Yohanes 18

At Yesus ebe hakha lagoukha wene

(Matius 26:47-56; Markus 14:43-50; Lukas 22:47-53)

1At Yesus nen sembayan itithogon arat iluk nen, at agarumi ane waganhe lagoukha meke emenogo at ebe inom dukhi lagoukhasik, i etaga Kidron aik ilibaganke yabu ai yagoma werekma italhukhasik agarumi inomat etoma ukisukha. 2At Yesus agarumi ane waganhe lagoukha meke emenogo iniki nekalok oba lageik, iniki nekalok oba lageik, etoma natogorlogo lageigat hagakhe lagoukhasikmo nen, at Yudas Yesus wasuagaluk yoko lageikhe meke etnogo yabula iti ilu welageikhe. 3Itithogon ilumo nogo nen, it ap Allah iteerek inougi koktek men, it Farisi meke men, inagarumi Allah ai therogo welageikharek meke inayoko 'biluk la'isasukhama, at Yudas nen tentara meke opaki doalek ageikhe inom wogosik, sikhe thege men, yi isagal ti isagal yibarlek men, wolok etoma lagoukha. 4Lagoukhama, at Yesus nen,

“An nebe yabokane yigithogon hagatnabugun,” iluk th'bokhogonat ilu welageikhe iti nen, inoba wageikhesik nen, men yogeisasikhe,

“Hit tha hearik wagap,” iluk yogeisasikhemo, 5it nen,

“Yesus ai Nazaret meke etnaga herarik wago o,” iluk yogokhukhama, at Yesus nen,

“Iti nebe anat o,” iluk yogeisasikhe. Itithogon isi korlek at Yudas Yesus wasuagaluk yoko lageikhe meke etnogo inalilu metek welageikhe. 6Werek korlek, at Yesus nen he,

“Iti nebe anat o,” iluk yogeisugunem, it emenogo mogukhogon inaloke higilha laga dogolik, inagaku dekak agat oba wilarik lagoukha. 7Itithogon laga korlek, at Yesus nen yabokane ageikhe inom men yogeisasikhe,

“Hit tha herarik wagap,” iluk yogeisasikhemo, it nen,

“Yesus ai Nazaret meke etnaga herarik wago o,” iluk yogokhukhama, 8at Yesus nen, men yogeisasikhe,

“Iti nebe anat o, iluk arat yokhisigi apigi. Hit nen, anat heraknabik wagap halok he, an nagarumi yoma loak nen here'isani o,” iluk yogeisasikhe. 9Itithogon yogeisasikhe iti, aban hagatlageidek werek korlek alebat, at Yesus nen allah yogokhe dogolik,

“Nopase Allah. Akhuni hat nen woknikhigin meke emenogo ageikhe nalageidek o,” iluk yogokhikhe meke etnogo ane ebeat asuagaluk itithogon yogeisasikhe iti. 10Itithogon yogeisekhe korlek, at Simon Petrus etnogo akarok wim yakharek meke itinem hago werekma kigikhogon waganhikhesik nen, ap Allah iteerek meke inoe kok atuaneke meke etaga Malkus iti wasigiluk yigilabethasikhesik asuk ebeke meke 'bogokhogon la'isikhe. 11Itithogon 'bogokhogon la'isikhemo, at Yesus nen, men yogokhikhe,

“Petrus. Hakarok obolukmo huakma kola'in o. Akhuni nen i henago wogeisugunem nekarek iti hak, an nopase nen,

Hat yi aik ti aik hagathabugun o, iluk yoknikhikhe meke iti tak-tagat an hagatnabusak erlok dek apegen a? Dek o. Hagatnabusagat o,” iluk yogokhikhe.

Yesus iki herle warogo wolok, ap etaga Hanas oba wagoukha wene

12Wene itithogon iluk isikhemo, it ap tentara meke opaki doalek emenogo inoe kok ageikhe inom, nen, it ap Yahudi meke Allah ai halek therogo welageikharek meke inom, at Yesus ebe ha'iluk, iki herle wakhukha. 13Iki herle warogo alebageik ap Hanas oba wolok wagoukha. Ap Hanas iti ebe, ap Kayafas tahun iti baga ebe Allah iteerek meke inoe kogat welageikhe meke iti ago'bak. 14At Kayafas iti ebe, alebat it ap Yahudi meke yogeisekhe dogolik,

“Nit tha'bokhogonat hasik ap opakiat ageikhe watlasusak iti hano o,” iluk inasuk wakhikhe meke etnogo.

At Petrus nen, “An nebe Yesus agot dek o,” iluk la'belhikhe wene

(Matius 26:69-70; Markus 14:66-68; Lukas 22:55-57)

15-16Itithogon wolok wagoukhama, at Simon Petrus etnogo nen, at Yesus agarumi ane waganhe lagoukha meke ageikhe ipisak Yesus oporlik wagoukha. Itithogon wagoukhasik, at Petrus anek, leget holagapema abel itikmanke holak oba werek korlek, at Yesus agot ageikhe iti, ap Allah iteerek inoe kok etnogo nen ebe iluk meke nogo nen, at Yesus ipisak ap kok iti agokutlu ukisukha. It ukisukhasik nen, at Yesus agot ageikhe, ap Allah iteerek meke inoe kok nen ebe ilu meke etnogo, yabokane apuke dukhi ageikhe. Dukhi aga dogolik, horlak holagapema akhuni dukhugunem thuam welagarek meke iti ipisak wenekak isukhasik nen, Petrus wolok ukisikhe. 17Itithogon wolok ukisinem, at horlak holagapema dukhugunem thuam welagarek meke etnogo nen Petrus yogokhe dogolik,

“Hat he, at yi agarumi ane waganiogei meke emenogo meke dek a? At agarumi mekeat o,” iluk yogokhikhemo, at Petrus nen,

“An he, dek o,” isikhe. 18Itithogon isikhesik werek korlek, o itinem, thogei weak nen, it inatuaneke meke men, it ap Allah ai halek therogo welageikharek meke men, hetu mokaldisukhasik nen, hetuken oba metek dogolik thogei isakhasi werekma, at Petrus inoba lageikhesik inomat thogei isakhasi metek welagoukha.

Ap Allah iteerek meke inoe kok etnogo nen Yesus itema waganhikhe wene

(Matius 26:59-66; Markus 14:55-64; Lukas 22:66-71)

19Itithogon thogei isakhasi korlek, ap Allah iteerek meke inoe kok etnogo nen, at Yesus oba itema waganhe dogolik, men yogokhikhe,

“Hat hagarumi hane waganiogei meke iti thani. Nen, hat hane yakulisekhe lagan iti, nikithogon,” iluk hinok at oba waganhikhemo, 20at Yesus nen he, men yogokhikhe,

“An nen akhuni agat oba meke wene yakulisekhe dogolik pakhogon anek yakulisegerek o. O it akhuni Yahudi meke tha'bokhogonat doalogo sembayan egarekma men, Allah ai halekma men, etoma anek yakulisegerek o. Wene an limago ageikhe yogeisegerek motok dek mekeat he, 21an noba hinok wokneekhe lagan iti nenaluk. An nen wene yogeisugunem it arat inasuk holharethek nen, an nen wene yogeisekhe lagei meke iti, it iniluat werek o. Halok he, it inoba hinok wogeisan o,” iluk isikhe. Wene itithogon isinem, 22ap Allah ai halek therogo welageikharek emenogo meke ageikhe ebe eta metek dogolik, at Yesus iki agot tugi wakhe dogolik men yogokhikhe,

“Ap Allah iteerek meke inoe kok yi nen yokhugunem, hat nen wene itithogon yogosusak a? Erlok dek o.” iluk yogokhe lageikhemo, 23at Yesus nen, men yogokhikhe,

“An nane korlo igi halok, wene korlo igi meke pakhogon yoknom he! Nen, nane mot igi meke hasigat, hiki agot tugi nakhen iti nenaluk,” iluk yogokhikhemo, 24yabokane at Hanas nen, at Yesus iki herle warogoat, ap Kayafas ebe ap Allah iteerek meke inoe kok meke etnogo oba wolok loagaluk la'isikhe.

At Petrus nen, “An nebe Yesus agot dek o,” iluk yabokane la'belhikhe wene

(Matius 26:71-75; Markus 14:69-72; Lukas 22:58-62)

25Itithogon wolok lagoukhama, at Simon Petru etnogo hetu mokalekma eranogoat metek dogolik thogei isakhasi werekma, it akhuni nen, men yogokhukha,

“Hat he, at agarumi ane waganiogei meke emenogo meke dek a? Hat at agarumi mekeat o,” iluk yogokhukhama, at nen,

“An dek o,” iluk la'belhikhe. 26La'belhe lageikhemo, ap Allah iteerek inoe kok meke etnogo atuaneke meke ageikhe, at Petrus nen asuk 'bogokhogon la'isikhe etnogo agarlak ageikhe nen,

“Hat he, hebe at hinom yabu ai yagoma werekma nileken hiigi apigi,” iluk yogokhikhemo, 27at Petrus nen he,

“Dek o,” iluk la'belhikheat. Itithogon la'belhe korlek eranogoat thue ayam ane isikhe.

Yesus iki herle warogo wolok ap kok Pilatus oba wagoukha wene

(Matius 27:1-2, 11-14; Markus 15:1-5; Lukas 23:1-5)

28Itithogon hagatluk, thue ane isikhemo, huben siakhogonat at Yesus ap Kayafas werekma nen, gubernur ai o kok halekma wolok wagoukha. Wolok wagoukhasik, Yesus anek uma kola'isukhasik,

“Nit pesta Paskah etnogo meke neke dogosakma, nit nen ninabusagat ukumo, nit weagarogo 'binanunogo,” iluk , o kok halek gubernur aila etoma ukigidek, o silimo huk agoukha. 29O silimo huk agoukhama nen, at Pilatus inoba dukhi ageikhesik men yogeisasikhe,

“Warligi yi. Ap yi wene nikithogon meke oba 'begesip nen wolok wagap,” iluk yogeisasikhemo, 30it nen, men yogokhukha,

“At weak hagakhidek dogolepma re, hat hoba wolok wetlo degat o,” iluk yogokhukha, 31at Pilatus nen, men yogeisasikhe,

“Ap yi wolok lalok nen, hit nen hagakhethep tak-tagat hinekaerek nen wene oba 'bigik, kokhik, hagatni o,” iluk yogeisasikhemo, it ap Yahudi meke nen he, men yogokhukha,

“Nit ninabusagat nen wene oba 'biluk inasusak erlok dek apigi o,” iluk yogokhukha. 32Inane itithogon yogokhukha iti, at Yesus nen wene haganeat yogeisekhe dogolik,

“An itithogon hagatnabiluk nasugun o,” iluk ekhe lageikhe meke etnogo, it itithogon hagakhukhama, at ane tak-tagat ageikhe iti. 33It Yahudi meke nen itithogon yogokhukhama, at Pilatus o kok halek gubernur aila etnogo apuke ukisikhesik, at Yesus ane hakhasikhesik nen, men yogokhikhe,

“Akhuni Yahudi meke inoe kok etagapogot etnogo hat a?” iluk yogokhikhemo, 34at Yesus nen, men yogokhikhe,

“Hat nen wene an nabok egen iti, hat hakla nen kagalogo egen a? At he, it akhuni aperek nen an nabok yokhekhama nen egen a?” iluk yogokhikhemo, 35at Pilatus nen, men yogokhikhe,

“Nikithogon. An nebe ap Yahudi meke nen yoknekhen a? It ap hekaerek hougi hagarumi men, ap Allah iteerek inougi koktek men, inom nen, hat hebe an woknehkha iti hat nikithogon hagakhenma,” iluk yogokhikhemo, 36at Yesus nen, men yogokhikhe,

“An nen akhuni napma 'bisegerek iti, akhuni agat oba meke nen inapma 'bisegarek iti hak 'buk. Dek o. An napma 'bisegerek iti, agat oba meke dogolepma re, nagarumi nen an nebe it ap Yahudi meke wogeisausak dek iluk, nebe nirlirli woknabuogoluk inom yabilep meke re, an napma 'bisegerek iti agat oba meke dek iti nen, nirlirli woknabugun dek o,” iluk yogokhikhemo, 37at Pilatus nen,

“Halok he, hat eberogonat kok hetagapogorat a?” iluk ekhe lageikhemo, at Yesus nen, men yogokhikhe,

“An nebe kok netagapogot hat egen itiat o. Iti hasigat an nen ebe wene abok pakhogon yogeisekhe dogeigiluk nebe agat oba yoma itaklasi usa'agagi o. Akhuni wene ebe wene iti werekmake asi lageikha meke inebe dopok an nane inasuk holiogei o,” iluk yogokhe lageikhemo, 38at Pilatus nen,

“Wene ebe wene iti nena wene nogo,” iluk yogokhikhe.

Yesus ebe motok wasuogoluk ukum oba 'bisukha wene

(Matius 27:15-31; Markus 15:6-20; Lukas 23:13-25)

Wene itithogon yogokhikhesik, at Pilatus yabokane ap Yahudi meke inoba dukhi ageikhesik nen, men yogeisasikhe,

“An nen at wene oba 'begep meke pilinekhi meke re, at weak ageikhe hagakhemo higi motok dek o. 39Itithogonat meke re, hit nen pesta Paskah neke dogolik, ap herle warek meke ageikhe herle hisalhisoagaluk kino yoknikhunem, hisalhisegerek etnogo nen, hit ap Yahudi meke hinoe kok etagapogot yi herle hisalhisausak warlok a? Hina'it a,” iluk yogeisasikhemo, 40it nen inaneak kogat walhe dogolik, men yogokhukha,

“Dek o. At iti herle hisalnisausak dek o! At Barabas itiat herle hisalnisan o!” iluk yogokhukha. At Barabas iti, obabut weak ikiabusak waganhe lageikhe mekeat isukha iti.

Currently Selected:

Yohanes 18: LAIDNT

Highlight

Copy