LAKSASIKE 17

O Tesalonika nen inane hùkoat sagalhukwa wene

1At Paùlùt Silat eperak o atoma nen he, o Apìpolìt en Apolonia nen pìkìt o kota Tesalonika wagaukwa. O Tesalonika atoma re, o apùnì Yahuri mene sapan ìkì lagaukwa ba aike wùrìk welagaike. 2Atì'nogo wùrìk were'ma, at Paùlùt o sapan egarek oba wùrìk werek halok kìkì lagaike hagat inoba kisike. Kìlìk he, minggu 3 ba sapan atoma ìkì logolìk, wene Ala ane helal waganek a'nogo ba ina'la kagalogo hinok wogisikenem it en oko yogotìk, ìkì lagaukwa. 3Ala ane helal waganek a'nogo ba sekek hogo yogoisìkì logolìk, mel yogoisìkì lagaike:

“At Karìsùt Ala nen lakhei wesigin ìlùk isukwa a'nogo re, yì aik tì aik hìlìk hìlìk wa'larìk en, eluk asigin, ìlùk isukwa. It isukwa atì hagat, at Yesùt hagasike wene abok yogohisìkì lagì mene yì, hagasusak higit hogoat hagasikomo. Ala nen lakhei wesigin ìlùk isukwa atì, ebe re, Yesùt atìat o,” ìlùk yogoisasike. 4Atì'nogo yogoisasikomo re, it apùnì o'moko nen,

“Eberogoat,” ìlùk wene atì wanhukwasik, it Paùlùt Silat werekwe asi lagaukwa. Atì hagat, it apùnì Yunani mene Ala ane wanhukwasik inebe Yahuri mene negen welagaukwa mene logolegat it werekwe asi lagìk, hìmì kaintek mene inebe apigat it werekwe asi lagìk, isukwa. 5Inebe logolegat it Paùlùt Silat eperak werekwe atì'nogo asi laganem, it apùnì Yahuri mene ua palogo, it ap inoabùt weak mene o silimo welegat were'ma inebe woginabìk he, esa hologo apùnì o kota Tesalonika atoma mene ina'la menerìk lagaukwama, wene hùkoat wo'lagaike. Atì'nogo haga'lagaikomo, at Paùlùt Silat eperak ineki lisogo apùnì logolegat inoba wogisek lùogolùk, heraginabìk, esa hologo o ap Yason were'ma o lasi lagaukwa. 6Latì logolìk, Paùlù lak inebe lek en he, Yason mel, Ala againapùrì he'nakìt mel, ineki lisogo ap kaintek pemerintah mene inoba wogisek wagaukwa. Wogisek wìrìk, inane hùkorogo mel yogoisasukwa:

“Ap o yì awì tì awì elokoken weagarìk nùgì mene amanogo yoma wagaikasi'mo re, 7at Yason yì nen woginapomo. It ap atì nen he,

Ninoe Kain Etagepogot hùnogoat Yesùt werek o, ìlùk, ninoe kain Kaisat ane heraksìlì'lùgì o,” ìlùk yogoisasukwa. 8Atì'nogo yogoisasukwama, it ap kaintek pemerintah mene mel, apùnì inebe logolegat amanogo mel, ina'mage lagasike. 9Ina'mage lagasikomo re, it ap kaintek pemerintah mene amanogo nen Yason lak en oko wogisoagalùk yogoisasukwama, wogisasukwama re, inebe ineki hele hikalogo wulaksasukwa.

Paùlùt lak o Perea wagaukwasik hagasukwa wene

10Atì'nogo wulaksasukwama, o hi isikomo re, it Ala againapùrì nen Paùlùt Silat eperak o Perea laksa wagaukwa. Laksa wagaukwama wìrìk he, o apùnì Yahuri mene sapan ìkì lagaukwa ba kisukwa. 11It apùnì Yahuri o Perea mene inoabùt he, apùnì o Tesalonika mene ina'la pùk welagaukwa atì hak he, lek. We, it he, wene akìlùk hogo wanhì logolìk,

“Wene ike atì eberogoat a? Mel a,” ìlùk, Ala ane helal waganogo hesukwa mene a'nogo ninhùp-nanhùbat etage salogo tùkùm hogo hìthìkì lagaukwa. 12Atì'nogo hìthìkì logolìk he, apùnì Yunani mene, hìmì kaintek mel, ap logolegat mel, inebe hùkoat inetaùken Yesùt oba hìpìrethesukwa. 13Atì'nogo hìpìrethesukwama re, apùnì nen inabok ìkì logolìk,

“Paùlùt en he, Ala ane o Perea yogoisìlì'logo,” ìlùk ikenem he, it apùnì Yahuri mene o Tesalonika welagaukwa mene amanogo inasuk holhukwasik he, wagaukwa. Wagaukwasik he, apùnì logolegat amanogo kolo hagasuagalùk ina'la lo'logoratìk, menetìk isukwa. 14Atì'nogo isukwama, Silat Timotìùt eperak, o atoma kamo iko kolek, it Ala againapùrì amanogo nen, Paùlùt enek,

“Hepok lanok,” ìlùk wolok i laut hùko yekelek aik oba wagaukwa. 15Atì'nogo wagaukwasik imakwe wolok o kota Atena wagaukwa. Wagaukwasik inapotkwe o Perea lùogolùk ikenem, at Paùlùt en he,

“Silat Timotìùt eperak noba hepok wesuak,” ìlùk wene warogo laksasikomo lagaukwa.

Paùlùt o Atena logolìk hagasike wene

16At Paùlùt, Silat Timotìùt eperak serisek o kota Atena atoma logolìk he, o atoma tùgì hareken awì wùrìk motok apigat were'ma eileken hìlìk, a'la motok weak agaike. 17A'la weak arìk he, ninhùp-nanhùp o apùnì Yahuri mene sapan ìkì lagaukwa ba kìlìk, it Yahuri mene mel, welek mene Ala ane wanhukwasik Yahuri mene negen welagaukwa mene mel, at en wene ina'la kagalogo yogoisikenem, it en at oko yogotì lagaukwa. Atì'nogo ìkì logolìk he, apùnì pasar oko wanhare'ma lìlìk, apùnì inom apì arìk, at en wene ina'la kagalhenem, it en oko yogotìk ìkì lagaukwaat. 18Atì'nogo ìkì logolìk he, at en it apùnì wene Epikùrot wene hesogo logolìk it aike yakùlisìkì lagaukwa mene mel, wene Sitoa wene hesogo logolìk, it aike yakùlisìkì lagaukwa mene mel, wene ina'la kagalogo yogoisikenem, it en oko yogotìk, it an at yogotenem, at en oko yogoisìgìk, ìkì lagaukwa. Atì'nogo ìkì lagaukwa mene aike nen he, at Paùlùt hesik mel isukwa:

“At he, wene elu nogo? Okot. We, hamùlùgat elu logolìgat he, ane nek motok apik yogonisìlì'logo,” ìlùk isukwa. Atì'nogo isukwama, it aike nen he, at Paùlùt en hano wene yogoisìkì logolìk he, Yesùt en hagasike wene yogoisìgìk, apùnì wa'lari'mo nen Ala nen inelugurinaperek wene yogoisìgìk, ìkì lagaike atì nen, mel isukwa:

“Apùnì hùnogo mene inawesa wene hesik yogonisìlì'logo he a,” ìlùk isukwa. 19-21Atì'nogo isukwasik, it apùnì o Atena atoma inawìwerek mene obogat mel, ap pok mene atoma welagaukwa mene mel, inoabùt he, hùnogo mene hagatì'lek, we, wene kerat wolok waganem inasuk holhìk, wene ebe pìlìngìtìk, iko motok logou inamolo welagaikarek atì nen, Paùlùt ebe wolok he, apùnì o Areopagùt wene elùgùn watare'ma atoma atogotenem inoba wolok lagaukwasik he, mel yogosukwa:

“Hat wene ket wolok wagatìk yakùlnisìkì lagen atì re, nit ninasuk holhì logolìk, hùnogoat mene akìkì lago atì nen, nit wene atì ebe kì'nogo mene, ìlùk tùkùm hogo ninelu asusak walogat,” ìlùk yogosukwa.

22Atì'nogo yogosukwama, at Paùlùt ebe ap kaintek o Areopagùt atoma atogosukwa amanogo, ina'la tùlem melarìk he, mel yogoisasike:

“Ap Atena mene yì sanì. Nogogì nagaiya'lak. Hit he, yì mene tì mene hesik hagasuogolùk he, tùgì hareken atìat hinetaùken tùlem hinoabùt palhì lagì. 23An o hit hinawì sili yoma nìkì logolìk, o wesa hagatì lagep obakwe neileken hìlìk nìkì logolìk, hareken aike awì wùrì'mo ako warogo hisegesep oba atoma helal mel ìlùk oba waganek were'ma neileken hìgì:

Yì Walhobak ninokot mene hesik o, ìlùk helal waganek were'ma hìgì. Hit hinokot logolìk hogoratì lagep atì, ebe re, an nen sekek hogo yakùlhisak. 24Ala nenat he, o kweang yoma walhìgìk, yì mene tì mene obogat walhìgìk, isikesik he, pogot kweang esewerek kain welagarek atì. Ma re, tùgì hareken awì apùnì ineki nen wùtarek mene atoma a'la at Ala logousak mea o. 25Nit apùnì obogat he, at enat ninebe ninelugu'ninapìk, nineleage wo'nisìgìk, yì mene tì mene wo'nisìgìk, ikerek atì nen, yì mene tì mene at elageik ìlùk nit apùnì nen wogosusak mea o. 26At Ala nenat, yì apùnì tì apùnì o inawì lopok logouagalùk, o hùlì hìgìk,

Tahun tì ba logopik, tì ba lek asuak, ìlùk hùlì hìgìk, a'la tak akasikesik en, yì apùnì tì apùnì inùkùl etage lopok obogat wìalarìk loagalùk, ero ba re, ap omakeat walhasike. 27Atì'nogo elalninapike atì re, apùnì ineileken mùm mene nen yì mene tì mene inekihak heratarek atì hak, apùnì ninùkùl etage lopok en at Ala ebe heratìk, ninelu agìk, uagalùk elalninapike atì. Mene re, at ebe walegat welagarek hùk. We, ninebe lopok ninera'lu horok yaat welagarek o. 28It aike nen atì'nogoat ìlùk mel isukwa:

At Ala omame ba ebe ninom hutik nineluk logolìk, kwe lagìk, yì mene tì mene hagatìk, ikoat welago, ìlùk isukwa. Atì'nogoat wùnì ap hit mene nen mel ìlùk helalhukwaat:

Nit obogat he, at againapùrì welago, ìlùk isukwa atì. 29Nit atì'nogo at againapùrì welago halok he, at ebe bake nit apùnì nen nina'la akalùk, nineki nen tùgì hareken emas mene, perak mene, helep mene, hagarogo wususak lek hìgì, ìlùk hùthasak o. 30-31It alep Ala ebe inokot logolìk, inoabùt weak hagato kolegat he, at en epe morogo heraksìkì lagaike. Atì'nogo meneat he, yogotak ya, at en he,

Yì apùnì tì apùnì obogat tì sat inanema waganogo ùkùm inoba hìgìk, kotìk, higit hogoat uak, ìlùk ap aike wenagasogo hìlìk ayoko hikomo werek atì nen, nit apùnì weak hagatì lago mene heraksìlìk ninoabùt hebelasuagalùk yogonisìlì'logo atì. Halok, nit en he,

Wene atì'nogo hagasigin atì, eberogoat, ìlùk, nit obogat hùthoagalùk, ap atì ebe wa'lagaikesi'mo nen, opase nen apotkwe eluguthesikomo werek o,” ìlùk yogoisasike.

32“At wa'lagaikesi'mo nen, eluguthesikomo werek o,” ìlùk yogoisikenem, inasuk holhukwasik, it aike nen he, Paùlùt agato agaukwa. Nen, it aike nen he,

“Wene egen atì, nit ninasuk hobuk holuagalùk ninhùkwe halok yogonisasagat o,” ìlùk yogosukwa. 33Atì'nogo yogosukwama, at Paùlùt it o atom heraksalùk wùlìpike. 34Atì'nogo heraksalùk wùlìpike meneat he, it apùnì aike at oba labeli lìlìk he,

“Wene atì eberogoat,” ìlùk inetatùken Yesùt oba hìpìrethesukwa. It atì aike etage Tìonisìùt, it ap kaintek o Areopagùt atì inom atogotì lagaukwa mene. Nen, he aike etage Tamarìt, nen, it aike inomat atì'nogo inetaùken Yesùt oba hìpìrethesukwa.

Currently Selected:

LAKSASIKE 17: LAIDNI

Highlight

Copy