Matius 16
16
Ap Farisi mende nen, “Nit didaguwok nen elalin mende omanggi kagasin nda,” yiluk Yesus yogokuka wene
(Markus 8:11-13; Lukas 12:54-56)
1Duki wagikesik werekma, it ap Farisi mende inom, it ap Saduki mende inom, Yesus aren mbaluwogoluk oba wagukasik, men yogokuka,
“Kat kebe kombae Allah mbogot oba mende nen wusa ʼbagi wagama wagan kalok, nit nen didaguwok nen ninil oba elalin mende omanggi kagasin nda,” yiluk yogokuka. 2Esigit diluk yogokukama at Yesus nen,
[“O mo liyok yi lagonem, mbogot oba mep sabuk yisi kalok, kit nen,
O kibi asigin yiluk, yiligogi ambigi. 3Nen kubengge kinilenggen lakalok nen, mbogot oba erlamuk werek kalok, kit nen,
Miyo wisigin, yiluk yiligogi ambigi. Mbogot elokonggen kinilenggen mbenako dogolik,
Esigit diluk kagat lasigin, yiluk kinendainggen enggerlek dogolik, aren enggagat mbalko kinilu mende, yi mende ndi mende o yogondak kagat larigogo eti, kit kinilu asuwagaluk kagat larigogo mende, didigidek werek yoma!] 4Kit akoni o yogondak werek mende yoma, kinobabut mondok weyak kagarik noko dogolik, Allah kinom dombokogo dogoĘĽbuk yoma! Esigit diluk dogolik, kit nen
Nit nen didaguwok nen, kat nen elalin mende omanggi kagasin, yiluk yoknirigogi mende, an nebe didanubagik nen yiluk an nen elalin ninat mende omanggi kagasigin mondok dek o. At Yunus nen akoni diduwagaluk elalinat kagakike eti kak, an nen yabunggane omanggi kagakonem kinilenggen niyagun o,” yiluk esigit diluk yogisasikesik, it ap yomenogo etoma togot diyalok, o werlekma lagike.
“Ap Farisi mende Saduki mende inom inawene, enggen kimbiri roti pirigogo mende kak,” yiluk yogisasike wene
(Markus 8:14-21)
5At Yesus agoromi ane waganggo laguka mende yomenogo inom i yenggelek etnogo aik ilibagangge arat wundalkukasik nen, agoromi inilenggen ĘĽbikasuka mende roti obarlikmat diluk lagukama nen,
6at Yesus nen men yogisasike,
“It ap Farisi mende inom, ap Saduki mende inom, enggen kimbiri roti mende pisuwagaluk akla wusa ʼbiligogi eti kak mende pago werek eti paga weyagat kinabunogo yiluk, kinobabut kwalogo dogono,” yiluk yogisasike. 7Esigit diluk yogisasikemo, it-it wene yisi dogolik, men yisuka,
“Roti etnogo omanggi wolok wagidek eti paga yeke kigi,” yiluk yisinem 8at Yesus nen enggagat didiyasikesik men yogisasike,
“Kit kinendainggen an noba awan panggot digidek dogolik,
Roti dek, yiluk yiligogi eti nenaluk. 9Kinendainggen dikogo didigidek yoma! Roti ebe 5 mendeat, ap inebe 5.000 paga nengga etnogo obarlikma aga? Esigit diluk nenggasik ndindurogo ʼbegama, mul yago mende meren akla yukarlogo ʼbegep nogo. 10Nen, omanggi roti ebe 7 mende, ap inebe 4.000 paga sumbusogo wogisegep etnogo nen, ndindurogo mul yago meren akla yukarlogo ʼbegep nogo? Kinakla didigidek werek? 11An nen roti pasik yokisigidek mende, eti nenaluk didigidek werek? Enggen roti pisuwagaluk akla wusa ʼbiligogi mende eti kak, it ap Farisi mende inom, Saduki mende inom, pago werek eti paga kinobabut kwalogo dogobagik nen yiluk yokisigi o,” yiluk yogisasike. 12Yogisasikemo, it yomenogo didisukasik nen, men yisuka,
“I. Wene yeke eti, enggen roti pirigogo mende pasik yokniseke dek o. Eti, it ap Farisi mende inom, ap Saduki mende inom, inawene yanggul isiligogi mende etnogo weyagat ninabunogo yiluk, ninobabut kwalogo dogowagaluk yokniseke kigi,” yiluk didisuka.
At Petrus nen, “Kat kebe Kristus at o,” yiluk ʼbukakogo Yesus yogokike wene
(Markus 8:27-30; Lukas 9:18-21)
13O etoma nen, at Yesus o unggul nggokma Kaisarea ap Filipi nen nggogot disike paga etoma dagi wagikesik nen, at agoromi ane waganggo laguka mende yomenogo kinok woginako dogolik, men yogisasike,
“It akoni nen, an abat endak lasi wagagi etnogo an nebe pasik yisi dogolik, ta yiluk yiligogi nogo,” yiluk yogisasikemo, 14it nen, men yisuka,
It amberek nen,
At ebe, Yohanes ima wusa ĘĽbiyasi lagike mende etnogo yigik, it amberek nen,
At ebe Elia yigik, it amberek nen,
At ebe Yeremia yigik, it amberek nen, at ap Allah wene yogisasi laguka mende yomenogo omanggi yigik, yiligogi,” yiluk yogokuka. 15Esigit diluk yogokukama, at Yesus nen,
“It nen esigit diluk yiligogi mende, kit nen, an nebe ta ambaligogi,” yiluk yogisasikemo 16at Simon Petrus etnogo nen,
“Kat kebe, Kristus Allah iluk mondok dogoligogo mende aʼbut, nit ndil ninabuwagaluk at nen laʼbi wisigin yiluk abok yoknisasike etnogoat o,” yiluk yogokike. 17Yogokikemo, at Yesus nen,
“Simon Yona aʼbut nagot o. Akoni nen yokegama yegen dek o. An nombae mbogot oba mende nen yokekemo yegen kigi o. Eti paga, kakla arlenggen kasi dogono o. 18Nen, omanggi inom yokisik. Kat kendaga nggit yu kak, Petrus o. Nen, nggit iya yi paga kimbikogo, an nagoromi nandorlogo ʼbiyalok o negen palogo ʼbiyasi kalok, at wema paga indewerek etnogo nen obatnerogo pagisek dogogin dek o. 19Nombae nggok mbogot oba mende apma ʼbiyiligogoma unggiligogoma, kunci su kuwaligogo mende kat wokisigin o. Kat nen, agat oba yoma mende pasik kagasusak dek yiluk wene mbalko kalok, mbogot oba mende nen wene mbalko kagat, yigin o. Nen, kat nen agat oba yoma pano kagasusak yiluk yisi kalok, mbogot oba mende nen pano yisi kagat, yigin o,” yiluk Petrus yogokike. 20Yogokikesik, at agoromi yomenogo taʼbokogonat men yogisasike,
“Kit nen an nebe pasik,
At eti Kristus, Allah nen ndil ninabuwagaluk laʼbi wisigin yiluk abok yoknisasike etnogoat o, yiluk akoni amberek mondok yogisagup o,” yiluk inasuk wakike.
At Yesus nen, “Yi wene ndi wene noba ʼbiluk nasugun o,” yiluk alebagik yogisasike wene
(Markus 8:31–9:1; Lukas 9:22-27)
21Kurli eti kurli nen, at Yesus nen agoromi ane waganggo laguka mende yomenogo at yabunggane kagasigin mende ĘĽbukakogo men yogisasike,
“An o Yerusalem eloma lausak werek o. Lamo it ap inarluwendek yomenogo inom, Allah indewerek mende ineugi nggokndek inom, Allah wene kolal mbalek indewerek mende inom, inom nen, yi aik ndi aik dogalegat kagat nabiluk nebe nasugun o. Nasumo nen, ninggi mbere nebe warek dogoluk nen, ninggi omanggi paga yi nen, Allah nen nilugut nabigin o,” yiluk ʼbukakogo yogisasike. 22Esigit diluk yogisasikemo at Petrus nen, Yesus wolok asokneat lagikesik men yogokike,
“Kat wene yegen eti kagat kabunogo nen, Allah nen ndil kabuwak o,” yiluk asuk wakike. 23Asuk wakikemo, at Yesus eloke dagakogo Petrus men yogokike,
“Kat Iblis kigi. Allah akla ambaligogo ndak-ndak ebekidek, akoni nen ambaligogi ndak-ndagat ebet diluk neloke mbaligogon yi, nelokoma yoma dogogup. Korla lan o,” yiluk yogokike. 24Esigit diluk yogokikesik, at agoromi ane waganggo laguka mende yomenogo wene omanggi men yogisasike,
“At ta nen an nomborlik noko dogigiluk kalok, obabut enggaerek ake endainggen kunik dogolik kagarigogo mende eti,
NaĘĽit, yiluk togot diluk, o paga mendiyalok inarigogo mende etiat ago mendeat wolok nomborlik noko dogigiluk wisuwak o. 25Nen, ta nen anggaerek nen,
An nebe niluk dogusak warlok, yiluk ebe irli korlagin kalok, watlatluk nuk akagin o. Mende, ta nen ebe irli korligidek an nake watlago kalok, ebe irli korlagin o. 26Ta nen yi mende ndi mende agat oba mende taĘĽbokogonat indewerek asigin mende, yabunggane ebe nuk asigin kalok, at nen,
An omanggi erlok sabusogo ʼbakigi, yusak nogo? Mondok dek o. Ebe nuk asigin eti obalikmo, nena mende imbisak onggo ʼbusak nogo. Erlok dek o. 27An abat endak lasi wagagi etnogo, yabunggane nombae pogorako mondok dogoligogo eti kagat, kagat latluk, it malaikat Allah mbogot oba nen yonggo wusa ʼbiya wirigogo mende yomenogo ninom witluk nen, etinem, akoni taʼbokogonat inobabut dombok kagarigogi mende ndak-ndagat onggo wogisa wisigin o. 28Nen, kit mendek werek yoma mende kinebe amberek watlagidek dogolik, an abat endak lasi wagagi etnogo Nendaganggok dogigiluk akoni taʼbokogonat napma ʼbiya wagonem kinilenggen nuyagunat o, yiluk eberogonat yokisigi,” yiluk yogisasike.
Currently Selected:
Matius 16: DNA
Highlight
Share
Copy
Want to have your highlights saved across all your devices? Sign up or sign in
