Yohanes 18

At Yesus ebe paka laguka wene

(Matius 26:47-56; Markus 14:43-50; Lukas 22:47-53)

1At Yesus nen sembayan esigit diluk arat yiluk nen, at agoromi ane waganggo laguka mende yomenogo at ebe inom duki lagukasik, i endaga Kidron aik ilibagangge taman o ai yago werekma wundalkukasik agoromi inomat etoma unggisuka. 2At Yesus agoromi ane waganggo laguka mende yomenogo ininggi nin oba lagik, ininggi nin oba lagik, etoma nandorlogo lagik kagako lagukasikmo nen, at Yudas Yesus wasuwagaluk yonggo lagike mende etnogo taman eti ilu welagike. 3Esigit diluk ilumo nogo nen, it ap Allah indewerek ineugi nggokndek inom, it Farisi mende inom, inagoromi Allah ago anggorlem dogoligogi mende inayonggo ʼbiluk laʼbiyasukama, at Yudas nen tentara omanggi dogalek inom wogisek, sike sege inom, yi isagal ndi isagal yibarlek inom, wolok etoma laguka. 4Lagukama, at Yesus nen,

“An nebe yabunggane yigit diluk kagat nabugun,” yiluk taʼbokogonat ilu welagike eti paga, inoba wagikesik nen, men yogisasike,

“Kit ta kweyarik wagap,” yiluk yogisasikemo, 5it nen,

“Yesus ago Nazaret mende etnaga kweyarik wago o,” yiluk yogokukama, at Yesus nen,

“Eti nebe anat o,” yiluk yogisasike. Esigit diluk yogisasi nggorlek, at Yudas Yesus wasuwagaluk yonggo lagike mende etnogo ineragalilu mendek welagike. 6Werek nggorlek, at Yesus nen,

“Eti nebe anat o,” yiluk yogisasinem, it yomenogo mogukogo inalongge kigika lago dogolik, inagongge denggak agat oba yulkasuka. 7Esigit diluk lago nggorlek, at Yesus nen yabunggane omanggi inom men yogisasike,

“Kit ta kweyarik wagap,” yiluk yogisasikemo, it nen,

“Yesus ago Nazaret mende etnaga kweyarik wago o,” yiluk yogokukama, 8at Yesus nen, men yogisasike,

“Eti nebe anat o, yiluk arat yokisigi ambigi. Kit nen, anat kweyak nabik wagap kalok, an nagoromi yoma lowak nen togot diyani o,” yiluk yogisasike. 9Esigit diluk yogisasike eti, awan kagat lagidek werek nggorlek alebat, at Yesus nen Allah yogoko dogolik,

“Nombae Allah. Akoni Kat nen woknikigin mende yomenogo omanggi nalagidek o,” yiluk yogokike, mende etnogo, ane ebeat asuwagaluk esigit diluk yogisasike. 10Esigit diluk yogisasi nggorlek, at Simon Petrus etnogo mbirok wim abigogo mende etinem pago werekma nggigikogo waganggikesik nen, ap Allah indewerek mende inewe nggok anduwanengge mende endaga Malkus eti wasigiluk pilabek kasike asuk ebengge mende taʼbokogo laʼbisike. 11Esigit diluk taʼbokogo laʼbisikemo, at Yesus nen, men yogokike,

“Petrus. Kambirok obalikmo kuwakma nggolaʼbin o. Akoni nen i kenago wogisasinem niligogi kak, an nombae nen,

Kat yi aik ndi aik kagat kabugun o, yiluk yoknikike mende eti ndak-ndagat an kagat nabusak erlok dek ambegen a? Dek o. Kagat nabusagat o,” yiluk yogokike.

Yesus inggi kerle warogo wolok, ap endaga Hanas oba waguka wene

12Wene esigit diluk yiluk yisikemo, it ap tentara omanggi dogalek yomenogo inewe nggok omanggi inom, nen, it ap Yahudi mende Allah ago palek anggorlem dogoligogi mende inom, at Yesus ebe paʼbiluk inggi kerle wakuka. 13Inggi kerle warogo alebagik ap Hanas oba wolok waguka. Ap Hanas eti ebe, ap Kayafas tahun eti paga ebe Allah indewerek mende inewe nggogat welagike mende eti agoʼbak. 14At Kayafas eti ebe, alebat it ap Yahudi mende yogisasi dogolik,

“Nit taʼbokogonat pasik ap omanggiat watlasusak eti pano o,” yiluk inasuk wakike mende etnogo.

At Petrus nen, “An nebe Yesus agot dek o,” yiluk laʼbelkike wene

(Matius 26:69-70; Markus 14:66-68; Lukas 22:55-57)

15-16Esigit diluk wolok wagukama, at Simon Petrus etnogo nen, at Yesus agoromi ane waganggo laguka mende omanggi imbisak Yesus omborlik waguka. Esigit diluk wagukasik, at Petrus arligat, leget su kambema abel sikmangge kolak oba werek nggorlek, at Yesus agot omanggi eti ap Allah indewerek inewe nggok etnogo nen ebe ilu mende nogo nen, at Yesus imbisak ap nggok eti ago silimo unggisuka. It unggisukasik nen, at Yesus agot omanggi, ap Allah indewerek mende inewe nggok nen ebe ilu mende etnogo, yabunggane iyogoba duki lagike. Duki lago dogolik, korlak su kambema akoni dukisinem suwam dogoligogo mende eti imbisak wenenggak yisukasik nen, Petrus wolok unggisike. 17Esigit diluk wolok unggisinem, at korlak su kambema dukisinem suwam dogoligogo mende etnogo nen Petrus yogoko dogolik,

“Kat at yi agoromi ane waganigogi mende yomenogo mende dek a? At agoromi mendeat o,” yiluk yogokikemo, at Petrus nen,

“An dek o,” yisike. 18Esigit diluk yisikesik werek nggorlek, o etinem, sogi nen, it inanduwanengge mende inom, it ap Allah ago palek anggorlem werek mende inom, kindu kun disukasik nen, kindu kunikmo mendek dogolik sogi werakasi werekma, at Petrus inoba lagikesik inomat sogi werakasi mendek welaguka.

Ap Allah indewerek mende inewe nggok etnogo nen Yesus endema waganggike wene

(Matius 26:59-66; Markus 14:55-64; Lukas 22:66-71)

19Esigit diluk sogi werakasi nggorlek, ap Allah indewerek mende inewe nggok etnogo nen, at Yesus endema waganggo dogolik, men yogokike,

“Kat kagoromi kane waganigogi mende eti sani. Nen, Kat kane yanggul isasi lagan eti ninggit diluk,” yiluk kinok waganggikemo, 20at Yesus nen, men yogokike,

“An nen akoni agat oba mende wene yanggul isasi dogolik ʼbukakogonat yanggul isiligogo o. O it akoni Yahudi mende taʼbokogonat dogalogo sembayan yiligogoma inom, Allah ago palekma inom, etomaat yanggul isiligogo o. Wene an limago omanggi yogisiligogo mondok dek mende, 21an noba kinok woknabigogon eti nenaluk. An nen wene yogisasinem it arat inasuk koligogi, nen, an nen wene yogisasi lagi mende eti it iniluat werek o. It inoba kinok wogiyan o,” yiluk yisike. Wene esigit diluk yisinem, 22ap Allah ago palek anggorlem werek yomenogo mende omanggi ebe eta mendek dogolik, at inggi agut paga Yesus wako dogolik men yogokike,

“Ap Allah indewerek mende inewe nggok yi nen yokogonem, Kat nen wene esigit diluk yogosusak a? Erlok dek o.” yiluk yogokikemo, 23at Yesus nen, men yogokike,

“An nane nggorlo yigi kalok, wene nggorlo yigi mende ʼbukakogo yoknisin te! Nen, nane mot yigi mende pasigat, kinggi agut paga naken eti nenaluk,” yiluk yogokikemo, 24yabunggane at Hanas nen, at Yesus inggi kerle waregat, ap Kayafas ebe ap Allah indewerek mende inewe nggok mende etnogo oba wolok lowagaluk laʼbisike.

At Petrus nen, “An nebe Yesus agot dek o,” yiluk yabunggane laʼbelkike wene

(Matius 26:71-75; Markus 14:69-72; Lukas 22:58-62)

25Esigit diluk wolok lagukama, at Simon Petrus etnogo kindu kunikmo eranogo mendek dogolik sogi werakasi werekma, it akoni nen, men yogokuka,

“Kat at agoromi ane waganigogi mende yomenogo dek a? Kat at agoromi mendeat o,” yiluk yogokukama, at nen,

“An dek o,” yiluk laʼbelkike. 26Laʼbelko lagikemo, ap Allah indewerek inewe nggok mende etnogo anduwanengge mende omanggi, at Petrus nen asuk taʼbokogo laʼbisike etnogo agarlak omanggi nen,

“Kat kebe at kinom taman o ai yagoma werekma nilenggen kiyigi etnogo re,” yiluk yogokikemo, 27at Petrus nen,

“Dek o,” yiluk laʼbelkikeat. Esigit diluk laʼbelko nggorlek eranogoat sewe ayam ane yisike.

Yesus inggi kerle warogo wolok ap nggok Pilatus oba waguka wene

(Matius 27:1-2, 11-14; Markus 15:1-5; Lukas 23:1-5)

28Esigit diluk kagatluk, sewe ane yisikemo, kuben siyakogonat, at Yesus ap Kayafas werekma nen, gubernur ago o nggok palekma wolok waguka. Wolok wagukasik, Yesus arligat uma nggola ʼbisukasik,

“Nit pesta Paskah etnogo mende nonggo dogusakma, nit nen ninabusagat unggumo, nit weyagarogo ʼbinanunogo,” yiluk, o nggok palek gubernur aguma etoma unggigidek, o silimo puk aguka. 29O silimo puk agukama nen, at Pilatus inoba duki lagikesik men yogisasike,

“Warligi yi. Ap yi wene ninggit diluk mende oba ʼbegesip nen wolok wagap,” yiluk yogisasikemo, 30it nen, men yogokuka,

“At weyak kagakidek dogolepma, kat koba wolok witlep degat o,” yiluk yogokukama, 31at Pilatus nen, men yogisasike,

“Ap yi wolok lalok nen, kit nen kagarigogi ndak-ndagat kinenggaerek nen wene oba ʼbigik, nggokik, kagatni o,” yiluk yogisasikemo, it ap Yahudi mende nen, men yogokuka,

“Nit ninabusagat wene oba ʼbiluk inasusak erlok dek ambigi o,” yiluk yogokuka. 32Inane esigit diluk yogokuka eti at Yesus nen wene pagane yogisasi dogolik,

“An yigit diluk kagat nabiluk nasugun o,” yiluk yisi lagike mende etnogo, it esigit diluk kagakukama, at ane ndak-ndagat agike. 33It Yahudi mende nen esigit diluk yogokukama, at Pilatus o nggok palekma gubernur aguma etnogo suguluk unggisikesik, at Yesus ane pakasikesik nen, men yogokike,

“Akoni Yahudi mende inewe Endaganggok kat a?” yiluk yogokikemo, 34at Yesus nen, men yogokike,

“Kat nen wene an nabok yegen eti kat kakla nen nggagalogo yegen a? At te, it akoni amberek nen an nabok yokegama nen yegen a?” yiluk yogokikemo, 35at Pilatus nen, men yogokike,

“An nebe ap Yahudi mende agama yokneken a? It ap Kat keugi kagoromi inom, ap Allah indewerek ineugi nggokndek inom, nen, Kat kebe an wokneka eti Kat ninggit diluk kagakenma,” yiluk yogokikemo, 36at Yesus nen, men yogokike,

“An nen akoni napma ʼbiyiligogo eti akoni agat oba mende nen inapma ʼbiyiligogi eti kak ʼbuk. Dek o. An napma ʼbiyiligogo eti agat oba mende dogolepma, nagoromi nen an nebe it ap Yahudi mende wogisausak dek yiluk, nebe nirli woknabuwogoluk inom abilep mende, an napma ʼbiyiligogo eti agat oba mende dek eti paga, nirli woknabugun dek o,” yiluk yogokikemo, 37at Pilatus nen,

“Kalok, Kat eberogonat Kendaga Nggogat a?” yiluk yogokikemo, at Yesus nen, men yogokike,

“An nebe Nendaganggok kat yegen etiat o. Eti pasigat an nen ebe wene abok ʼbukakogo yogisasi dogigiluk nebe agat oba yoma endak lasi wusa wagagi o. Akoni wene ebe wene eti werekmangge yisi lagaka mende inebe dombok an nane inasuk koligogi o,” yiluk yogokikemo, 38at Pilatus nen,

“Wene ebe wene eti nena wene nogo?” yiluk yogokike.

Yesus ebe mondok wasuwogoluk wene oba ʼbisuka wene

(Matius 27:15-31; Markus 15:6-20; Lukas 23:13-25)

Wene esigit diluk yogokikesik, at Pilatus yabunggane ap Yahudi mende inoba duki lagikesik nen, men yogisasike,

“An nen at wene oba ʼbegep mende mbilelki mende, at weyak omanggi kagakemo kigi mondok dek o. 39Esigit dilugat mende, kit nen pesta Paskah nasi dogolik, ap kerle warek mende omanggi kerle piyal kisawagaluk nggino yoknokonem, piyaligogo etnogo paga, kit ap Yahudi mende kinewe endaganggok yi kerle piyal kisausak warlok a? Kinaʼit a,” yiluk yogisasikemo, 40it nen inaneyak nggogat walko dogolik, men yogokuka,

“Dek o. At eti kerle piyal nisausak dek o! At Barabas etiat kerle piyal nisan o!” yiluk yogokuka. At Barabas eti obabut weyak inggi abusak waganggo lagike mendeat yisuka.

Currently Selected:

Yohanes 18: DNA

Highlight

Copy