, ebe hutduagaluk elalin meke kogat hagasigin nogo? Dek o,” iluk isukha.
Yesus ebe hakhauwogoluk hagakhukha wene
32Itithogon ekhe dogolik, it akhuni doalegat emenogo inane hok-hok Yesus abok isinem, it ap Farisi meke inasuk holhukhasik nen, it ap Allah iteerek inougi koktek inom nen, ap Allah ai halek therogo welageikharek meke aperek nen, Yesus ebe hakhoagaluk wene warisasukha. 33Itithogon isi korlek, at Yesus nen men yogeisasikhe,
“An we, elanma hasik niki pererlagat ninom dogoluk nen, at la'ani ageikhe meke etnogo oba napuke arat ligin o. 34An o etoma lalok werek korlek, hit nen an heraknabik nekhe dogogun mekeat he, hit o an dogoginmo etoma wisusak motok erlok dek iti nen, an ninom abuk asugun dek o,” iluk yogeisekhe lageikhemo, 35it ap Yahudi meke inougi koktek emenogo nen, it-it ekhe dogolik, men isukha,
“Ap yi o koma lalok werekma, nit at herarik lalok ninom abuk asugun dek nen yoknisekhe apegep. Ap nit meke olirok akhuni Yunani meke werekma inoba lagoukhasik werekma inoba lalok nen, akhuni Yunani meke wene yakulisekhe dogeigiluk ekhe apegep a? 36At nen yoknisekhe dogolik,
Hit an nebe heraknabik nekhe dogogun mekeat he, an ninom abuk asugun dek o. Nen, hit o an dogoginmo etoma wisusak motok erlok dek o, iluk yoknisekhe iti, at akla nikithogon apekhesik nen yoknisekhe apegep,” iluk ekhe lagoukha.
Yesus nen akhuni inilugurinakherek meke hasik yogeisasikhe wene
37Wene itithogon isukhasik oba nen, pesta etnogo ilugun kobokhogon arat agunem, hari kok iti baga Yesus ebe melageikhesik nen, ane kokhogonat men yogeisasikhe,
“Tha nen i abu halok, an noba nasusak o. 38Nen, tha nen etaiken an noba hakotdekhe halok, i inilugurinakherek meke at akla nen elesi hunak-hunak palogo dukhekhe dogogin o, iluk Allah ane holal waganek oba isukha hagat, hagatlasigin o,” iluk 39wene itithogon yogeisasikhe iti, akhuni inetaiken at oba hakotdegarek meke inebe dopok Allah Agoreke wogeisagein, iluk abok isikhe mekeat he, itinem, at Yesus ebe hogorakho korlek dageisikhe etnogo aban dageigidek nogo nen, Allah Agoreke aban usa'i ageidek werek korlek isikhe.
40Wene itithogon yogeisugunem, akhuni doalegat emenogo inasuk holhukhasik, it aperek nen, men isukha,
“Ap yi, ap ageikhe Allah ane yoknisasigin iluk, therogo welagorek etnogoat o,” iluk ugunem 41it aperek nen,
“Dek o. Akhuni tilninabuagaluk Allah nen la'isigin isikhe etnogoat o,” iluk ekhe lagoukha mekeat, it aperek nen, men isukha,
“Akhuni tilninabuagaluk Allah nen, la'isigin isikhe etnogo, o Galilea nen erlok wisusak nogo? Erlok dek o. 42Akhuni tilninabigin meke Allah nen la'isigin isikhe meke iti, ap Daud nen itago meke, at Daud ekaerek aila erloma welageikhe baga, o Betlehem etoma itaklasigin, iluk Allah ane baga holal waganogo 'bisukha werek etnogo dek?” 43iluk itithogon ilik laga lagoukhasik, ilugun oba, akhuni doalegat emenogo Yesus hasik inane thagalogo inebe mikikhukha. 44Itithogon mikikhukhasik, it aperek nen Yesus ebe hakhauwogoluk hagakhukha mekeat he, iniki hakhigidek kamotdisukha.
Ap Yahudi meke inougi koktek inetaiken Yesus oba hakotdigidek hagakhukha wene
45Itithogon kamotdisukhasik werekma, it ap Allah ai halek therogo welagoukha meke nen Yesus ebe hakhoagaluk wene warisasukha meke emenogo inapuke it ap Allah iteerek meke inougi koktek inom, ap Farisi meke inom, inoba wagoukhama, wene men yogeisasukha,
“Ap etnogo ebe ha'iluk ninoba wolok wageidek iti nenaluk,” iluk yogeisasukhama, 46it nen men yogeisasukha,
“Eiye! Wene at nen iliogo iti hak, it ap aperek nen wene itithogon isinem hisogorek dek mekeat he, at nen wene ninat iliogo iti nen ebe thogotdogo,” iluk yogeisasukhama 47it ap Farisi meke emenogo nen, men yogeisasukha,
“Hit meneke, at nen nukhetdinagakhemo nen ekhe lagap a? 48Nit ap Yahudi meke ninougi koktek inom, ap Farisi meke inom, aperek nen inetaiken at oba hakotdiluk hagakhunem ageikhe hisekhe lagap a? Motok dek o. 49Motok dek mekeat he, it akhuni doalegat yoma wene Allah nen ninasuk wakhikhe wene etnogo inokodek dogolik iliogei iti, Allah nen inoba homan 'bisekhemo werek o,” iluk yogeisasukha. 50Itithogon yogeisasukhama, ap it meke ageikhe etaga Nikodemus, alebat hibako Yesus oba wageikhe meke etnogo nen, it men yogokhukha,
51“Nagarlak lak. Wene Allah nen ninasuk wakhikhe meke iti baga, ap ageikhe ane inasuk holhidegat, nen, at hagakhe meke wene erlo hutukhogon inokodegat dogolik, wene tak piokhogon oba 'busak, iluk isikhe nogo? Itithogon igidek o,” iluk yogeisasikhemo, 52it nen at men yogokhukha,
“Hat meneke, haila o Galilea meke nogo? Ap Allah ane yogeisegarek meke ageikhe o Galilea nen wisigin iluk Allah ane baga holal waganek ageikhe werekma hileken higin motok dek etnaga, hileken hanorogon 'bikhekhe dogono,” iluk yogokhukha.
Akhuni nen, he ageikhe param hagakhunem hasukhasik, Yesus oba wolok wagoukha wene
[ 53Itithogon yogokhe lagoukhasik, akhuni emenogo inailake dopok kikil warogo lagoukha.
Currently Selected:
Yohanes 7: LAIDNT
Highlight
Share
Copy
Want to have your highlights saved across all your devices? Sign up or sign in
