Mark 14

Jisas yakat malni kau laihninyayamna kidika

(Mt 26:1-5; Lk 22:1-2; Jn 11:45-53)

1Baisa ma bu kiwi kawas tanitkauh kidika yakat insal kaiwi bayakna alasnina mani kidika dai,#Ex 12:1-27; Dt 16:1-8. plawar pupuhnin dini dis busna kasnin mani kidika. Sumalyang balna taninatuna balna dawak la sumalniyang balna kidika kauna kalpakwi Jisas yakat laihwi inin wawalwadai yul alas munah. 2Bahang buas laih yuyulwadai:

—Dikah kasnin alasnina mani yakat laihnin, muih balna kidika kiri yaklauwas atninna.

Muih yal as yaklau Jisas minityakatkahnin dini walapni utuhna kidika

(Mt 26:6-13; Jn 12:1-8)

3Jisas laih Betania yakat kiunadai, Saiman lipar muihni kalatwadai kidika ūni yakat; witing laih tibil yakat yalahna sakkat, muih yal as kiwi kanadai yal kidika laih, punin dini pihni kau, dipulu kaupak kahnin dini walapni yakna kidika, minit nuhni dai bahang duwi kiwi Jisas tunan yakat utuhna.#Lc 7:37-38. 4Kidika yakat muih buas bangdai kidika laih kulninna daukalwi aput yuyulna:

—¿Ais yamwi di walapni kidika dauh utuhwih? 5Witing sipdai lalah 300 minit bakanpamwi muih miniknakunni balna yakat ilp diana atnin.

Dawak kidika yal yakat niningkauh yuyulna dai.

6Kaunah Jisas yaklau yulna:

—Datanauh; ¿ais yulni ustamanah? Aput yayamna adika laih yamniki. 7Bahang muih miniknakunni balna kidika laih manna pasmangna yakat ban dutanama ki,#Dt 15:11. dawak bik witingna yamni kidika dukih diawakat sipki yamni diyamnamna; kaunah yang laih man pasmangna yakat ban yadutas awanamaki. 8Adika yal laih witing ais yamnin sipdai kidika yakat yamna: yang muihki nuhni kidika baisa tanit kau kahnin dini walapni kidika kahna sau ū yakat yanunuwarang kidika yulni. 9Barangni manayultayang sau angkat angkat laihwi yaknin yulni sumamalwarang kidika, adika yal ais yamna kidika bik yuyulwarang ki, dawak kaput laih ma-isingkatna karang.

Judas yaklau Jisas yakat malni kauīna kidika

(Mt 26:14-16; Lk 22:3-6)

10Judas Iscariote, disaipil 12 balna kidika kaupak as kidika yaklau, sumalyang balna taninatuna balna yakat kiuna dai Jisas kidika witingna tingnina yakat āna atnin. 11Kidika yulni dakakana kat, witingna alasna kaldakakana dawak pramis kalalahna dai Judas yakat lalah kalana atnin, dawak Judas laih amput dawi Jisas kidika sumalyang balna taninatuna balna tingnina yakat ānin kidika walna dai.

Dawan yaklau masan kasnin diniyamna kidika

(Mt 26:17-29; Lk 22:7-23; Jn 13:21-30; 1 Kur 11:23-26)

12Kasnin alasnina ma tatuna yakat plawar pupuhnin dini dis busna kakaswadai kidika, dawak insal kaiwi bayakna mani sīp kurih as laihna kat sakripais yayamwadai kidika yakat, Jisas disainipil balna yaklau kalyulwi dakakana:

—¿Angdika pāni yakat yangna yawik insal kaiwi bayakna mani masan kasnin dini kidika yamnikna dukih mawih?

13Bahang witing disainipil balna paskaupak bu yakwi sihna, aput diyulwi:

—Manna tawan nuhni yakat yawanauh. Kidika yakat muih al as was butnin dini as kau was butwi kiwalik kat kalpaktanama; dawak usnit uita yawanama, 14dawak angkat kawarang kidika yakat, ū dawan yakat kalyultanama: ‘Sumalyang yaklau yulwi dakawi: ¿Angdika ūni paskau daklana yakat yang disaikipil balna karak insal kaiwi bayakna mani masan kasnin dini kidika kastanakiyah?’ 15Witing yaklau ū makau yakat daklana as nuhni dawak bik yamni as namangnakawarang. Kidika yakat mayang masan kasnin dini kidika yamtanama.

16Disaipil balna kidika laih kalahwi tawan nuhni yakat uina dai. Witingna laih Jisas yaklau amput diyulna dai kidika kaput kalpapakna, dawak kidika yakat insal kaiwi bayakna mani masan kasnin dini kidika yayamna dai.

17Ma puklakwa yakat Jisas disainipil balna 12 kidika karak uiwi kakanadai. 18Witingna tibil yakat di kaswabangkat, Jisas yaklau aput diyulna:

—Barangni manayultayang manna kaupak as, yang karak di kaswa kidika yaklau,#Sal 41:9. malni kau yaīwarangki.

19Witingna laih kulninna bukna dai, dawak as as kalahwi Jisas yakat kalyulwi dakakana:

—¿Yang yah?

20Jisas yaklau nangnitnalana:

—12 balna kidika kaupak as, yang di kastayang dini yakat plawar busna suihwi kaswa kidika ki. 21Muih Walanibis al kidika laih ta yakat lapakwarang ki ulna balna yakat yuyulwa kidika; kaunah ¡minikun palni angdika muihni yaklau malni kau īwa kidika! Witing niningyakat yamni dai batahnwas dai kat.

22Witingna laih di kaswabangkat, Jisas tingni yakat plawar busna kidika duwi Papang yakat tingkih kalana usnit kat, bahwi disainipil balna yakat diana, aput diyulwi:

—Dutanauh, adika ki yang muihki nuhni.

23Usnit kat tingni yakat sutak as duwi, Papang yakat tingkih kalana usnit kat, witingna yakat diawakat bitik didina. 24Jisas yaklau diyulna:

—Adika ki yang āki,#Ex 24:8; Zac 9:11. pramis as#14.24 Pramis as: tingkau ulna balna buas kidika laih aput yuyulwi: pramis wisam kidika. barangni yamwa kidika,#Jr 31:31-34. adika laih sau yakat utuhna muih mahni ilpnina. 25Barangni manayultayang yang wattik wain minik wasni kaupak ditas awaki ki, Papang king kāwa sauni kat laih wain wisam wasni kidika diki ki.

Jisas yaklau yulwi Pita yaklauwiting yakat kaltalwaski tarang kidika

(Mt 26:30-35; Lk 22:31-34; Jn 13:36-38)

26Salmo balna kidika unbabauna usnit kat, Olib asangni yakat uina dai. 27Jisas yaklau diyulna:

—Manna bitik laih yang akat yamni yakultas awanamaki. Ulna balna kidika aput yuyulwi: ‘Sīp maintalyang muihni kidika īki ki, dawak sīp balna kidika laih kalrarawarang ki.’#Zac 13:7. 28Kaunah yang wattik lawaki mani kat, baisa Galilea yakat yawasmana kat yang tatuna yawaki ki.#Mt 28:16.

29Pita yaklau kalyulna:

—Ūk balna kidika bitik yamni makukulwas karang bik, yang laih yamni makulki ki.

30Jisas yaklau nangnitlana:

—Barangni mayultayang adika puknita, baisa sakara wat bu yulwas kat, man lawa wat bas yatalasyang tima.

31Kaunah Pita yaklau baisa baisa kalyulwi dakana dai:

—Yang man karak daunik karang bik, matalasyang laih yultas awaki ki.

Dawak witingna bitik kaput manah yuyulna dai.

Jisas Getsemaní yakat minit yulna kidika

(Mt 26:36-46; Lk 22:39-46)

32Usnit kat pa as ayangni Getsemaní yakat uina dai. Jisas yaklau disainipil balna yakat diyulna:

—Manna akat yalahtanauh, yang laih yawik mikit yultayang kat.

33Dawak Pita, Jims dawak Jan kauna duwi kiuna, dawak witing laih kidika yakat kulnin bukna dai. 34Aput diyulna:

—Yang sangkika yakat kulnik bukna kaldakayang daunin yulni. Manna akat watta sahmuhni bang-awanauh.

35Kidika usnit kat Jisas laih baisa apis tanit yakat kiwi abukwi muhni kidika sau yakat sukna, dawak Papang yakat kalyulna, rahm yamna atnin, kidika mani witing dalani kidika dakawas atnin. 36Witing minityulna yakat aput yulna: “Yang Papangki, man namang yakat laih di bitik kidika sipman: adika dinin wasni tapahlni kaupak yalaihta yaktah; kaunah yang dukih yawa kaput laih yamwinih, kaunah man dukih mawa kaput yamtah.”

37Usnit kat witingna bangdai kidika yakat nawatwi kiuna, dawak kakamana bangkat ditalna dai. Pita yakat kalyulna:

—Saiman, ¿ama tusmahn? ¿Awar as bik sip sahmuhni sak-awasmandaih? 38Sahmuhni bang-awanauh dawak mamatna yultanauh, kalmana laknamna awas yulni. Manna laih kulnamna kidika yamniki, kaunah muihmana nuhni kidika laih yudutni ki.

39Watwi kiwi sihm yulni balna dai kidika lamwi yulwi minityulna dai. 40Nawatwi kaina mani kat, disaipil balna kidika watwi kamabangkat ditalna dai, kat uba palni miniknakauhna dai kidika yulni. Dawak witingna ais nangnitlaninnapa amanglalawasdai. 41Wat bas yakat nawatwi kaiwi aput diyulna:

—¿Manna baisa ama urupdabangmanah? Kamanah aitani ki, muih Walanibis al kidika muih dutni yamyang balna tingnina yakat kanin awarni kidika kaiwi kana. 42Lawanang mawanang; malni kau yaīwa muihni kidika laih kaiwi uliswi.

Jisas yakat lalaihna kidika

(Mt 26:47-56; Lk 22:47-53; Jn 18:2-11)

43Jisas laih baisa yulbauwa sakkat disaipil balna 12 paskaupak as Judas kidika muih mahni kalpakwi kiwi kana, kalbaunin dini isparah dawak pan karuk. Witingna laih sumalyang balna taninatuna balna, la sumalniyang balna dawak muihbararak balna yaklau disisihwak uina dai. 44Judas malni kau īyang muihni kidika yaklau sain as diana dai, aput diyulwinah: “Angdika muihni yakat umki kat, kidika karangki; laihta yamni sitta duyawanauh.” 45Kaput bahang Jisas yaihnit yakat kiwi kalyulna:

—¡Sumalyang!

Dawak umna. 46Bahang witingna laih Jisas yakat lalaihna.

47Kaunah kidika yakat bangdai kidika kaupak as yaklau isniparah yakwi sumalyang nuhni dini yamyang yakat tapani nakas dakna. 48Dawak Jisas yaklau muih balna yakat diyulwi dakana:

—¿Ais yulni manna isparah dawak pan duta yalaihna aiwanamanah, yang laih sihm dimalyang as yang kapat? 49Ma bitik yakat manna pasmangna yakat manasumalnayang dai makat yulnin ūni yakat,#Lc 19:47; 21:37. dawak wat as bik yalaihtasmana dai. Kauna adika kaput kalahwi, ulna balna yakat yulwa kidika kaput kalahna atnin yulni.

50Disaipil balna bitik laih Jisas kidika alas kaldapamwi kikirana dai. 51Kaunah wahma aslah umuk kau kalsuruhmdana kat Jisas usnit uiwi kiunadai. Kidika wahnima yakat lalaihna, 52kaunah witing laih umuk kidika dapamwi wahdis kiri yaklana dai.

Jisas laih la tunan muihni balnamuhnina yakat kiuna kidika

(Mt 26:57-68; Lk 22:54-55, 63-71; Jn 18:12-14, 19-24)

53Bahang Jisas kidika laihwi sumalyang nuhni muhni yakat duwi uina, dawak sumalyang balna taninatuna balna kidika bitik, muihbararak balna kidika dawak la sumalniyang balna kidika bitik kalududuhna dai. 54Pita laih nai kaupak usnit uiwi kawi kiunadai sumalyang nuhni ūni watakni kidika yakat, dawak makat yulnin ūni dūrni maintalyang balna karak watwi yalahna dai, kuh yaihnit yakat kuh kalpuihwinah.

55Sumalyang balna taninatuna balna dawak la tunan muihni balna karak kalpakwi Jisas alasni as wawalwadai īna atnin; kaunah sip yayakwasdai. 56Kat muih mahni kidika Jisas niningkauh alas manah yuyulwadai karang bik, biri biri rahm kalkukulwasdai. 57Buas yaklauwi alas yulwi aput yulwi yulni yayakna:

58—Yangna dakanayangna witing yaklau aput yulwakat: ‘Yang lawik adika makat yulnin ūni muih balna laihwi yayamna kidika daukalpamki ki, dawak ma bas kat wattik ūk yamki ki muih laihwi yamwas kidika.’#Jn 2:19.

59Kaunah kaput bik witingna rahm kukulwasdai muih balna yuyulwa kidika.

60Bahang sumalyang nuhni kidika muih balna bangkidika papusyakat yaklauwi Jisas yakat kalyulwi dakana:

—¿Man di as bik yultas man? ¿Ais diniyah akat man namangkauh yulwabang adika?

61Kaunah Jisas laih ap danadai, di as bik yulwas. Sumalyang nuhni kidika yaklau watwi kalyulwi dakana:

—¿Man yah Mesías, Papang ayangni nuhni kidika walanibis?

62Jisas yaklau kalyulna:

—Agha, yang. Dawak manna talnama muih Walanibis al kidika parasni bitik duwa kidika tingnipal niningyakat yalahwi kisang mukusni balna yakat kaiwakat.#Dn 7:13.

63Bahang sumalyang nuhni kidika prakni balna iswi bisna kulnin daukalna sainni, dawak aput yulna:

—¿Mayang ais yulni baisa witnis waldih? 64Manna dakanamana Papang niningkauh dutni yulwakat. ¿Ampat talamanah?

Witingna bitik laih kulninna aslah kalalahna dai Jisas laih dutni yamna kidika yulni daunin kidika.#Lv 24:16.

65Buas balna kidika laih susuihwas tuhwi, minikpa balna taihwi babauna, aput kalyulwinah:

—¡Yultah wais mabaunayah!

Dawak makat yulnin ūni dūrni maintalyang balna kidika laih muhni yakat babauna dai.

Pita yaklau Jisas talasyang atna kidika

(Mt 26:69-75; Luk 22:56-62; Jan 18:15-18, 25-29)

66Pita laih sau yakat sakdai, watak yakat. Kidika minitni yakat sumalyang nuhni dini yamyang yayal balna kidika kaupak as kiuna; 67dawak Pita kuh yaihnit yakat kuh kalpuihwa sakkidika yakat watwi kaltalwa sakkauna, kalyulna:

—Man bik Nazaret kaupak Jisas kidika karak likman dai.

68Pita yaklau talasyang kalti, aput kalyulna:

—Yang witing yakat amangnilatasyang, amanglatasyang ais yulni yultasakmanpa.

Dawak ahni kiwikawa yakat kalahna dai. Bahang wat as sakara yulna dai. 69Sumalyang nuhni dini yamyang yal kidika watwi Pita yakat kaltalna, dawak muih ūk balna yakat diyulna:

—Adika laih witingna kaupak as ki.

70Kaunah witing laih watwi talasyang atna. Kidika usnit kat, kidika yakat muih bangdai kidika balna yaklau watwi Pita yakat kalyuyulna:

—Rahm palni man laih witingna kaupak as man. Baisa kidika minityakat man laih Galilea kaupak man.

71Bahang Pita laih wat wat pramis yamwi, aput yulna:

—¡Kidika alni yulni yultamana kidika amangnilatasyang!

72Kidika minitni yakat sakara wat bu yulna dai, dawak Pita laih isningkatna dai Jisas yaklau aput kalyulna dai kidika: ‘Baisa sakara wat bu yulwas kat man lawa wat bas yatalasyang tima.’ Dawak Pita laih kaidana dai.

Currently Selected:

Mark 14: SUMU

Highlight

Copy