Yohanes 2
2
O Kana ap omanggi kwe yikonem Yesus nen elalin kagakike wene
1Esigit diluk kagako lagukasik, noge ininggi mbere yiluk nen, ininggi omanggi paga nen, o Galilea o unggul omanggi endaga Kana etoma ap omanggi age yikonem Yesus agoya ayonggo ĘĽbisukama etoma inom welaguka. 2Etoma werekma, at Yesus agoromi ane waganggo laguka mende inom inayonggo ĘĽbisukama lagukasik welagukaat. 3Lagukasik werekma, anggur enggen ambusu kenago mende taĘĽbokogonat dek agikemo, Yesus agoya nen men yogokike,
“It anggur enggen ambusu kenago mende dek agama werek o,” yiluk yogokike. 4Esigit diluk yogokikemo, at Yesus nen, men yogokike,
“Nagoya o. An nen kagasusak oba awan korok asi wagidek werek nggorlek, kat nen an nenaluk yokneken,” yiluk yogokike. 5Esigit diluk yogokike mende, at agoya nen, at indewerek inanduwanengge yomenogo men yogisasike,
“At nen,
Yigit diluk kagatni, yisi kalok, at yigin mende etiat kagatno, nirugi,” yiluk yogisasike. 6It akoni Yahudi mende nen pagane etoma nenat kagako dogolik, yi mende ndi mende inom, inoba inom, sobalogoat kagarigogi mende pasik iyak nggit mende perlelek nggokndek mende ebe 6 paga etoma ʼbisukama welagike. Iyak nggokndek dorom negen eti ebe dombok akla i 100 liter negen kenasusak erlok welagike. 7Esigit diluk werekma, at Yesus nen it inanduwanengge yomenogo yogisasi dogolik, men yogisasike,
“Iyak nggokndek dorom negen etoma paga i kenatni o,” yiluk yogisasikemo, ambem kerokigik kenakuka. 8Esigit diluk ambem kerokigik kenakukama, at Yesus nen it men yogisasike,
“Yogo. Kenakep mende eti omanggi nggelelogo ap nggok pesta indewerek mende wogosi lani o,” yiluk yogisasikemo wogosi laguka. 9It nen i nggelelogo wogosi lagukasikmo nogo nen, i ebe esigit diluk mende, yiluk inilu welaguka mende, ap nggok mende etnogo nen,
“Nggoma nen wolok wagaka,” yiluk onggodek dogolik, i etnogo anggur enggen ambusuat kagat lagikemo, induk walkasike mende, pano mondok nen ap age yigikuka werek etnogo ane pakasike. 10Ane pakasikemo wagikemo nen, men yogokike,
“Werlak! Akoni taʼbokogonat nen anggur enggen ambusu induk pano mende alebagik wogisasinem, inaʼitogo nasi kalok, yabunggane anggur ambusu induk weyak negen wogisiligogi mende, kat nen, anggur ambusu induk pano mende kenago ʼbiluk welagandik nen yabunggane winamet degen yi, nayuk!” yiluk yogokike.
11At Yesus ebe diduwagaluk elalin mende omanggi kagakidekma alebagik kagakike eti o Galilea o unggul Kana dogolik kagakike eti paga, at pogorarigogi mende inilurogo yanggul isasikemo it at agoromi ane waganggo laguka mende yomenogo Yesus ebe didiluk, inendainggen at oba panggot disuka.
12Esigit diluk arat kagatluk nen, at Yesus ebe inom, agoya inom, agarlagi inom, agoromi at ane waganggo laguka mende inom, o Kapernaum laguka. Lagukasik nen, ininggi mbere negenat welaguka.
Allah ago palekma Yesus nen nggarelkike wene
(Matius 21:12-13; Markus 11:15-17; Lukas 19:45-46)
13Etoma werekma, it akoni Yahudi mende nen,
“Alebat at Allah nen ndil ninakike,” yiluk, inakla ebeko dogolik domba warogo pesta endaga Paskah pasik nausak oba arat panggok yi wagikemo, Yesus o Yerusalem wusasike. 14Wusasikesik nen, Allah ago palekma unggisikesik, it akoni onggo mbaligogi mende, sapi inom, domba inom, sewe merpati yogik negen inom, onggo waganggik, it amberek etoma korek dogolik uang onggokik, kagakonem at ilenggen iyasike. 15Esigit diluk kagakonem ilenggen iyasi lagikesik, kerle nggombi mende ndugi kagarogo nen sapi inom, domba inom, ndugi laʼbisok warogo Allah ago palekma nen mukogo wula ʼbiyigik, meja o mberlago paga uang onggoko laguka mende yomenogo abel dagak-mbagakogo laʼbiyigik, inauang yomenogo agat oba sirlik-mbirlikogo wusa ʼbigik, kagakike. 16Kagako dogolik, it ap sewe merpati yogik negen onggo waganggo laguka mende yomenogo mberisasi dogolik, men yogisasike,
“Sewe yoma korlalok duki lani o. An nombae ago palekma yoma, yi mende ndi mende onggo mbaligogoma salek mbaligogi yi, esigit diluk kagasusak mondok dek o,” yiluk mberisasike. 17Esigit diluk mberisasikemo, it at agoromi ane waganggo laguka mende yomenogo inakla nen,
“Alebat it ap amberek nen Allah wene paga kolal mbalogo ʼbisi dogolik, men yisukama werek etnogo,
Allah nombae kat kago palek nendainggen kunik mondok nen, nakla agaga mondok dagaligogo, (Mzm. 69:9=TB 69:10)
yiluk kolal mbalkukama werek kigi,” yiluk inakla ebekuka.
18Yesus nen it ap yomenogo esigit diluk yogisasikemo, it ap nggokndek Yahudi mende nen Yesus ebe mbereko dogolik men yogokuka,
“Kat nen kagaken yi, indewerek dogolik kagasusak oba kagakenma, yiluk didaguwok nen, elalin mende omanggi kagasin nda,” yiluk mberekuka. 19Esigit diluk mberekukama, at Yesus nen, men yogisasike,
“Dek o. Allah ago palek yi miyalini o. Arat miyalumo, an nen yabunggane ninggi kenagan oba arat paligin o,” yiluk yogisasike. 20Esigit diluk yogisasikemo it ap nggokndek Yahudi mende yomenogo nen, men yogokuka,
“A! Allah ago yi awan palko nggorlek 46 tahun welago mende, kat nen,
Ninggi kenagan oba arat paligin, yiluk yegen eti erlogat palusak yiluk yegen a? Erlok dek o,” yiluk yogokuka. 21Esigit diluk yogokuka mende, Yesus nen wene Allah ago palek pasik yisike eti o palek mende pasik yisike ʼbuk. At enggaerek ebe pasigat yisike o. 22Wene esigit diluk yogisasikesik yabunggane watlagikesik nen iluk agikemo, it ap at agoromi ane waganggo laguka mende yomenogo nen,
“Wene yi alebat yoknisasinem ninasuk kolkugu mende,” yiluk inakla ebekukasik nen, Allah wene kolal mbalek mende inom, wene Yesus nen yogisasike mende etnogo inom, didisukasik inakla nen eberogonat ambasuka.
Yesus nen akoni taĘĽbokogonat inakla ilu werek wene
23Esigit diluk yisukasik werek nggorlek, o Yerusalem it akoni Yahudi mende domba warogo pesta paskah nasi nggorlek, at Yesus etoma inom dogolik ebe diduwagaluk, elalin mende kagarik lagike eti paga, akoni dogalegat inilenggen kasukasik nen inendainggen at oba panggot disuka. 24Esigit diluk inendainggen at oba panggot disuka mende, at Yesus enggaerek nen, it inebe taĘĽbokogonat inobabut ilu eti paga,
“Eberogonat woknabugun” yiluk endainggen it inoba panggot digidek welagike. 25Akoni inakla at ilu mondok dogoligogo eti paga, akoni amberek nen,
“It amberek inobabut yigirlik,” yiluk, at yogosusak mondok erlok dek o.
Currently Selected:
Yohanes 2: DNA
Highlight
Share
Copy
Want to have your highlights saved across all your devices? Sign up or sign in
