La'isasikhe 23

1Itithogon meldisikhemo, at Paulus it ap Yahudi Allah hasik wene erlo pilinekhe lagoukha meke inebe natogokhukha emenogo, ileken tek-tek inoba 'bisekhe dogolik,

“Nougi nagarumi. An Allah il oba, haganeat nen hurli yogotak hurli hagakhe lagei iti,

Weak hagakhe lagei, iluk nakla wene munini ebekhe lagei dek. At he, wene nakla thelek, hano hagakhe lagei, iluk apekhe lagei,” iluk yogeisasikhesik nen ageikhe igin hak, 2ap Allah iteerek inoe kok meke etaga Ananias nen, it ap aperek Paulus alilu welagoukha meke nen ape thaukhogon wasuagaluk yogeisasikhe. 3Yogeisasinem, at Paulus nen, ap Allah iteerek kok etnogo yogokhe dogolik,

“O he'bet weak mekeat, hano thalek apusu kut wakharek iti hak, hoado oba anek hano thalek hetaiken pere welagan iti nen, Allah nen hat hasiginat o. Hat nen, wene Allah nen ninasuk wakhikhe wene etnogo hago dogolik, wene iti mothogon hagakhidek, ukum an noba 'biluk hagarumi nen an nasuagaluk yogeisegen iti nenaluk,” iluk yogokhikhe. 4Itithogon yogokhikhemo, it ap etoma welagoukha meke nen,

“Ap Allah iteerek meke inoe kok yi hakla meanetdiluk wenagakhen iti motok weak,” iluk yogokhukha. 5#Keluaran 22:28 Itithogon yogokhukhama, at Paulus nen,

“I. Nagarlak lak. Allah ane holal waganogo 'bekhe dogolik,

Hinougi koktek thekhisik welageikharek meke iti hinakla meanetdisalok wenageisugup o,

iluk holal waganogo 'bisukhama werek mekeat, at ebe Allah iteerek inoe kok werek iluk an nokodekma igima o,” iluk yogeisasikhe.

6Yabokane at Paulus nen, it ap Allah hasik wene erlo pilinekhe lagoukha meke emenogo inebe ebetlake Saduki meke inane waganhe lagoukha meke, nen, ebetlake Farisi meke inane waganhe lagoukha meke, werekma ileken ekagat hugdisalok nen, ane kokhogonat men yogeisasikhe,

“Ap yirani. Nougi nagarumi. An nebe Farisi meke. Nopase lak Farisi meke nenat itago meke welagei. Dogolik akhuni watlageikharek meke yabokane Allah nen eberogonat inilugurinabigin iluk hutdekhe lagei iti nen ukum noba 'begama yi,” iluk yogeisasikhe. 7-8It Saduki meke nen,

“It akhuni watlageikharek meke Allah nen inilugurinabigin degat. Malaikat Allah nen yoko usa'isa agarek meke inebe degat. Mokat degat,” iluk ekhe lagoukha. Nen, it Farisi inane waganhe lagoukha meke nen,

“Tha'bokhogonat iti werek anek o,” iluk pakhogon ekhe lagoukha. Itithogon ekhe lagoukha iti nen, at Paulus nen wene itithogon yogeisugunem, it Farisi inane waganhe lagoukha meke men, Saduki inane waganhe lagoukha meke men, inom it-it inane thagaldiluk, inebe agorogo hagatlagoukha. 9Inane itithogon kogat thagalhe dogolik, it ap Farisi meke Allah ane holal waganek inilu meke emenogo ebetlake melatluk inane puk weak, it Saduki meke emenogo wenageisekhe dogolik, men yogeisasukha,

“Nit ninakla nen, ap yi wene oba dekmaat apekhe lago. At amokareke nen yogokhemo iliogo a? At he, malaikat Allah nen yoko usa'isa agarek meke emenogo ageikhe nen yogokhemo iliogo a. Itithogon eberogonat yogokhunem iliogo mekeat dogosak,” iluk, 10inane kogat thagalhe dogolik, Paulus ebe ebelake nen likhigik, ebelake nen likhigik, wasunogo iluk, it ap tentara opaki doalhe lagoukha meke inoe kok etnogo nen, agarumi it ap emenogo inoba usatluk, Paulus ebe inakla nen tilogo o obatneak halekma etnogo wolok ukuagaluk yogeisasikhe.

11Itithogon yogeisasikhemo wolok ukisukhama, o itinem hibako, ninoe Etagapogot Paulus alilu melasi ukiluk nen, men yogokhikhe,

“Hat nen, wene an nobasik o Yerusalem yoma pakhogon yogeisegen iti hak, yabokane o Roma etoma itithogon pakhogon yogeisa liginat iti nen, hetaiken hapukhogon dogono o,” iluk yogokhikhe.

Paulus ebe wasuogoluk abok palhukha wene

12Hubenke ap Yahudi meke inebe aperek natogotdiluk nen, Paulus ebe wasuogoluk abok palhe dogolik men isukha,

“Nit nen Paulus ebe wakhidek dogolik, i men, hipiri men, nikidek dogoluk nen, arat wakho halok nen nuok o,” iluk hupuk palogo wene palhukha. 13Wim abok itithogon palhukha iti, ap inebe 40 nen, aperek inomat dogolik nen palhukha. 14Itithogon palhukhasik, ap Allah iteerek inougi koktek emenogo men, inarluetek emenogo men, inoba lagoukhasik nen, men yogeisasukha,

“At Paulus ebe aban wakhidek dogolik, yi meke ti meke nugun dek, iluk, hupuk palogo nen iluk wago. 15Halok he, hit ap Allah hasik wene erlo pilinekharek meke hinom nen, at tentara inoe kok etnogo nen, Paulus ebe hinoba wolok wisuagaluk surat men iluk waganogo la'ino,

Nit nen Paulus itema thekekhogon waganuagaluk ebe ninoba wolok wetnogoluk kino yokhekho, iluk la'ino. Itithogon la'umo, at nen eberogonat thalek hinoba wolok wisigiluk wagunem, nit Paulus ebe wasuogoluk holagarlem thaldiluk dogogun o,” iluk 16abok itithogon palhunem, at Paulus eak meke ageikhe etoma dogolik asuk holhikhe. Asuk holiluk, o obatneak halekma etnogo lageikhesik nen, Paulus husupi yogosi ukisikhe. 17Husupi yogosi ukisikhemo, at Paulus nen ap tentara meke kok ageikhe ebe waikhikhesik, men yogokhikhe,

“Noe. Ap elege yi nen, hinoe kok etnogo wene ageikhe yogosusak werek o. Halok he, hat nen at oba wolok lan o,” iluk yogokhikhe. 18Itithogon yogokhikhemo, at nen elege etnogo wolok nen, ap tentara inoe kok etnogo oba lageikhesik men yogokhikhe,

“Paulus iki herle warek werek etnogo nen wanekhesik nen,

Elege yi nen wene at ageikhe yogosusak meke werek o, iluk hoba wolok wisuagaluk nayoko 'bekhemo wolok wagei yi,” iluk yogokhikhe. 19Itithogon yogokhikhemo, ap tentara inoe kok etnogo nen elege etnogo iki hak-hak wolok inasokne lagoukhasik men yogokhikhe,

“Wene nena wene yoknesigiluk wagan. Yoknom,” iluk hinok waganhikhe. 20Hinok waganhunem, at nen,

“It ap Yahudi meke inane dapukhogon ekhe dogolik, Paulus itema thekekhogon waganuogoluk thalek, hat nen huben ebe wolok, it ap Allah hasik wene erlo pilinekharek meke natogorlek werekma inoba lanok nen iluk kino yokhesugun ega. 21Meke re, hat nen wene it ega iti, hologo hagakhun. Ap inebe 40 nen, aperek inomat, dogolik nen Paulus ebe wasuogoluk abok palhasik elokhoma thalek dogogun ega o. It nen,

Paulus ebe wakhidek dogolik, hipiri men, i men, nikidek dogoluk, arat wakho halok nen nugun o, iluk hupuk palhasik werek. Itithogon dogolik, yogotak it nen,

Wene at nen oko nikithogon yoknisagein, iluk thekharek werek o,” iluk yogokhikhe. 22Itithogon yogokhikhemo, ap tentara inoe kok etnogo nen elege etnogo men yogokhikhe,

“Hat nen, wene etnogo arat 'bualogo at yogokhi, iluk, it aperek yogeisugun o,” iluk asuk warogo apuke la'isikhe.

Paulus ebe o Kaisarea ap Feliks oba la'i agoukha wene

23Itithogon hagakhikhesik, ap tentara opaki doalhe lagoukha meke inoe kok etnogo nen, ap koktek at apma welagoukha meke inebe pere waisasukhasik nen, men yogeisasikhe,

“Hit nen ap tentara meke inebe 200 men, kuda oba inebe yasukhogo dogolik wim yakharek meke inebe 70 men, sikhe thege baga inakharek meke inebe 200 men, inom doalegat natogorinabiluk nen, yogotak hibako jam 9 o Kaisarea lobageik nen iluk wenago 'bisano. 24Wenago 'bisalok, at Paulus ebe tilogo kuda oba yasutdiluk, ap kok Feliks gubernur etnogo oba wolok lobageik nen, kuda at hasik ageikhe 'bisano,” iluk yogeisasikhe.

25Itithogon yogeisasikhesik, surat men iluk palogo 'bisikhe,

26“Kok gubernur Feliks noe. An Klaudius Lisias nen surat yi palogo hoba la'i agei iti. 27Ap iti ap Yahudi meke nen ha'iluk wasugun hakma, akhuni nen,

At ebe o Roma aierek meke, iluk yoknekhama, an nen nagarumi tentara meke inayoko 'bigirik wogosik lagarik ebe tilhi o. 28Ebe tilhirik,

Nikithogon hagakhemo nen wene oba 'biliogei, iluk nilu asik nen iluk, ap it meke Allah hasik wene erlo pilineriogei meke inoba wolok lagei. 29Wolok lagarik, erlo herakho meke re, at ebe wasusak hakene hagakhidegat. Nen, iki herle wasusak hakene, hagakhidegat higi. Ukum it nen oba 'bega iti, it Yahudi meke hagakharek meke hasigat oba 'begama o. 30Meke re, akhuni nen,

Ap Yahudi meke nen Paulus ebe wasuogoluk abok palhama o, iluk husupi yoknesi ageikhama nen, ebe hat hoba la'i agei iti. La'i agarik nen, yabokane it ap ukum oba 'biliogei werek, hat hilhanem isuagaluk inasuk warogo la'isa ageiat iti o,” iluk at Feliks nen surat palhikhe.

31Palhikhemo nen, agarumi tentara meke emenogo nen Paulus ebe wolok wisuagaluk inayoko 'bisikhe hagat, wolok wagoukha. O itinem hibakoat, Paulus wolok, o Antipatris wagoukha. 32Wolok wagoukhasik nen, it kuda oba wageidek meke nen,

“Hit kuda baga yasukhogo wagap meke halok, Paulus ebe wolok lani,” iluk la'isalok nen, it suguluk inapuke o kota Yerusalem o obatneak halekma etnogo lagoukha. 33Lagoukhama, it wolok wagoukha meke emenogo o Kaisarea wagoukhasik nen, surat waganek etnogo ap kok gubernur wogokhukhasik nen, Paulus ebe inom wogokhukha. 34Wogokhukhama, surat waganek etaga thalhikhesik nen, Paulus oba hinok waganhe dogolik,

“Hat hai o koma nogo,” iluk hinok waganhikhesikmo, at nen,

“An nai o propinsi Kilikia meke,” iluk yogokhikhe. 35Itithogon yogokhikhemo, at nen,

“Halok he, ap ukum hoba 'biliogei werek iti inebe yabokane wageikha halok nen hitema waganigin o,” iluk yogokhikhesik, at agarumi nen, Paulus ebe o kok at Herodes halhikhemo iti kola'iluk therogo dogoagaluk yogeisasikhe.

Currently Selected:

La'isasikhe 23: LAIDNT

Highlight

Copy