MATÌÙT 10

Yesùt en ap inebe 12 nen inayoko hesike wene

(Mrk.3:13-19; Luk.6:12-16)

1Ineki aike sapùl he, at Yesùt en agoromì ane wanhì lagaukwa mene inebe 12 nen amanogo atogosi wesuagalùk waisasikomo wagaukwama re, it en apùnì aike mokareke inoabùt weak mene ina'la kìlìk were'ma henogo wulaksìgìk, yì ou tì ou inoba werek mene hagarinapìk, inomame lek maben mene inomamerinapìk, ìlìk loagalùk, omame wogisasike. 2Ap inebe 12 nen atì, inetage yì: emakum he, Simon etage aike Peterùt ìgìk a'nogo agot Atereat eperak mel, Sepeteùt aput Yakobùt a'nogo agot Yohanet eperak mel, 3Pilipùt Paretolomeùt eperak mel, Tomat Matìùt pemerìntah hesik uang kìno ìlìk wanhì lagaike mene a'nogo eperak mel, Alpìùt aput Yakùp Tareùt eperak mel, 4Simon

“O Kana'an yoma ninawìwerek mene hùgì nek logouok o,” ìlùk ìkì lagaike a'nogo mel, Yùrat Isikariot Yesùt wasuagalùk hobuk yoko lagaike mene a'nogo mel, inetage atem.

At Yesùt en it ap inebe 12 nen hagatì logousak mene hesik inasuk wasike wene

(Mrk.6:7-13; Luk.9:1-6)

5At Yesùt en it ap inebe 12 nen atì sùpùrogo laksagalùk he, inasuk yì'nogo wasike:

“It apùnì etakwe mene inauakwe lagùp o. Nen, it apùnì o Samarìa mene inauakwe lìlìk kùgùbat o. 6We, apùnì Isirael mene wam topa wam kwe nong agarek hak kwe nong agaikasik werek atì inobakwe isìlìk lano o. 7Laga logolìk he, mel yogoisìlìk lano o:

Ninopase Ala pogot oba mene nen awe a'ma hinegein a'nogo yogotak arat hinegein o, ìlùk, yogoisìlìk lano o. 8It apùnì ou inoba werek halok hagarinapìk, wa'lagaika halok inelugurinapìk, henako hake inayùk mene inoba werek halok hagarinapìk, mokareke oabùt weak mene ina'la kìlìk were'ma henogo wulaksìgìk, ìlìk nìkì logoino. An nen oko lek wokhisìgì atì hak he, hit en atì'nogoat oko lek wogisìlìk lano. 9-10Apùnì aike yabu woksikenem, inapùrùk wogisagarek atì hak, hit en hagarinabìk laganem he, it en wokhisìkì logogun ha'ma, uang hùkotek emas mel, perak mel, hamùlùtek tembaga mel, hinoua'ma kalogo wanhì'legat, nen, su we, kwe aganeke mene kalusak mene mel, hinasu laberek mene pìretek mel, hinesok a'makwe labesugun mene mel, sìge lùk mel, wolok lagì'lek hinebe nek lani o. 11Nen, hit o sili hùkoma, hamùlù'mo, ki lagep halok he, sa nen hai warogo hinebe wokhinape halok he, oabùt palhìlìk, at atìat hinom logopik o ninmo lùogolùk halok he, wùlìbi wìrìk lano. 12Nen, it aike inaua kegep halok he, it inawiwerek mene atì hai warìnabino. 13Nen, it apùnì atoma inoabùt hano nen wokhinape halok he, hai hinane agauk hogo warinabugun atì ba, Ala nen agaugerinabiginat o. Atì'nogo meneat he, inoabùt weak halok he, hai warinabugun mene atì hinane oak wanino. 14Nen, it atoma nen hinebe wokhinapì'lek logolìk hinane wanhì'lek hebisaga halok he, o atoma heraksalùk hinapotkwe wùlìbi waga logolìk he, hinesok alolongeke horogo pelaksalùk wùlìbi we'no. 15Yogotak he, an nane eberogoat yogohisak. Hobuk ninopase Ala pogot oba mene nen ùkùm inoba hìgìk, kotìk, ìgìn atì sapùl he, it apùnì o Sorom Komora mene atoma re, ùkùm inoba hìlìk weagarinabigin meneat he, se negenat o. Meneat he, it apùnì o sili hit wokhinapì'lek herakhikogoin mene atì nek he, ùkùm ekin mene inoba hìlìk motok weagariìnabigin o,” ìlùk yogoisasike.

Apùnì aike nen weagarinapo kolek, “An Yesùt agot o,” ìlùk ìkì logousak wene

(Mrk.13:9-13; Luk.21:12-17)

16Atì'nogo yogoisasikesik he, aike mel yogoisasike:

“An nen, hit he, hinoabùt wam topa wam oabùt hake mene, it apùnì inoabùt yeke lo yeke oabùt weak mene hake mene inekele'ma heak hogo lakhikegeinmo atì re, hinoabùt walo oabùt hibik-hebek hogo hagaterek atì hak hagatìk, sùe pel oabùt enago welagarek atì hak welagìk, ìkì logoino. 17Apùnì nen it ap wene ero pìlìngìtare'ma inoba wokhisek lagìk, o sapan egare'ma atoma nen tùgì hinoatìk, ugun a'naga re, hinepe hebelogo logoino o. 18Atì'nogo hagathinabugun atì, ero an nebe hesigat, ap inetagepogot mene mel, kaintek mene mel, inoba wokhisek laganem, hit en it ap atì ineilhanem an hagatenem hineileken niìkì lagep mene a'nogo pak hogo it yogoisìgìk, apùnì etakwe mene yogoisìgìk, yogoisoagalùk hanoasuak hinanema wanugun a'naga o. 19Hinanema atì'nogo wanuagalùk wokhisek lagaika halok he, hit en oko yogoisogoin mene atì sat Ala nenat hina'la kagaligin. Halok he, oko kì'nogo yogoisogoin ìlùk hinalabut hìtùp o. 20Wene oko yogoisogoin atì re, hit en hina'la kagalogo ugun hùk. We, hinopase Ala Areagùn hina'la logolìk,

Yì'nogo ini o, ìlùk yogohisiko kolek ugun o. 21Agaiyak aike nen he, at okawerek agaiyak aike wasuagalùk wolok lagìk, opase nen he, aput wasuagalùk wolok lagìk, inagainapùrì nen he, inopase inagosa inabìt arìk he, inoasuagalùk inabok palhìk, ugunat o. 22Nen, apùnì obogat en an netage ìlìk,

Hit he, at agoromì, ìlùk inabìt motok hikogoin o. Meneat he, sa nen epe morogo logogin halok he, o wùrep oba Ala nen teligin o. 23O sili aike nen weagathinabuogolùk iko halok he, hese o sili aike lano. It apùnì Isirael mene inawi sili he'nakìt oan wene yogoisìgì'lek werek kolegat he, an abat ta'lasi wagagi a'nogo hobuk wesigin o, ìlùk, nane eberogoat yogohisìgì.

24“It gurulak wene yakùlisagarek mene sebeksek negen werek kolegat, it inagainapùrì yakùlisagarek mene atì hesaksek negen po ya welagaikarek motok lek o. Atì hagat he, it ap kaintek sebeksek negen werek kolek, inatitigeke mene atì re, hesaksek negen welagaikarek motok legat o. 25Mene re, it yekerùgì atì inopase guru atì inom higit haga'lagìk, nen, it inatitigeke mene atì inopaselak inom higit haga'lagìk, umo re, higirat o. It apùnì inoe o esewerek mene atì weak ìlùk etage Peelsepùl iko halok, it at agoromì inom omakìma mene atì, atì'nogoat inetage weak hùkoat ìkì logogun o,” ìlùk yogoisasike.

“Ala at hinayùk hogo logousak,” ìlùk yogoisasike wene

(Luk.12:2-7)

26Atì'nogo yogoisasikesik, aike mel yogoisasike:

“Hobuk Ala nen, yì mene tì mene sebelek mene atì weinamethìgìk, hinago mene atì sele'mathìgìk, igin enek atì nen he, hit en, it apùnì mene atì hinayùk hogo logogùp o. 27Nen, an nen hit o mùmmo yogohisìgì mene, hit an o lìa ba ìkì logoino. Nen, hinesakoma nane sami-samok yogohisìgì mene atì, hit en o weinamma lagalìk hinane pak hogo yogoisìkì logoino o. 28Apùnì nen hinareagùn hinoasusak mea. We, hinagasabeke nek hinoasugun atì nen he, hinayùk hago logogùp o. Meneat he, at Ala nek he, hinareagùn mel, hinagasabeke mel, elok motok warogo etu ai'mo lakhikasagat werek atì nen, at Ala at hinayùk hogo logoino. 29Sùe wulue atì oko mìren palharek nogo. Ebe pìre mene oko uang sen motok hamùlùgat mene omakeat oba wanharek akìgì. Atì'nogo meneat he, hinopase Ala pogot oba mene nen,

Sùe atì tung hogo pìnìk o, ìlùk oan ìgì'lek werek kolek, aike kweangma tung hogo pikerek lek o. 30Hit he, hinesi hinùkùloa'ma obogat Ala nen eki motok wenago welagarek o. 31Ala nen sùe wulue atì ebe apigat mene, esin hake akikerek hùk. Apùnì hinebeat esin motok akikerek o. Atì nen hinayù'lek hogo logoino o,” ìlùk yogoisasike.

Apùnì ineilhanem, “Yesùt an noe,” ìlùk inane pak hogo usak wene

(Luk.12:8-9)

32Atì'nogo yogoisasikesik, aike mel yogoisasike:

“Sa nen,

Yesùt atì an noe o, apùnì ineilhanem ane pak hogo iko halok he, an hogo re,

At atì an nagot o, ìlùk nopase pogot oba mene eilhanem, nane pak hogo iginat o. 33Atì'nogo meneat he, sa nen,

Yesùt atì an nokot o, ìlùk apùnì ineilhanem labelho halok he, an hogo re,

At atì an nokot o, ìlùk nopase pogot oba mene eilhanem pak hogoat igin o,” ìlùk yogoisasike.

Yesùt en, “Apùnì it-it inom weak asuagalùk wagagi,” ìlùk yogoisasike wene

(Luk.12:51-53, 14:26-27)

34-35 # Mi.7:6 Atì'nogo yogoisasikesik he, aike mel yogoisasike:

“Hit hina'la nen he,

At wagaike atì re, kweangma yoma weim lìoligìlùk wagaike, ìlùk akagùp o. An wagagi atì re,

opase aput eperak weak agìk, agosa eak eperak weak agìk, oan a'logo eperak weak agìk, it-it inom weak arìk loagalùk wagagi o.

36Apùnì inaselei mene negen he, inawi omakìma meneat inom hùlìrasugun o.

37Nen, an he, hinabìt negen akìkì logolìk he, hinopase hinagosalak hinetawì welagep halok he, an nagoromì asusak lek o. Nen, an hinabìt negen logolìk hinagainapùrì mel, hina'logomì mel, hinetawì welagep halok he, an nagoromì asusak legat o. 38E ba menhisìlìk inoatarek mene a'nogo, hinageiyo lopok hinomolo ba wìlìk an nopolik wolok wagì'lek halok, an nagoromì asusak legat o. 39Sa nen okawerek ebe elele helegein halok he, ebe wa'larìk nong asigin o. Meneat he, sa nen an hesik wa'lasigin halok he, ebe elele helegein o,” ìlùk yogoisasike.

“Apùnì inoabùt hagatarek higit hogoat, Ala nen oko wogisegein o,” ìlùk yogoisasike wene

(Mrk.9:41)

40“At sa nen hinebe wokhinabigin halok he, an nebeat wo'nabigin o. Nen, an nebe wo'nabigin atì, an nopase lakhani wagaike mene a'nogo ebeat wanigin o. 41Nen, sa nen,

Ap yì Ala ane yogoisikerek mene, ìlùk ebe wanigin halok he, it ap Ala ane yogoisagarek mene oko helagarek higit hogoat helegein o. Nen,

Ap yì higit hogo hagaterek mene, ìlùk ebe wanigin halok he, it higit hogo hagatarek mene oko helagarek hagat helegeinat o. 42Nen, sa nen,

Yekerek magakelak mene yì Yesùt ane wanherek mene, ìlùk i min mene aike wogote halok he, Ala nen oko wogosigin mene helìgì'lek nong asìgìn lek o, ìlùk eberogoat yogohisìgì o,” ìlùk yogoisasike.

Currently Selected:

MATÌÙT 10: LAIDNI

Highlight

Copy