Markus 1

Yohanes nen ima wusa ʼbiyasi dogolik kagako lagike wene

(Matius 3:1-12; Lukas 3:1-18; Yohanes 1:19-28)

1At Yesus Kristus Allah aʼbut nen wene pano wene kagako lagike mende wene yokisak. 2Wene eti erlo paga, at Yesaya Allah wene yogisasi lagike mende etnogo nen kolal mbalogo ʼbisike kagat, kagat lagike. Esigit diluk kolal mbalko dogolik men yisike,

“At Allah nen,

Kat yabunggane lanok nen yiluk, ap omanggi kat kagolak yaʼbagasi dogowagaluk ayonggo ʼbiluk alep laʼbigima o. (Mal. 3:1)

3At ebe o limo akoni dekma etoma dogolik ane wai yisi dogolik,

Iya! Ninewe Endaganggok wisumongge, kolak panorogo yakik, nggorlo mende motogo yakik, yako dogoni o, yiluk waisiligogo,” (Yes. 40:3)

yiluk yisikemo, at Yesaya nen kolal mbalogo ʼbisike o. 4Wene kolal mbalek werek eti ndak-ndagat, at Yohanes ebe o limo akoni dekma wagike o. Wagikesik nen, akoni ima wusa ʼbiyigik, wene yogisigik, kagako dogolik, men yisi lagike,

“Wene kinoba mende Allah nen sagalogo deget diyawagaluk kit weyak kagarigogi mende eti togot diyalok kinobabut kwalatni. Kinobabut kwalasumo, an nen ima wusa ʼbinagagin o,” yiluk yogisasi lagike. 5Esigit diluk yogisasinem, it akoni o propinsi Yudea mende inom, o kota Yerusalem mende inom, inebe taʼbokogonat, at oba nandorli wago laguka. Nandorli wagukasik, yi weyak ndi weyak kagako laguka mende ʼbukalogo togot diyasinem, at nen i Yordan ima wusa ʼbiyasi lagike. 6Esigit diluk kagako dogolik wam unta isi mende nggwarogo iyom yikigik, owado mende nggwarogo serlok kagarogo yikigik, yiko lagike. Esigit diluk kagako dogolik, kimbiri yibirla mende ninggik, simuk ambusu onggama mende ninggik, kagako lagike. 7Esigit diluk kagako dogolik, men yogisasi lagike,

“An nebe elege nobatne dek mende wagi yi, ap nggok obatneyak mende yabunggane wisigin o. At ebe nggok obatneyak eti paga, at iyok agut kerle warek eti an nen nindibagal yunggulogo piyalusak erlok dek o. 8Nen, an weat, ima wusa ʼbinagasi lagi mende, at ebe witluk nen ima wusa ʼbinagu kak, Allah Agurengge kinoba wusa ʼbinagi wisigin o,” yiluk yogisasi lagike.

Yohanes nen Yesus ima wusa ʼbisike wene

(Matius 3:13-17; Lukas 3:21-22)

9At Yohanes nen wene esigit diluk yogisasinem, at Yesus o Galilea agum o endaga Nazaret etoma nen oba wusasikemo, i Yordan ima wusa ʼbisike. 10Ima wusa ʼbisikemo i aik oba duki wagonem, Allah Agurengge mbogot nggagukogo sewe merpati yogik negen oba duk yi wusa wagonem ilenggen kasike. 11Ilenggen kasinem, Allah ane mbogot oba nen men yisike,

“Kat kebe an Naʼbut nendainggen kunik mende o. Nakla arlenggen koba werek o,” yiluk ane wusa ʼbi wagike.

Iblis nen Yesus akla nggagaligiluk wago lagike wene

(Matius 4:1-11; Lukas 4:1-13)

12Allah ane wusa ʼbi wago nggorlek eranogoat, Agurengge nen, Yesus o limo akoni dekma wolok lagike. 13Wolok lagikemo nen, o limo akoni dekma etoma, inggi 40 hari werek nggorlek Iblis nen akla nggagaligiluk oba wago lagike. O etoma ʼbagi aila werekma malaikat Allah mbogot oba nen yonggo wusa ʼbiya wirigogo mende yomenogo amberek wusa wagukasik anggorlem welaguka.

Yesus o Galilea wagikesik, Simon agarlagi inom inayonggo ʼbisike wene

(Matius 4:12-22; Lukas 4:14-15; 5:1-11)

14Yabunggane Yohanes etnogo inggi kerle wakukasikmo, at Yesus o Galilea agum dagi wagikesik nen, Allah wene pano wene etnogo yogisilik noko lagike. 15Yogisilik noko dogolik, men yisi lagike,

“O Allah apma ʼbinagigin etnogo arat ʼbinagigin o. Eti paga, kit weyak kagarigogi mende togot diyalok kinobabut kwalogo pano wene yi eberogonat yiluk didini o,” yiluk yogisilik noko lagike. 16Yogisilik noko dogolik, i Galilea yenggelekma aik obangge lago dogolik, Simon agot Andreas imbisak kibitngge-yogongge ikanat waganigogoma nogo nen ikan waganuwogoluk, su yoge su ima wusakonem ilenggen lagiyasike. 17Ilenggen lagiyasikesik nen, men yogisasike,

“Ikan waganigogi eti kak, akoni esigit dilugat woginako dogobagik nen, yanggul kisak nen nomborlik witni o,” yiluk inayonggo ʼbiyasike. 18Inayonggo ʼbiyasinem eranogoat iniyom yoge su etoma togot diyalok, Yesus omborlik laguka. 19Omborlik lagukama korogat lagukasik nen, Zebedeus aʼburi Yakobus agot Yohanes imbisak, nggu paga iniyom yoge su ʼbugunggakonem ilenggen lagiyasike. 20Ilenggen lagiyalok nen, eranogoat waisasike. Waisasikemo, inombae inom, ap onggo wogisagaluk inayonggo ʼbisike mende inom, nggu paga ʼbiyalok Yesus omborligat laguka.

Ap omanggi kugi obabut weyak mende akla unggisikesikmo Yesus nen mukogo wula ʼbisike wene

(Lukas 4:31-37)

21It yomenogo Yesus omborlik lago dogolik, o Kapernaum unggisuka. Unggisukasik nen, ininggi 7 paga Hari Sabat Allah ake werlegat dogolik, o akoni Yahudi mende sembayan yiligogoma unggisukasik nen, Yesus nen wene yanggul isasike. 22Yanggul isasinem, it akoni yomenogo nen men yisuka,

“Ap Allah wene kolal mbalek indewerek mende nen yanggul nisiligogi kak yiligogo dek o. At te, wene ebe indewerek dogolik yanggul isiligogi kak yanggul nisiligogo o. Ninayuk o,” yiluk pogorakuka. 23Esigit diluk pogorako nggorlek etinemat ap omanggi kugi obabut weyak mende akla unggisikesik welagike mende, o it akoni Yahudi mende sembayan yiligogoma inoba unggisikesik ane nggokogo men yisike,

24“Yesus ago Nazaret mende yi! Kat nen ninggit diluk kagat ninabigiluk wagan. Nit weyagat ninabigiluk wagan a? Kat kebe Allah enggaerek ake mendagakesik laʼbagi wagama wagan eti an nen didagagi o,” yiluk ane nggokogonat yogokike. 25Esigit diluk yogokike mende, at Yesus nen mbereko dogolik,

“Kane. Ap yi akla nen duki lan o!” yiluk yogokikemo, 26kugi obabut weyak mende etnogo ap etnogo akla nen dukigiluk kagako dogolik, ap etnogo owak del kilik, ane naik yigik, kagako dogolik dukisike. 27Dukisikemo, it akoni yomenogo it-it men yisuka,

“Iya! Yi ninggit diluk kagake. Wene eti ngget ninat wene indewerek nen yanggul nisiligogo kigi. At nen ane pakasinem, kugi inobabut weyak mende inasuk koligogi eti nayuk!” yiluk pogorakuka. 28Esigit diluk pogorakukama, at Yesus abok o Galilea agum o ya nda etoma ibat wikak-wakakogo kagat lagike.

Yesus nen Simon akowan inom, akoni inebe dogalegat inom, u pano kagarinakike wene

(Matius 8:14-17; Lukas 4:38-41)

29At Yesus inom, Yakobus Yohanes imbisak inom, agoromi amberek inom, o akoni Yahudi mende sembayan yiligogoma nen duki wagukasik mbiyokogo Simon inom, Andreas inom, inaguma laguka. 30Inaguma lagukasik nen, uma unggisukama, Simon akowan oba u aganggen weyak nen windik werekma unggisinem eranogoat, it nen,

“Kwe yi oba u aganggen nen werek o,” yiluk Yesus yogokuka. 31Yogokukama kwe etnogo eragalilu lagikesik nen, inggi pagogo mendisike. Mendisinem, oba u aganggen etnogo dek agike. U dek agikemo nen, at nenat yamagiyasi lagike. 32Esigit diluk yamagiyasi werekma, keyamnggengge mo nggobokogo lagikesikmo nen, it akoni nen, amberek u warek mende inom, kugi inobabut weyak mende inakla unggisukasik welaguka mende inom, wogisek Yesus oba waguka. 33Wago nggorlek akoni amberek o etoma mende taʼbokogonat silimo nandorli waguka. 34Nandorli wagukama, it yi u ndi u warek welaguka mende inebe dogalegat pano kagarinakik, kugi inobabut weyak mende inebe dogalegat akoni inakla unggisukasik werekma mukogo wula ʼbiyigik, kagakike. Kagakonem, it kugi inobabut weyak mende nen,

“Ap yi ebe Yesus o,” yiluk didisuka eti paga,

“Kinane yusak dek o,” yiluk wenemuk yisike.

Yesus nen o unggul werlekmangge pano wene yogisilik lagike wene

(Lukas 4:42-44)

35Esigit diluk kagarinako lagikesik nen, noge yisikesik o wigik at iluk atluk dukisike. Dukisikesik nen, o limo akoni dekma lagikesik sembayan yisi lagike. 36Esigit diluk sembayan yisi nggorlek, it Simon agarlagi inom nen yabunggane Yesus kweyarik laguka. 37Kweyarik laguka mende, Yesus ebe werekma lagukasik, it nen, men yisuka,

“Akoni taʼbokogonat nen kweyakabigogi o,” yiluk yogokuka. 38Yogokukama, at Yesus nen, men yisike,

“Nineragalilungge o unggul taʼbokogonat ombongge wemangge yoma wene pano wene yogisilik lagaluk wagi eti paga yogisilik luwok nen witni o,” yiluk yogisasike. 39Yogisasikesik nen, o Galilea agum akoni Yahudi mende sembayan yiligogomangge unggisikesik nen, wene pano wene etnogo yogisigik, kugi inobabut weyak mende akoni inakla unggisukasik werekma mukogo wula ʼbiyigik, kagarik lago lagike.

Yesus nen ap omanggi u konanggo negen inayuk mende pano kagakike wene

(Matius 8:1-4; Lukas 5:12-16)

40Esigit diluk kagarinabik lagonem, ap omanggi u konanggo negen inayuk mende oba welagike mende Yesus oba wagikesik nen, indibagal yunggulogo keyagi wako dogolik, men yogokike,

“Newe, naʼbuwakan o. Kat kakla nen pano kagat nabigin ambegen kalok, erlok kagat nabusagat o,” yiluk ane aʼbuwarek negen yogokike. 41Yogokikemo, at Yesus nen, at ebe aʼbuwa kasikesik nen, inggi pakasikesik nen, men yisike,

“Nakla nen pano kagat kabigin ambigirikmoat o. Eti paga, koba pano asin o,” yiluk yogokike. 42Yogoko nggorlek, eranogoat oba u konanggo negen etnogo dek agikesik pano agike. 43Pano agikemo, at Yesus nen ebe laʼbigiluk ane obatnerogo asuk wako dogolik, 44men yogokike,

“Yesus esigit diluk kagat nake yiluk, akoni amberek mondok yogisagup o. Ap Allah indewerek mende ilenggen kiyawak nen oba lalok men kagatno. At Musa nen yisi dogolik,

Akoni inoba pano atluk, Allah ake omanggi ʼbiyano, yiluk yisike ndak-ndagat,

Oba pano agama, yiluk didaguwak nen, Allah ake omanggi ʼbiya lan o,” yiluk asuk warogo laʼbisike. 45Esigit diluk yogisagup yiluk asuk warogo laʼbisike mende, at etnogo nen akoni yugunat yogisasi dogolik,

“Yigit diluk pano kagat nake o,” yiluk abok ya nda yogisilik lagikemo, at Yesus nen o unggul nggokmangge etoma salekma lausak erlok dek nen, sikmangge o limo akoni dekma lagikesik welagike. Esigit diluk welagike mende, akoni o yi ai ndi ai etoma nen oba nandorli wago laguka.

Currently Selected:

Markus 1: DNA

Highlight

Copy