Miqueas 5
5
Devid kingni lani kidika watwi laihwi dulauna
1 # S.b. 5:1-12 kat kidika laih S.b. 4:14—5:14 kidik kalkulna ki hibru kau ulna yakat.“Kauna waralaih, Jerusalén,
man tamat daknin kidika ridi alahwa,
kat ma-awaihdadakna bahang,
dawak Israel tanituna kidika parasni palni dalani wauhwarang bahang.
2Belén Efrata, man laih
Judá sulani pasyakat dibin man,
man kaupak Israel kabamintni as kalahwarang#Mt 2:6; Jn 7:42.
kidika laih sara sulani dai kidika kaupak kaiwi.”
3Waralaih Dawan witing dini balna dawi,
kaunah walanibis yakwarang kat manah
yal as muih bin dunin tahawa sakkidika.
Kaput dawak kalududuhwarang pa aslah balna karak
Israel balna pa ūk kau duwi uina bangkidika.
4King kidika yaklauwarang
dawak tawanni kidika tunan duwarang,
Papang parasni bitik duwa kidika kau,
dawak witingna kidika kulnninna aslah yalalahwarang,
kat Papang kidika laih nuhni kalyamna karang sau sutni bitik kau.
5Witing yaklauwi kulnin aslah lani kidika duaiwarang.
Asirio balna mayang masauki akat aiwi kakawarangkat,
dawak makingki uni balna yakat kakawakat
witingna niningna yakat tunan muihni tiaskaubu,
dawak ahal nunuhni dikulna kidika tiaskaubās sihdarang.
6Witingna kabamint kakawarang Asiria yakat,
Nimrod#Gn 10:8-11. sauni yakat, isparah baini karak,
dawak Asiria balna kaupak mailaih'yayakwarang
mayang masauki lainni bayayakna kidika,
dawak masauki akat aiwi kakana kidika.
7Kaput laih, tawan mahni pasyakat
Jacob tawanni muihni buas wawatna bangkidika
laih sihm Dawan was sihwak kaiwa kapat karang,
dibasta minit yakat waslauwa kapat,
kidika laih muih kulnin lani awaski.
8Kaput laih tawan mahni pasyakat
Jacob tawanni sutni watna bangkidika laih
sihm layan as asangpas dini anyang balna pasyakat kapat karang,
kidika awaskat, layan, sīp balna pasyakat kana kapat karang,
bayakwi kiwa kidika tipisnimak kau laihwi iwi,
dawak asbik kiri yaklawas ki sangnika karuk.
9Kaput diyamma Papang,
man waihmala balna yakat, bahtadis yamma.
10Papang kaput yulwi:
“Kidika mani amaras balna kidika imukki,
dawak wār kalbautaman kārni balna bik bahtik dis yamki;
11tawan nunuhni balna kidika daukalmukki,
kalbauyang balna ūnina pararasni balna kidika bitik tuklakki;
12sukmayah balna kidika bitik dahnyamki,
dawak di kaikalahwas kau talwi yuyulwa balna kidika bik disyamki;
13dawan dauh wayani balna kidika daukalmukki,
dawak kimapala dawan dini ti dutaman kidika bik;
kaput laih dawan dauh balna man silp yamtada,
kidika yakat mamat yultaman,
bahang kidika laih dama.
14Damawan dauh ayangni kau duta pan dahnaman balna kidika duttik yakki ki,
dawak tawanma nunuhni balna kidika bitik daukalki.
15Yang kulnik daukalwa yulni biritik diyamki ki,
muih balna yang yulki kat dakawi yayamwas balna dai kidika yakat.”
Currently Selected:
Miqueas 5: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
