MATÌÙT 19

“Ap inagagwì waganek mene lologo heraksasak motok lek o,” ìlùk yogoisasike wene

(Mrk.10:1-12)

1At Yesùt en wene atì arat yogoisasikesik he, o Kalilea hebùlùk he, o Yurea i Yoretan aik ìlì ba pisike. 2Pikenem apùnì apik opolik pìkì lagaukwama re, at en o atoma ou hagarinapike.

3Ou hano hagarinapo kolek he, it ap Parìsi mene he'nakìt Yesùt oabùt paluogolùk oba wagaukwasik he, mel yogosukwa:

“Ap en he, hìmì waganek mene atì, ùkùm hùko mene, hamùlùk mene, oba hìkì logolìk he,

Nabìt, ìlùk lologo heraksasak elok a? Mea a,” ìlùk yogosukwama, 4#Kej.1:27, 5:2 at Yesùt en he,

“Ero ba Ala nen elalinapì logolìk he,

Ap elalhìk, he elalhik, elalinapike,

ìlùk wene helal waganek a'nogo etage salhì'lek welagep nogo? 5#Kej.2:24 Atì'nogo elalinapikesik he, wene mel yogoisasike:

Ap en agosa opase hebisaluk agwe eperak hano logolìk he, inebe pìre meneat he, omakeat haga'larìk logouak o,

6ìlùk yogoisasike atì nen he, inebe pìre hùk. Omakeat agaikasik werek o. At Ala nenat atì'nogo eperak hùnogo hisasikesi'mo re, apùnì inokawerek en, tetelasak motok lok o,” ìlùk yogoisasikomo re, 7#Ul.24:1-4 it en he,

“Halok he, at Musa nen,

Ap aike nen hìmì waganek mene heraksagalùk halok he,

He yì hebe nabìt. Herakhagagì o, ìlùk, helal waganogo ekimo wogorìk he, elok heraksasagat o,

ìlùk isike atì nìkì'nogo nen isike,” ìlùk yogosukwa. 8Atì'nogo yogosukwama, at Yesùt en he,

“Lek o. Wene atì'nogo yogoisasike atì re, hit hina'la motok pùk logolìk yogohisikenem hinasuk holusak motok mea atì nen,

Hinagagwì waganek mene lologo heraksasagat o, ìlùk yogoisasike atì. Atì'nogo meneat he, ero ba Ala nen elalinapi logolìk atì'nogo motok isike lek o. 9Halok he, wene aike yì yogohisak. Ap sa nen agwe waganek mene ap aike nen pailak hakhìgì'le'maat he, lologo heraksìlìk he hùnogoat mene aike wanhe halok he, pailagat hagasugun o,” ìlùk atì'nogo yogoisasikomo, 10at Yesùt ane wanhì lagaukwa mene amanogo nen he,

“Halok he, ap en hìmì woginapì'lek, hìmì nen ap woginapì'lek, logoumo re, hano hìgì,” ìlùk yogosukwama, 11at en he,

“Atì'nogo mene re, wene igin yi, apùnì obogat hesik elok lek o. We, it Ala nen inoabùt atì'nogo wogisasike mene hùgì nek he, hùthogoin o. 12It ap aike re, inagosalak ina'la nen inoualì lek ta'larìk he, hìmì woginapì'lek motok welagaikarek o. Nen, he'nakìt he, apùnì nen inouali woginapenem inagagwì woginapì'lek welagaikaregat o. Nen, he'nakìt he, Ala nen awe a'ma hisikere'ma, at hesik hagatì logouogolùk ineram enat inagagwì woginapì'lek welagaikarek o. Wene ìgì atì elok wanusak halok he, wanini o,” ìlùk yogoisasike.

“Yekerùgì magatek atì noba we'nìk,” ìlùk yogoisasike wene

(Mrk.10:13-16; Luk.18:15-17)

13At Yesùt en atì'nogo yogoisasikesik were'ma, it apùnì aike nen inagainapùrì at an eki inùkùloak sebelogo sapan inoba houagalùk oba wogisek wagaukwama re, at agoromì ane wanhì lagaukwa mene amanogo nen wenagisasukwa. 14Wenagisasukwa meneat he, at Yesùt en,

“Apùnì yekerùgì yì hake haga'lasugun halok, Ala nen awe a'ma hisikere'ma atoma esewerek asugun atì nen he, it yekerùgì magatek aroma an noba we'nìk. Wene palhe hùk o,” ìlùk yogoisasike. 15Atì'nogo yogoisasikesik he, eki inùkùloak sebelhùlùk, atoma nen o wele'ma lagaike.

Ap aike ebe elege, agarok apik mene Yesùt oba wagaike wene

(Mrk.10:17-31; Luk.18:18-30)

16At Yesùt atì'nogo lagaikesik were'ma, ap aike oba wagaikesik he, mel yogosike:

“Guru, noe. An nabùlal-habùlal haga'nabuak en he, an noabùt hagatì logousak he, hano ki hake hagatì logousak akegen,” ìlùk yogosikomo, 17at Yesùt en he, mel yogosike:

“Hano kì hake hagatì logousak ìlùk an yogoneten atì, nìkì'nogo nen. Hano hagaterek atì re, ap omakeat enek werek a. Hat ineluk motok logogunmo atoma kusak walok halok he, wene Ala nen ninasuk wasike wene atì hasuk holìk he, higit hogo hagatì logoino o,” ìlùk yogosikomo, 18#Kel.20:13-16; Ul.5:17-20 at ap a'nogo nen he,

“Wene atì ebe kì'nogo mene hesik egen,” ìlùk, hinok wokhasikomo, at Yesùt en he,

“Wene atì Ala nen mel isike:

Apùnì inebe inoasusak lek o. Pailak haksasak lek o. Yogot wanusak lek o. Hinapeliagat inabok palusak lek o.

19 # Kel.20:12; Im.19:18; Ul.5:16 Hinopase hinagosa inane hologo agaugerinapì logousak o. Hinokawerek hinebe hinetaùken hutik welagasep atì hak, it apùnì aike hinom welagasep mene atì, hinetaùken hutik logoino o,

ìlùk ninasuk wasike wene atì hesik ìgì o,” ìlùk, yogosikomo re, 20at ap elege a'nogo nen he,

“Wene obogat yogoneten atì re, nasuk hologo logolìk higit hogo hagatìrek meneat o. Mene re, kì mene hagatì'lek welagì akegen,” ìlùk yogosikomo 21at Yesùt en he,

“Hat hebe hano motok asigìlùk halok, yoma nen lìlìk he, hagarok yì mene tì mene atoma obogat it aike inoba abasi lano. Abarìk he, oko wokhesugun mene atì, it apùnì aike inagarok lek inelageik mene atì sùpùrogo wogisano. Atì'nogo wogisegen halok he, hat pogot oba mene hùkoat esewerek asigin o. Halok, atì'nogo arat sùpùrogo wogisalùk he, an nopolik nìkì logoinok en, we'no,” ìlùk yogosike. 22Atì'nogo yogosikomo, at ap elege a'nogo asuk holhikesik he, agarok motok api'mo nogo nen he, a'la weak a'lùk lagaike. 23Lagaikomo re, at Yesùt en agoromì ane wanhì lagaukwa mene amanogo mel yogoisasike:

“Apùnì inagarok apik mene atì pogot oba Ala nen awe a'ma hisikere'ma atoma nìkì'nogo ku heat o, ìlùk eberogoat yogohisìgì,” ìlùk yogoisasike. 24Atì'nogo yogoisasikesik he, at en he,

“Wene atì meneat hobuk lagak hogo yogohisak. Wam unta hùko atì mene re, lisu eketma elok lok hogo kusak meneat he, it apùnì inagarok apik mene atì Ala nen awe a'ma hisikere'ma atoma kusak motok mea o,” ìlùk yogoisasike. 25Atì'nogo yogoisasikomo re, at agoromì ane wanhì lagaukwa mene amanogo inasuk holhukwasik he, inayùk apik agaukwasik mel yogosukwa:

“Halok he, Ala nen apùnì sanì hak elok telinabusak he,” ìlùk yogosukwama, 26at Yesùt en eileken it inoba hìlìk he, mel yogoisasike:

“Apùnì nen hagasusak motok mea meneat he, at Ala nen yì mene tì mene hagasusak elok enek o,” ìlùk yogoisasike.

27At Yesùt en atì'nogo yogoisasikomo, at Peterùt en he,

“Mene re, nit hat hopolik nìkì logouogolùk yì mene tì mene obogat heraksalùk wagosik nìkì lago mene yì nek he, nena mene wo'nisegein,” ìlùk yogosikomo, 28at Yesùt en he,

“An nen eberogoat yogohisak. Hit an nopolik nìkì lagep mene yì re, yì mene tì mene Ala nen hobuk ket hùnogoat hagarì'mo nen, an abat ta'lasi wagagi a'nogo hobuk wìrìk, hogo'napo kolek, nobùlùk oba atoma kain were'ma, hit nera'lu atoma hinobùlùk 12 nen talek oba kainat logolìk, apùnì Isirael mene inùkùl etage 12 nen amanogo hit en ùkùm inoba hìgìk, kotìk, ìkì logogun o. 29Halok, an netage hùko asuagalùk sa nen awì wùrìk mel, oe agot mel, erùgì mel, opase agosa mel, againapùrì mel, eyabu siok mel, heraksalùk waga halok he, obùlù'mo Ala nen oko ebe mene motok apik wogotìk, nabùlal-habùlal wogotìk, ìgìn o. 30Atì'nogo meneat he, it apùnì o yogotak inetagewerek mene logolegat he, hobuk inetage lek asigin. Nen, it aike yogotak inetage lek werek mene hobuk inetagewerek asigin o,” ìlùk yogoisasike.

Currently Selected:

MATÌÙT 19: LAIDNI

Highlight

Copy