MATÌÙT 16

Ap Parisi mene nen he, “Nit en hùthagagùkwe elalin mene aike hagasin he,” ìlùk Yesùt yogosukwa wene

(Mrk.8:11-13; Luk.12:54-56)

1Wthlibi wagm'kesik were'ma, it ap Parìsi mene mel, it ap Saluki mene mel, Yesùt oabùt paluogolùk oba wagaukwasik, mel yogosukwa:

“Hat hebe hopase Ala pogot oba mene nen pelakhagei wagaikomo wagen halok he, nit en hùthagukwe nineilhanem elalin mene aike hagasin he,” ìlùk yogosukwa, 2Atì'nogo yogosukwama at Yesùt en he,

[“O mo hea i laga kolek, pogot oba o maba hike halok, hit en he,

O hìbì asigin, egesep akìgì. 3Nen, ohealek o polu mùm inom hagatenem hineileken lakhìlìk he,

Atì moso hùko mene negein, ìlùk egesep atì. Pogot elokoken hineileken penerìk he,

Atì'nogo haga'lasigin, ìlùk hinetaùken wekelek logolìk, oabùt enagat palhù hinelu meneat he, yì mene tì mene o yogotak haga'larì'logo atì, hit hinelu asuagalùk haga'larì'logo meneat he, hùthìgì'lek welagep yoma rì!] 4Hit apùnì o yogotak welagep mene yoma re, hinoabùt motok weak hagarìk nìkì logolìk, Ala hinom lopok hogo logohùk yoma rì! Atì'nogo logolìk, hit en he,

Nit en hùthagagùkwe re, hat en elalin mene aike hagasin he, ìlùk yogonetì lagep meneat he, an nebe hùthanuageip ìlùk an nen elalin hùnogoat mene aike hagasigin motok lek o. We, at Yùnùt en apùnì aike hùthoagalùk elalinat hagasike atì hak enek an nen hobuk aike hagatenem hineileken neogoin o,” ìlùk atì'nogo yogoisasikesik, it ap amanogo atoma hebisalùk he, o wele'ma lagaike.

“Ap Parìsi mono Saluki mene inom inawene re, eken sùpùrùk horoti mene hisuagalùk eken a'la pelaparek mene atì hake,” ìlùk yogoisasike wene

(Mrk.8:14-21)

5At Yesùt agoromì ane wanhì lagaukwa mene amanogo inom i yekelek a'nogo aik ìlì bakwe arat wùlùpukwasik, agoromì ineileken hìthasukwa re, sùpùrùk horotì mene lì'mathùlùk lagaukwama nen, 6at Yesùt en mel yogoisasike:

“It ap Parisi mene mel, ap Saluki mene mel, eken sùpùrùk horoti mene hisuagalùk a'lakwe pelaparek atì hake mene hesogo werek atì ba weagathinabinogo ìlùk, hinepe hebelogo logoino o,” ìlùk yogoisasike. 7Atì'nogo yogoisasikomo, it-it ìkì logolìk mel isukwa:

“Sùpùrùk horotì mene aike wolok wagì'lek atì nen ike hìgì,” ìlùk ikenem 8at Yesùt en enagat hùrisasikesik he, mel yogoisasike:

“Hinetaùken noba hìpìrìk logohùk yì rì! Hit-hit ìkì logolìk,

Sùpùrùk horotì mene lek, ìlùk ìkì lagep atì nahalok. 9Hinetaùken tùkùm hogo hùthìgì'lek yoma rì! Sùpùrùk horotì mene ebe 5 meneat he, ap inebe 5.000 mene neka a'nogo lì'mathegep? Atì'nogo nekasik tìtelogo hagama, mùl ugu mene mìren a'la kalogo hegep nogo. 10Nen, aike sùpùrùk horotì mene ebe 7 meneat he, ap inebe 4.000 mene nekasik titelogo haga mene, mùl ugu mene mìren a'la kalogo hegep nogo. Hina'la hùthìgì'lek welagep? 11An nen sùpùrùk horoti mene hesik yogohisìgì lek meneat he, nahalok hùthìgì'lek welagep. Eken sùpùrùk horoti mene hisuagalùk a'la pelaparek mene atì hake mene, it ap Parisi mene mel, Saluki mene mel, hesogo werek atì nen hinepe hebelogo logouageip ìlùk yogohisìgì o,” ìlùk yogoisasike. 12Atì'nogo yogoisasikomo, it amanogo hùthasukwasik he, mel isukwa:

“Ì. Wene ike atì re, we, eken sùpùrùk horoti mene hisuagalùk a'la pelaparek atì mene hesik yogonisike lek. At he, it ap Parìsi mene mel, Saluki mene mel, inawene yakùlisagarek mene a'nogo weaga'ninabinogo ilùk, ninepe hebelogo logouagalùk yogonisike hìgì,” ililk hùthasukwa.

At Peterùt en, “Hat hebe Karìsùt at o,” ìlùk pak hogo Yesùt yogosike wene

(Mrk.8:27-30; Luk.9:18-21)

13O atoma nen, at Yesùt o kota Kaisarea ap Pilipi nen hùkothesike ba atoma lagai wagaikesik he, at agoromì ane wanhì lagaukwa mene amanogo hinok wogisìkì logolìk he, mel yogoisasike:

“It apùnì nen, an abat ta'lasi wagagi a'nogo an nebe hesik ìkì logolìk he, sa ìlùk ìlì'lùgì nogo,” ìlùk yogoisasikomo, 14it en he, mel isukwa:

“Apùnì aike nen he,

At ebe re, Yohanet ima pegalinapì lagaike mene a'nogo, ìgìk, it aike nen he,

At ebe re, Elia ìgìk, it aike nen he,

At ebe re, Yeremia he a, ap Ala ane yogoisìkì lagaukwa mene amanogo aike he a, ìgìk, ìlì'lùgì,” ìlùk yogosukwa. 15Atì'nogo yogosukwama, at Yesùt en he,

“It en atì'nogo ìlì'lùgì meneat he, hit enek he, an nebe hesik sa ìkì lagep nogo,” ìlùk yogoisasikomo, 16at Simon Peterùt a'nogo nen he,

“Hat hebe re, Karìsùt Ala eluk motok welagarek mene aput, nit telninabuagalùk at en lakhei wesigin ìlùk abok yogonisasike a'nogoat o,” ìlùk yogosike. 17Atì'nogo yogosikomo, at Yesùt en he,

“Simon Yùnùt aput nagot e. Apùnì nen yogohetama egen lek o. We, an nopase pogot oba mene nen yogohetomo egen hìgì o. Halok he, ha'la hai hakìkì logoino. 18Nen, aike inom yogohesik. Hat hetage helep u hak, Peterùt o. Nen, helep isa yì ba hìpìrogo re, an nagoromì atogorogo hisìlìk o negen wùrogo hisìgì halok he, at a'ma baga esewerek a'nogo nen ning hogo hagisek logogin lek o. 19At Ala nen awe a'ma hisikere'ma kagarek oba, kwe hùtùkwe mene hat wokhesigin o. Hat en, kweangma yoma mene hesik hagasusak lek ìlùk wene palhen halok he, pogot oba mene nen wene palhe hagat igin o. Nen, hat en kweangma yoma hano hagasusak hano ìlùk egen halok he, pogot oba mene nen hano ike hagat igin o,” ìlùk Peterùt yogosike. 20Atì'nogo yogosikesik, agoromì amanogo obogat mel yogoisasike:

“Hit en an nebe hesik he,

At atì Karìsùt, Ala nen telninabuagalùk lakhei wesigin, ìlùk abok yogonisasike a'nogoat o, ìlùk apùnì aike motok yogoisagùp o,” ìlùk inasuk wasike.

At Yesùt en he, “Yì ùkùm tì ùkùm noba hìlìk noasugun o,” ìlùk emakum yogoisasike wene

(Mrk.8:31–9:1; Luk.9:22-27)

21Hùlì atì hùlì nen he, at Yesùt en agoromì ane wanhì lagaukwa mene amanogo at hobuk hagasigin mene pak hogo mel yogoisasike:

“An o Yerusalem a'loma lasak welagì o. Lamo re, it ap inalùgetek amanogo mel, Ala esewerek mene inogogì kaintek mel, Ala ane helal waganek esewerek mene mel, inom en, yì aik tì aik apigat haga'nabìk nebe noasugun o. Noasumo, nebe warek neki pìre were'ma re, aike nen he, Ala nen nelugu'nabigin o,” ìlùk pak hogo yogoisasike. 22Atì'nogo yogoisasikomo at Peterùt en he, Yesùt wolok alepma lagaikesik mel yogosike:

“Hat wene egen atì hagathabinogo nen he, Ala nen telhabuak o,” ìlùk asuk wasike. 23Asuk wasikomo, at Yesùt elokwe lagak hogo Peterùt kelakhìlìk mel yogosike:

“Hat Ibilit hìgì. Ala a'la akikerek higit hogo ebetì'lek, we apùnì nen akagarek hak ebethìlìk nakwe palhì lagen yì, nelokoma yoma logogùn. Hela lan o,” ìlùk yogosike. 24Atì'nogo yogosikesik he, at agoromì ane wanhì lagaukwa mene amanogo aike mel yogoisaaike:

“At sa nen an nopolik nìkì logoigìlùk halok he, oabùt okawerek hesik etaùken tùlem logolìk hagaterek mene atì,

Nabìt, ìlùk heraksalùk, e ba menhisìlìk inoatarek mene atì ageiyo meneat wolok nopolik nìkì logoigìlùk wesuak o. 25Nen, sa nen okawerek en,

An nebe neluk logousak walok, ìlùk ebe elele helegein halok he, wa'larìk nong akegein o. Mene re, sa nen ebe elele helìgì'lek an hesik wa'laga halok he, ebe elele helegein o. 26Sa nen yì mene tì mene kweangma mene obogat ese asigin meneat he, hobuk ebe nong asigin halok, at en he,

An aike elok sabùrogo hakìgì, usak nogo? Motok lek o. Ebe nong asigin atì obùlù'mo re, nena mene eperak okosusak nogo. Mea o. 27An abat ta'lasi wagagi a'nogo re, hobuk nopase hogorato motok welagaikarek atì hagat haga'la'lùk, it malaikat Ala nen pogot oba nen yoko pelaksa wagarek mene amanogo ninom wìrìk, atì sat he, apùnì obogat inoabùt lopok hagatarek mene higit hogoat oko wogisa wesigin o. 28Nen, hit metek welagep yoma mene aike wa'lagì'lek logolìk, an abat ta'lasi wagagi a'nogo kain Netagepogot logoìgìlùk apùnì obogat nawe a'ma hisa waganem hineileken neogoinat o, ìlùk eberogoat yogohisìgì,” ìlùk yogoisasike.

Currently Selected:

MATÌÙT 16: LAIDNI

Highlight

Copy