YouVersion Logo
Search Icon

La'isasikhe 28

28
At Paulus i eken palekma Malta dogolik hagakhe lageikhe wene
1Ninebe tilogo i aik obake dukhisugusik werekma, it akhuni etoma meke nen,
“O i eken palekma yi etaga Malta,” iluk yoknisasukha. 2Yoknisasukhasik, inakla arlekenhogo wokninakhukhasik o miso wageikhemo nen, ayike nen thogei isakhoagaluk hetu mokalogo 'binanhukha. 3Hetu mokalogo 'binanhukhama dogolik, at Paulus nen hali therle kokhogon natogotdiluk nen, hetumo hunhunem, warlo pelal ageikhe hetu aik nen dukhi ageikhesik, Paulus iki aik paldisikhesik, hunik motok huk ageikhe. 4Iki baga hunik werekma, akhuni inaierek meke emenogo inileken halok, it-it ekhe dogolik,
“Ap yi akhuni inakherek meke o. Ima nen tilogo dukhi aga mekeat he, su inamokareke etaga Ukum, akhuni inebe inakherek meke etnogo nen,
At ebe iluk dogosak dek, iluk, wakhe yi,” iluk isukha. 5Itithogon ekhe korlek Paulus ebe weak ageik, watlageik, ageidek dogolik, warlo pelal etnogo iki nen hisakhogon hetumo kola'isikhe. 6Itithogon hagakhikhemo, it akhuni emenogo nen,
“Ebe hisigin a? At he, opaki hasigat tunhogo watlasigin a,” iluk apasukhasik, inileken welagoukha welagoukha, ebe itithogon hagatlageidek nen,
“Ap yi akhuni hakene dek. Elalin meke higi,” iluk isukha.
7Itithogon hagakhugu baga nen, o horogat etoma, ap kok etaga Publius agat iteerek meke, nit ap huso oba lagagumo, at nen ninebe hanorogo wokninakhikhemo, niniki henagan at ninom welagagu. 8O at werekma etoma, at opase oba agaken ageikhesik, al pirlak mep inom laga dogolik, witik motok welageikhe. Witigat werekma, at Paulus oba ukisikhesik iki ha'iluk, Allah ayoko 'bisikhemo, oba hano ageikhe. 9Itithogon hano ageikhemo, it akhuni o i eken palekma etoma meke u waganhe lagoukha meke aperek Paulus oba wagoukhama, hagarinakhunem inoba hano agoukhaat. 10Itithogon hano hagarinakhe lageikhemo, it akhuni emenogo nen, heagei warogo yi meke ti meke doalegat woknisasukhasik nen, yabokane nit o etoma thogotdiluk imake wisuogoluk hagakhunem, yi meke ti meke holagarlem amene woknisasukhaat.
At Paulus o Malta nen o Roma wageikhe meke
11O etoma dogolik, tugi henagan welagagusik nen, ku ageikhe ukulmo kaneke hulupmio pere meke inalino hagarogo 'bisukha meke, o Aleksandria nen haganeat wolok wagoukhasik, o weak werek nen i eken palekma etoma welagoukhasik, yoma wisuogoluk hagakhunem akla ukisugu. 12Ukisugusik o etoma nen o Sirakusa wagagusik nen, niniki henagan welagagu. 13Welagagusik, o etoma nen, ku baga i yoarlemake nen o kota etaga Regium wagagu. Wagagusik werekma, hubenke hisakne i laut mothogon waga lageikhemo, o aheke hak, o kota etaga Putioli wagagusik agat oba dukhisugu. 14O Putioli etoma Allah a'buri meke aperek werekma ninom abuk agagusik, it nen he,
“Ninom dogouok o,” iluk ninayoko 'bisukhama, niniki 7 hari nen ninom welagagu iti. Welagagusik o etoma nen o kota Roma wisuogoluk wagagu. 15Wagunem, it akhuni aperek nen,
“It wiriogei,” iluk isukhama, Allah a'buri o Roma meke nen inasuk holhukhasik, ninakorlem it aperek Pasar Apius, laga korlek, aperek o hotel ap huso witluk, noge egarekma o ebe henagan halekma etoma lagoukhama, at Paulus ileken hisalok nen, Allah heagei wakhikhesik nen akla hano ageikhe.
At Paulus o Roma wageikhesik dogolik hagakhikhe wene
16Etoma nen o kota Roma arat wagagumo, it ap koktek nen,
“Paulus asokneat dogoak. Werek korlek, ap tentara meke opakiat nen therogo dogoak,” iluk isukha.
17Itithogon isukhama, niniki henagan welagagusik nen, at Paulus nen, it akhuni Yahudi meke inougi koktek natogosi isuagaluk inayoko 'bisikhe. Inayoko 'bisikhemo, inebe arat natogosi agoukhama, at nen, men yogeisasikhe,
“Nagarlak lak. An nen, akhuni nit meke weak ageikhe hagarinakhidek. Nen, nit nen ninopa lak hagakhe lagoukha iti hak hagakhorek iti meke thogotdiluk weak hagakhidegat. Itithogon mekeat he, o Yerusalem etoma nen nebe ha'anhukhasik, niki herle warogo, akhuni Roma meke iniki baga 'banhukha. 18Itithogon 'banhukhama, it ap koktek nen wene erlo herakhe dogolik,
Ap yi, ebe wasusak hakene ageikhe hagakhidek higi, iluk herle hisalnabuogoluk hagakhukha. 19Itithogon hagakhukha mekeat, it ap Yahudi meke nen,
Dek o, iluk inane obatnerogon isukha iti nen, an nen,
Ukum noba 'bega meke yi, Kaisar nen erlo herago ilokon wasuak o, iluk yogeisasigi o. Itithogon isigi iti an nen ukum ageikhe it nagarlak lak inoba 'bigiluk isigi dek o. 20Nit akhuni Israel meke nen,
Ap ageikhe wisigin o, iluk ninetaiken at oba welagorek etnogo hasigat, niki herle warogo 'banhukhama welagei yi. Iti nenat, hit hinebe noba wagunem wene yokhisagaluk hinayoko 'bigi iti o,” iluk yogeisasikhe. 21Itithogon yogeisasikhemo, it nen,
“Akhuni o Yudea etoma nen surat hat hobasik ninoba la'i ageidek. Nen, nit ninagarlak lak aperek o etoma nen wageikhasik, wene hat hobasik yoknisigik, habok weak igik, i ageidegat o. 22Meke re, wene hat waganhetik hagakhe lagan iti hasik, akhuni o yi ai ti ai meke nen,
Wene iti weak, ugunem anek, ninasuk holhe lago iti nen, wene hat nen eberogonat apekhe lagan meke iti hekaerek nen nit yoknisugunem ninasuk holusak warlok o,” iluk yogokhukha.
23Itithogon yogokhukhasik,
“Nit niniki iti baga nen yabokane hoba wisugun o,” iluk wene warikhukha. Wene warikhukhasik nen, iniki iti baga inebe doalekma, o Paulus welageikhemo oba wagoukha. Wagoukhama, o huben nen logat hibako wene Allah apma 'bisekherek wene etnogo yogeisekhoat welageikhe. Yogeisekho dogolik, it nen Yesus hagakhikhe wene iti eberogonat iluk hutduagaluk, wene Allah nen ninasuk wakhikhe wene Musa nen holal waganogo 'bisikhe etnogo baga men, ap aperek Allah ane yogeisekhe lagoukha meke nen holal waganogo 'bisukha etnogo baga men, inasuk wakhe lageikhe. 24Itithogon yogeisugunem nen, it ebetlake wene iti eberogonat iluk waganhukha. Mekeat, it ebetlake nen waganhidek. 25Itithogon hagakhukhasik, it-it inane inasokhotek tomok thagalik-thagalik kikil wasuogoluk hagakhunem nen, at Paulus nen wene opakiat ageikhe yi yogeisasikhe,
“Wene Allah Agoreke nen ninopa lak Yesaya nen yogeisoagaluk yogokhikhemo, yogeisekhe lageikhe iti, mothogon yogeisasikhemo higi. 26Allah nen,
Akhuni ethoma inoba lalok nen, wene yi yogeisano.
Hinasuk holek dogogun mekeat,
hutukhogon hutdekhe dogogun dek o.
Nen, hinileken 'birogo dogogun mekeat,
hutukhogon hekhe dogogun degat o.
27 # Yesaya 6:9-10 It akhuni yi, inileken higik, inasuk holhik, inakla ebekhik, hagatluk nen,
yabokane inobabut hebelumo an nen hanorinabunogo iluk nen,
it nen inakla puk ageik, inasuk dogou-dogou hagakhik,
inileken puk uagaluk ineram nenat puk-puk hagakhik, hagakhukha o,
iluk Allah Agoreke nen isikhemo, Yesaya nen holal waganhikhe,” iluk yogeisasikhe. 28Itithogon yogeisasikhesik, wene ilokon warogo men yogeisasikhe,
“Itithogon isikhe iti nen, wene yi hinilu asubageik iluk yokhisak,
Allah nen akhuni aperek nen, at nen tilinakherek wene iti, it akhuni itikmanke meke yogeisa loagaluk inayoko 'bekhemo yogeisiliogei. It itithogon yogeisugunem, inasuk hologo hagasugun o, iluk hinilu asubageik iluk yokhisigi iti o,” iluk Paulus nen yogeisasikhe. [ 29Itithogon yogeisasikhemo, it ap Yahudi meke emenogo kikil wakhe dogolik, it-it inane kogat thagalik thagalik kikil wakhukha.]
30At Paulus o Roma etoma dogolik, o halek ageikhe elanma hasik dogeigiluk oko 'bisikhesik, 2 tahun etoma werekma, akhuni doalegat at 'bikhauwogoluk oba waga lagoukha. Wagunem, at nen inebe tha'bokhogonat hano woginakhe lageikhe. 31Itithogon woginakhunem, it aperek nen wenagakhidek werek korlek, at ayuk dek pakhogonat wene Allah nen apma 'bisekherek wene etnogo yogeisigik, ninoe Etagapogot Yesus Kristus hagakhe lageikhe wene etnogo yakulisigik, ekhe lageikhe.

Currently Selected:

La'isasikhe 28: LAIDNT

Highlight

Share

Copy

None

Want to have your highlights saved across all your devices? Sign up or sign in