Isaías 10
10
1¡Alakaih manna, lā dutni ātamana
kaput bik laih muih kulnin dukih kalawas kidika lā ātamana,
2muih parasnina dis balna niningna yakat lā kat yamtas mana
kaput bik yang tawanki minikunni kidika rahmni kalatas mana,
tingmak balna yakat taihta dini maltamana
dawak warau balna yak dinina maltamana!
3¿Manna ais yamtanama yah kidika minit manalaihwakat,
manna naikaupak talnangkat wah kidika kaiwakat?
¿Wais yakat ilp yulta yawanama yah?
¿Manna dimana minit nunuhni balna kidika amput datanamayah?
4Manna sauyak mana lakwi dawak silak yak mana dukiwas karang kat
muih iyang balna tingnina yakat buktanama.
Kaput bahang Papang kulnin daukalna kidika yamni kalwas ki
witing ban niningna yakat yaklauwi.#Is 5:25; 9:12,17,21.
Papang, Asiria kidika duwi yusyamna, sau ūk balna yakat wah diana atnin yulni
5“¡Asiria kingni!#Is 14:24-27; Nah 1:1—3:19; Sof 2:13-15.
Kidika laih pan as ki, bahang yaka kau dutik kulnik daukalwak wah diatayang,
bahang kaput yus yamtayang#10.5 Yus yamtayang: Hibru kau laih yulwi witingna yus yayamwa kidika. kulnik daukalwak.
6Sihtingkat tawan dudutni balna niningna yakat kalbauwi,
yang kau dutni yayuyulwa balna yakat,
bahang kaput laih dinina balna kidika malwi dawak dakyaknin bik,
sihm tapas kau sau atakda kapat atakna atnin.
7Kaunah Asiria kingni laih kaput kulwas ki,
kidika awaski witing yamnin kulwa kidika.
Di ūk laih kulwas ki,
kaunah daukalwi dahn yamnin manah kulwi tawan balna manas yakat.
8Yulwi: ‘Sau kingni balna bitik kidika yang tunan ānayang ais yulki kidika yamna atnin.
9Yang niking yakat laih sihm kapapatki tawan nunuhni Calno dawak Carquemis karak,
kaput bik Amat kidika Arfad karak kapapatki,
dawak Samaria kidika bik Damasco kapat ki.
10Muih pasyakat dawan dauh manas kalpaknayang,
Jerusalén dawak Samaria kau duduwa kapat tanit.
11Kaput laih yamniki, Samaria dawak daniwan balna kau yamnayang kidika,
¿sip-awas awakiyah, Jerusalén dawak daniwan dauh balna yakat kalyamna atnin?’ ”
12Dawan yamnin duwa kidika bitik yamwarang kat
Jerusalén dawak Sayan asangni yakat,
usnit kat Asiria#2 Re 19:20-32. kingni yakat wah kalawarang
witing manah kapat kaldakawa kidika yulni.
13Asiria kingni kidika yulna:
“Yang alas paraski kau yamnayang;
yang laih sinski yamni dutayang, bahang wark balna yamnin kidika ridi yamnayang.
Sau as kaupak, sau ūk yakat dakwi kalahwa lainni balna kidika satuk yamnayang,
dawak kidika sauni paskau di minit nunuhni balna bangkidika bitik dunayang,
dawak, muih kulnin parasni kapat king balna kidika tuklaknayang.
14Yang tingki kidika tawan balna dinina minit yakat ānayang,
saunina bitik yang dunayang
sihm muih as kat uhubin uni yakat sumani balna damukna kat duwa kapat,
dawak muih as bik disdai lawani kidika bahna atnin,
dawak kaput bik uhubin anani kidika wakahwasdai parasni yulna atnin.”
15Kaunah, ¿ki kidika witing kauh nuhni kaldakanin sip kat pah,
yus yamwa muihni karak dawakat?
¿Sa kidika witing kauh nuhni kaldakanin sip kat pah
murwa muihni karak dawakat?
¡Tulnah kidika laih pan as kapat awaskat pah,
muih yus yamwa kidika-awaskat!
16Kidika bahang, Dawan parasni nuhni duwa kidika
yaklauwi parasnina dis dawarangki muihnina nuhni duduwa balna yakat,
dawak yamwak muihnina nuhni kidika dahlna karang yamah.
17Papang maisihni dis kidika laih Israel yaringni,
bahang witing laih kuh dahlwa kapat kalwarang,
ma aslah pasyakat wakal damasni kidika bitik busna karang,
kidika sauni yakat.
18Bitik palni laih daukalpamna karang
witing asangnipas yaksihni kidika, dawak dinipulu dahna pāni kidika bik.
Kaput laih muih as yamah laihwak parasni dis dana kapat kalna karang.
19Kaput laih asangpas yakat pan balna kidika bulah kalna karang,
bahang muihbin as bik sip karang kulwi talna atnin yapak bangpa.
20Kidika mani
Israel muihni balna bulah wawatwarang kidika,
Jacob tawanni muihni balna dauwas yaklalawarang kidika,
watwi kalwawalwas karang di daukalna muihni yakat,
kaunah Dawan yakat parasni palni lalaihna karang,
Israel Papangni holi yakat.
21Jacob tawanni muihni balna as as
Papang yakat nawatwi uina karang.
22Man tawanma Israel kidika mahni palni
kuma kauhnimak kapat karang bik
as as manah nawatwi uiwarang.
Daukalpamnin kulna kidika ban kaput sakki,
bahang la kat yamnin kidika laih bitik palni yamna karang ki.
23Kat Dawan parasni nuhni duwa kidika
yaklauwi daukalpamnin kulna,
bahang adika sauni bitik yakat kaput yamwarangki.
24Dawan parasni nuhni duwa kidika aput yulwi:
“Yang tawanki Sayan yak yalahtaman kidika,
yamaduwinih Asirio balna niningna yakat,
pananina yakau mana wiwiswarang
dawak tulninanah namangna yak dulalauwarang bik
Egipto kau yayamna dai kapat.#Gn 22:17; Rom 9:27.
25Kat ma balna kidika parahni dudarang kidika
wahni diana atnik,
yang kulnik daukalna kidika yaklauwi imukna karang.
26Dawan parasni nuhni duwa kidika yaklauwi wah diana karang
Madián nining kau yamna dai kapat
Oreb kinipala nuhni dai yakat,
witing parasni kidika niningkana karang Asiria#10.26 Asiria: barangni yulnin kat kuma, yuldarang kat Éufrates wasni, Asiria wasni, wasni balna kidika kitang manas duwa bahang kidika karak libitwi yulwi. nining yakat,
sihm Egipto kau niningkana dai kaput.
27Kidika mani dangmat kau di tikini ilna dai kidika lakna karang,
dawakat arangmapana yakat pan ilwi sitna dai kidika bik bahngna karang.”
Asirio balna kawi uina niningna yakat
Rimón munah muih balna kidika kawi aiwi,#10.27 Rimón munah...kawi aiwi: Hibru kau laih yulwi dinimak kau pan sitna kidika laih disala yaklauwi bahna karang.
28Ajat yakat kiwi kawi,
Migrón munah bayakwi
dawakat Micmas yakat dinina kidika dadawi,
29was murwa munah dakyaklalawi
dawak Geba yakat watwi;
Ramá laih muihsak-dadauwi,
Saúl kau Gabaa kidika balna laih kalahwi kikiri.
30¡Bat-galim parasni sarahwi!
¡Laisa, dakah!
¡Nangnitlatah,#10.30 Nangnitlatah: sara mani kau ulna kidika kaput yulwi. Hibru kau laih yulwi dutni manah. Anatot!
31Madmena kalahwi, kiri,
Gebim muihni balna laih yakmamaldi.
32Warmani, muih kawi aiwa kidika Nob yakat watwi;
uman sainni diana ki Sayan asangni niningkauh kalbaunin,
dawak Jerusalén asangni ubulni nining yakat bik.
33Talnauh, Dawan parasni nuhni duwa kidika,
pan nunuhni balna yakat parasni yamadangni kau laih bahwi;
nanaini balna kidika bik bahna,
malaluih balna kidika bik sau yak bubukna.
34Ki kau duwi asangpas damasni balna kidika pihwi,
Líbano kau pan nunuhni kau yaksasihn kidika dakna ki.
Currently Selected:
Isaías 10: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
