MAREKÙT 1

Yohanet en ima pelaginapi logolìk hagatì lagaike wene

(Mat.3:1-12; Luk.3:1-18; Yoh.1:19-28)

1Hano wene, Yesùt Karìsùt, Ala aput en hagatì lagaike wene yogohisak. 2#Mal.3:1 Wene atì re, ero ba re, at Yesaya Ala ane yogoisìkì lagaike mene a'nogo nen helal waganogo hesike hagat haga'lagaike. Atì'nogo helal wanhì logolìk mel isike:

“At Ala nen he,

Naput e. Hat hobuk kwe legeinkwe, hakwe yakhagakì logouagalùk ap aike ayoko hìlìk alebagìk lakhìgìma o.

3 # Yes.40:3 At ebe o leimo apùnì le'ma atoma ane wai ìkì logolìk he:

Eiga! Ninoe Etagepogot wesiginkwe, kwe hanorogo tegelhìk, kolo mene higit hogo yatìk, ìkì logoni o, ìlùk waisìlì'logo,”

ìlùk isikomo re, at Yesaya nen helal waganogo hesike atì. 4Wene helal waganek werek atì higit hogoat, at Yohanet ebe o leimo apùnì le'ma wagaike atì. Wagaikesik he, ima pelaginapìk, wene yogoisìgìk, ìkì logolìk, mel ìkì lagaike:

“Wene hinoba mene Ala nen sagalogo legetsoagalùk he, hit weak hagatì lagep mene atì heraksìlìk hinoabùt hebela'ni. Hinoabùt hebelasumo, an nen ima pelakhinapì logogin o,” ìlùk yogoisìkì lagaike. 5Atì'nogo yogoisikenem he, it apùnì o propinsi Yurea aike obogat mene inom, o kota Yerusalem mene inebe obogat inom, at oba atogosi waga lagaukwa. Atogosi wìrìk he, yì weak tì weak hagatì lagaukwa mene hukalogo heraksikenem, at en i Yoretan ima pelaginapi lagaike. 6Atoma pelaginapo logolìk warn unta esi mene ìkogo asu laberìgìk, ogat mene nokologo agauak hagarogo pagaluk ikìgìk, ìkì lagaike. Atì'nogo ìkì logolìk, apùrùk pulue mene nìkìk, kin amusu ekama mene nìkìk, ìkì lagaike. 7Atìgìnhi logolìk, mel yogoisìkì lagaike:

“An nebe yekerek nomame lek mene wagì yì, ap kain omame apik mene hobuk wesigin o. At ebe kain omame apik atì nen he, at esok agùt yelik mene an nen neitep awì yakhìlìk en hikalusak he, mea o. 8Nen, an nen, we, ima pelakhinapì lagì meneat he, at ebe wìrìk en he, ima pelakhinabu hak, Ala Areagùn hinoba pelakhei wesigin o,” ìlùk yogoisìkì lagaike.

Yohanet en Yesùt ima pelapike wene

(Mat.3:13-17; Luk.3:21-22)

9At Yohanet en wene atì'nogo yogoisikenem he, Yesùt o Kalilea tokwe etage Nasaret en oba pisikomo re, i Yoretan ima pelapike. 10Ima pelapikomo aik oba wùlìbi wesigin ha'ma re, Ala Areagùn pogot healogo sùe pel hake ot oba labok i pi waganem eileken hasike. 11Eileken hasikomo re, Ala ane pogot oba nen mel isike:

“Hat hebe an naput netaùken hutik mene. Hat hesik na'la hai hakìgìrek o,” ìlùk ane pelakhei wagaike.

Ibilit en Yesùt a'la kagaligìlùk waga lagaike wene

(Mat.4:1-11; Luk.4:1-13)

12Ala ane pelakhei waga kolek aremnogoat, Areagùn nen he, Yesùt o leimo apùnì le'ma wolok lagaike. 13Wolok lagaikomo re, o leimo apùnì le'ma atoma 40 hari werek kolek, Ibilit en a'la kagaligìlùk oba waga lagaike. O atoma re, paik aua were'ma malaikat Ala nen pogot oba nen yoko pelaksa wagarek mene amanogo aike pi wìrìk he, serogo welagaukwa.

Yesùt o Kalilea wìrìk, Simon lak inayoko hesike wene

(Mat.4:12-22; Luk.4:14-15, 5:1-11)

14Hobuk he, Yohanet a'nogo eki hele wasukwasi'mo re, at Yesùt o Kalilea tokwe lagai wìrìk he, Ala ane hano wene a'nogo yogoisìlìk nìkì lagaike. 15Yogoisìkì logolìk he, mel ìkì lagaike:

“O Ala awe a'ma hikegein a'nogo arat hikegein o. Halok he, hit weak hagatì lagep mene heraksìlìk hinoabùt hebelogo hano wene yì eberogoat ìlùk hùtheni o,” ìlùk yogoisìlìk nìkì lagaike. 16Yogoisìlìk nìkì logolìk he, i Kalilea yekele'ma esakokwe laga logolìk, Simon agot Atereat eperak ninhùp-nanhùbat ikanat wanharesi'mo nogo nen he, ikan wanuogolùk su yoge su ima pelapenem eileken lagisasike. 17Eileken lagisìlìk he, mel isike:

“Ikan wanhesep atì hak, apùnì atì'nogoat woginabìk nìkì logouageip en, yakùlhisak en an nopolik we'ni o,” ìlùk yogoisasike. 18Yogoisasikomo re, aremnogoat inasu yoge su atoma heraksalùk he, at opolik lagaukwa. 19Opolik lagaukwama horogat lagaukwasik he, Yesùt eileken lakhasike hake, ap Sepeteùt againapùrì Yakobùt agot Yohanet eperak inom i so a'la logolìk inasu yoge su hìkìn katenem eileken lagisasike. 20Eileken lagisìlìk he, aremnogoat waisasike. Waisasikomo re, inopase inom ap oko wogisagalùk inayoko hesike mene inom, so a'la hisalùk he, Yesùt opoligat lagaukwa.

Ap aike mokareke oabùt weak mene a'la kìlì'mo Yesùt en henogo wulakhesike wene

(Luk.4:31-37)

21It amanogo Yesùt opolik lìlìk he, o Kaperenagùm kisukwa. Kisukwasik he, ineki sabìt oba Ala hesik welegat logolìk, o apùnì Yahuri mene sapan egarek oba kìlìk he, Yesùt en wene yakùlisasike. 22Yakùlisikenem he, it apùnì amanogo nen he, mel isukwa:

“Ap Ala ane helal waganek esewerek mene nen yogonisagarek hake ìlì'logo lek o. We, at en he, wene ebe esewerek mene nen u hak ìlì'logo atì, nayùk e,” ìlùk hogorasukwa. 23Atì'nogo hogoratì lagaukwa atì sat he, ap aike mokareke oabùt weak mene a'la kisikomo welagaike mene, it apùnì Yahuri mene sapan egarek oba inoba kisike. Kìlìk he, ane hùkorogo mel isike:

24“Yesùt aua Nasaret mene yì! Hat en nìkì'nogo haga'ninabigìlùk wagen. Nit weaga'ninabigìlùk wagen a? Hat hebe re, Ala okawerek hesik menhagaikesik lakhagei wagama wagen atì, an nen hùthagagì o,” ìlùk ane hùkorogoat yogosike. 25Atì'nogo yogosike meneat he, at Yesùt en wenagatì logolìk,

“Hane. Ap yì a'la nen henogo wùlìbi lan o,” ìlùk yogosikomo re, 26mokareke oabùt weak mene a'nogo ap a'nogo a'la nen Wùlìbigìlùk ìkì logolìk, ap a'nogo oak lei'leigethìkì logolìk ane wai ìlìk ìlìk wùlìpike. 27Wùlìpikomo re, it apùnì amanogo nen mel isukwa:

“At ane ike atì nìkìnìk. Wene atì ket hùnogoat wene esewerek en yakùlnisìlì'logo hìgì. At en mokareke oabùt weak mene wenagisikenem he, at ane inasuk hologo hagarì'lùgì atì nayùk e!” ìlùk hogorasukwa. 28Atì'nogo hogora'luk he, at Yesùt abok wolok o Kalilea tokwe ya ta atoma obogat hepok lagaukwa.

Yesùt en Simon agwe agosa mel, apùnì he'nakìt logolegat mel, ou hagarinapike wene

(Mat.8:14-17; Luk.4:38-41)

29At Yesùt ho, Yakobùt Yohanet eperak ho, agoromì aike inom, o apùnì Yahuri mene sapan egarek oba nen wùlìbi wagaukwasik he, Simon ho, Atereat ho, inaua lagaukwa. 30Inaua lagaukwasik he, ouma kisukwa re, Simon eamal oba ou agaken apik en weitek were'ma kisukwa. Kikenem aremnogoat be, it an he:

“He yì yì'nogo nen werek o,” ìlùk Yesùt yogosukwa. 31Yogosukwama re, he a'nogo era'lu horok hogo lìlìk he, eki hagasogo menhesike. Menhikenem he, oba ou agaken a'nogo lek agaike. Ou lek agaikomo re, at enat leberisìkì lagaike. 32Atì'nogo leberisiko were'ma, himaganekokwe mo kopok hogo lagaikesi'mo nen, it apùnì nen he, it aike ou wanhì lagaukwa mene inom, mokareke inoabùt weak mene ina'la kìlìk welagaukwa mene inom, wogisek Yesùt oba wagaukwa. 33Waga kolek he, apùnì aike o atoma mene obogat he, olilu atogosi wagaukwaat. 34Atogosi wagaukwama re, it yì ou tì ou wanhì lagaukwa mene inebe logolegat hano hagarinapìk, mokareke inoabùt weak mene inebe logolegat apùnì ina'la kìlìk were'ma henogo wulaksìgìk, isike. Ikenem he, it mokareke inoabùt weak mene amanogo nen at ebe hùthasukwa atì nen he,

“Hinane usak lek o,” ìlùk wene palhike.

Yesùt en o sili welekkwe hann wene yogoisìlìk lagaike wene

(Luk.4:42-44)

35Atì'nogo hagarinapì lagaikesik he, nogo isikesik o etawì wekelìk waga kolek eluk a'lùk wùlìpike. Wùlìpikesik he, o leimo apùnì le'ma lagaikesik sapan ìkì lagaike. 36Atì'nogo i lagaikomo re, it Simon agaiya'lak inom hobuk Yesùt herarìk lagaukwa. 37Herarìk laga lagaukwasik, ebe were'ma herasukwasik, mel isukwa:

“Apùnì obogat en, herakhabì'lùgì o,” ìlùk yogosukwa. 38Yogosukwama re, at en he, mel isike:

“Ninera'lukwe o sili pokwe makwe yoma wene hano wene yogoisìlìk lagalùk wagì atì nen he, yogoisìlìk lùok en we'ni o,” ìlùk yogoisasike. 39Yogoisasikesik he, o Kalilea tokwe apùnì Yahuri mene sapan egarek obakwe kìlìk he, wene hano wene a'nogo yogoisìgìk, mokareke inoabùt weak mene apùnì ina'la kìlìk were'ma henogo wulaksìgìk, ìlùk laga lagaike.

Yesùt en ap aike oumo henako hake mene hagasike wene

(Mat.8:1-4; Luk.5:12-16)

40Atì'nogo hagarinabìk laganem he, ap aike oumo henako hake inayùk mene oba welagaike mene Yesùt oba wagaikesik he, eitep awì yagasogo, hai watì logolìk he, mel yogosike:

“Noe hallabok e. Hat hano haga'nabigin akegen halok he, elok hano haga'nabusagat o,” ìlùk ane elageik ane yogosike. 41Yogosikomo re, at Yesùt en, at ebe etawì arìk he, eki hakìlìk mel isike:

“An nen hano hagathabigìlùk ìkì lagì. Halok he, hoba hano ame o,” ìlùk yogosike. 42Yogoto kolek, aremnogoat oumo henako hake a'nogo lek arìk oba hano agaike. 43Hano agaikomo re, at Yesùt en ebe lakheigìlùk ane keirogo asuk watì logolìk, 44mel yogosike:

“Yesùt tì'nogo haga'nape ìlùk, apùnì aike motok yogoisagùn o. We, ap Ala esewerek mene eileken heoak en oba lìlìk, mel haga'no. At Musa nen ìkì logolìk he,

Apùnì inoba hano arìk, Ala hesik aike hisano, ìlùk isike higit hogoat,

Oba hano agama, ìlùk hùtheoak en, Ala hesik aike hisa lamo,” ìlùk yogosike. 45Atì'nogo yogosike meneat he, at a'nogo nen apùnì yùgùnat yogoisìkì logolìk he:

“Yì'nogo haga'nape o,” ìlùk abok hano wìagararìk lagaike atì nen he, at Yesùt o kota ya ta atoma kìlìk ebe weinam hogo nìkì logousak mea agaikomo re, leimo apùnì le'ma lagaikesik welagaike. Atì'nogo welagaike meneat he, apùnì o ya ta atoma nen oba atogosi waga lagaukwa.

Currently Selected:

MAREKÙT 1: LAIDNI

Highlight

Copy