Job 40
40
1-2Man, dukih mawadai kidika yangkarak la kanin
yang, paraski nuhni bitik dutayang adika,
¿baisa man kultamahn nangmatlanin?#Job 13:15-23; 23:5; 31:35-37.
Job
3-4¿Ais sipyah yang nangnitlanik, di dauh as yang adika?
Baisa yamniki ap danik.
5Uman wat wat yulbaunayang,
dawak di ūk minityakat laktik yulnik dini diski.
Papang yaklauwi watwi Job yakat kalyulwi dakawi
6Dawan yaklauwi watwi Job yakat kalyulwi dakana, wing parasni wauhwa kidika munah.
Dawan
7Waradika man kulnam dadasni kidika nikingkatah,
bahang adika yulwi dakanin balna adik nangkitlatah:#Job 38:3.
8¿Yang adika barangni awasyang, dawak pāt dutayang yakultaman,
dawak witni kat man laih dutni as bik dis alahwanam?
9¿Man kidika parasniman katpah yang kapat?
¿Man damatsuru kidika alwana kapātyah, yang kapat?
10Kaput kat nuhni alahwah, king kapat,
alasmana yaringni kidika kalmuktah.
11Witingna manah kapat kaldakakawa balna bitik yakat talah:
kulnam daukalna kidika kalatang kiwi, sau yakat lakmuktah.
12Agha, mamakpa talaman kidika kau tukta laktah,
muih dudutni balna kidika taihta labantah, panina kat
13Bitik kidika sau yakat nutah,
daunin sinilak ūni yakat āta puttah.
14Kaput laih yang palni talik rahm kulki
man parasma kidika yaklauwi minit bayaknin kidika mana.
15Talah di nuhni dutni wayakani Behemot yakat,#40.15 Behemot: kidika laih di nuhni as ki, sihm was aniras kapat ki.
kidika laih yang yamnayang, sihm man kapat:
witing laih dibasta kaswi turuh kapat;
16talah dangni kidika ampat parasniyah,
dawak pusurni balna kidika ampat parasniyah.
17Mamahni kidika laih dadasni ki sihm saba kapat,
kalni sininwah kalrikwa balna kidika laih surunimak kalna.
18Wakalni balna kidika laih sihm bras tubo balna kapat, dawak bik ayan kapat ki.
19Kidika laih yang warkki yamni yamnayang;
yang, yamna muihniyang manah sipyang minit bayaknik.
20Asang balna kau, di anyang balna yakikisda kidika,
balna yaklauwi dibasta duaiwi kalalawi, kasna atnin.
21Was minitkau dibasta balna ukuswa kidika dinit yakat kalangwi,
dawak wasmak paskau suku ukusna balna walsah yakat yakmaldi.
22Was minitkau di ukuswa balna kidika yaklauwi sanni kalawi,
dawak waskung kau pan balna kidika kal-awaihdak kalduduwi.
23Was kidika bangwi kil'kaiwak bik yamaduwas ki;
was kidika nangnitak kat kilwi kawak bik isninglak ki.
24¿Wais sipyah, laihwi minikpa balna yaknin,
kidika awasbik nangnitak yakat wah kau sitnin?
Currently Selected:
Job 40: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
