Yohanes 10

At Yesus nen, “Domba iteerek dogolik, therisik welagarek meke, nebe anat o,” iluk yogeisasikhe wene

1At Yesus nen wene itithogon yogeisasikhesik nen, yabokane men yogeisasikhe,

“An nen wene ageikhe eberogonat yokhisak o. Tha nen domba waganigiluk ebe lanma ukigiluk, holagape palekmake ukigidek, leget isiade talogo ukekhe halok, ap iti inilarlurlu waganherek meke iki abusak waganigilugat o. 2Nen, tha nen, holagapemake ukekhe halok he, at iti domba iteerek dogolik therogo welagarek mekeat o. 3At domba iteerek dogolik therogo welagarek meke iti, ebe waga halok, at ageikhe domba aila holagape palekma thuam welagarek meke nen thu hualdisinem, at domba iteerek etnogo nen ane hageisasinem, it domba nen, at ane inasuk holharethekma nogo nen, inetaga dopok waisalok, wogosik itikmanke dukhekherek o. 4Wogosik dukhekherethek nen, at ebe alebageik laga korlek, ako domba emenogo, at ane inilumo nogo nen, at oporligat lageikharek o. 5Itithogon hano lageikharek mekeat, it ap ninat meke inane ugunem, it domba nen, it inane inokodekma nen, inoporlik lageidek lo lageikharek o,” iluk, 6at Yesus nen, wene iti oba lisogon it yogeisasikhe mekeat he, wene ki meke hasik ekhe heat, hutdigidegat welagoukha.

At Yesus nen, “Domba iteerek dogolik, therogo welagarek meke, nebe anat o,” iluk yogeisasikhe wene

7Itithogon hutdigidek werek korlek, yabokane at Yesus nen, men yogeisasikhe,

“Wene eberogonat ageikhe yokhisak o. Domba iti inaholagape palekma, an nebeat o. 8An wageidek aban werek korlek, it akhuni aperek alebageik wagoukha iti, it inebe tha'bokhogonat domba inilarlurlu waganhik, himakhik, hagakharek meke wagoukhasikmo nogo nen he, it domba nen, it inane inasuk holhidek welagoukha. 9Holagape palek, an nebeat o. Tha nen an nebe baga ukekhe halok, irlirli horlageinmo motok hano dogolik, dukhigik-ukigik hagakhe dogolik, oka hano meke anek neke dogogin o. 10Nen, it ap inilarlurlu waganharek meke wageikharek iti, domba inilarlurlu waganhik, inakhik, inebe motok degetdisigik, hagasuogoluk wageikharek mekeat he, an wagagi iti anek, it akhuni yi meke ti meke doalegat oba hiakhogon welageikharek iti hak, inebe iniluk motok dogoagaluk inilugurinabilukmo nen ebe meke oba hiakhogon dogoagaluk wagagi o.

11 Domba ite werek dogolik therisik welagarek meke, nobabut hano, nebe anat o. Domba iteerek dogolik therisik welageikharek meke, obabut hano meke nen, domba irlirli waganogo watlasigin iluk akla apekherek. 12At itithogon apekherek meke re, at ap ageikhe domba iteerek meke dek. At ako degat. At oko wogosuagaluk therisik werekma helo yeke wagunem ileken lakhalok, domba here'isalok lo lagarekma, helo yeke etnogo nen domba emenogo aik nen yarlukhigik woginabigiluk sikhogo-mukhogo thirlik-pirlikhogon ula'isekherek. 13At iti oko wogosuagaluk domba therisik welagarek iti nen, domba emenogo akmu dek thogotdisalok lo lagarek iti o. 14-15Domba therisik welagarek meke nobabut hano re, nebe anat o. Nopase nen an ilu, nen, an nen at nilu, welagorek iti hak, an nen nako domba nilu, nen, it nen an inilu, welagorek o. Itithogon dogolik, an nako domba inirlirli waganogo watlasigiluk welagei. 16Nen, an nako domba ebe lanma yoma anek werek 'buk. O werlekmake aperek weregat o. Nadomba etoma meke nane inasuk holuagaluk wogosik wisigilugat welagei o. 'Bisasumo, it an nako domba yoko palek opakimoke nekhe dogogun. Itithogon nekhe korlek, an narligat nen therisik dogogin o. 17An watlatluk nen napuke niluk asigiluk nebe watlasigin apegerek iti nen, nopase nen an etaiken hunik welagarek o. 18An nen watlasigin apigidekmaat, it akhuni aperek nen obakha baga nasusak erlok dek o. An nekaerek nakla nenat, nebe watlasigin apagein obaat watlasigin o. Watlatluk yabokane napuke niluk asigin iti nekaerek nakla nen apagein obaat o. Itithogon hagasuagaluk nopase nen la'ani ageikhe mekeat hagasigin o, iluk eberogonat yokhisigi,” iluk yogeisasikhe.

19Wene itithogon yogeisasikhe iti nen, it ap Yahudi meke inaneak motok thagalhukhasik inebe mikikhukha. 20Itithogon mikikhukhasik it inebe doalekmake nen he, men isukha,

“At yi mokat obabut weak meke akla ukekhesik ebe thinuknuk agasik wene isi korlegat, hit at ane holhe lagap iti nenaluk,” iluk isukha. 21Itithogon isukha meke re, it hetnake nen, men isukha,

“Dek o. Akhuni mokat obabut weak meke inakla ukiluk, wene itithogon egarek dek o! Mokat obabut weak meke nen inileken puk meke erlok hano hagarinabusak apegep? Motok erlok dek o,” iluk isukha.

It ap kok Yahudi meke nen Yesus ebe wasuogoluk abok yabokane isukha wene

22Itithogon isukhasik oba nen, it akhuni Yahudi meke inakla nen,

“O Yerusalem Allah ai halek meke yabokane hanorogon karelhugu etnogo,” iluk inakla eberek dogolik pesta isakharek oba arat horok asi ageikhe. Itinem, o weak welageikhe. 23Itithogon werek korlek, at Yesus Allah ai halekma, misohulakma etaga Salomo misohulakmake nukhunem 24it ap koktek Yahudi meke alilu natogosi agoukhasik nen, men yogokhukha,

“Allah nen Kristus ayoko 'biluk la'isigin isikhe etnogo, harat a? Ninat a, iluk arlik halhe lago yi re, ninakla thiokhogon hurli niniki ki baga nen yoknisagein. Allah nen Kristus ayoko 'biluk la'isigin isikhe etnogo, hebe harat halok he, pakhogonat yoknisan o,” iluk yogokhe lagoukhama, 25at Yesus nen he, men yogeisasikhe,

“An arat yokhisekhe lagei mekeat he, hit nen eberogonat iluk apekhe lagap dek o. An nopase nen nayoko 'bisikhemo hagakhe lagei iti, an nabok pakhogon yokhisau hagat, hagakhe lagei mekeat he, 26hit hinebe domba an meke 'buk, ninat iti nen, nebe hutdanhe lagap dek iti o. 27Hit hinakla itithogon apegethep mekeat he, it aperek an nadomba meke halok, nane inasuk holharethek, it nen an nebe it inilu nogo nen, noporlik wageikharek o. 28Noporlik nekhe korlek, it iniluk motok dogoagaluk inilugurinakhe dogogin iti nen, it inebe watlatluk nuk asugun dek o. It an niki baga werek korlek, it ap aperek nen tilogo woginabusak erlok dek o. 29Ap aperek erlok dek mekeat he, an nopase nen nadomba woknikhikhe meke iti anek he, ebe obatne werek o. It an nopase nen woknikhikhe meke iti, at iki baga werekma, it ap aperek nen tilogo woginabusak erlok dek o. 30Nopase nipisak ninebe opakiat o,” iluk yogeisekhe lageikhemo, 31it ap koktek Yahudi meke nen, helekit inikimo waganhukhasik, Yesus ebe motok wasuogoluk hagakhukha. 32Itithogon hagakhe lagoukhama, at Yesus nen, men yogeisasikhe,

“An nopase nen hano meke doalegat hagasuagaluk nayoko 'bisikhe meke hagakhunem, hinileken neekhe lagap etoma tha'bokhogonat, ageikhe ki hak korlo hagakhi baga nen nebe nasuogoluk hagakhe lagap,” iluk yogeisekhe lageikhemo, 33it nen, men yogokhukha,

“Hat hano hagakhe lagan iti baga helekit oba hasuogoluk hagakhe lago 'buk. Hat hebe akhuni mekeat he, Allah etaga weagarogo, men ekhe lagan,

An Allah nipisak tak-tak, iluk ekhe lagan iti nenat hasuogoluk hagakhe lago o,” iluk yogokhe lagoukhama, 34#Mazmur 82:6 at Yesus nen, men yogeisasikhe,

“Wene Allah nen ninasuk wakhikhe meke etnogo baga, at nen men isikhemo holal waganogo 'bisukhama werek,

Hit hinebe allahat o,

iluk holal waganek werek etnogo dek a? 35Wene Allah ane holal waganek welagarek iti tha'bokhogonat, ageikhe munenagarek dek apigi. Iti nen he, it at ane yogeisasikhe meke hasik,

Hinebe allahat,

iluk isikhemo holal waganek werek korlegat, 36an nen,

Nebe Allah a'but igi iti nen,

Allah etaga weagakhe, iluk nenaluk ekhe lagap. Allah nenat nayoko 'biluk eberogonat nebe wenago agat oba yoma la'ani ageikhe mekeat, itithogon nenaluk ekhe lagap. 37An nopase nen,

Itithogon hagakhe dogono, iluk, nayoko 'biluk la'ani ageikhe meke, ebe hagakhidek dogolema, hit nen nebe hutdaniluk hinetaiken noba hakotdusak erlok dek o. 38Meke re, an nen hagakhe korlegat, hit eberogonat iluk hinetaiken an noba hakotdusak hina'it iti o. Itithogon hagakhethep iti an nen nopase nipisak hunik, nen, at nen an nipisak hunik, welagorek iti, hinilu atluk nen eberogonat iluk hutdubageik nen, an hagakhe lagei meke iti eberogonat iluk hutdini o!” iluk yogeisekhe lageikhemo, 39it nen, at Yesus ebe hakhauwogoluk hagakhukha mekeat, at it iniki agap warek polokhogon dukhisikhe.

40Yesus itithogon dukhisikhesik nen, yabokane apuke i Yordan aik ilibaganke at Yohanes nen alebat akhuni ima usa'isekhe lageikhemo etoma itali lageikhesik welageikhe. 41Etoma werekma, akhuni doalegat at oba wagoukhasik nen, men isukha,

“At Yohanes nen elalin meke ageikhe hagakhe lageikhe motok dek mekeat he, at nen ap yi abok ekhe lageikhe etnogo ane ebeat ageikhe,” iluk isukhasik 42it akhuni etoma welagoukha meke inebe doalegat inetaiken Yesus oba hakotdisukha.

Currently Selected:

Yohanes 10: LAIDNT

Highlight

Copy