Isaías 41
41
Papang pramis yamwi Israel kidika laihwi yakna atnin
1“Yang muhki yakat ap awanauh kuma paskau sau wirni yakat yalahtamana kidika.
Sau muihni balna kulnamna dadasni bitik karak dutanauh.
Aiwanang kat adika yulni yulbaudanang,
kaluduhdi biri biri yulbaudi taldanang.
2¿Wais yaklauwi yamwak makilwa kaupak king as kaiwi kalahna yah,
bahang witing laih di bitik minit bayakwa kidika?
¿Wais yaklauwi sau kingni balna kidika witing tingni yakat āwakat sau yakat bubukwi,
dawak witing isniparah,
kaput bik lasni kau taihwi sikitwih,
dawak ruhmwak pini dibasta kusuni kapat kiwi?
3¿Wais yaklauwi pakwak uiwi kiwih,
dawak di as dis kiwa kidika kalni kidika ta yakat taihwas kapat?
4¿Adika warkni wais yamna yah?
¿Wais yaklauwi kaput pakna yah tatuna kaupak
yul balna kidika kaput kalahwi kaina atnin?
Yang kuduh, Dawan as yang manah kidika,
tatuna kaupak witni kat.#Is 43:10; 44:6; Rib 1:8,17; 22:13.
5Kuma kau yalalahwa -sau wirni- muihni balna kidika talwi yamaduduna;
sau kidika sutni kaupak sutni nakas kat laih isihna dai.
Uman ulis ki, uman aiwi.”
6Tingnina kau di yayamwa balna kidika bitik laih
witingna wanaihnina yakat ilp diayawi,
dawak kulninna dulalauwi.
7Kipala kidika awaskat pan kau di yamyang muihni kidika,
gol kau di yamyang muihni yakat kulnin dulauwi;
amar kau di tiswa kidika, tisnin ayanni nuhni yak tiswa yakat kulnin dulauwi,
dawak yulwi ayan birna kidika yamni kat,
usnit kat silak kau yamni pāsaktah muih wayani pan kau yamna kidika,
itiknin awas yulni.#41.7 S.d. 6-7 kidika libitna ki, tunan as yakna kidika S.d. 40:19-20 yakat.
8“Dakah Israel, Jacob tawanni,
diki yamyang, yang lawik waltik yaknayang kidika,
tawan as, yang kaltalyang yamni Abraham sulani kidika:#2 Cr 20:7; Jm 2:23.
9Yang lawik sau sutni kaupak mayaknayang,
kaput bik aiwanam mayulnayang sau bangni naikaupak,
dawak mayulnayang: ‘Man laih yang diki yamyang man.’
Yang lawik mayaknayang, bahang madatasyang.
10Bahang yamaduwinih, yang man karak yang;
yamaduwinih yang laih man Papangmayang.
Yang parasma matik ilp matayang,
dawak tingki parasni kau madulautayang.
11Man yakat dutni makukulwa kidika bitik
laih asalnina kalahwarang,
dawak sau yakat bubukwarang,
man namang yakat kalbabauwa kidika bitik laih dahn kakalna karang.
12Waihmala balna kidika walma
kaunah yaktas awama;
man namang yakat war yayamwa dai kidika diskarang,
nining disdai kapat.
13Kat yang man Papangma Dawan yang adika,
tingma sutni yakat laihna yang;
dawak mayulnayang: ‘Yamaduwinih, yang ilp maki.’ ”
14Dawan yulwi:
“Israel, Jacob tawanni kidika,
dibin dawak parasni dis karang bik,
yamaduwinih; yang ilp matayang.
Yang, Israel Papangni maisihni disyang kidika, malaihtik yakyang yang.
15Man kidika di wauhnin dini as mayamki,
yamni wisamni anani bik yayamni;
asang balna kidika wauhta yahamni manah yamma,
asang ububulni balna kidika dibasta kusuni kapat yamma.
16Rumhtang kat wing yaklauwi dukiuna karang,
wing parasni kaiwa kidika ruhwi duwi kiuna karang.
Kaput laih man Dawan yakat alasna duma,
dawak man manah kapat kaldakama Israel Papangni maisihni dis yakat.
17“Muih miniknakunni, di dis balna kidika was wawalwi,
kaunah yayakwas ki.
Tunina bitik buhlana was dikih diawa kidika yulni;
kaunah yang Dawan yang lawik yamki,
yang Israel Papangni yang sip ruhmtik datas awaki.
18Kauhmak wanilang kau asang kidika kaupak kalating kat wasnuh murwi kalahwarang,
dawak sau langni balna kaupak kalating kat was burhwi kalahwarang;
kaput bik laih kauhmak wanilang kidika bik wasmak balalni kalna karang,
yamting kat sau buhlana kidika kaupak was burhwi kalahna karang.#Is 35:6-8; 43:19-20; 44:3-4.
19Kauhmak wanilang yakat suhun dahki,
olib dahki, burimak dahki;
kaput bik laih sau buhni yakat kalatingkat ukuswi barakna karang
awas panan dawak pan ūk balna bik,
20kaput laih sau muihni balna bitik tatalwang dawak dakakawang,
yamni dakanauh dawak amanglatanauh,
yang Dawan yang, bahang paraski kau adika dini balna yamnayang,
yang Israel Papangni maisihni disyang kidika yang lawik kalating kalna.”
Papang yaklauwi dawan dauh balna yakat traininatalwi
21Dawan, Jacob kingni kidika yulwi:
“Dawan dauh balna, aiwa tamatna daktanauh,
dawak manna yulmana kidika aiwa tamatna daktanauh.
22Matakitkau di balna kalahwarang kidika aiwa yultanauh,
dawak di balna bayakna kidika bik lāih yakta yultanauh,
dawak dakana ki;
dawak di balna kaiwarang kidika bik yultanauh,
bahang kaput laih talna atnin angkat kiwi watwarang pa;
23yanayultah ais bayakwarang yah adika usnit dawakat,
nikingnakata rahm manna kidika dawan manah.
Sipmana yakat yamtanauh, yamni kidika-awas bik dutni karang bik,
di as kat muihsak daunikna dini kidika.
24¡Manna dauh mana kidika
di as bik yamnin sip-awas mana!#Jr 10:5.
Angdika muihni manna yakat manaduwa kidika laih witing dutni palni ki.
25“Makilwa niningyakat kalatingkat muih al as kaiwi kalahna dai;
ayangni kau yaktik kalyulnayang dai,#41.25 Ayangni kau yaktik kalyulnayang dai: satuk wirlana yakat yulwi: witing ayangki yakwi yulwi.
dawak tingpal niningkaupak kaina.
Kabamint muihni balna yakat kalni kau atakwi sihm wasmak kapat;
dawak bik sau bibilni kau di balna yamyang witing kalni kau atakwi tikwa kapat.
26¿Tatuna kaupak wais yaklauwi yulna dai adika yulni,
mayang dakana atnin?
¿Adika kaiwi kalahwarang kidika wais yaklauwi yulna daih tanit kaupak,
mayang dakadi rahm yulwi atnin?
Manna asbik alahwa yultasmana dai,
muih as bik manadakakawasdai yul yultanang kat.
27Yang lawik yulnayang dai,#41.27 Yang lawik yulnayang dai: kaput kidika yamni kapat ki. Hibru kau laih yulwi Akat, dawak kidika yakat. Sayan kaupak, dawak tatuna kaupak,
dawak wais yaklauwi muih yakwi sihna dai Jerusalén yakat kiwi yulna atnin,
sirihni palni muih balna kidika nawatwi aiwarangki.
28Talayang, dawan ūk balna kidika as bik aiwas ki;
muih as bik diski yul sumalna atnin,
dawak yultik dakayang kidika muih as bik diski nangkitlana atnin.
29¡Kidika balna bitik laih dauhki!
Di as bik yamnin sip-awas ki;
kidika laih dawan dauh pāni manah ki.
Currently Selected:
Isaías 41: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
