Génesis 30

1Raquel witing talwak Jacob yakat walanbis kalanin sip-awasdai, dawak witing wirahni Lea yakat tumna, dawak alni yakat kalyulna:

—Walambis yatah, kidik awaskat yang laih dauki.

2Kaunah Jacob witing kulnin daukalwi kalyulna:

—¿Yang adika Papang yangh? Witing kuduh yaklauwi walamabis sip mawas kidika.

3Kaput dawak witing yulna:

—Talah, yang diki yamyang Bilha kidika dutah, dawak witing karak alangwah, bahang witing walanbis yakwarang kat, kidika laih yang dunayang kapat karang.#30.3 Barangni yulnin kat: yang kalaskimak minit yakat walabis yakwang. Kaput laih sip awaki walabis dunik.

4Kaput laih Raquel witing yaklauwi dini yamyang Bilha kidika Jacob yakat kalana, witing yalni kapat duna atnin. Dawak Jacob kidika Bilha karak kalalangna, 5dawak witing yaklauwi Jacob yakat walanbis as kalana. 6Kaput dawak Raquel yulna: “Adika muihnibin ayangni laih Dan#30.6 Hibru kau Dan kidika tanka laih la kat yamnin, sihm kapat yulni kidika duwi. karang, kat Papang mikityulnayang kidika dakana bahang, dawak la kat yamna yang walakbis as yana kidika.”

7Kidika usnit kat Bilha yaklauwi watwi Jacob yakat walanbis as kalana, 8dawak Raquel yaklauwi yulna: “Adika muihnibin ayangni laih Neftalí#30.8 Hibru kau Neftalí kidika yulni tanka laih niningkau kalbaunin sihm kapat paruh yulwi. karang, kat wirahki nining yakat uba kalbaunayang dawak minit bayaknayang bahang.”

9Dawak Lea talna witing sip baisa walabis yakwas bahang, witing dini yamyang Zilpa kidika Jacob yakat kalana dai, witing yalni kapat duna atnin. 10Dawak Zilpa yaklauwi Jacob yakat walanibis as kalawak, 11Lea yulna: “¡Ais suerte yah! Kidika bahang muihnibin kidika ayangni laih Gad#30.11 Hibru kau Gad tanka laih suerte. karang.”

12Dawak usnit kat Zilpa yaklauwi Jacob yakat walanibis al ūk kalana, 13dawak kaput laih Lea yulna: “¡Ais alasnina yah! Waralaih yayal balna yuyulwarang yang isinglak ki. Kidika bahang muihbin kidika ayangni pakna karang Aser.”#30.13 Hibru kau Aser tanka laih isninglak.

14Ma as Rubén asangpas kau kiuna, kidika laih plawar minik babahwa mani dai, dawak kidika yakat di minik as yakna dai, ayangni laih mandrágoras,#30.14 Kukulwadai, adika dini minik yaklauwi yayal yakat walaninabis diawadai. dawak dini balna kidika nanangni Lea yakat duwi kiuna. Dawak Raquel dini minik balna kidika talna Lea yakat kalyulna:

—Plisma man walamabis mandrágoras duaina kidika as yatah.

15Kaunah Lea yaklauwi nangnitlana:

—¿Man namang yakat di dauh kapatyah alki dakyaknaman kidika? ¡Dawak waradika bik yang walakbis mandrágoras duaina kidika bik dakyakkuhtimahn!

—Kaput kat man walanbis mandrágoras duaina kidika minit, adika puknita Jacán man karak payahna karang —Raquel yaklauwi kaput kalyulna.

16Pukta yakat, Jacob yamak kaupak kaiwak Lea kalahwi niningkauh kiwi kalyulna:

—Warmani yang karak amama, kat yang walakibis mandrágoras duaina kidika minit mawirihnayang bahang.

Kidika pukta Jacob Lea karak payahna, 17dawak Lea yaklauwi Jacob yakat walanbis al as kalana, bahang kidika yakat uman walanbis singka dai, kat witing minit yulna kidika Papang dakana dai bahang. 18Kaput laih Lea yaklauwi yulna: “Adika muihni bin ayangni laih Isacar#30.18 Hibru kau Isacar yulni balna tanka laih prisantni kalanin kidika awaskat wayaki kalanin sihm yulni kapat duwi. karang, kat Papang yaklauwi yana bahang, kat yang bik diki yamyang yal kidika alki yakat kalanayang dai bahang.”

19Usnit kat Lea yaklauwi Jacob yakat walanbis ahal tiaskauas kidika kalana dai, 20dawak yulna: “Papang di minit dis yamni as yana. Waradika laih yang alki tanit dalani yadakawarang, kat walanibis balna tiaskauas kalanayang bahang. Kidika bahang adika muihnibin ayangni laih Zabulón#30.20 Hibru kau Zabulón kidika yulni balna laih dauh kalanin kidika awaskat dalani talnin sihm kidika yulni kapat duwi. karang.”

21Dawak witni yakat Lea walanbis yal as duna ayangni Dina pakna. 22Kaunah Papang isningkatna Raquel yakat, dawak minityulna kidika dakana bahang baisa kalawak walanbis yakna. 23Dawak witing walanbis tatuna duna kat, yulna: “Papang yaklauwi yang walabis dutasyang asalni kidika yakpamna yang kaupak. 24Wat ūk yāwak yakki kat yamni karang.” Kidika barang ayangni José.#30.24 Hibru kau José kidika tanka laih dakwi yaknin dawak baisa kalanin sihm kidika yulni kapat yulwi.

Jacob yaklauwi Labán yakatalas kalyulna kidika

25Raquel witing José kidika duna usnit kat, Jacob yaklauwi Labán yakat kalyulna:

—Yadatangkat sauki yakat nawattik yawakuh. 26Yang walakbis balna dawak yalki balna bik yatah, kat witingna yulnina man karak wark alahwanayang, bahang yadatang yawakuh. Man yamni amanglataman ampus man warkma yamnayang kidika.

27Kaunah Labán biri kalyulna:

—Plisma yang karak wattah. Yang amanglanayang Dawan blisin yana man munah. 28Yayultah ampus dunam kultaman, bahang yang lawik minitlautik maki.

29Kaput laih Jacob yaklauwi kalyulna:

—Man yamni amanglataman ampus man warkma yamnayang kidika, dawak bik ampus tingmalau balna maintalnayang kidika; 30yang aiwasyang tanitkauh bulah bin manah dutaman dai kidika, waradika laih nuhni palni kilwi kiuna, kat aiwik āwanayang kaupak, Dawan yaklauwi yamni blisin mana; kaunah, ¿mampat kat yang silp walakibis balna dinina yamkiyah?

31—¿Ampus lautik manik kultamanh? —Labán watwi kalyulwi dakana.

—Di as bik lauwi yawinih —Jacob yaklauwi kaput kalyulna—. Wattik sīpma balna maintalki, yang lawik mayulki kidika agha timakat: 32warmani yadatangkat sīpma balna pasmunah bayakki, kaput laih sīp sasani binina kidika bitik silp yakki pa ūk,#30.32 Kaput ki, grik kau ulna kidika. Hibru kau laih sīp binina bubulni kidika, dawak sasani kidika, sīp balna pasyakat. dawak kuts binina uninatak bubulni kidika balna bik. Bahang kidika balna yang mikit karang. 33Kaput laih, man usnit kat aiwa talma yang ampus dunayang kidika, bahang kaput laih amanglama yang ampus kulnik yamni kidika: kaput laih man talma yang sīpki balna dawak kutski balna pasyakat sani, bulni bik awas likkarang kat kidika laih yang malnayang kat awarang.

34—Yamniki man yultaman kidika yamni talayang —kaltadai Labán.

35Kaunah kidika mani Labán yaklauwi sīp unitak bubulni balna kidika bitik silp yakna dai, dawak kuts balna bik sihm kaput yamna dai, dawak sīp sasani kidika bik, witing walanibis balna yakat diana maintalna atnin. 36Kaput laih kidika usnit kat sīpni balna kidika mahka duwi kiuna Jacob sakdai kidika kaupak, bahang kidika laih ma bās praisni naikau dai tani kidika.

Dawak Jacob witing laih, Labán sīpni balna kidika ban maintalwādai. 37Alamo panan, almendra panan dawak castaño panan kidika balna dakwi unitak turna bahang kaput laih sipdai rarauni pihni kidika talna atnin; 38-39usnit kat panan balna dai kidika sīp balna kaluduhwi was didiwa pāni yakat dungna. Bahang kidika yakat kuduh ahalmuk kidika yayal yakat lalaihwadai kidika, bahang kidika panan turna niningtani yakat kal-lalaihwa bahang walaninabis kidika sasani bubulni bik kalalahwadai. 40Kaput laih Jacob witing sasani kalahwa balna kidika pa ūk lawa dai, sasani bubulni balna pasyakat āwadai, Labán tingni lau balna pasyakaupak yakwi. Kaput laih Jacob witing silp tingnilau balna kidika yakwi lana. 41Dawak tinglau tanit salalani balna kidika kallalaihwa kat walaninabis yakna atnin, Jacob witing yaklauwi panan kidika was didiwa pāni yakat dungwadai, kaput laih kallalaihwa minitni yakat panan kidika talna atnin yulni; 42kaunah tinglau tanit ararakni balna kidika aiwak, panan kidika dunghwasdai. Kidika bahang tinglau tanit ararakni kidika laih Labán tingnilau balna dai, dawak tingnilau balna salalani kidika laih Jacob dini dai. 43Kaput yamwi Jacob kidika di duyang kalna dai, sīp balna, dini yamyang balna ahal, yayal, kiamil dawak biriku bik.

Currently Selected:

Génesis 30: SUMU

Highlight

Copy