YOHANET 5

Yesùt en, ap aike oba ou mene i Petesita yekele'ma nen hagasike wene

1Atì'nogo haga'lùk he, it Yahuri mene pesta aike hagatì lagaukwa mene hagatenem Yesùt hobuk o Yerusalem pisike. 2O Yerusalem atoma re, leget pa'leget ape palek aike etage Topa akwe egarek mene era'lu i moge aike it apùnì Iberani mene inane ba etage Petesita egarek mene yekelek welagaike. I moge atì era'lu ìlìng-walìng he, o sabu 5 nen hano wùrìk were'ma, 3-4apùnì logolegat inoba ou mene mel, ineileken mùm mene mel, ineitep holu mene mel, inawe wùt warek mene mel, atoma weiteta logolìk, [i moge a'nogo ninhùp-nanhùp abolok ikenem serogo welagaukwa. Atì'nogo serogo were'ma, malaikat Ala nen yoko pelaksa wagarek mene pi wìrìk, i a'nogo abologothikenem he, it apùnì inoba ou mene amanogo aike tak alebagik i mogoma a'nogo pike halok, yì ou tì on inoba ekin mene se mene obogat se aga lagaukwa atì nen he, serogo welagaukwa atì.] 5-6Atì'nogo serogo welagaukwa mene ap aike re, ou warek werek kolek 38 tahun haga'lagaike mene inom inebe atoma weitek were'ma, Yesùt eileken hasikesik he,

“Ap yì holoat en yì'nogo welagare'ma hìgì,” ìlùk eileken enagat hasikesik he, mel yogosike:

“Nopase. Hat hano hagathabusak walok a? Habìt a,” ìlùk yogosikomo, 7ap a'nogo nen he, mel yogosike:

“Nagot e. I moge yekelek yì abolok ikenem, an nebe hapogosogo ima pelakhanusak mene, an nagoromì yoma lek nogo nen he, nabusak en erogat pigìlùk walhiko kolek, it aike tak alebagìk pìlì'lùgì o,” ìlùk, yogosikomo, 8at Yesùt en he, mel yogosike:

“Nopase. Hebe melarìk he, halit talek mene arì helalùk lan o,” ìlùk, 9yogoto kolek aremnogoat ap a'nogo ou se agaikesik he, alit talek mane a'nogo helalùk lagaike.

At Yesùt en ap ou hagasike atì re, it apùnì Yahuri mene ineki sabìt oba Ala hesik welegat welagaikarek a'nogo ba hagasike. 10Atì'nogo welegat werek kolek hagasikomo laganem he, it ap kaintek Yahuri mane nen ineileken hasukwasik he, ap ou kerat se agaike mane a'nogo mel yogosukwa:

“Nagot yì. O yogotak he, nineki sabìt oba Ala hesik welegat logolìk, hat lit wolok lasak lek mene wolok laga lagen,” ìlùk, yogosukwama, 11at ap a'nogo nen he, mel yogoisasike:

“Lek o. An ap ou haga'nape mene atì nen,

Halit helalùk lan, ìlùk yogonetomo nen helalùk waga lagì o,” ìlùk, yogoisasikomo, 12it en hinok oba wokhìkì logolìk he,

“Ap atì, sa nen,

Halit helalùk lan, ìlùk yogohete,” ìlùk oba hinok wokhasukwa meneat he, 13at Yesat apùnì inebe apik welagaukwa mene amanogo ina'la nalagaikamo re, ap oba ou hano hagasike mene a'nogo nen he,

“Sa nen haga'napesik yogonete heat,” ìlùk oake palagaikeeik welagaike.

14Atì'nogo hagasukwasik oba nen, hobuk, at Yesùt Ala awì wùrì'mo ap a'nogo eperak apì agaukwasik he, mel yogosike:

“Nopase. Yagotak hat hoba arat se agen atì re, hobuk weak hùko mene aike hoba asinogo nen he, weak mene aike hagatùn o,” ìlùk yogosike. 15Atì'nogo yogosikomo, at ap a'nogo it ap kaintek Yahuri mene inoba lagaikesik he, mel yogoisasike:

“Ap an ou haga'nape ìgi a'nogo re, Yesùt enat haga'napomo o,” ìlùk yogoisasike. 16Atì'nogo yogoisasikomo re, it apùnì Yahuri mene ineki sabìt oba Ala hesik welegat werek kolek, Yesùt en ap a'nogo ou hano hagasike atì nen, at Yesùt ebe weagathouogolùk isukwa.

17Atì'nogo isukwa meneat he, at Yesùt en mel yogoisasike:

“An nopase eki aike kamo ìgì'lek, o yogotak yì inomat hagarinapo motok welagarek atì hak, an atì'nogoat hagarinapo welagì o,” ìlùk yogoisasikomo, 18it ap kaintek Yahuri mene amanogo nen ineki sabìt oba Ala heaik welegat logolìk, Yesùt en ou hagasusak lek mene hagasike atì ba net ebe wasuogolùk isukwa hùk. At he, at en,

“An nebe Ala neperak higit,” u hak he,

“An nopase ebe Ala at o,” ìlùk, isike atì nen, ebe wasuogolùk ebenageik weim abok isukwa.

Ala nen he, aput Yesùt en apùnì oak tegelinabuagalùk eki ba hesike wene

19Weim abok atì'nogo isukwama, at Yesùt en he, ap amanogo wene yì'nogo yogoisasike:

“Yì mene tì mene an nopase nen hagatenem neileken hìgì'lek, we, an na'la nen kagalogo hagasusak mea atì nen he, an nopase hagaterek meneat higit hogo hagatì lagì o, ìlùk eberogoat yogohisìgì. 20An nopase nen he, aput an etaùken hutik motok logolìk, at ebe nenat yì mene tì mene hagaterek mene obogat yakùlnetenem yogotak hagatenem hineileken neegep atì re, hamùlùgat negen meneat he, hobuk hit hogorasuagalùk yakùlnetenem hùko mene hagatenem hit hineileken neogoin oba weregat o. 21Nen, an nopase nen aùnì warek mene inelugurinaperek atì hak, aput an nen apùnì warek mene atì'nogoat inelugurinabigin, ìlùk na'la akìgìrek mene hùgìat inebe lopok inelugurinapìrek. 22-23Apùnì obogat en an nopase hogoratarek atì hak, an aput atì'nogoat hogo'napì logouagalùk, at en apùnì oak tegelogo ùkùm inoba hìgìk, kotìk, ikerek lek. We, aput an nenat oak tegelogo ùkùm inoba hìgìk, kotìk, uagalùk, neki ba hesiko o. Halok he, it apùnì aike nen an hogo'nabì'lùgì lek halok he, an nopase lakhani wagaike mane atì, hogorarì'lùgì legat o,” ìlùk, yogoisasikesik wene hobuk aike mel yogoisasike:

24“It apùnì aike nen, an nane wanhì logolìk, inetaùken an lakhani wagaike mene a'nogo oba hìpìrethogoin halok, apùnì wa'la'lùk lagaikarek ero hebisalùk ineluk motok logogun mene ero ba arat wagaikasik werek o. Ineluk motok logogun mene ese agaikasik werek atì nen he, hobuk ùkùm inoba hegein lek o, ìlùk eberogoat yogohisìgì. 25Nen, apùnì warek mene nen, an Ala aput nane inasuk holugun oba oan werek meneat he, arat asi wagasik werek o. It nane inasuk holugun mene halok, ineluk arìk ineluk motok logogun o, ìlùk, eberogoat yogohisìgì. 26Ineluk motok welagaikarek mene are an nopase okawerek me welagarek atì hak, aput an neki ba hanhikomo esewerek welagì o. 27An nebe abat ta'lasi wagagi atì nen, apùnì oak tegelogo ùkùm inoba higik, kotìk, uagalùk, nopase nen anat neki ba hanhike o. 28-29Nen, hobuk he, apùnì obogat inoak obakwe lopok en, an nane inasuk holìlùk, ineluk asugun like werek o. It atì, aike inoabùt hano hagatì lagaukwa mene halok, ineluk motok logouagalùk menhisìgìk, nen, it aike inoabùt weak hagatì lagaukwa mene halok, ùkùm inoba heigìlùk menhisìgìk, igin ìlùk yogohisìgì atì nen,

Wene atì nayùk e, ìlùk, hogoratùp o,” ìlùk yogoisasike.

30Atì'nogo yogoisasikaik he, wene aike mel yogoisasike:

“An naligat na'la nen kagalogo yì mene tì mene hagasusak mea atì nen he, an nen na'la akalùk hagatì lagì lek o. We, at an lakhani wagaike mene a'la akikerek mene hagasigìlùk ìkì lagì atì nen, nopase ane apoligat, apùnì oak tegelogo ùkùm inoba hìgìk, kotìk, ìkì lagì atì, higit hogoat ìkì lagì o,” ìlùk yogoisasike.

At Yesùt abok pìlìngìrogo yogoisagarek wene

31Atì'nogo yogoisasikesik aike yogoisìkì logolìk he,

“An nebe hùthanuagalùk nokawerek nabok pìlìngìrogo yogohiselema, eberogoat ìlùk hina'la akelep lek o. 32Atì'nogo meneat he, an nebe hùthanuagalùk, nopaso nen nabok pìlìngìrogo yogohisìlì'logo atì, eberogoat yogohisìlì'logo ìlùk, an nelu o. 33Hit en Yohanet oba an hesik hinok wanuagalùk hinagoromì yoko laksasigisipmo re, at on he, ebe wene hesik nabok pak hogo yogohisasike akìgì. 34An nebe hùthanuagalùk apùnì nen nabok pìlìngìrogo yogoisagarek atì walok en yogohisìkì lagì hùk. We, Ala nen hit telninabuagalùk yogohisìkì lagì o. 35At Yohanet atì ebe re, esage kìalogo hikenem yararathikerek hak were'ma, hit en he,

Esage yarogo ninoba hìkì logouak, ìlùk, elama hesigat hina'la hai hakìkì lagagip atì, 36an nebe hùthanuagalùk, at en nabok pìlìngìrogo yogohisìkì lagaike meneat he, mea negen. At he, an nopase nen,

Neyabu ato hìgì'lek heleleng hogo haga'no, ìlùk, nayoko hesikomo hagatì lagì atì ba nek he, apùnì nen,

At ebe opase nen lakhei wagaikomo, ìlùk nabok ikenem inasuk holìk nebe hùthanu hagat hùthanusak o. 37An nebe hùthanuagalùk, nopase nen lakhani wagaike mene atì nen, nabok pak hogoat yogohisasike meneat he, hit en nopase ane hinasuk holhì'legat, elokoken hineileken hìgì'legat logolìk he, 38at en nayoko hìlìk lakhani wagaike meneat he, hinetaùken noba hìpìrethìkì lagep lek atì nen, at ane hina'la werek motok lek o. 39Hit en akìkì logolìk,

Nineluk motok logogun he, Ala ane helal waganek hesogo welago yì baat logogun o, ìlùk, helal waganek atì hanorogo hìthegesep meneat he, helal waganek atì, an nebe hùthanuagalùk wanhukwama werek kolegat he, 40hinebe hineluguthinabuagalùk an noba wesusak he, hinabìt o.

41“Atì'nogo hagatesep meneat he, an enek he, apùnì nen hogo'nabuagalùk hagatìrek lek. 42Hit enek he, Ala hinetawìrogo welagasep motok lek atì, an hinoabùt nelu o. 43An nopase nen lakhani wagaikomo wagagi meneat he, hit en an nebe wo'napì lagep lek. Atì'nogo meneat he, at aike okawerek a'la akalùk waga halok enek he, ebe wanugun hinoabùt hikìkì lagì o. 44Ala aligat esok motok welagarek atì nen hogothinabuagalùk hagatì'lek logolìk he, hit-hirat hat aike nen hogoratìk, hat aike nen hogoratìk, hogorakìkì lagep atì nen, hinetaùken an noba nìkì'nogo hipirethousak akegep. Mea o. 45Mene re, an nen Ala eilhanem ùkùm hinoba hegein ìlùk hina'la akagùp o. At he, Musa ane atì baat hano'ninabigin ìlùk hina'la hai hakegesep meneat he, at enat ùkùm hinoba hegein o. 46An nabok hinelu asuagalùk, at Musa nen helal waganogo hesike atì nen he, at en helal wanhìke mene atì eberogoat ìlùk hùthìkì logoilepma re,

Yesùt eberogoat, ìlùk hùthanilebat o. 47Mene re, wene Musa nen helal waganogo hesike mene atì, hit en eberogoat ìlùk hùthìgì'lek welagasep halok, an nane atì nìkì'nogo hùthìlìk eberogoat ìlùk akogoin. Mea o,” ìlùk yogoisasike.

Currently Selected:

YOHANET 5: LAIDNI

Highlight

Copy