Lukas 6

Akoni Yahudi mende Hari Sabat paga Allah ake werlegat werek nggorlek Yesus agoromi gandum enggen mbalogo nilik laguka wene

(Matius 12:1-8; Markus 2:23-28)

1Ininggi omanggi paga, itn akoni Yahudi mende Hari Sabat Allah ake werlegat dogoligogi etinem, at Yesus agoromi ane waganggo laguka mende yomenogo inom, gandum ai yagomangge lago dogolik, kumbak mbaligogi kak, gandum enggen mbalogo ininggi nen lologo nilik nilik laguka. 2Esigit diluk kagarik lagonem, it ap Farisi mende amberek nen,

“Hari Sabat Allah ake werlegat dogolik esigit diluk kagasusak dek yiluk wene mbalek werek mendeat, nenaluk kagarigogi?” yiluk yogisasuka. 3Esigit diluk yogisasukama, at Yesus nen,

“At Daud agoromi inom laguka mende yomenogo kimbiri abu agikemo nen, at nen kagakike mende Allah wene paga kolal mbalek etnogo kit nen wenakidek werek nogo? Wenarigogiat o. 4Allah ago palekma unggisikesik kimbiri roti mende Allah ake ʼbisuka mende, yugunat nausak mondok dek mende welagike. It Allah indewerek mendeat nausak mendeat, at Daud nen waganggikesik omanggi nonggo dogolik, omanggi agoromi inom laguka mende yomenogo wogisasike yiluk kolal mbalek etnogo wenakidek werek nogo?” yiluk yogisasikesik, 5wene omanggi men yogisasike,

“Allah ake hari Sabat oba werlegat werek yi, indewerek, an abat endak lagagi nebe yiat o,” yiluk yogisasike.

Akoni Yahudi mende Hari Sabat paga Allah ake werlegat werek nggorlek Yesus nen ap omanggi inggi pelak lambelek mende pano kagakike wene

(Matius 12:9-14; Markus 3:1-6)

6Nen, ininggi omanggi paga, hari Sabat Allah ake werlegat dogolik, at Yesus it ap Yahudi mende sembayan yiligogoma unggisikesik nen, wene yanggul isasike. Yanggul isasinem ap omanggi inggi ebengge lambelek mende etoma welagike. 7Werekma, it ap Allah wene kolal mbalek inilu mende yomenogogo inom, it ap Farisi mende yomenogo inom, inakla nen,

“Yesus eti hari Sabat Allah ake werlegat werek nggorlek ap yi u pano kagasigin a? Dek a. Esigit diluk kagako kalok, wene eti at oba ʼbuwok o,” yiluk inil waganggo laguka. 8Inil waganggo werekma, at Yesus nen inakla ambasuka mende eti enggagat iyalok, ap inggi ebengge lambelek mende etnogo men yogokike,

“Kebe melatluk nen, orlo ya eme o,” yogokikemo, ap etnogo melatluk nen, orlo eranogo melasi lagikemo, 9at Yesus nen akoni yomenogo men yogisasike,

“An nen wene omanggi kinok wokiyak. Hari Sabat Allah ake werlegat dogolik, pano kagarinabusak eti pano a? Weyagat inabusak eti pano o. Akoni inebe inirli woginabusak eti pano a? At te, inebe mondok inasusak eti pano a. Kit nen yini nda,” yiluk yogisasike. 10Esigit diluk yogisasikesik, ilenggen ʼbiriyilik lagikesik nen, ap etnogo men yogokike,

“Kinggi walokan,” yiluk yogokikemo inggi walok kasinem, arat pano agike. 11Esigit diluk kagakikemo, it ap Allah wene kolal mbalek indewerek mende yomenogo inom, it Parisi mende yomenogo inom, inakla agaga ambik dagaluk nen,

“Wene ninggit diluk oba ʼbuwok,” yiluk it-it abok mbalko laguka.

Yesus nen ap inebe 12 paga mikogo ʼbiyasike wene

(Matius 10:1-4; Markus 3:13-19)

12Etinem, at Yesus etnogo sembayan yigiluk ndom oba dagasike. Dagisikesik Allah ayonggo ʼbisi nggorlek, o arat ki agikemo kibanggone inomat Allah ayonggo ʼbisi mondok werekma o wi kike. 13O wi kikemo nen, agoromi ane waganggo laguka mende yomenogo waisasikemo wagukama nen, inebe 12 paga mikogo ʼbiyalok,

“Kinebe laʼbinagagin,” yiluk mendiyasike. 14Mikogo ʼbiyasike eranogo inendaga, omanggi Simon endaga agake Petrus salkike etnogo inom, Simon agot endaga Andreas etnogo inom, Yakobus inom, Yohanes inom, Filipus inom, Bartolomeus inom, 15Matius inom, Tomas inom, Alfeus aʼbut Yakobus etnogo inom, Simon,

“O yoma ninaiwerek mende dombok dogogun o,” yiluk, yisi lagike etnogo inom, 16Yakobus aʼbut Yudas etnogo inom, Yudas Iskariot Yesus wasuwagaluk yonggo lagike etnogo inom mikogo ʼbiyasike.

At Yesus nen akoni mondok dogalegat wene yanggul isigik, u kagarinakik kagakike wene

(Matius 4:23-25)

17At agoromi mikogo ʼbiyasike mende yomenogo inom ndom oba nen wusa wagukasik nen, apma agat enagoma puk aguka. Etoma puk agukama at agoromi yomenogo inom, akoni mondok dogalegat o Yudea o unggul dombok mende inom, o Yerusalem mende inom, o Tirus Sidon i laut aik oba welaguka mende inom, 18it nen at Yesus ane kolkik, at nen u weyak mende kagarinakik, kagasuwogoluk at oba nandorli waguka. Esigit diluk nandorli wagukama kugi inobabut weyak mende inakla unggiluk welaguka mende inomat kagarinakike. 19At obatne paga akoni dogalegat kagarinako lagikemo, it yomenogo inebe taʼbokogonat nen Yesus obatne paga kagarinabuwagaluk ininggi pakawogoluk kagakuka.

“It amberek panorinakonem inakla arlenggen agik, it amberek weyagarinakonem inakla weyak agik, kagasugun o,” yiluk yogisasike wene

(Matius 5:1-12)

20Esigit diluk kagakonem at Yesus nen agoromi ane waganggo laguka mende yomenogo ilenggen inoba ʼbiluk nen, men yogisasike,

“Kit akoni kinamende mondok dek mende kalok, Allah apma ʼbinagagin eti paga, kinakla arlenggen kasi dogono o.

21Nen, kit yogondak kinakla abu negen werek mende kalok, yabunggane wokisamo kinelabut kinaʼitogo nugun eti paga, kinakla arlenggen kasi dogono o. Nen, kit de arigogi mende kalok, yabunggane endo asugun eti paga, kinakla arlenggen kasi dogono o.

22-23It ap yoma inakombalak nen alep Allah wene yogisasi laguka mende kagarinako laguka kak, kit yogondak an abat endak lagagi yi nane waganggep eti paga inaʼit kiyasi dogolik, kit kinebe pulogo ʼbinagagik, inane korleyak mbet kisigik,

Ap yi weyak, yiluk kinendaga yisi dogolik kinabok weyak mbalkik, kagat kinako kalok, onggo kit mende mbogot oba dogalegat werek eti paga, kinakla arlenggen kasi dogolik pogol kilik kilik endai warasi dogono o.

24Esigit diluk mende, kit kininggiwerek mende yi, kinamende dogalegat eti paga nen, kinakla arlenggen kiligogi mende, yabunggane weyagat kinabigin o.

25Nen, kit yogondak elalma ake negen kinaʼitogo niligogi mende yi, yabunggane weyagat kinakonem abu asugun o. Nen, kit yogondak elalma akeat ando arigogi mende yi, weyagat kinakonem kinendainggen warasi dogolik de asugun o.

26It ap yoma inakombalak nen, it ap amberek Allah wene yogisiligogi mende salek nugut diyasi nggorlek pogorinako laguka kak, akoni taʼbokogonat nen pogot kinako kalok, weyagat kinabigin o,”

yiluk yogisasike.

“It ap kinom agorek mende eti inaʼbuwa dogusak o,” yiluk yogisasike wene

(Matius 5:38-48; 7:12)

27Esigit diluk yogisasikesik nen, yabunggane men yogisasike,

“Esigit diluk mendeat, kit an nane koligogi mende yi, an wene omanggi yokisak. It akoni kinom agorek mende inaʼbuwa dogono o. It nen inaʼit kiyasi nggorlegat, kit nen onggo panorogonat kagarinako dogono o. 28It nen, kit kinalem ʼbinagasi nggorlegat, kit nen, kinakla arlenggen inoba ʼbiyasi dogono o. Nen, it weyagat kinabigogi mende eti, it inake sembayan yisi dogono o. 29Kinelokonggen pelak dambukogo kinako kalok, pelak inom kinasuwagaluk wogisano o. Nen, kiniyom sogi mende eti korlasi kalok, kiniyom akmangge mende eti inomat korlawak nen, irli waganggup o. 30Akoni amberek nen nggino yokisasi kalok, inebe dombok wogisasi dogono o. Nen, kinamende waganggo kalok, yabunggane woknisani yiluk, nggino yogisagup o. 31Kit kinakla nen, Esigit diluk kagat ninabilep o, yiluk ambaligogi eti kagat kagarinako dogono o. 32Nen, it ap kinaʼbuwa ambaligogi mende etnogo arlek, kit nen inaʼbuwa ambegep kalok, pano yiluk yokisagun nogo? It akoni weyak kagarigogi mende eti nen inaʼbuwa ambaligogi mende inaʼbuwa ambiligogiat. 33It akoni pano kagat kinabigogi mende etnogo arlek kit nen pano kagarinabigogi kalok, pano yiluk yokisagun nogo? It weyak kagarigogi mende eti nen esigit dilugat kagarigogi o. 34Kit kinakla nen, Onggo erlok woknisagun, yiluk ambasi dogolik it akoni wogisiligogi kalok, pano yiluk yokisagun nogo? It ap weyak kagarigogo mende eti, yabunggane onggo ndak-ndagat woknisawak nen yiluk, inagarlagi inom weyak kagarigogi mende wogisasinem, it nen onggo esigit diluk wogisiligogiat. 35Mende, kit nen kinom agorek mende inaʼbuwa kigik, panorogo yamagiyigik, onggo it nen omanggi woknisawagaluk ambigidegat yugunat wogisigik, kagako dogogun kalok, kinebe Allah Endaganggok aʼburiat werekma, onggo nggok mende wokisagin o. At nen esigit dilugat, it inobabut weyak at ebe keyagi wakidek weyak kagako nggorlek, at nen inaʼbuwa kiligogo o. 36Eti paga, ninombae nen ninaʼbuwa niyiligogo kak, kit nen akoni inaʼbuwa iyasi dogono o,” yiluk yogisasike.

Akoni wene inoba ʼbigik nggokik kagarigogi mende pasik yogisasike wene

(Matius 7:1-5)

37Esigit diluk yogisasikesik, omanggi men yogisasike,

“Allah nen wene kinoba ʼbunogo yiluk, kit nen wene akoni amberek inoba ʼbugup o. Allah nen wene kinoba ʼbiluk nen, weyagat kinabunogo yiluk, kit nen wene akoni amberek inoba ʼbiluk nen weyagat inakup o. Kit nen weyak kagarigogi mende Allah nen sagalogo deget duwagaluk, akoni nen kit weyagat kinabigogi mende sagalogo deget disi dogono o. 38Kit nen yi mende ndi mende yugunat wogisasi kalok, Allah nen yugunat wokisaginat o. Iyak yalengge paga walkigik, ambem kerok yisinem sebekogo wusa ʼbiluk yabunggane oba dukogo nggerlekogo kenakonem amberek ndiyak ndiyak wusiligogo kak, Allah nen esigit diluk nggokogo wokisagin o. Kit nen kurli walkalok nen wogisiligogi kak, Allah nen, kurli eti pagaat walkalok wokisagin o,” yiluk yogisasike. 39Esigit diluk yogisasikesik nen, wene omanggi oba lisogo men yogisasike,

“Ap omanggi ilenggen mbuk mende nen agarlak omanggi esigit dilugat ilenggen mbuk mende eti pagogo wolok lausak ambegep? Esigit diluk kagasumo nen, imbisagat inggala wusagun dek nogo? Wusagunat o. 40It guru lak wene yanggul isaligogi mende sebeksek werek nggorlek, it yanggul isaligogi mende etnogo nggok negen dogoligogi dek o. Mende, ta nen wene arat taʼbokogo ilu atluk kalok nen ombae yanggul isiligogo mende eti imbisak ndak-ndagat o. 41Kit kinenggaerek kinilenggenma o nggok obake mbalek mende ʼbikakigidek dogolik, it kinagarlagi kinirugi inom amberek inilenggenma amumulengge ʼbugurlagat unggiluk werekma wogiyawogoluk nggolagiyiligogi eti nenaluk. 42Kit kinenggarek kinilenggenma o nggok obake mbalek mende werek etnogo kigidek dogoligat, it kinagarlagi, kinirugi inilenggenma amumulengge ʼbugurlagat mende unggiluk werekma wokiyak o yiluk, ninggit diluk yusak ambegep. Kinowado pagaat pano salek kinendainggen mbere yi re! Kinenggaerek kinilenggenma o nggok mende mbalek werek eti ndak wokakalok nen, kinilenggen arat pano ago kalok, yabunggane kinagarlagi kinirugi inom inilenggenma amumulengge werek mende eti erlok wogiyausagat o,” yiluk yogisasike.

“O enggen yikonem erlo enggagat didiligogi,” yiluk yogisasike wene

(Matius 7:16-20; 12:33-35)

43Esigit diluk yogisasikesik nen, omanggi men yogisasike,

“O erlo pano mende omanggi enggen weyak mende yirigogo dek. Eti kak, o erlo weyak mende enggen pano mende omanggi yirigogo degat. 44Yi o ndi o, enggen yirigogo eti paga erlo enggagat kiligogi. O mumun arlok weyak eti mende enggen o ara enggen negen omanggi yikonem mbaligogi mondok dek. Eti kak, o mun mende, enggen anggur enggen pano mende yitlukmo mbaligogi mondok degat. 45Akoni nen yi wene ndi wene inambema nen yiligogi eti, inakla nggerlek dogolik, nggagalogo dagi wagonem, yiligogi o. Inobabut pano mende inakla pano mende nggerlek dogolik, wene pano mendeat wulabi wirigogi o. Mende, akoni inobabut weyak mende inakla weyagat dogolik, wene weyak mendeat wulabi wirigogi o,” yiluk yogisasike.

“Ap inebe mbere nen o mbere palkuka,” yiluk oba lisogo yogisasike wene

(Matius 7:24-27)

46Esigit diluk yogisasikesik nen, omanggi men yogisasike,

“Kit an nen yokisasi lagi mende kagakidek dogoligat,

Newe, Newe, yiluk nenaluk yoknirigogi. 47-48Ta nen an noba witluk nane kol diluk mot-mot kagarigogo mende o paligogi mende oba lisogo yokisak. At eti, ap nen o paligogi etnogo kagat o. Ap omanggi agat wemarogo kulelogo nen, o andorli nggit oba dukogo ʼbiluk, palkike. Esigit diluk palkikemo, yabunggane i utluk wago dogolik, o etnogo warabet kasike mende, mondok aʼbet werek palkikemo nogo paga, aborlok omanggi yigidek mondok puk agike. 49Nen, at ta nen an nane kolko dogoligat, mot-mot kagarigogo dek kalok, ap omanggi o paligiluk agat oba owak andorli ʼbigidek palkikemo, i utluk wago dogolik o etnogo satnokogo wolok lago dogolik mondok miyak-dambukogo weyagat disike eti kagat o,” yiluk yogisasike.

Currently Selected:

Lukas 6: DNA

Highlight

Copy