Matius 26
26
Yesus ebe wasuwogoluk abok mbalkuka wene
(Markus 14:1-2; Lukas 22:1-2; Yohanes 11:45-53)
1At Yesus nen wene eti taĘĽbokogonat arat yogisasikesik nen, yabunggane agoromi ane waganggo laguka mende yomenogo men yogisasike,
2“Nininggi mbere dogoluk nen Pesta Paskah kagasugun eti kit kiniluat o. Esigit diluk kagako nggorlek, an abat endak lasi wagagi etnogo, ap nen yonggo lalok, it amberek nen o paga mendaniluk nasuwagaluk ininggimo ʼbanugun o,” yiluk yogisasike. 3Etinem, it ap Allah indewerek mende ineugi nggokndek inom, it ap inarluwendek yomenogo inom, at ap Allah indewerek mende inewe nggok endaga Kayafas etnogo agolilu nandot diluk nen, 4Yesus il warogo limago paʼbiluk wasuwogoluk abok mbalko laguka. 5Abok mbalko dogolik, men yisuka,
“Pesta nggok iyago nasinem eti, inaneyak nggogat sagalogo nen, ilugun oba weyak asunogo pakigidek dogoluk, o werlekma kalok pakawok o,” yiluk abok yisuka.
Kwe omanggi nen ambusu obasi pano mende Yesus ungguloba ndiyalogo wusa ĘĽbisike wene
(Markus 14:3-9; Yohanes 12:1-8)
6Esigit diluk yisukasik werek nggorlek, at Yesus o Betania ap Simon u konanggo negen inayuk mende pagaat ebemangge welagike mende eti aguma etoma unggisikesik werekma, 7kwe omanggi ambusu obasi pano onggo nggogat mende onggo mbalogo iyak nggit mende endaga pualam kagarek mende paga akla kenagogo wolok Yesus kimbiri nasinem oba unggisikesik nen, unggulowak oba ndiyalogo wusakike. 8Esigit diluk wusakikemo, at Yesus agoromi ane waganggo laguka mende yomenogo inilenggen kasukasik nen,
“Ambusu we yugunat elamarogo ndiyalke yi, nenaluk,” yiluk, inakla agaga dagiluk, kwe etnogo mbereko dogolik,
9“Ambusu eti onggo mondok nggogat mende mbalogo nen, it inamende dek mende sumburisaem,” yiluk yisuka. 10Esigit diluk yisukama, at Yesus nen inobabut enggagat didiyasikesik nen, men yogisasike,
“Kwe yi nen pano kagat nake mende, nenaluk mberirigogi. 11It akoni inamende dek mende eti kit kinom mondok dogogun mende, anat, kit ninom mondok dogogun dek o. 12At kwe yi nen ambusu ndiyal dangge eti, an yabunggane nakonem nebe watlasumo, warek sal nabuwogoluk wat danu kagat arat wat dani waga o. 13Nane eberogonat yokisak. Kwe yi nen kagat nake yi eberek dogowagaluk, akoni wene pano wene etnogo, o yi ai ndi ai yogisilik noko dogolik,
Kwe eti esigit diluk kagakike, yiluk abok pano yisi dogogun o,” yiluk yogisasike.
Yudas nen Yesus wasuwagaluk ap inayonggo lagike wene
(Markus 14:10-11; Lukas 22:3-6)
14At Yesus nen wene esigit diluk yogisasikemo, at agoromi ane waganggo laguka mende inebe 12 yomenogo mende, omanggi endaga Yudas Iskariot etnogo, it ap Allah indewerek mende ineugi nggokndek yomenogo inoba lagikesik nen,
15“An nen Yesus eti wokisasi kalok, kit nen onggo nena mende woknisugun ambegep,” yiluk yogisasikemo, it ap yomenogo nen,
“Onggo uang perak mende 30 wokisugun o,” yiluk yogokukasik nen, wogokuka. 16Onggo arat wogokukama, at Yudas Iskariot etnogo nen, ngginem Yesus eti wogisausak pano yiluk akla munini ebeko lagike.
Yesus agoromi inom, pesta Paskah nasuka wene
(Markus 14:12-21; Lukas 22:7-14, 21-23; Yohanes 13:21-30)
17Yudas esigit diluk akla ebeko nggorlek, it akoni Yahudi mende enggen roti pisuwagaluk wusaĘĽbigidek mende alebagik niligogo mende nuwogoluk kagako dogolik, it Yesus agoromi ane waganggo laguka mende yomenogo oba wagukasik, men yogokuka,
“Newe, Kat domba pesta Paskah ake nanok nen, nit nen yi mende ndi mende o nggoma ndugurogo ʼbi lausak warlok ambegen,” yiluk oba kinok waganggukama, 18at Yesus nen,
“O kota etoma lalok nen, ap omanggi etnaga wene men yogotno.
At ninewe wene yanggul nisiligogo mende nen,
An kagasigin mende arat korok asi wagama nen, an nagoromi nane waganigogi mende ninom, at aguma etoma pesta Paskah werago nuwok nen yogosi lani o, yiluk yoknisekemo yokisi wago, yiluk yogotno,” yiluk yogisasikemo 19it yomenogo, at nen yisike kagat, lagukasik nen, yi mende ndi mende pesta Paskah etnogo ake mondok nimik-nomokogo ʼbisuka. 20O arat ki agikemo, at Yesus agoromi ane waganggo laguka mende amberek inom lagukasik nen, inebe 12 yomenogo inom korek latluk 21pesta nonggo dogolik men yogisasike,
“Kit ap ya mende omanggi nen, an nebe nasuwagaluk yonggo ligin o, yiluk, eberogonat yokisigi,” yiluk yogisasike. 22Esigit diluk yogisasikemo, it yomenogo inakla mondok weyak agukasik men yogokuka,
“Newe! An a? An dek ambigi,” yiluk, inebe dombok nen yilik laguka. 23Esigit diluk yilik lagukama, at Yesus nen,
“Kat omanggi an nimbisak nininggi omanggimo piring akla wusa ʼbigik ambusu magogo nonggo mende eti nenat nasuwagaluk yonggo ligin o. 24An abat endak lasi wagagi etnogo, kagasigin mende kolal mbalek werek ndak-ndagat kagasigin mende, at ap nebe nasuwagaluk yonggo ligin mende etiat, iya. Mondok weyagat asigin o. At ap eti endak latlep dekma, panoat dogolep mende,” yiluk yogisasikemo, 25at Yudas, Yesus wasuwagaluk yonggo lagike etnogo nen,
“Newe. An a? An dek ambigi,” yisikemo at Yesus nen,
“Karat mende yiligogon,” yiluk yogokike.
Yesus agoromi inom roti inom, enggen ambusu inom, ilugun oba nasuka wene
(Markus 14:22-26; Lukas 22:15-20; 1Korintus 11:23-25)
26At Yesus nen wene esigit diluk yogokikesik, kimbiri nasi dogolik, roti inggimo waganggikesik nen, Allah keyagi warogo, ebe nggusogo it agoromi yomenogo sumburisasi dogolik, men yogisasike,
“Yi an nebeat o. Waganiluk nen nani o,” yiluk yogisasike. 27-28Yogisasikesik yabunggane iyak anggur enggen ambusu kenago mende inggimo waganggikesik nen, Allah keyagi warogo it yomenogo wogisasi dogolik, men yogisasike,
“Yi an namebat o. Allah nen wene warogo wokinabigin yisike etnogo, an namep wulabogo nasugun eti paga akoni dogalegat yi weyak ndi weyak kagarigogi mende sagalogo deget diyagin eti paga ebeat asigin o. Eti paga, kinebe taʼbokogonat nani o. 29Wene omanggi yi yokisak. Anggur enggen ambusu yi nalok, an yabunggane omanggi ninggidek dogoluk nen, kurli nombae nen at apma ʼbiyagin eti kurli kit ninom ambusu ngget mende nugun o, yiluk, eberogonat yokisigi,” yisike.
30Wene esigit diluk yogisasikesik nen, endai Allah endai omanggi watluk dukisukasik nen, ndom Zaitun oba dagasuka.
“Kat nen Yesus nonggodek, yiluk, laʼbeligin o,” yiluk Petrus yogokike wene
(Markus 14:27-31; Lukas 22:31-34; Yohanes 13:36-38)
31Ndom Zaitun oba dagasukasik, at Yesus nen,
“At Allah nen,
At ap domba inanggorlem dogoligogo mende eti ebe an nen wakonem, domba omanggimo nandorlek dogoligogo mende eti, lo sirlik-mbirlik lugun o, (Zak. 13:7)
yiluk yisikemo, kolal mbalogo ʼbisukama werek eti paga, yogondak kibanggo yi, kit taʼbokogonat an togot daniluk lo lugun o. 32Mende, an nasumo Allah nen yabunggane nilugut danumo an ndak o Galilea dagiluk kinelokoma dogogin o,” yiluk yogisasikemo, 33at Petrus nen,
“It taʼbokogonat togot dagaluk lo lugun kalok, anat togot dagaluk lo dukigin mondok dek o,” yiluk yogokikemo, 34at Yesus nen,
“Yogondak kibanggo sewe ayam mondok ane yigidek werek nggorlek, kat nen,
Yesus eti nonggodek o, yiluk, kinggi kenagan oba laʼbeligin etnaga o, yiluk eberogonat yokigi,” yiluk yogokikemo, 35at Petrus nen,
“Dek o. An nimbisagat ninasumo ninasusagat o. Mende, an nen,
Kat nonggodek o, yiluk, laʼbeligin dek o,” yiluk yisinem, it Yesus agoromi ane waganggo laguka mende yomenogo pelakngge taʼbokogonat nen, esigit dilugat yilik laguka.
Yesus Getsemani taman o ai yagoma nen Allah ayonggo ĘĽbisike wene
(Markus 14:32-42; Lukas 22:39-46)
36Esigit diluk yisukasik nen, at Yesus ebe inom, agoromi ane waganggo laguka mende yomenogo inom, Getsemani taman o ai yagoma lagukasik agoromi men yogisasike,
“An korok ya lalok sembayan yisi nggorlek, kit yoma korek dogoni o,” yiluk yogisasike. 37Esigit diluk yogisasikesik nen, Petrus inom, Zebedeus aʼburi inebe mbere eranogo inom, wogisek lagikesik nen, akla weyak atluk endainggen sebeluʼbuk agikemo men yogisasike,
38“An nendainggen mondok weyak agasik watlasusak negen kagat nabigogo. Eti paga, kit ya dogolik, ninomat ninebe kwalogo doguwok,” yiluk yogisasikesik nen, 39at asokneat korogat lagikesik eloke sogum pogo wi lagikesik nen, Allah ayonggo ʼbisi dogolik, men yogokike,
“Nombae o. An weyagat nabugun eti ndil nabusak kalok, ndil nabin o,” yiluk yu kak,
“Ambusu kenago nowagaluk woknisugun eti, wokausak kalok, wokano. Nen, dek kalok, an nakla ambigi mende eti dek o. Kat kakla ambegen mende etiat kagat nabino o,” yiluk sembayan yisike. 40Sembayan esigit diluk arat yiluk nen agoromi kenagan eranogo inoba wagike mende, it noge mondok yisinem, at Petrus men yogokike,
“Kit kibanggo yi satu jam omanggi pasigat an ninom ninobabut kwalogo dogusak a? Erlok dek a. 41Weyak kagasuwagaluk kinakla nggagali wisunogo yiluk, kinobabut kwalogo dogolik, sembayanat yisi dogoni o. Kinakla nen erlok kagasusak yiluk ambaligogi mende, kinebe nen esigit diluk kagasusak erlok dek o,” yiluk yogisasikesik nen, 42sembayan alebat yisike kagat, yabunggane dagakogo lagikesik nen, men yisike,
“Nombae. An weyagat nabugun yi, ndil nabusak erlok dek kalok, kat kakla ambegen eti ndak-ndagat kagat lasuwak o,” yiluk, sembayan yisike. 43Sembayan yiluk yabunggane wagike mende, it agoromi yomenogo noge inilumo agikemo nen, noge yisinem ʼbiriya wagikesik nen 44sembayan alep inggi mbere paga yisikesik, yabunggane omanggi inom yigiluk lagikesik nen, alebagik yisike kagat, yisike. 45Arat yiluk nen agoromi inoba wagikesik men yogisasike,
“Kit set walogo noge yisi mondok dogogun a? Lakani! Ap omanggi nen ap weyak kagarigogo mende nen an abat endak lasi wagagi etnogo nasuwagaluk ininggimo ʼbanigin eti o arat asi waga. 46Eti paga, nit luwok nen, kit melatni o. Lakani! Ap an nasuwagaluk yonggo laga mende etnogo arat korogat waga eti,” yiluk yogisasike.
Yesus ebe pakasuka wene
(Markus 14:43-50; Lukas 22:47-53; Yohanes 18:3-12)
47Yesus nen,
“Korogat waga eti,” yiluk yisi nggorlek eranogoat, at Yudas, ebe Yesus agoromi inebe 12 yomenogo mende yonggo lagikemo, it ap Allah indewerek mende ineugi nggokndek yomenogo inom, it ap inarluwendek yomenogo inom nen, it ap inebe dogalegat inayonggo ʼbiluk laʼbiya wagukama, mbirok inom, mbayok inom, wolok inebe mondok dogal diluk inom waguka. 48At Yudas Yesus wasuwagaluk yonggo lagike mende etnogo nen, wene men yogisasikesik nen waguka,
“Ebe didubagik nen, an ndak lalok keyagi nambe sarluk wako kalok, kit nen,
I, ebe etiat kigi, yiluk, paka lano,” yiluk wene arat yogisasikesikmo nogo nen, iniluat werekma 49at ndak Yesus oba wagikesik nen,
“Newe o,” yiluk, ambe sarluk keyagi wakonem, 50at Yesus nen,
“Nogot yi! Kat nenaluk wagan,” yiluk yogokikemo, it ap yomenogo Yesus oba wagukasik nen, ebe mondok pakasuka. 51Pakasinem ap omanggi Yesus inom welaguka mende etnogo nen mbirok ogoret akla uwakma nen nggigikogo, ap Allah indewerek inewe nggok anduwanengge omanggi asuk mondok taʼbokogo laʼbisike. 52Esigit diluk laʼbisikemo, at Yesus nen,
“Mbirok eti kuwakma obalikmo yukarlin o. It ap mbirok oba inarigogi onggo mbirok abaat inarigogi o. 53Yogondak an nebe nirli woknabuwagaluk, nombae nggino yogosumo, at nen it malaikat Allah mbogot oba nen yonggo wusa ʼbiya wirigogo mende yomenogo inebe agot dombok 12 paga dogal diluk mbererlagat mende, agot dombok mondok dogal diluk inayonggo ʼbumo, ndil nabi wisusak erlok dek ambegen a? 54Ndil nabi wisusak erlok mende, ndil nabilepma Allah nen,
Esigit diluk kagat lasigin, yiluk yisikemo kolal mbalek werek etnogo, ninggit diluk ndak-ndagat atlep ambegen. Dek o. Ndak-ndagat asuwagaluk esigit diluk yogokidek togot digi o,” yiluk yogokikesik, 55it ap dogalegat waguka yomenogo men yogisasike,
“Ap ininggi abusak waganggonem paginabigogi eti kak, kit nen esigit diluk an pak nabuwogoluk, mbirok inom, mbayok inom, mondok wolok wagap yi nayuk o! An kibitngge-yogongge Allah ago palekma korek dogolik wene yanggul isasinem, kit nen yigit diluk pak nakidek welagasip nen, 56it ap Allah wene yogisasi laguka mende nen kolal mbalkuka etnogo ndak-ndagat asuwagaluk kagat nakep o,” yiluk yogisasikemo, it ap at ane waganggo laguka mende yomenogo, at ebe togot diluk lo mondok laguka.
Yesus wasuwogoluk wene oba ĘĽbisuka wene
(Markus 14:53-65; Lukas 22:54-55, 63-71; Yohanes 18:13-14, 19-24)
57Lo esigit diluk lagukama nen, at Yesus ebe pakasukasik, ap Allah indewerek mende inewe nggok endaga Kayafas oba wolok laguka. Lagukama, etoma it ap Allah wene kolal mbalek indewerek mende inom, it ap inarluwendek inom, nandorlek werekma laguka. 58Yesus esigit diluk wolok lago nggorlek, at Petrus etnogo yabunggane inomborlik yenoĘĽbok lago lagikesik nen, ap nggok Kayafas etnogo ago silimo unggisikesik,
Yesus ninggit diluk kagasugun, yiluk ilenggen iyagaluk, at ap nggok etnogo agoromi Allah ago palek anggorlem dogoligogo mende inom sabokogo korek lagike.
59Korek werek nggorlek, it ap Allah indewerek ineugi nggokndek inom, wene Allah ake erlo mbileligogo mende taĘĽbokogonat inom, at Yesus wasuwogoluk, men yisuka,
“Akoni at weyak kagakonem inilenggen kega mende yuwak nen kweyaginabini,” yiluk inenggalat wene oba ʼbuwagaluk kweyaginakuka mende, 60inebe dogalegat inenggalat wene oba ʼbuwogoluk waguka mende, dek agikemo, yabunggane ap inebe mbere mende wagukasik nen,
61“At yi nenat,
Allah ago eti miyalogo laʼbiluk nen, obalikmo, yabunggane ninggi mbere paga palko dogoluk nen ninggi omanggi paga yi arat ndirlipogo paligin o, yiluk yisike mende,” yisukama, 62at ap Allah indewerek mende inewe nggok etnogo melagikesik nen,
“It ap yoma wene dogalegat koba ʼbiligogi yoma, kat nen onggo omanggi yogisagin dek a? Onggo yogisamo,” yiluk yogokike mende, 63at Yesus ane yigidek togot disikemo, at ap nggok Allah indewerek mende etnogo nen,
“Allah aʼbut Kristus laʼbi wisigin yisuka etnogo, ebe kat kalok, yoknisanok nen yiluk, at Allah iluk mondok dogoligogo mende endaga kumbuk mbalogo yokigi o,” yiluk yogokikemo, 64at Yesus nen,
“Kat nen yegen etiat o. Mende, an omanggi yokisak.
Kurli yogondak nen, an abat endak lasi wagagi etnogo, at Allah obatne korleyak yi mende ndi mende kagasusak dombok etnogo nimbisak eragalilu inggi ebengge nggogat korek dogoluk nen, yabunggane mbogot oba etoma nen oisa aklangge wusa wagonem kinilenggen niyagun o, (Dan. 7:13)
yiluk yokisigi,” yiluk yogokikemo, 65it ap Allah indewerek inewe nggok etnogo iyom liʼbilogo laʼbisi dogolik, men yogisasike,
“Allah ebe akla kai diluk endaga weyagat deke eti kegep a? Akoni nen at weyak kagakonem inilenggen kega mende wene ʼbukakogo yuwagaluk nenaluk anggorlem dogogun. At nen Allah akla kai diluk endaga weyagat deke eti arat kinasuk kolkep. 66Kit ninggit diluk ambaligogi,” yiluk yogisasikemo, it nen,
“Weyak yekesikmo ebe mondogat wasusak o,” yiluk yogokuka. 67Esigit diluk yogokukasik nen, wosi oba supogo ʼbigik, ininggi yunggulik wakik, ininggi agut ndugi ndamuk-pamukogo wakik, kagako dogolik,
68“Kristus! Ta nen kake nogo. Yoknisan nda,” yiluk yogoko laguka.
Petrus nen, “Yesus nonggodek o,” yiluk laʼbelkike wene
(Markus 14:66-72; Lukas 22:56-62; Yohanes 18:15-18, 25-27)
69Esigit diluk yogoko nggorlek, at Petrus etnogo olilu kogolnggerlekma korek werekma, korlak inanduwanengge mende omanggi oba wagikesik, men yogokike,
“Kat kebe, Yesus Galilea mende eti kinom noko lagap mende ambigi,” yiluk yogokikemo, 70at Petrus nen akoni dogalegat yomenogo inil obaat, men yogokike,
“Kat yegen eti an nonggodek o,” yiluk nen, 71kolagambe mbalek dukiligogoma eranogo duki wisigiluk kagakonem, at korlak inanduwanengge mende omanggi ninat mende nen ilenggen lakalok, akoni dogalegat yomenogo men yogisasike,
“Ap yi Yesus Nazaret mende etnogo inom noko lagaka mendeat o,” yiluk yogisasikemo, 72at Petrus nen alep yisike kagat, yabunggane Allah endaga kumbuk mbalko dogolik,
“Ap eti an nonggodek o,” yiluk yogisasikesik, 73eranogoat werekma, it ap dogalegat yomenogo Petrus oba wagukasik nen, men yogokuka,
“Kane enggagat didagaligogi. Kat kebe eberogonat it mendeat o,” yiluk yogokukama 74at Petrus nen,
“Ap eti ebe an nonggodek o. Nombae Allah endaga paga! Nenggalat yigi kalok, At nen nasuwak o,” yiluk, kumbuk mbalko nggorlek eranogoat sewe ayam ane arat yisike. 75Sewe ayam ane arat yisikemo, at Petrus nen,
“I. Yesus nen yoknoko dogolik,
Sewe ayam ane yigidek werek nggorlek, kat nen, Yesus nonggodek o, yiluk kinggi kenagan oba laĘĽbeligin,
yiluk yokneke etnogo ebe arat laʼbelki yi kigi,” yiluk, akla ebet diluk dukisikesik nen, endainggen pisogo de akike.
Currently Selected:
Matius 26: DNA
Highlight
Share
Copy
Want to have your highlights saved across all your devices? Sign up or sign in
