LAKSASIKE 19

Paùlùt o Epesùt wagaikesik hagasike wene

1A t Apolot o Korìtùt atomaat werek kolek he, at Paùlùt a'nogo o propinsi Kalatia mel, Perìgìa mel, pokwe lagak-pagak waga lagaikesik, o kota Epesùt wagaike. Wagaikesik, apùnì Yesùt ane wanhukwa mene aike were'ma inoba kisike. 2Inoba kìlìk mel yogoisasike:

“Hit hinetaùken Yesùt oba hìpìrethesigip atì re, Ala Areagùn wanhigisip welagep a? Lek a,” ìlùk yogoisasike. Yogoisasikomo, it en he,

“Ala Areagùn werek ìlùk ikenem, ninasuk holhì'lek en wanhì'lek welago,” ìlùk yogosukwa. 3Atì'nogo yogosukwama, at Paùlùt en yogoisìkì logolìk he,

“Halok he, hit ima pelakhinapukwa atì, wene kì wene yakùlhigipmo pelakhinapukwa,” ìlùk yogoisasikomo, it en he,

“Yohanet en ima pelaginapì lagaike a'nogo wene yakùlhugumo ima pela'ninapukwa,” ìlùk yogosukwa. 4Atì'nogo yogosukwama, at Paùlùt en he,

“Yohanet en ima pelaginapì lagaike atì, it apùnì nen,

Weak hagatì lago mene arat heraksogosik ninoabùt hebelago, ìlùk iko halok pelaginapì lagaike. Atì'nogo pelaginapì logolìk he, mel yogoisìkì lagaike:

An nopolik ap aike wesigin. Halok hinetaùken at oba hìpìrethìlìk logoino o, ìlùk ebe Yesùt hesigat yogoisìkì lagaike atì,” ìlùk yogoisasike. 5Atì'nogo yogoisasikomo it inasuk holhukwama re, ninoe Etagepogot Yesùt etage palogo hobuk ima pelaginapukwaat. 6Pelaginapukwama, at Paùlùt en eki inùkùl sebelhenem he, Ala Areagùn inoba pi wagaikomo, it en he, wene it aike inane inokot mene ba elalinat ìgìk, Ala ane it aike yogoisìgìk, ìkì lagaukwa. 7It atì'nogo ìkì lagaukwa atì re, ap inebe 12 hake nen ìkì lagaukwa.

8Atì'nogo isukwama re, at Paùlùt o apùnì Yahuri mene sapan ìkì lagaukwa ba kìlìk ayù'lek hogo logolìk he, wene Ala nen awe a'ma hisikerek wene a'nogo hùthìlìk wanuagalùk, ina'la kagalogo, wene at en yogoisìgìk, it en oko at yogotìk, ìkì logolìk he, tùgì hinagan welagaike. 9Logolìk, atì'nogo yogoisìkì lagaike meneat he, it atì o'moko inetaùken ning ìlìk, wene atì ina'la meathìlìk he, apùnì aike logolek ineilhanemat, Yesùt opolik lagaikarek wene atì abok weak palhukwa. Abok weak palhukwama, at Paùlùt, it herakhisalùk, it o'moko Yesùt ane wanhukwa mene nek wogisek wùlìpike. Wogisek wùlìbìk he, o hùko wùrì'mo ap Tiranùt en yì wene tì wene yakhlisìkì lagaike ba atì kìlìk, ninhùp-nanhùp eki aike kamo ìgì'lek wene at en yogoisìgìk, it en oko yogotìk, ìkì lagaike. 10Atì'nogo iko motok 2 tahun were'ma nen, it apùnì o propinsi Asia atoma, Yahuri mene lek, Yunani mene lek, obogat wene ninoe Etagepogot ane a'nogo inasuk holhukwa.

Ap etage Sikeba againapùrì nen hagasukwa wene

11At Paùlùt en apùnì nen hagasusak lek mene elalinat hagarinapì lagaike atì, ebe re, Ala nenat hagarinapì lagaike. 12Hagarinapenem he, su at Paùlùt amùkùt tetùkwe mene he a, asu ebe mene elokoken weak asinogo ìlùk etakwe labetì lagaike mene he a, apùnì nen wolok, it ou wanhì lagaukwa mene inoba hei laganem he, on hano agìk, mokareke inoabùt weak mene ina'la kìlìk welagaike mene henogo wùlìpìk, ìkì lagaike.

13Atì'nogo hagato kolek, it apùnì Yahuri mene aike inebe wesagùn logolìk, mokareke inoabùt weak mene apùnì ina'la kìlìk were'ma henogo wulaksìlìk nìkì lagaukwa mene nen he, ninoe Etagepogot Yesùt etage palogo wulaksùogolùk walhasukwaat. Walhìkì logolìk, it en, mokareke oabùt weak mene yogotì logolìk he,

“At Yesùt, Paùlùt en yogoisìlìk niko mene atì etage palogo, henogo wùlìbi lan o, ìlùk yogohetì lago,” ìlùk yogosukwa. 14Atì'nogo hagatì logolìk, ap Yahuri mene ebe ap Ala esewerek mene inoe kain etage Sikeba atì, againapùrì ap inebe 7 nen welagaukwa mene nen atì'nogoat walhasukwa. 15Walhikenem, at mokareke oabùt weak mene nen he,

“Yesùt atì ebe, an nelu. Nen, Paùlùt atì ebe, abok holhìrek meneat. Mene re, hit yì sanì he. An nokot,” ìlùk yogoisasikesik en, 16ap mokareke oabùt weak mene a'la kìlìk welagaike mene a'nogo inoba pok harogo sagali lìlìk omame arìk he, it mabenetsasike. Mabenetsìkì logolìk, inasu lìbì'labak hogo tùgì mep wùlogo inoasike. Inoasikomo re, at aua nen inalulukwa palek hese wùlùpukwa. 17Hese wùlùpukwama re, apùnì nen,

“It atì'nogo hagata o,” ìlùk isukwama, it apùnì Yahuri mene mel, Yunani mene mel, o kota Epesùt welagaukwa mene obogat inasuk holhukwa. Holhukwasik he, inayùk arìk, Yesùt etage ebenageik hogoratì lagaukwa. 18Nen, it apùnì inetaùken Yesùt oba hìpìrethesukwa mene hùgì inebe wìrìk he, weak hagatì lagaukwa mene apùnì logolek ineilhanem hukalhì lagaukwa. 19Nen, it ap wesagùn logolìk wesarogo hagatì lagaukwa mene inebe logolegat en inariùesika wesa mene uang perak hùko mene 50.000 hake ba oko palhukwasik hesogo welagaukwa mene atogorogo apùnì obogat ineilhanem etu lolhukwaat. 20Atì'nogo hagasukwama re, ninoe Etagepogot ane atì hùko agìk, omame agìk, ìkì lagaike.

Apùnì o Epesùt mene nen, inane hùko sagalhukwa wene

21Atì'nogo hagasukwama, at Paùlùt a'la nen akìkì logolìk he,

“O propinsi Maketonia lìlìk en he, o propinsi Akaya wìrìk en pìkìt, o Yerusalem legein,” ìlùk a'la akasikesik he,

“Lìlìk, hobuk napotkwe wìrìk, o kota Ùrùm neileken ha legeinat o,” ìlùk isike. 22Atì'nogo ìlìk he, at atitigeke mene inebe pìre, Timotìùt ho, Erasìtùt ho, eperak o propinsi Maketonia laksa wìrìk, at aligat enek o propinsi Asia welagaike.

23-24Atem sat he, o kota Epesùt atoma ap aike etage Temeterìùt. Yì mene tì mene perak mene hagatì lagaike. Hagatì logolìk sukwan ebe he mene etage Aretemìt. Ebe awì hùko atoma wùrìk werek kolek, perak mene aike eagwìak apigat hagarogo hìkì lagaike. Atì'nogo hagarogo hikenem, apùnì nen oko hìkì lagaukwama, it Temeterìùt agoromì inapùgùnweak hagatì lagaukwa mene inomat hùkorogo sabùrìkì lagaukwa atì nen, apùnì Yesùt ane wìlìk opolìk lagaikarek wene atì hesik o Epesùt atoma inane hùkoat sagalhukwa. 25Atì'nogo haga'lagaike atì, at Temeterìùt en, agoromì mel, it aike perak mene atì'nogo inapùgùnweak hagatì lagaukwa mene mel, inayoko hesike. Inayoko hesikomo atogosukwama, at en he,

“Nagaiya'lak. Nit atì'nogo hagatì lago atì ba hano sabùrìkì lago, ìlùk hinelu. 26Mene re, yogotak at Paùlùt atì hagarì'logo mene, hineileken tomok hìgìk, hinasuk holhìk, ìkì lagep. At en he,

Apùnì ineki nen sukwan hagatarek atì re, ebe walhobak mene lek o, ìlùk yogoisikenem, apùnì logolegat en,

Wene atì eberogoat, ìlùk wanha atì, horok o kota Epesùt yoma mene nek hùk. O propinsi Asia obogat hake wanhamaat o. 27Atì nen, nit atì'nogo hagatì lago mene yì ninabok weak palugun o. Mene re, nit ninabok enek weak palugun hùk. Ninagona esin Aretemìt awì hùko wùrìk yì re, lek meneat akìkì logolìk, Aretemìt apùnì o propinsi Asia mene obogat mel, o yì awì tì awì mene mel, inomat he, at awe a'ma kìlìk logolìk hogorarì'lùgì mene sagalogo legethogoin atì!” ìlùk yogoisasike.

28Yogoisasikomo ina'mage apik lagalìk he,

“Nit apùnì o Epesùt mene ninagona Aretemìt hùko atìat o,” ìlùk inane hùkorogo iko motok kamo isukwa. 29Atì'nogo ìkì logolìk, inane sagalhenem, apùnì o kota Epesùt atoma mene humusegat atogosi waga logolìk he, ap o propinsi Maketonia mene inebe pìre, Paùlùt inom nìkì lagaukwa mene, inetage Kayùt ho, Arisitarekùt ho, inebe haksìlìk heleka hùko wagane'ma wogisek kisukwa. 30Wogisek kisukwama, Paùlùt ebe hobuk inopolik apùnì inebe logolegat atogore'ma atoma kigìlù isike meneat he, it apùnì Yesùt ane wanhukwa mene nen,

“Hat kùgùn,” ìlùk wene palhukwa. 31Nen, ap kaintek o propinsi Asia mene aike Paùlùt inom hutik welagaukwa mene nen he,

“Heleka wagane'ma atoma helokwe hei kùgùn o,” ìlùk it aike nen etaùken sebeluagalùk wene warogo oba laksasukwaat. 32Nen, apùnì atogosukwa mene amanogo, inebe hùkokwe wene ebe inokorat atogosi wagaukwa atì nen,

“Nahalok atogosi wago heat,” ìlùk it aike nen inane yì'nogo ìgìk, it aike nen tì'nogo ìgìk, inane hùkoat sagalhukwa. 33Inane atì'nogo sagalho kolek, it ap Yahuri mane nen he, ap Aleksatat apùnì logolek ineilhanem menhei wagaukwama re, it apùnì logolegat amanogo nen he,

“Wene ero, at hìgì,” ìlùk ina'la akasukwa. Atì'nogo akikenem, at Aleksatat en he,

“An wene noba le'ma o,” ìlùk apùnì amanogo yogoisagalùk eki sagan warisasike meneat he, it ina'la nen he,

34“Ap yì Yahuri mene,” ìlùk ebe hùthìlìk he, inane omakeat lapuk hogo, hùkorogoat mel isukwa:

“Nit apùnì o Epesùt mene yoma esin he, ninagona Aretemìt atìat o,” lìlùk inane hutik-hutigat 2 jam hake iko welagaukwa.

35Atì'nogo ìkì lagaukwama re, at ap wene halhenem helal wanhì lagaike mene nen, it apùnì logolek amanogo inane legethesike. Legethìlìk he, mel yogoisasike:

“Hit apùnì o Epesùt mene yì sanì. Ninagona Aretemìt hùko atì awì wùrìk atì mel, apùnì-apùnì at okawerek ebe bake hagarek pogot oba nen pi wagaike mene atì mel, nit apùnì o Epesùt mene yoma hesogo welagorek atì sa okot. Apùnì o yì awì tì awì obogat inelu nek. 36Apùnì aike nen,

Wene atì lek meneat o, ìlùk sagalusak lek. Halok he, hit yoma nen hinetaùken lek negen yì'nogo tì'nogo aike hagatì'lek, hinabolo'legat logousak o. 37It ap yì nen, yì mene tì mene ninagona sukwan awìla mene aike ineki abusak wani kìgì'legat, sukwan ebe atì abok palhì'legat, werek kolegat he, wogisek wagep yì rì! 38At ap Temeterìùt ebe mel, agoromì inapùgùnweak hagatarek mane mel, inom en he, ùkùm ap aike oba housak werek halok he, ineki aike sapùl ùkùm inoba hìgìk kotìk egarek oba nen, it gubernur lak ineilhanem ùkùm inoba housak werek o. Halok he, at aike nen ùkùm at aike oba hìgìk, at aike nen ùkùm at aike oba hìgìk, atoma nenat usak werek o. 39-40Hinebe atogosi wagasip hinane hùkoat sagalhep yì, it aike nen,

Nena wene hesik atogosi wagasip ìkì lagep, ìlùk ùkùm hinoba hiko halok he, hit en nìkì'nogo ugun. Wene ero le'ma yì rì! It en he,

Weak hagasuagalùk ina'la menetì lagep, ìlùk ùkùm hinoba housak o. Atì nen he, hit en aike hagasuagalùk akegep halok he, apùnì obogat inayoko hìlìk atogothìlìk, ùkùm inoba hìgìk, kotìk, egarek atì like wene higirethousak o,” ìlùk yogoisasike. 41Atì'nogo yogoisasikesik he, apùnì atogosukwa mene amanogo pùgùlogo laksasike.

Currently Selected:

LAKSASIKE 19: LAIDNI

Highlight

Copy