Nahúm 1
1
Papang kulnin daukalwak biri kalyamwa kidika
1Prapit Nahúm Elcos pāni kaupak dai kidika, witing yulni balna ulna wauhnitaya akat kidika laih, Papang yaklauwi niningkana dai. Adika yulni kuduh Nínive tawanni yakat kalyulna yulni balna.#Is 10:5-34; 14:24-27; Sof 2:13-15.
2Papang laih, Papang as minit anyang ki,
dawak biriwi kalyamnin kulnin lani duwi:#Ex 20:5-6; Dt 4:24.
biriwi diyamnin, witing niningkauh yaklalauwa balna yakat,
dawak waihnila balna yakat kulnin daukalwi.
3Papang laih kulnin laihwatyang ki, dawak parasni nuhni duwi,
wiswas laih dawas karang ki, dutni yamyang muihni balna yakat.
Papang laih wing parasni wauhwa minit munah lapakwi,
dawak lapakwak kalni kaupak pukni dulauwa kidika laih mukus balna.
4Kuma niningyakat yaklawi, dawak buhlakwi.
Yamwi, was balna kidika bitik buhlakna atnin.
Basán pāni dawak Carmelo asangni kidika bik kusulawi.
Dawak sihm kusulawi Líbano dinipulu balna kidika bik.
5Witing niningyakat diyukwi asang balna kidika,
dawak asang balna kidika arwi.#Sal 97:5; Mi 1:4.
Sau bitik kidika yulwi, witing talwa kamanah;
dawak muih bitik kidika yakat yalalahwa kidika.
6¿Wais sipkarang yang ban kalni kau yaklauna sak atnin,
witing annin nuhni nining yakat?
¿Wais sipkarangyah ban sak-atnin,
witing kulnin daukalwa niningyakat?
Witing anwakat sihm kuhpau kapat laihwi kiwi,
dawak witing muhni yakat kipala nunuhni balna kidika sahwi.
7Papang laih yamni ki;
yakmaldinin pāni as ki, kulnin bukna balna mani yakat:
tanit dakwi wais witing yakat rahm kukulwa balna yakat.
8Kauna, sihm was pauwi di murwi dukiwa kapat daukalwi dis yamwi,
witing niningkauh yaklauwa balna yakat.
Puksani kidika dilaihwarang ki, waihnila balna yakat.
9¿Ais as manna Papang niningkauh yamnin kultamanah?
¡Witing yaklauwi daukalwi dismukwarang bitik palni!
¡Muih as bik watbu witing niningyakat yaklauwas ki!
10Kat sihm wakal tarakni kapat ki,#1.10 Simh wakal tarakni kapat ki: hibru kau laih minitkau lakwi ulwi: dawak wasak dina wanisak kapat.
sihm di kusulana kapat busna karang bitik palni.
11Nínive, man kaupak kalahna,
Papang niningkauh di dutni kidika:
yul sumalyang muihni dutni as.
12Kidika bahang Papang yulwi, witing tawanni yakat:
“Asiria muihni balna kidika pararasni ki,
dawak mahni karang bik daukalwi dis yamna karang.#1.12 Asiria...dis yamna karang: kaput ulna kidika yamni kapat ki. Hibru kau laih amangladas ki.
Yang lawik mayamting kat dalani wauhnaman,
kauna baisa laih mating kat dalani wauhtas awama.
13Mamatkau truknin tikini dutaman kidika bahtik dis yamki
dawak sīnma kidika bik bahki.”
14Nínive kingni, Papang yaklauwi
man yulma laih aput yamnin yulna:
“Man sulama dutas awama,
man ayangma tanit yakat duwi kiunin kidika;
dawan dauh uni kidika bahtik dis yamki,
dawak wayani balna kidika bik,
dawak yakat manuki,
kat man kidika dutni palni man bahang.”
Nínive bahwarang kidika isning pakna
15 # S.d. 1:15—2:13 kidika laih libitna ki. S.d. 2:1-14 kat hibru kau ulna kidika.¡Talnauh! ¡Uman asang balna minitna yakat kaiwi,
yul muryang kidika kulnin aslah lani duaiwi!#Is 52:7.
Alasmana balna nuhni yamtah Judá;
pramamis kat yamta.
Baisa muih dudutni balna kidika man yakat aiwas karang;
kat bitik palni dismukna bahang.
Currently Selected:
Nahúm 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
