Salmos 5
5
Ma payahlawa kaupak Papang karak
Coro sumalniyang kaupak, bara. Devid salnimo.
1-2Dawan, yang kingki, dawak yang Papangki,
yang yulki balna adika dakah,
dawak aidik yultayang adika bik yadakah,
kalmadinit yakat buktik yultayang kidika bik dakah,
kat man yakat mikit yultayang.
3Mapiris yakat yang dikit kidika dakah;
mapiris palni yang yulki balna kidika mayultayang,
dawak tahatayang man nangkitlatang dakana atnik.
4Man laih Papang as dutni kidika dukih mawas ki;
muih dudutni balna kidika sip man yaihmat yakat yalalahwas ki,
5dawak bik, man muhma yakat pa as bik diski witingna manah kapat kaldakakawa muihni balna kidika.
Dutni yamyang balna yakat dutni ditalaman,
6alas muihni balna kidika itaman,
dawak malnikau inin yayamwa balna dawak muih iyang balna kidika dutasman.
7Nawatwak yang laih, man dalani lani nuhni dutaman kidika kau
sipyang man ūma yakat āwinik;
¡kaput bik ayangma nuhni yamna atnik rispik lani bitik karak
man ūma maisihni dis yakat talik!
8Dawan, yang kau dutni yakukulwa balna yulni,
la kat yamtaman yakat yaduta yawah,
dawak bik ta yamni yakat yaduta yawah.
9Witingna yul rahm barangni kidika yuyulwas ki;
¡pastawa niningkauh kidika laih dutni manah ki!
Dawak dinitna suru kidika laih sau-ū kuhryakwi apahna kapat ki;
¡dawak tunina kidika laih alasmanah ki!#Rom 3:13.
10¡Wah diata, Papangki!
¡Malnikau di yayamwa balna kidika kalatang kat daukalwang!
Dutni mahni yayamwa kidika yulni duwinih,
kat man namangkauh yaklalauna bahang.
11Alasna awanauh, witing yakat namatna daknin waltamana kidika;
alasna ban kaput unbautanauh,
kat man lawa nanitna daktaman bahang.
Man yakat dalani matatalwa kidika, man yulma alasna duduwi,
12kat, Dawan man lawa blisin diataman bahang, man yakat barangni balna yakat;
minikun talna lani dutaman kidika, witingna niningna yakat nanitnadaknin as bahang.
Currently Selected:
Salmos 5: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
