YouVersion Logo
Search Icon

LAKSASIKE 10

10
Korenelìùt en Peterùt ayoko hesikomo, oba wagaikesik hagasike wene
1O Kaisarea atoma ap esa hùko tentara mene etage ap Italia esa ìlùk ìkì lagaukwa mene ap aike inoe kain mene etage Korenelìùt welagaike. 2At Ala ayùk hogo logolìk againapùrì inom en hogoratì lagaukwa. Logolìk he, it apùnì Yahuri mene amanogo aike inekimo lek inelageik mene hùkorogo leberisìkì logolìk, sapan kamo ìgì'lek iko motok welagaike. 3Atì'nogo iko motok logolìk he, eki aike sapùl, o mo hea i laga kolek jam 3 hake, abìkakan mel hasike. Malaikat Ala nen yoko pelaksa wagarek mene amanogo aike pi wagaikesik Korenelìùt oba kìlìk he,
“Korenelìùt,” ìlùk yogosike. 4Yogosikomo, at Korenelìùt eileken at oba lùrogo hìkì logolìk, ayùk arìk he,
“Ì, noe. Nahalok,” ìlùk isikomo, at en he,
“Hat sapan ìgìk, apùnì inekim lek inelageik mene leberisìgìk, ìkì lagen atì re, Ala elu agasik hoba eberek werek o. 5O yogotak o Yope atoma ap aike etage alep mene Simon. Hobuk mene Peterùt, ìlì'lùgì mene a'naga wesuagalùk, ap aike at ayoko laksano o. 6At ebe ap pok wagasik he, ap Simon yì wam tì wam ogat nokolek pùgùthikerek mene a'naga aua i laut hùko yekele'ma era'lu atoma werek o,” ìlùk yogosike. 7Arat yogo'lùk he, malaikat Ala nen yoko pelaksa wagarek mene a'nogo wùlìpikesik lagasikomo re, at Korenelìùt en, atitigeke mene aua welagaikarek mene inebe pìre mel, ap aike ebe tentara, ekaragùn mene Ala ebe hogoratì logolìk Korenelìùt wolok nìkì lagaike mene atì mel, waisasike. 8Waisasikesik laksagalùk ìkì logolìk, wene abìkakan hasike wene a'nogo yogoisasikesik, o Yope laksasike.
9Laksasikomo, it a'nogo laga lagaukwasik hùenkwe o Yope horogat kuogolùk laga kolek, at Peterùt a'nogo likene jam 12 sapan igìlùk o tùm sabìa tale'ma lagegarek oba lagasike. 10Lagasikesik sapan iko were'ma sùpùrùk nele agaike. Nele agaikesik werek kolek, apùnì aike nen sùpùrùk noagalùk ouma oan werato kolek he, abìkakan mel hasike. 11Pogot healogo re, su kain hake hùko mene okut 4 karek oba kelik mene kweangma pelakhei waganem eileken hasike. 12Su atì a'la re, yì wam tì wam, yì walo tì walo kweangma welagarek mene atì mel, yì rùe tì rùe pogot obakwe purogo nikerek mene atì mel, obogat kalek welagaike. 13Were'ma re, Ala nen sa ane heat yogotì logolìk he,
“Peterùt. Hebe melarìk he, aroma warogo nan o,” ìlùk yogosike. 14Atì'nogo yogosikomo, at Peterùt en he,
“Lek u. Noe. An wesa mene mel, yùgalhì'lek mene mel, hamùlùk halok nìkì'legat welagìrek,” ìlùk yogosike. 15Atì'nogo yogosikomo, ane a'nogo nen aike yogotì logolìk he,
“Ala nen,
Hano nasak, ìlùk ike halok, hat en,
Wesa, nasak lek, ìlùk ha'la akagùn o,” ìlùk yogosike. 16Eki pìre ba atì'nogo yogosikesik, aike yogo'lùk he, an hake a'nogo pogot oba nen lisogo wanhikomo hek hogo lagasike. 17Lagasikomo at Peterùt en he,
“Nabìkakan hìgì atì ebe kì'nogo mene heat,” ìlùk oake palagaikesik a'la ebeto were'ma re, it ap Korenelìùt en laksasike mene amanogo lagaukwasik, apùnì aike yogoisìkì logolìk he,
“Simon aua kì,” ìlùk hinok wanhukwama, it en he,
“Aua arì,” ìlùk isukwama, kwe ba arat kisukwa. 18Kisukwasik inane ouma kelakhesukwama, inebe wùlùpukwama mel yogoisasukwa:
“Ap pok mene etage alep mene Simon, hobuk mene Peterùt, a'naga ebe yoma hinom welagep a? Lek a,” ìlùk hinok wanhukwa. 19Hinok wanho kolek he, at Peterùt a'nogo abìkakan hasike mene a'nogo,
“Ebe kì'nogo mene hìgì,” ìlùk a'la ebetoat were'ma, Ala Areagùn nen he,
“Ap inebe hinagan mene herakhabìk wagaikasik werek o. 20Halok, hat hebe siak hogo pìlìk, it atì an nenat laksa wagìma wagaika atì nen he,
Ninom lasak mea, ìlùk, ha'la wenesùgì ebetì'legat hinom lano o,” ìlùk yogosike. 21Yogosikomo, at Peterùt inoba pìlìk he, mel yogoisasike:
“Nebe hera'nabìk wagep atì, nebe yì o. Hit nìkì'nogo nen wagep,” ìlùk yogoisasike. 22Atì'nogo yogoisasikomo, it en he,
“Ap tentara mene esa logolharek mene inoe kain etage Korenelìùt, atì nen lakhina wagama wago. At atì oabùt higit hogo hagatìk, Ala ebe ayùk hogo welagìk, ikenem, it apùnì Yahuri mene obogat en oabùt palharesik he, atì'nogoat abok hano egarek. At ati atì'nogo hagatenem, malaikat Ala nen yoko pelaksa wagarek mene amanogo aike nen he,
Peterùt atì nen wene hat hasuk holusak mene yogohesigin werek o, ìlùk hat hayoko lakhina wesuagalùk yogotomo, at en lakhina wagama hoba wago o,” ìlùk yogosukwa. 23Atì'nogo yogosukwama, at en he,
“Halok he, an ninom nogo uok en, ki we'ni o,” ìlùk yogoisasike.
Yogoisasikomo re, nogo ìlùk en, hùenkwe ineluk a'lùk he, it Ala againapùrì o Yope atoma mene inomat wagaukwa. 24Waga logolìk, ebekalem ineki omakeat nogo ìlùk he, o Kaisarea wagaukwa. Waga kolek, at Korenelìùt inelokoma logolìk he, at ogogì agoromì mel, erùgì agaiya'lak at inom ekabe mene mel, inayoko hesikomo re, obogat atogosukwasik were'ma wagaukwa. 25Wagaukwasik he, at Peterùt ebe ouma kigìlùk ikenem, at Korenelìùt en at ebe wanhikesik he, eitep awì yagasogo Peterùt awe a'ma soma ìlìk hogorasike. 26Atì'nogo hogorasike meneat he, at Peterùt en he,
“Noe, melame. An nebe apùnì meneatma, atì'nogo hogo'nabusak lek o,” ìlùk eki hagasogo menhesike. 27Menhìlìk he, eperagat wene ane ìlìk-ìlìk ouma kisukwasik, apùnì logolegat atogosi wagaukwasik were'ma at Peterùt eileken isasike. 28Eileken isìlìk, mel yogoisasike:
“Nit apùnì Yahuri mene nen hit apùnì etakwe mene ninom hùnetìk, nit hinoba kìgìk, usak lek ilùk, wene palek welagarek atì, hinelu. Atì'nogo meneat he, at Ala nen,
Apùnì aike mene atì, inom logousak he, wesa mage, ìlùk usak lek o, ìlùk yakùlnetomo re, 29hit en nayoko laksegepma nabìt ìgì'lek wagì o. Wagì mene re, wene aike hinok wokhisak. Wene ebe kì'nogo nen nayoko laksegep,” ìlùk yogoisasike. 30Atì'nogo yogoisasikomo, at Korenelìùt en he,
“O ùage, mo hea i laga kolek, jam 3 ba o yìgìnenemat an naua sapan ìgì. 31Sapan atì'nogo ikenem he, ap aike asu amùlìt apik laberek mene an neilhanemat melasi pi waga. Melasi pi wìrìk he,
Korenelìùt. Hat sapan egetek atì, Ala asuk holhomo. Nen, apùnì inekim lek inelageik mene leberisegetek atì, Ala nen hoba eberek weregat o. 32O Yope atoma re, ap ebe omakeat mene etage alep mene Simon. Nen, hobuk mene, Peterùt, atì ayoko loak en ap aike laksan o. At ebe re, ap pok wagasik he, ap etage Simon, yì wam tì wam ogat nokolek mene pùgùraterek mene a'naga aua i laut hùko yekele'ma esakoma atoma werek a'naga o, ìlùk yogonete. 33Atì nenat, an neki aike welagì'legat he, ap aike hayoko hoba laksìgìma, hat hoabùt hano nen kamo ìgì'lek hano wagen, noe. Nit obogat yogotak Ala eilhanem welago yoma re, ninoe Etagepogot en,
Wene yogoisano, ìlùk yogohete mene, wene atì obogat ninasuk holuogolùk welago, noe,” ìlùk yogosike.
At Peterùt en wene yogoisasike wene
34At Peterùt en wene ero ba nen yogoisìkì logolìk he,
“At Ala oabùt he, apùnì inogat oba nek eileken isìlìk, aike elokoma hisìgìk, aike apotma hisìgìk, ikerek lek, ìlùk yogotak en hùthìgì. 35Apùnì inùkùl etage ya mene ta mene at ebe inayùk logolìk inoabùt higit hogo hagatarek mene hùgì woginaperek enek hìgì o. 36Ma re, nit apùnì obogat ninoe Etagepogot Yesùt Karìsùt en lapuk hogo hinoagalùk, wene hano wene atì, ebe nit apùnì Yahuri mene ninoba lakhei wagaike atì hinelu o. 37-38Wene ebe haga'lagaike atì re, at Yohanet en ima pelaginapì logolìk, wene ima pelaginaparek wene atì yogoisìkì lagaikesi'mo nen, at Yesùt aua Nasaret mene atì, Ala nen Areagùn oba pelakhei wagìk, omame wogotìk, isikesik, eperak welagaike atì nen, alebagìk o Kalilea tokwe atoma nen, o apùnì Yahuri mene inaua ya ta atoma laga logolìk, yì mene tì mene hanorogo hagatìk, it aike Ibilit en ning hogo hagisek welagaike mene hagarinapìk, ìlìk nìkì lagaike atì hineluat o. 39Apùnì Yahuri mene inaua o ya ta atoma mel, o kota Yerusalem wùrì'mo atoma mel, nìkì logolìk, obogat hagatì lagaike mene atì, nit nineileken hasugu. Atì'nogo meneat he, at ebe e ba menhìlìk wasukwa atì. 40Atì'nogo wasukwa meneat he, eki pìre warek were'ma re, eki aike ba, Ala nen eluguthesikesik he, ebe apùnì nen ineileken hoagalùk weinamethesike atì. 41Atì'nogo weinamethesike meneat he, apùnì obogat ineileken hìgì'lek. We, alebat at Ala nen,
It inebe atemat ineileken hoak o, ìlùk wena'ninapike mene nek, at Yesùt ebe warek were'ma Ala nen eluguthesikomo, nit at ninom logolìk sùpùrùk mel, i mel, ninomat nasugu. 42Atì'nogo logolìk he, nit en apùnì wene yogoisìlìk laga logolìk he,
Apùnì obogat, wa'lagaukwa mene mel, ineluk werek mene mel, ùkùm inoba hìgìk, kotìk, uagalùk, Ala nen Yesùt at menhesike, ìlùk, tùkùm hogo yogoisìlìk laga logouagalùk ninayoko hesike. 43At Yesùt hesik, it ap Ala ane yogoisìkì lagaukwa mene amanogo obogat en he, abok ìkì logolìk, mel isukwa:
At ebe waganem he, it apùnì weak hagatarek mene inetaùken at oba hìpìrethogoin mene hùgì inebe lopok, it weak hagarì'lùgì mene atì, at Ala nen at Yesùt etage ba sagalogo legetsegein o, ìlùk yogoisìkì lagaukwa,” ìlùk at Peterùt en yogoisasike.
Apùnì etakwe mene Ala nen Areagùn wogisasike wene
44At Peterùt en wene atì oan yogoisiko were'ma, Ala Areagùn it apùnì wene atì inasuk holhì lagaukwa mene amanogo inebe obogat inoba louk i pi wagaike. 45-46Atì'nogo pi wagaikomo, it apùnì inogat inekalìma mene palek logolìk wene eberogoat ìlùk wanhukwa mene aike Peterùt inom wagaukwasik were'ma, Ala nen Areagùn atì'nogo it etakwe mene inoba pelakhei wagaikomo, helasukwasik, wene it aike inane inokot mene ba elalinat ìgìk, Ala hogoratìk, ikenem, ineileken hìgìk, inasuk holhìk, isukwasik he, mel isukwa:
“Ala nen Areagùn it apùnì etakwe mene elogat wogisikomo hìgì. Nayùk e,” ìlùk hogorasukwa. Atì'nogo hogorasukwama, at Peterùt en he, mel yogoisasike:
47“Lakhani. It yì Ala Areagùn nit wo'nisikerek atì hagat, it wogisikomo helaga atì. Halok he, sa nen,
It ima pelaginabusak lek, ìlùk wene palusak akegep. Elok pelaginabusagat o,” 48ìlùk yogoisasikesik, Yesùt Karìsùt etage palogo ima pelaginabuagalùk, it aike yogoisasikomo pelaginapukwa. Atì'nogo pelaginapukwama, it en he, at Peterùt yogotì logolìk he,
“Noe. Heki hamùlùgat aike ninom logopik en lanok o,” ìlùk hakhesukwama inom welagauka.

Currently Selected:

LAKSASIKE 10: LAIDNI

Highlight

Share

Copy

None

Want to have your highlights saved across all your devices? Sign up or sign in