MATÌÙT 24

“Ala awì wùrìk apùnì aike nen motok mesalugun o,” ìlùk yogoisasike wene

(Mrk.13:1-2; Luk.21:5-6)

1At Yesùt Ala awì wùrì'mo nen wùlìpikesik laganem he, at agoromì ane wanhì lagaukwa mene amanogo oba wagaukwasik he, mel yogosukwa:

“Ala awì wùrìk arì heileken lakhan,” ìlùk yogosukwa. 2Atì'nogo yogosukwama, at en he,

“Hit o wùrìk aroma obogat hegep a? Helep oba lou'-louk wùrìk aroma aike hebìgì'lek, we, motok heleleng hogo mesalogo laksogoin o, ìlùk, eberogoat yogohisìgì,” ìlùk yogoisasike.

“Alebagìk tì'nogo weak hagathinabugun,” ìlùk yogoisasike wene

(Mrk.13:3-13; Luk.21:7-19)

3Atì'nogo yogoisalùk he, tom Saitun punu ba lagalìk hùrek were'ma, at ane wanhì lagaukwa mene amanogo oba wagaukwasik inaligat logolìk he, mel yogosukwa:

“Hat en yogonisegen a'nogo re, mera nen haga'lasigin. Hat hebe wagìk, o wùrep oba haga'lagìk, igìlùk iko kolek he, kì mene tak haga'laganem nit ninetaùken wekelasigin. Wene sekek hogo yogonisan,” ìlùk yogosukwama, 4at Yesùt en he,

“Apùnì nen lalhinabinogo ìlùk he, hinoabùt hebelogo logoino o. 5Apùnì inebe logolegat en inetage an netage mene salogo nen mel ìlìk wesugun:

Karìsut a'nogo nebe wagì yìat o, ìlùk, inane eberogoat salek apùnì apigat lalinabi wesugun o. 6Atì'nogo haga'laga kolek, weim horogat yapenem inane hinasuk holhìk, walegat yapenem inabok holhìk, ìkì logolìk he, hinetaùken abolok ùgùp o. Atì'nogo haga'lasigin meneat he, o wùrep oba haga'lasigin mene atì oanat o. 7Yì apùnì tì apùnì inùkùl etage lopok weim kagalhìk, ap inetagepogot inagoromì inawe a'ma mene lopok weim kagalhìk, o yì awì tì awì sùpùrùk no agìk, lugul langathìgìk, igin o. 8Meneat he, atì re, hìmì omalik taginabuogolùk inapot heinet watarek atì hak, alebagìk hogoin he, atìat o.

9“Atì sat he, apùnì inùkùl etage lopok en, an netage ìlìk,

Hit he, at agoromì, ìlùk hinebe inabìt motok hagathinabìk he, hinebe hakhìkìlik, it aike nen tùgì hinoatìk, hinebe motok hinoatìk, uagalùk inoba wokhisek laga logogun o. 10Atìgìnho kolek, it apùnì aike inetaùken Ala ba hìpìrethesukwa meneat he, inebe logolegat ina'la pùk arìk heraksalùk wùlìbìk he, at aike nen at aike wasuagalùk wolok lagìk, aike nen aike anini oba hìgìk, ugun o. 11Nen, it aike inapeliagat Ala ane yogoisagarek mene negen hagarogo hinoba wìrìk he, apùnì motok apigat lalinabugun o. 12Atì'nogo motok haga'larìk waga logoumo re, it apùnì inoabùt motok kolo haga'larìk he, it-it inetawìrogo logogun mene atì hobuk inetaùken min arìk wesigin o. 13Meneat he, sa nen epe morogo motok logogin halok he, o wùrep oba Ala nen teligin o. 14Nen, Ala nen awe a'ma hisegein mene hano wene yì, yì apùnì tì apùnì motok inelu asuagalùk o yì awì tì awì yogoisìlìk lagep halok he, o wùrep oba arat haga'lasigin o,” ìlùk yogoisasike.

“Motok weak hogoin,” ìlùk yogoisasike wene

(Mrk.13:14-23; Luk.21:20-24)

15 # Dan.9:27, 11:31, 12:11 Atì'nogo yogoisasikesik he, hobuk aike mel yogoisasike:

“Hit en helal waganek yì etage salhì logolìk he, hanorogo hùthìkì logoino o. Ap Taniel Ala ane yogoisìkì lagaike mene a'nogo nen ìkì logolìk he,

Apùnì nen ina'meilo mene hagatenem agaserogo pùgùlugun mene o Ala okawerek awì menhaga halok,

16apùnì o Yurea tokwe mene atoma hese re, tom obakwe lagauak o. 17Hese lagauogolùk halok, apùnì aike o tùm oba lagalìk logopik, inapotkwe pi wìrìk en inagarok yì mene tì mene ouma wani kusak lek. Hese pìkìrat lagauak o. 18Nen, it aike yabukwe nen, sùpùrùkakwe nen, inapotkwe ouma inasu wani wagì'lek atoma nenat hese pìkìrat lagauak o. 19Atì'nogo lagaki logolìk, it hìmì omalik ina'ma mene atì mel, ineagwì ketago ineilak wogisìlì'lùgì mene atì mel, weak hogoin atì, eigo! Netawì lak e! 20Hit hese logoin atì, o weak oba he a? Sapan iko kolek he a, lanogo ìlùk he, sapan ìkì logoino o. 21O atì like weagat asigin atì re, emakum Ala nen yì mene tì mene elalhike atì hùlì nen pìkìt, o yogotak ya hùlì re, atì hake aike haga'lagì'lek. Nen, hobuk aike motok haga'lasigin lek meneat he, omake hesik atìat weak hùko haga'laganem hogoin o. 22Weak haga'laganem hogoin atì, at Ala nen he,

Hùlì yì hùlì arat o, ìlùk ìgì'lek kamo ilepma re, apùnì obogat heleleng hogo telinapì'lek weagat a'lep. Meneat he, at againapùrì wenaginapike mene hùgì, it hesik enek he,

Yogo. Weak arat hegep o, ìlùk, hùlì wasigin werek o. 23-24Atì sapùl he, it apùnì aike inapeliagat ìkì logolìk he,

Karìsùt a'nogo nebe anat o, ìgìk, nen, it aike nen,

Ala ane yogohisìgìrek mene a'nogo nebe anat o, ìgìk, i wesugun o. Wìrìk he,

Apùnì Ala nen wenaginapike mene amanogo lalinabusak he a? Lek he a, ìlùk lalinnbuogolùk he, inane eberogoat salek akoagalùk hagasusak lek mene elalin mene hagarìk wesugun o. It aike nen,

Karìsut a'nogo yì waga yì hani, ìgìk, it aike nen he,

Karìsùt a'nogo a'lì waga a'lì lakhani, ìgìk, ikenem hit hina'la nen he, eberogoat ìlùk akagùp o. 25Wene atì oan haga'lagì'lek werek kolek hùsipi tak yogohisìgì atì hanorogo hùthìkì logoino o. 26It apùnì aike nen yogohisìkì logolìk he,

Lakhani! At a'nogo o leimo a'loma werek o, iko halok he, hineileken lakha lagùp o. Nen, it aike nen,

Lakhani! At a'nogo ouma abùrare'ma hinago werek o, iko halok he, hina'la nen eberogoat ìlùk akagùp o. 27Atì re, an abat ta'lasi wagagi a'nogo, wesigin he, o eilabùt o mo lìabi wagarek a'loma nen omake hesik yegelogo, o mo kikerek higit lakhei wagarek atì hak wesigin o,” ìlùk atì'nogo yogoisasikesik he,

28“Warek werek halok he, sùe warek nikerek mene atì atoma atogosi lagarek o,” ìlùk yogoisasike.

“An abat ta'lasi wagagi a'nogo hobuk wesigìlùk iko kolek, tì'nogo haga'lasigin,” ìlùk yogoisasike wene

(Mrk.13:24-27; Luk.21:25-28)

29 # Yes.13:10, 34:4 At Yesùt en atì'nogo yogoisasikesik, hobuk aike mel yogoisasike:

“Weak hùko atì'nogo hìlìk oba nen ineki apik welagì'legat he,

O mo mùm agìk, tùgì yatì'lek kamo ìgìk,

hesagal pogot oba nen lologo pi wagìk, pogot oba inomame apik mene atì Ala nen inabologothìgìk igin o.

30 # Dan.7:13 Atì'nogo hagato kolek, an abat ta'lasi wagagi a'nogo arat wesigin ìlùk, apùnì inetaùken wekelogo hùthùgùkwe pogot oba aike haga'larìk oba nen, apùnì inùkùl etage lopok le aga kolek nomamerogoat ohena a'la pi waganem, ineileken nììlìk apik hogo'nabugun o. 31Atì'nogo waga logolìk he, an nen it malaikat Ala nen pogot oba nen yoko pelaksa wagarek mene amanogo laksa waga logolìk he, napìkon ane hùkoat pak hogo ikenem he, it en apùnì an nen wenaginapigi mene amanogo, o ma'lomakwe, po'lomakwe, ìlìkwe, yìkwe, o pogot erokwe erokwe a'loma nen motok atogorinabugun o,” ìlùk yogoisasike.

Wene e ara oba lìrogo yogoisasike wene

(Mrk.13:28-31; Luk.21:29-33)

32At Yesùt en atì'nogo yogoisasikesik he, hobuk aike mel yogoisasike:

“Wene yì e ara oba lìrogo yogohisegein yì hùthano o. Eka sabeligìlùk ikerek a'nogo mene ba lìrogo yogohisak. E ara atì eka lologo pikeresik hobuk asìmìt hulelhìk, eka sabelhik, ikenem he, hineileken hìlìk hina'la nen he,

Yogo. O arat hìbì asigin hìgì, ìlùk hina'la hùthegesep atì hak, an nen,

33Tì'nogo haga'lasigin, ìlùk yogohisìgì a'nogo, ebe obogat haga'laganem hineileken hìlìk he,

Yogo. O wùrep oba haga'lasigin a'nogo horok asi waga hìgì, ìlùk, hina'la akano o. 34Yì'nogo haga'lasigin, tì'nogo haga'lasigin, ìlùk yogohisìgì atì, apùnì o yogotak werek mene inebe aike lek agì'lek oan werek kolegat ebe obogat haga'lasigin o, ìlùk, eberogoat yogohisìgì. 35Pogot mel, kweang mel, atì lek asigin meneat he, an nane atì lek asigin motok lek o,” ìlùk yogoisasike.

“Mera haga'lasigin nit obogat ninokot atì nen, hinoabùt hebelogo logoino,” ìlùk, yogoisasike wene

(Mrk.13:32-37; Luk.17:26-30,34-36)

36At Yesùt en atì'nogo yogoisasikesik he, wene aike mel yogoisasike:

“An wesigin he, o tì sat jam tì ba wesigin ìlùk, apùnì mabok inokot. Nen, malaikat Ala nen pogot oba nen yoko pelaksa wagarek mene amanogo inokorat. Nen, an nebe Ala apurat meneat he, nokorat. We, an nopase Ala aligat elu o. 37It apùnì ap Nu werek oba atem hagatì lagaukwa higirat he, an abat ta'lasi wagagi a'nogo hobuk atì'nogoat hagatenem wesigin o. 38I apik nap-hap isike atì, oan ìgì'lek werek kolek, it apùnì atoma nen sùpùrùk nìkìk, eken amusu nìkìk, ap en hìmì ìkìgìk, it aike ìgìsìgìk, iko kolek he, at Nu a'nogo so a'la kisike. 39So a'la kìlìk werek kolek, it apùnì amanogo wonogat were'ma, i arat nap-hap ìkì logolìk motok inoasike. Atì hak he, an abat ta'lasi wagagi a'nogo hobuk wesigin higit hogo re, atì'nogoat haga'lasigin o. 40Atì sat he, ap inebe pìre yabu wanhenem aike wanhì logolìk he, aike heraksegein o. 41Nen, hìmì inebe pìre sùpùrùk gandum mene werasuogolùk sagalhenem, aike wanhì logolìk he, aike heraksegeinat o. 42Atì'nogo haga'lasigin atì nen, hit en he,

Ninoe Etagepogot mera wesigin, hinokot atì nen he, hinepe hebelogo logoino o. 43Nen, ap awì esewerek mene aike a'la nen he,

O yogotak hùako re, jam tì ba an naua yoma ap aike yogot wanigìlùk kì wesigin, ìlùk, elu logoilepma re, at ebe aua atì kagalek motok were'ma, o pin talogo yogot wani kilep lek, ìlùk, hineluat akìgì. 44Atì hak he, hit hina'la nen he,

At tì sat wesigin, ìlùk, akìgì'lek wonogat werek kolek, an abat ta'lasi wagagi a'nogo re, arat wesigin atì, hinebe tegelek logoino,” ìlùk yogoisasike.

Ap kain nen atitigeke mene oabùt higit halok, kolo halok, hagaterek mene oba lìrogo yogoisasike wene

(Luk.12:41-48)

45At Yesùt en atì'nogo yogoisasikesik he, hobuk aike mel yogoisasike:

“Ap kain mene aike againapùrì serisek logolìk inapùrùk wogisasak higit hogo wogisìkì logouagalùk, at atitigeke mene ayoko hikenem, at a'la kagalek logolìk oabùt oe ane igin mene higit hogo hagaterek atì sa akegep. At atì oe atì nen menhùlùk lagarek o. 46Menhùlùk laganem, atitigeke a'nogo atì'nogo higit hogo hagatenem eileken ha waga halok, atitigeke mene a'nogo a'la hai apik hakegein o. 47Atì'nogo hano hagatenem, ha wìrìk, oe a'nogo nen he,

An nagarok yoma heleleng hogo hat heki ba logouak, ìlùk, menhegein o, ìlùk, eberogoat yogohisìgì. 48Meneat he, at atitigeke mene atì, oabùt weak halok he, a'la nen he,

Noe a'nogo hepok wìrì'logo lek. Logopik en wesigin hìgì, ìlùk, 49agaiya'lak inoe kain a'nogo atitigeke mene aike tùgì inoatìk, it ap anggur amusu lùgùlùgì paluogolùk nekarek mene inom lapuk hogo logolìk, sùpùrùk mel, anggur amusu atì mene mel, nìkìk, 50ìkì logolìk he, at en he,

Noe a'nogo o tì sat, jam tì ba wesigin, ìlùk, motok okot wonogat were'ma oe kain a'nogo wesigin o. 51Atì'nogo were'ma wìrìk he, at atitigeke a'nogo ebe tùgì motok warogo re, it apùnì inogat oba nek hano salek inetaùken pìre logolìk hagatarek mene laksikerek oba atoma laksamo, atoma logolìk he, aik hùnogo lì agìk, le agìk, ìkì logogin o,” ìlùk yogoisasike.

Currently Selected:

MATÌÙT 24: LAIDNI

Highlight

Copy