La'isasikhe 18
18
At Paulus o Korintus wageikhesik dogolik hagakhe lageikhe wene
1Itithogon hagatdiluk, at Paulus o kota Atena etoma thogotdiluk o kota Korintus wageikhe. 2Ebe aban wageidek werek korlek, ap kok Klaudius nen,
“Akhuni Yahudi meke inebe o kota Roma dogosak dek. Motogat horla dukhuak,” iluk wene palhikhemo nen, ap Yahudi meke ageikhe etaga Akwila. Ebe o Pontus itaklageikhe meke. Age etaga Priskila ipisagat, o Italia nen it tak o Korintus kerat lagoukhasik werekma, at Paulus yabokane wageikhesik hisa ageikhe iti. 3It Akwila Priskila ipisagat oko horlauwogoluk, o su ai meke 'bugukakhe lagoukha. At Paulus oko horlagaluk itithogonat 'bugukakhe lageikhe iti nen, it inoba wageikhesik dogolik, inomat 'bugukhakhe lagoukha. 4Itithogon inom 'bugukakhe dogolik, hibiku-yogoku iniki 7 baga Allah hasik werlegat dogolik sembayan uogoluk hagakhunem, o akhuni Yahudi meke sembayan ekhe lagoukhama ukiluk, it akhuni Yahudi meke dek, Yunani meke dek, Yesus ane waganuagaluk inakla kagalhe lageikhe.
5Inakla kagalhunem, it Silas Timotius ipisak o Makedonia nen wagoukhama, at Paulus ninat meke ageikhe hagakhidek, wene itiat yogeisekho motok welageikhe. It akhuni Yahudi meke men yogeisasikhe,
“Allah nen Kristus la'isigin iluk wene watnisasikhe etnogo, ebe Yesus wageikhe itiat o. An nilu,” iluk pakhogon yogeisekhe lageikhe. 6Itithogon yogeisugunem, it nen,
“Dek o. Weak ekhe lagan o,” iluk abok weak palhe lagoukhama, at Paulus etnogo nen,
“An noba thelek o,” iluk u hak, asu itikmanke meke amumul hisalogo usa'isikhesik nen, men yogeisasikhe,
“Hit hinekaerek nen nuk akegep halok he, hinoba dopok o. An noba dek o. Hurli yogotak hurli nen, an akhuni itikmanke meke wene yogeisa ligin o,” iluk yogeisasikhesik, 7it o etoma here'isalok dukhisikhesik nen, ap itikmanke meke Allah ane waganhikhe meke etaga Titius Yustus iti aila lageikhe. At aila iti, o it akhuni Yahudi meke sembayan ekhe lagoukhama aliluat halek welageikhe. 8Etoma werekma, ap Krispus, o akhuni Yahudi meke sembayan ekhe lagoukhama iti kok iteerek welageikhe meke ebe men, a'buri men,
“Wene iti eberogonat,” iluk inetaiken ninoe Etagapogot oba hakotdisukha. Hakotdisukhama, it akhuni o kota Korintus meke aperek inebe doalegat wene holiluk nen,
“Eberogonat,” iluk inetaiken ninoe Etagapogot oba hakotdisukhama, inom ima usa'isasukha. 9-10Itithogon hagakhukhama, iniki ageikhe o hibako ninoe Etagapogot nen Paulus a'bikaka baga wene men yogokhikhe,
“Hayuk agun. An thekharik motogat welagei o. O yoma an na'buri inebe doalegat werekma, akhuni aperek nen weagathabuogoluk yigithogon tigithogon ageikhe hagathabugun dek o. Halok he, huk ageidek wene yogeisekho motok dogono,” iluk yogokhikhe. 11Itithogon yogokhikhe iti, satu tahun welageikhesik nen, thut 6 ageikhe inom Paulus ebe o etoma huk dogolik, Allah ane yakulisekho welageikhe.
12O propinsi Akhaya etoma ap kok Galio gubernur dogoagaluk meldisukhama werekma, it akhuni Yahudi meke inebe natogotdiluk, Paulus ebe iniki hakhasukhasik nen, itema waganuagaluk ap ukum inoba 'bigik, kokhik, hagakharek meke inoba wolok lagoukha. 13Ebe wolok lagoukhasik nen ukum oba 'bekhe dogolik, men isukha,
“Ap yi nen, wene Allah nen ninasuk wakhikhe wene etnogo here'isalok, Allah ebe anek hogorakhe dogolik, ninat meke hagakhe dogoagaluk inakla kagaliogo meke wolok wago o,” iluk yogeisasukha. 14Itithogon isukhama, at Paulus nen wene oko igin hakma, at Galio nen akhuni Yahudi meke yogeisekhe dogolik,
“Hit akhuni Yahudi meke yirani. Ukum oba 'begesip wolok wagap yi, nit pemerintah Roma meke ninane thagalogo 'biluk weak kogat hagakhemo nen wolok wetlepma,
Hanoat yoknesi agap iluk, hit nen ekhe korlek nasuk holile. 15Meke re, wene yi hit hinane hasik, inetaga hasik, hit hagakhethep meke hasik, oba 'begesip wolok wagasipmo, hit hinoba dopok nen moretdusak o. Wene itigirlik meke, an nen moretdusak dek. Na'it,” iluk yogeisasikhe. 16Itithogon yogeisasikhesik, o ukum inoba 'bigik, kokhik, hagakharekma etoma nen mukhogo ula'isasikhe. 17Ula'isugunem, it akhuni aperek tha'bokhogonat nen, ap etaga Sostenes, o akhuni Yahudi meke sembayan egarekma iteerek kok welageikhe meke iti, ebe hakhasukhasik nen, o ukum inoba 'bigik, kokhik, hagakhe lagoukhama etoma ebe tugi wakhukha. Itithogon wakhe korlegat at Galio etnogo nen irlirli waganhidek obakhaniniat huk ageikhe.
Paulus apuke o Antiokhia lageikhe wene
18At Paulus iki doalegat Allah a'buri o kota Korintus meke inom etoma welageikhesik nen, yabokane it o etoma heagei warogo 'bisalok, he Priskila agun Akwila ipisak inomat wogosik, imake ku warogo o Siria luogoluk hagakhukha. Hagakhukhasik, o kota Kengkrea etoma aban lageidek dogolik,
“An Allah nipisak hunik welago, iluk nisi uanat hurli iti hurli dogoagaluk thogotdigin,” iluk thogotdisikhesik welageikhe meke,
“Hurli yi hurli arat,” iluk tha'bokhogon palhikhe. 19Isi itithogon palhikhesik, o etoma nen o Efesus lagoukha. Lagoukhasik nen, it Akwila Priskila ipisak etoma 'bisalok, o akhuni Yahudi meke sembayan egarekma ukisikhesik nen, it Yahudi meke etoma welagoukha meke, wene at nen inakla kagalogo yogeisugunem, it nen oko yogokhik, it nen at yogokhunem, at nen oko yogeisigik, hagakhe lagoukha. 20Itithogon hagakhe lagoukhasik, it nen he,
“Hat yoma ninom hiki doalegat dogoluk nen lanok o,” iluk hakhauwogoluk hagakhukha meke re, at nen,
“Dek o,” isikhe. 21Itithogon isikhesik lagaluk hagakhe dogolik men yogeisasikhe,
“Hit egep iti Allah nen hano iluk apekhe halok he, an yabokane hinoba wisigin o,” iluk o Efesus etoma nen imake ku warogo o Kaisarea lageikhe. 22O Kaisarea lageikhesik nen,Allah a'buri o Yerusalem meke heagei warinabi lageikhesik nen, yabokane apuke o Antiokhia wageikhe. 23O Antiokhia wageikhesik welageikhesik nen, yabokane o propinsi Galatia men, Frigia men, waga dogolik etoma it akhuni Yesus ane waganhukha meke inetaiken ago watdisilik nekhe lageikhe.
Apolos o Efesus dogolik wene yogeisekhe lageikhesik, yabokane o Korintus wageikhesik hagakhe lageikhe wene
24Ap Yahudi meke ageikhe etaga Apolos. Ebe o Aleksandria nen itaklageikhe meke, o Efesus wageikhesik welageikhe. Ane hano motok yogeisekhe dogolik, Allah ane holal waganek etnogo ilu motok welageikhe. 25Werekma, it aperek nen, ninoe Etagapogot oporlik lageikharek wene iti yakulikhukhama waganhikhesik nen, ima usa'isegarek wene iti, Yohanes nen ima usa'isekhe lageikhe iti anek ilu welageikhe. Itithogon mekeat, Yesus ane obatnerogon yogeisigik, mothogon yakulisigik, hagakhe lageikhe. 26Yesus ane waganhikhesik nen, o it akhuni Yahudi meke sembayan ekhe lagoukhama ukisikhesik, ayuk dek dogolik, wene pakhogon yogeisekhe lageikhe. Yogeisugunem, it he Priskila agun Akwila ipisak inasuk holhukhasik, ebe wolok inaila lagoukhasik nen, Allah nen at oporlik laga dogoagaluk akla apekherek wene iti hutukhogon yakulekhe lagoukha. 27Yakulekhe lagoukhama, o Akhaya wisigiluk hagakhikhemo, Allah a'buri o Efesus meke nen, wene holal waganogo it akhuni o Akhaya meke Yesus ane waganhukha meke inoba la'ekhe dogolik, men isukha,
“Apolos hinoba waga iti hanorogo waganino,” iluk holal waganogo wogokhukhama wolok lageikhe. Lageikhesik, it akhuni o Akhaya meke Allah obabut hano nen wene eberogonat inakla apalok waganhukha meke doalegat yomageisekhe lageikhe. 28Yomageisekhe dogolik, it Yahudi meke inom akhuni inil oba wene palhe dogolik, at ane hano iti nen, it inane obatne degetdiluk at ane obatne ageikhesik nen, Allah ane holal waganek etnogo baga yogeisekhe dogolik,
“Allah nen, Kristus la'isigin iluk abok yoknisasikhe etnogo, ebe Yesus la'i ageikhe itiat o,” iluk pakhogon yogeisekhe lageikhe.
Currently Selected:
La'isasikhe 18: LAIDNT
Highlight
Share
Copy
Want to have your highlights saved across all your devices? Sign up or sign in
