Luk 8

Muih yayal balna Jisas yakatilp kalalawadai kidika

1Kidika usnit kat, Jisas laih tawan balna dawak tawan binina mahni yakat Papang king kāwa sauni yulni kidika sumalwi awaihna dai. Apostel balna 12 dai kidika karak kalpakna bangdai, 2dawak yayal balna buas witing yaklau spirit dudutni balna duduwa kaupak dawak sikninanis kaupak yamni diyamna dai kidika kauna bangdai. Kidika balna pasyakat bangdai Mery Makdalen, witing kaupak sitan tiaskaubu kalalahna dai kidika; 3Herod lalahni maintalyang Cuza yalni Juana dai kidika bik; dawak Susana; dawak muih manas witing yakat ilp kalalawadai kidika balna kauna.#Mt 27:55-56; Mk 15:40-41; Lc 23:49.

Di dahyang yulni malni yulni

(Mt 13:1-9; Mk 4:1-9)

4Muih mahni tawan balna kaupak kalalahna dai Jisas yakat talna atnin, bahang muih mahni kalududuhna dai. Bahang adika malni yulni diyulna dai: 5“Di dahyang muihni as di dahna kalahna dai. Dahna mani kat, di minik balna buas kidika laih ta yakat bubukna dai, dawak di balna atatakna dawak di lawani balna bik ukmumukna dai. 6Di minik balna ūk kidika laih kipala balna walsah yakat bubukna dai; dawak di minik balna kidika ukusna mani kat, was dis yulni kusulalana dai. 7Di minik ūk balna kidika laih wakal pasyakat bubukna dai; dawak papatni bararakna mani kat, wakal balna kidika yaklau balakwi imumukna dai. 8Kaunah di minik ūk balna kidika laih sau yamni yakat bubukna dai; dawak barakwi minik yamni yayakna dai, minik as kaupak minik 100 kalahna dai.”

Adika Jisas witing yulna dai, dawak baisa minitlakwi parasni sarahwi aput yulna dai: “¡Tapamana dutamana kidika dakanauh!”

Ais yulni malni yulni yulna kidika

(Mt 13:10-17; Mk 4:10-12)

9Disaipil balna laih Jisas yakat kalyulwi dakakana dai kidika malni yulni kidika ais amput yulnin dukih kalawapa. 10Aput diyulna: “Manna yakat laih Papang king kāwa sauni yakat di malni kau kidika namangnakawi; kaunah muih ūk balna yakat laih malni yulni kau diyultayang, tatalwa kapat bik talwas atninna dawak dakakawa kapat bik amanglawas atninna.#Is 6:9-10.

Jisas yaklau di dahyang yulni malniyulni kau kat lāih yakwi diyulna kidika

(Mt 13:18-23; Mk 4:13-20)

11“Malni yulni kidika laih aput yulnin dukih kalwi: Di minik kidika laih Papang yulni; 12dawak di minik balna ta yaihnit yakat bubukna kidika laih, muih balna yul yamni dakakawa kat sitan kaiwi isningna kaupak yakwa kidika ki, rahm kukulwas atninna dawak bik dilaihwi yakwas atnin. 13Di minik balna kipala walsah yakat bubukna kidika laih yul yamni dakawi duduwa kidika ki, kaunah riknina dis kidika; ma parahni manah rahm kukulwi kaunah traini talnin mani kat bubukwi. 14Di minik balna wakal pasyakat bubukna kidika laih, yul yamni dakakawa balna kidika ki, kaunah tani tani kulwi kalbaunin balna, sau ritsni balna dawak dukih lani balna kidika yaklau diyayamwakat minik yayakwas kidika ki. 15Kaunah di minik balna sau yamni yakat bubukna kidika laih, muih balna isningna yamni karuk yul yamni kidika dakawi laihwi yayamwa kidika ki, dawak kidika yakat barangni laihwi duwi minik yamni yayakwi.

Awas yulni malni yulni kidika

(Mk 4:21-25)

16“Muih as bik awas dahlwas ki di as kau mukna atnin kidik awaskat kalangnin pāni dinit yakat āna atnin, kaunah maluih yakat ilwi,#Mt 5:15; Lc 11:33. muih kakawa balna bitik kidika ingni duna atninna. 17Sihm kaput bik, di as bik malni yakat diski amanglawas atnin, dawak di as bik malni kau diski ahni lāih yakat kalahwas atnin.#Mt 10:26; Lc 12:2.

18“Kaput bahang, yamni dakanauh, angdika muihni kat mahni duwa kidika laih minityakat baisa kalana karangki; kaunah dis muihni kidika laih, ais duwa kidika bitik dakyakna karangki.”#Mt 25:29; Lc 19:26.

Jisas nanangni dawak wirahni balna kauna

(Mt 12:46-50; Mk 3:31-35)

19Jisas nanangni dawak wirahni ahal balna laih witing sakdai kidika yakat uinadai, kaunah yaihnit yakat laih uiwasdai kat uba palni muih mahni bangdai kidika yulni. 20Muih as yaklau Jisas yakat isningpakna:

—Nanangma dawak wirahma balna laih ahni yakat bangki, dawak man yakat matalnin dukih diawi.

21Witing yaklau nangnitlana:

—Angdika muihni balna Papang yulni dakawi laihwi yayamwa balna kidika ki yang nanangki dawak yang wirahki ahal balna.

Jisas yaklau wing dawak was lalamwabalna yakat laihwatwa kidika

(Mt 8:23-27; Mk 4:35-41)

22Ma as kat, Jisas kuring as kau disainipil balna karak kana, dawak aput diyulna:

—Lakun nakas yakat madakmawanang.

Bahang kalahwi uina, 23dawak lakun kidika yakat dawi uiwabangkat, Jisas laih kamana dai. Kidika minitni yakat lakun minityakat wing parasni as wauhna dai, dawak kuring kidika laih was puna dai dawak bulwarang atwi yamaduduna dai. 24Bahang Jisas yakat uiwi uswi sahmuhwi aput kalyuyulna:

—¡Sumalyang! ¡Sumalyang! ¡Was pasyakat mahamawi!

Jisas laih yaklauwi wing yakat dawak was lalamwa balna yakat yamnin diyulna, dawak bitik laih laihwatwi yamni kalnadai. 25Usnit kat disaipil balna yakat diyulna:

—¿Manna rahm kulnin lani dutamana kidika angkatdanayah?

Kaunah witingna laih muihsakdauwi dawak bik yamni talwi, biri biri aput yulwi dakakana:

—¿Adika muihni waispah, wing yakat dawak was yakat yamnin diyulwakat yulni kat dakawi yayamwa kidika?

Gerasa kaupak spirit dutni kalkana muihni kidika

(Mt 8:28-34; Mk 5:1-20)

26Witni kat Gerasa sauni yakat uiwi kakanadai, lakun nakas yakat pakkidika, Galilea muhnit kau. 27Jisas sau yakat yaklakna mani kat, tawan kaupak spirit dutni kalkana muihni al as kalahwi Jisas yaihnit yakat kiunadai. Ma mahni bayakna dai witing laih prak āwas dawak ū as kau bik yalahwasdai, kaunah sau ū yakat payahwadai. 28Jisas yakat talna mani kat, witing muhnit yakat limbabahwi kalnidinit bukwi sarahwi aput yulna:

—¡Jisas Papang makau sakkidika Walanibis, yang yakat yauswinih! ¡Kalma dinit buktik mayultayang dalani yawinih!

29Witing kaput yulna dai, kat Jisas yaklau spirit dutni kidika witing kaupak kalahnin kalyulna dai yulni. Spirit dutni kidika laih ma mahni witing yakat laihwi duna dai; dawak muih balna kidika yaklau laihwi tingni balna yakat dawak kalni balna yakat sin kau sisitwadai karang bik, dakwadai dawak spirit dutni kidika yaklau kalyamwakat muih dis pāni balna yakat kiradai. 30Jisas yaklau kalyulwi dakana:

—¿Man ayangma amputyah?

Dawak witing yaklau nangnitlana:

—Yang ayangki laih Legión.

Kaput yulna dai kat witing muihni yakat spirit dudutni balna kidika laih muihni mahni kakanadai kidika yulni, 31witingna laih Jisas yakat kalyuyulna dai puksani tuhni yakat disihnin awas yulni. 32Asang yakat kusih mahni di kaswabangdai bahang, spirit dutni balna kidika laih Jisas kalni dinit bubukna dai didawakat kidika balna yakat kana atninna; dawak Jisas laih didawakat kakanadai. 33Spirit dudutni balna kidika laih muih al kidika kaupak kalahwi kusih balna yakat kakanadai, dawak kusih balna kidika laih lakun kat kiri uiwi kawi was dadauna dai.

34Kusih maintatalwa muihni balna dai kidika laih, di kalahna kidika tatalna mani kat, kiri uiwi tawan balna yakat dawak di dahnin pāni balna yakat yuyulna dai. 35Muih balna kidika laih kalahwi uiwi tatalna dai di kalahna kidika. Dawak Jisas sakdai pāni yakat uiwi kakana mani kat, muih al as kaupak spirit dudutni balna kalalahna dai kidika muihni laih Jisas kalnisar yakat prak āwi la kat yalahna sakkat talwi; yamaduduna dai. 36Dawak di kalahwakat tatalna dai kidika muihni balna laih, muih balna yakat yuyulna dai spirit dutni kalkana muihni amput yamni kalahna kidika. 37Bahang Gerasa sauni muihni balna yaklau Jisas yakat kalnidinit bukwi kalyuyulna dai kidika kaupak kalahwi kiuna atnin, kat uba palni yamaduduwadai kidika yulni. Kaput bahang Jisas laih kuring yakat kawi kiunadai. 38Muih al as kaupak spirit dudutni balna kalalahna muihni kidika laih Jisas yakat kalnidinit bukna dai witing karak kiuna atnin, kaunah Jisas yaklau watnin kalyulna dai, dawak aput kalyulna:

39—Ūma yakat nawatta yawah dawak Papang yaklau man yulma ais yamna kidika bitik muih balna yakat diyultah.

Muih al kidika laih kiwi tawan bitik yakat diyulna dai witing yulni Jisas ais yamnadai kidika.

Jairo walanibis yal kidika. Yal as Jisas prakni naini yakatsukna kidika

(Mt 9:18-26; Mk 5:21-43)

40Jisas watwi lakun nakas yakat dakyaklana mani kat, muih balna kidika laih alasna manah kalpararasna dai, kat witingna bitik tanitalwabangdai kidika yulni. 41Kidika minitni yakat muih al as ayangni Jairo kidika kiwi kanadai, witing laih Papang yulni sumamalwa ūni kidika tanituna dai. Kidika alni laih Jisas kalnidinit bukna dai witing ūni yakat kiuna atnin, 42kat witing walanibis yal aslah, kurih 12 duwa kat, daunin manah palni dai.

Jisas laih ta yakat kiwa kauna kaldakana dai muih balna usnit uhuiwa kidika yaklau uba kaltataihwakat. 43Muih balna pasyakat yal as sakdai witing laih siknis kalahna kaupak kurih 12 duwadai, kidika laih āni kira dai, dawak di duwa dai kidika laih daktar balna yakat manah disna dai, kaunah as bik yamni kalyayamwasdai. 44Adika yalni laih Jisas dangnit kaupak kaiwi prakni naini kidika sutni yakat sukna dai, dawak kidika minitni yakat āni kiradai kidika laihwatna dai. 45Bahang Jisas yaklau yulwi dakana:

—¿Wais yaklau yasuknayah?

Muih bitik sukdaski atwi yuyulwa bahang, Pita yaklau yulna:#8.45 Tingkau ulna balna as as yakat laih aput yuyulwi: Pita dawak witing karak kalpakna bangdai kidika muihni balna karak yuyulna.

—Sumalyang, muih balna kidika laih matataihwi dawak akauh tutukwi.

46Kaunah Jisas laih baisa yulwi dakana:

—Muih as yaklau yasukna, kat yang kaupak parasni nuhni as kalahna kidika amanglanayang.

47Yal kidika laih yakmaldinin sip awaskat, kalyukwinah kiwi Jisas kalnisar yakat limbabahna dai. Muih balna bitik muhnina yakat kalyulna dai ais yulni kaput sukna kidika, dawak bik amput yamni kalyamna dai kidika. 48Jisas yaklau kalyulna:

—Yang walakibis yal, man rahm kulnin lani dutaman kidika yulni yamni mayamna. Kulnam alasna yawah.

49Jisas laih baisa yulbauwa sakkat, yul trukyang muihni as kiwi Papang yulni sumamalwa ūni tanituna yakat kalyulna:

—Walamabis yal laih dauna; Sumalyang yakat baisa uswinih.

50Kaunah Jisas laih dakawi, aput kalyulna:

—Yamaduwinih; dauhmanah rahm kultah, dawak walamabis yal laih kallaihwi yakna karangki.

51Ū yakat kiwi kana mani kat, muih as bik didawakat kakawasdai kaunah Pita, Jims, Jan dawak muih yalbin kidika papangni dawak nanangni kidika balna manah kawi yaklalana dai. 52Muih balna bitik laih kidika yulni dalani dakawi kaidabangdai, kaunah Jisas yaklau diyulna:

—Manna kakaidinih; muih yalbin kidika laih dauwaski, kaunah kamatuski.

53Witingna bitik laih Jisas yakat niningkakarana dai, kat witingna laih amanglalana dai dauna kidika. 54Bahang Jisas yaklau muih yalbin kidika tingni yakat laihwi parasni sarahwi aput yulna:

—¡Muih yal siraubin, lawah!

55Dawak watwi sangka kalnadai; kidika minitni yakat yaklauna, dawak Jisas yaklau diyulna dai di kalalawakat kasna atnin. 56Papangni balna laih yamni tatalna dai; kaunah Jisas yaklau diyulna dai muih as kau bik yulnin awas di kalahna kidika.

Currently Selected:

Luk 8: SUMU

Highlight

Copy