La'isasikhe 12
12
Allah a'buri yi aik ti aik kokhogon hagarinakhe lagoukha wene
1Itithogon hagakhe lagoukha itinem he, ap etagapogot Herodes nen Allah a'buri meke aperek weagarinabigiluk hagakhikhe. 2Itithogon hagakhikhesik, at Yohanes oe Yakobus wasuagaluk agarumi yogeisasikhemo karok oba ebe motok wakhukha. 3Itithogon wakhukhama, at Herodes akla nen,
“An itithogon hagakhe lagei iti baga, it ap Yahudi meke inakla motok arleken akhega o,” iluk, yabokane Petrus iki herle wasuagaluk agarumi yogeisasikhemo, pesta roti hikhidek meke nasi korlek, at iki herle wakhukhaat. 4Itithogon wakhukhasik, o akhuni iniki herle warogo 'bisegarekma 'bi lagoukha. 'Bi lagoukhasik nen, ap tentara meke inebe 16 dogolik, alebat inebe 4 nen therogo welageik, yabokane inebe 4 nenat therogo welageik, hagakhe dogoagaluk inayoko 'bisikhesik nen, at Herodes akla nen men apasikhe,
“Pesta etaga Paskah, nugun etnogo nalok nen, Petrus wolok akhuni inil oba ukum oba 'bigiluk nen, iki herle waregat dogoak o,” iluk akla apasikhe. 5At Petrus iki herle warogo kola'iluk werek korlek, it Allah a'buri nen sembayan at obasik huk ageidek hunik-hunigat inetaiken oba nenat motok isi lagoukha.
Allah nen Petrus iki herle hisalogo ula'isikhe wene
6Sembayan itithogon isi korlek, at Herodes nen huben hak Petrus ebe waganogo akhuni iniki baga 'bigiluk akla apasikhesik, aban werek korlek, o itinem hibako, ap tentara meke emenogo, it inebe aperek holagapema therogo werek korlek, inebe pere Petrus iki ebelak ebelak herle warek noge isi korlek, it abel ebelak ebelak dogolik herle ilugun iniki baga herogo welagoukha. 7Itithogon werekma, malaikat ninoe Etagapogot nen yoko usa'isa agarek meke emenogo ageikhe koma nen wageikhe heat etoma melasi usa'agunem, o kakok agorekma etnogo motok lia ageikhe. Itithogon lia ageikhemo, at malaikat etnogo nen he, Petrus iluk asuagaluk aborlogotdekhe dogolik, men yogokhikhe,
“Ibat hiluk asin,” iluk yogokhikhemo melagunem, pisuemaken etnogo iki baga nen abusagat hiakhogon usasikhe. 8Usasinem, at malaikat etnogo nen, men yogokhikhe,
“Therlok ikhik, hisok agot ikhik, hagasin o,” iluk yogokhikhe. Itithogon yogokhikhemo ikhikhemo, at malaikat etnogo nen,
“Su itikmanke meke ikhogo nen, noporlik eme o,” iluk yogokhikhemo 9oporligat dukhisikhe. Dukhisi dogolik, at malaikat etnogo nen eberogonat hagakhikhe mekeat he, at Petrus obakha palek dogolik,
“Na'bikaka hekhe lagei he a,” iluk akla apasikhe. 10Ap tentara meke inebe akman therogo welagoukha meke emenogo werek korlek, inaliluke dukhigik, aperek inom inaliluke dukhigik, lagoukhasik thu thikmanke o silimo dukhegarekma ebe pisuemaken oba hagarekma dukhuogoluk hagakhunem, thu abusagat hualageikhemo, dukhisukha. Dukhisukhasik nen, holagarlemke laga dogolik, at malaikat etnogo Petrus thogotdiluk koma lageikhe heat nalageikhe.
11Nalageikhemo, at Petrus obabut hebelatluk nen, akla men apasikhe,
“I. At Herodes obatne baga haknarek werekma, it akhuni Yahudi meke tha'bokhogonat nen,
Itithogon hagasugun, iluk nabok palhe korlegat, malaikat ninoe Etagapogot nen eberogonat yoko usa'i agama herle hisalnakhe higi,” iluk hutdisikhe. 12Itithogon hutdisikhesik nen, he Maria ap etaga Yohanes Markus iti agossa aila etoma akhuni inebe doalegat natogokhukhasik nen, sembayan isinem lageikhe. 13Lageikhesik nen, thu puputhasinem, it emenogo nen,
“Tha nen puputhiliogo,” iluk horlak inatuaneke meke etaga Rode iti 'bikha dukhi ageikhe. 14Ileken 'bikha dukhi ageikhesik, Petrus ane ekagat hutdiluk, akla arleken nen, thu hualhigidegat here'isalok pirlirli ukisikhesik nen,
“Petrus holagapema wagasik werek o,” iluk yogeisasikhe. 15Itithogon yogeisasikhemo, it nen,
“Eiye. Horlak yi hunu-hunu aga higi,” iluk yogokhukhama, at nen,
“Dek o. Eberogonat o,” iluk ane kikarogonat isikhe. Itithogon isikhemo, it nen,
“Halok he, iti malaikat Allah nen yoko usa'isa agarek meke emenogo, ageikhe Petrus hasik usa'i aga meke he a,” iluk isukha. 16Itithogon isi korlek, at Petrus ebe holagapema dogolik, iki nen thu puputhasi motok welageikhe. Puputhasi motok welageikhemo nen, it emenogo nen thu hualogo inileken ulakhasukha nen, Petrus werekma hasukhasik, hogorakhukha. 17Hogorakhunem, at nen,
“Hinane ugup o,” iluk iki lia'isikhe. Iki lia'isikhesik nen,
“Niki herle warek werekma, ninoe Etagapogot nen hisalogo ula'ani agama wagei o,” iluk wene pilinerogo yogeisasikhe. Itithogon yogeisasikhesik nen,
“Yakobus men, ninagarlak lak nerugi Allah a'buri aperek men, wene yi yogeisa lano,” iluk yogeisalok nen, at ebe o nekalokma lageikhe.
18Itithogon dukhisikhemo, noge iluk hubenke o wi isikhemo nen, it ap tentara Petrus therogo welagoukha meke emenogo nen,
“Petrus etnogo ebe ka laga,” iluk inaneak kogat thagalhukha. 19Inaneak itithogon thagalhukhama, at kok Herodes etnogo nen Petrus ebe herasuagaluk ap aperek yogeisasikhemo herakhukha meke, ebe degat nen he, it ap tentara therogo welagoukha meke emenogo initema waganiluk nen, inebe motok inasuagaluk agarumi aperek inayoko 'bisikhe. Inayoko 'bisikhemo inebe inakhukhama, at Herodes ebe o Yudea nen, kota Kaisarea dagei ageikhesik welageikhe.
At Herodes ebe watlageikhe wene
20O etoma dogolik, it akhuni o tirus men, Sidon men, inobasik at Herodes etnogo akla aga apigat dageisikhe. Akla aga apigat dageisikhemo, it tha'bokhogonat inebe dapukhogon nen,
“O nit werekma yoma, hipiri ap kok Herodes werekma nen oko palogo hano waganhorethekma,” iluk ap etaga Blastus, Herodes atuaneke dogolik yi meke ti meke at ai meke iki baga welageikhe meke iti oba lagoukhasik, it werekmake asuagaluk, at tak akla kagalhukha. At tak akla kagalhukhasik nen, yabokane Herodes inom dapuluogoluk oba ukisukhasik yogokhukha. 21Yogokhukhama, at Herodes nen,
“Niniki iti baga nen dapulugun,” iluk iki wenago wene warisasikhe. Wene warisasikhe baga tak-tak ageikhemo, at nen su ap koktek ikharek meke ikhikhesik, wene inasuk wakhe dogolik o talek oba hurek welageikhe baga hurek lageikhesik, inasuk wasigiluk wene erlo ula'isikhe. 22-23Itithogon ula'isikhesik inasuk wakhunem, it akhuni doalegat emenogo nen,
“Ap yi, ane akhuni inane hakene iliogo dek. At he, walhenak welagarek meke ane hakene iliogo,” iluk hogorakhukha. Itithogon hogorakhukhama eranogoat malaikat ninoe Etagapogot nen yoko usa'isa agarek meke emenogo ageikhe usa'ageikhesik,
“At Allah at hogorakhidek ekaerek hogorakhasikhe iti,” iluk Herodes ebe wakhikhemo, wako akla ukhatdisikhemo ebe motok watlageikhe.
24Itithogon hagatlageikhemo, Allah aneat wiak-wayakhogon hagatlageikhesik, kok ageikhe. 25Itithogon kok aga korlek, it Barnabas Saulus ipisak nen, akhuni Yerusalem meke arat yomageisalok nen, inapuke wisuogoluk, ap etaga Yohanes Markus etnogo wolok wagoukha.
Currently Selected:
La'isasikhe 12: LAIDNT
Highlight
Share
Copy
Want to have your highlights saved across all your devices? Sign up or sign in
