Génesis 27

Isaac yaklauwi Jacob dawak Esaú yakatblisin diawi

1Isaac kidika uman muihbarak kalna dai, dawak minikpa bik di talwas dana dai. Bahang ma as kat Esaú yakat kalyulwak kiwak aput kalyulna:

—¡Walakbis!

Esaú biri kalyulna:

—Papang yayultah.

2Dawak Isaac yulna:

—Talaman, yang laih uman muihbarak kalnayang, adika mani balna akat sipki daunik. 3Kaput bahang dukih yawi man asangpas yakat yawah, lasma dawak simabang balna duta, dawak di as īta aiwah. 4Usnit kat man yamni auhni lahta wasnibin bik apis datah, yang kaskihyawa kaput, dawak duaita yatang kaskuh. Kaput laih yang dautas yang kau blisin maki.

5Kaunah Rebeca laih dakawasakdai Isaac yaklauwi Esaú yakat kalyulwa kidika. Kaput bahang witing asangpas yakat di īna kiudawak papangni yakat duaiwi kalanin yulni, 6yal kidika yaklauwi walanibis binkauh Jacob yakat kalyulna:

—Talah, yang warmani dakanayang papangma kidika wirahma Esaú yakat aput kalyulwak: 7‘Man di as īta aiwah auhni lahta wasni karak utuhta yatang kat kaskuh, dawak kaput laih dautasyang kau Dawan muhni tani yakat blisin māki' dautas yang tanityak.’ 8Kaput bahang, walakibis, yamni dakah mayulki kidika: 9Man yawah tinglau bangkidika yakat, dawak kuts binina tanit yayamni kidika bu duaita yatah; papangma yakat lahtik kalaki auhni palni wasnibin bitik, witing yamni dakawa kaput. 10Man duyawa kalatang kat kaswarang, dawak kaput laih blisinni kidika man yakat mawarang witing dauwas tanitkauh.

11Kaunah Jacob yaklauwi nanangni yakat kalyulna:

—Wirahki laih unitak yakat butuni mahni duwi, kaunah yang laih butuki diski. 12Papang ki yalaihwi dakawi amangkilawarang kat, witing kulwarang yang lawik sarahni kaltalayang; kaput laih yang akat layatuhwarang blisin yanin pāni yakat.

13Kaunah nanangni yaklauwi nangnitlana:

—Walakbis la tuhnin kidika yang mikit yakat bukwang. Man laih yamtah yang mayultayang kidika, kuts binina kidika duaiyatah.

14Jacob witing kiwi kuts binina kidika duaiwi kalana nanangni yakat. Witing yaklauwi di lahna auhni yamni dawak wasnibin bitik apis dana, Isaac kaskih kalawa kaput, 15dawak Esaú asnina tanit yamni kidika yakna, bahang kidika asnina laih ūni yakat apakna bangdai, dawak witing walanibis binkauh Jacob yakat āna. 16Usnit kat, kuts unitak yakau Jacob tingni dawak dinimak yakat bik muklakna dai, butuni dis pāni balna yakat, 17dawak di auhni lahna dai kidika dawak plawar bik busna dai kidika karak kalana.

18Kaput laih Jacob witing papangni sakyakat kawi aput kalyulna:

—¡Papang!

Isaac biri kalyulna:

—Akat sak yang. ¿Walakibis balna bu kidika angdikamahn?

19—Yang kuduh Esaú man walamabis barakni —kaltadai Jacob yaklauwi—. Man yayulnaman kidika yamnayang. Bahang plisma lawa yalahda di īnayang adika kastah, dawak man blisinma kidika yatah.

20Kaput laih Isaac yaklauwi yulwi dakana:

—¿Amput sirihni kalpaktadah yang walakibis?

—Man Damawan Papangma yaklauwi ilp yana waltik yaknik —kalatna Jacob yaklauwi.

21Kaunah Isaac yaklauwi yulna:

—Īs aiwang malaihtik dakakuh, kaput laih amanglaki rahm man kidika walakbis Esaú man pa.

22Dawak Jacob iskiuna papangni Isaac laihwi dakana atnin. Kaput dawak Isaac yulna: “Dinit yulwa kidika Jacob dinit, kaunah tingni balna laih Esaú tingni.” 23Kaput laih sip amangnilawas dana, kat tingni balna kidika butuni kasak duwadai bahang, witing wirahni Esaú kapat. Kaunah witing mahka blisin kalawarang kat, 24watwi kalyulwi dakana:

—¿Rahm man kidika walakbis Esaú manh?

—Agha yang Esaú —Jacob yaklauwi kalyulna.

25Kaput laih papangni yaklauwi kalyulna:

—Bahang walakbis, kasnik kidika yatah, man di īnaman kidika, dawak kaput laih blisin māki.

Jacob yaklauwi papangni yakat di kalawak kasna, dawak wain bik uiwi kalana. Isaac witing kasna dawak bik dina, 26usnit kat kalyulna:

—Walakbis, yaihkit yak aiwah yaumtah.

27Jacob kidika yaihnit yakat kiuna umna atnin dawak Isaac witing asna wayani duwa kidika dakana. Kaput laih adika yulni karak blisin kalana:

“Walapni as purwa kidika laihwalakibis kaupak purwi.

Kidika laih asangpas kau purwa kapat ki

Dawan yaklauwi blisin kalana kidika.

28Papang yaklauwi was mawarangmakau kisang kaupak,

sau akat di minik tanit yamni kidikamawarang,

plawar minik manas dawak wain bikmanas mawarang.

29Muih mahni dima yayamwarang;

nisan balna kidika man muhma yakatlimbabahwarang.

Man wirahma balna kabamintni awama;

¡man muhma tani yakat limbabahna karang!

Wais lamatuhwarang kat,

kidika muihni laih la tuhna karang,

dawak blisin mawarang muihni kidikayakat laih blisin kalana karang.”#Gn 12:3. ,#Hib 11:20.

30Isaac yaklauwi Jacob yakat blisin kalawi dahn dawakat, Jacob kidika papangni sakkidika kaupak kalahwi kiwak, Esaú kidika di iwi kaikalahna dai. 31Dawak witing bik di auhni lahna dai wasnibin bik apis danadai lahna kidika pasyakat, dawak papangni yakat dukiwi aput kalyulna:

—Papang, lawah; bahang man walambis di īna kidika kastah, dawak blisin kidika yatah.

32Isaac yaklauwi yulwi dana:

—¿Man kidika wais manh?

—yang kuduh Esaú, man walambis barakni —kaltadai.

33Isaac witing kasak isning-aina, dawak dinit dalah kalyulna:

—Kaput kat, ¿wais daih kiwi di iwi duaiwi lahwi yana kidika? Yang bitik kasnayang man aiwasman tanit kauh, dawak yang lawik blisinki kidika kalanayang, bahang waralaih witing kidika blisin duna.

34Esaú, witing papangni yulwa kidika dakawi tapalhni palni kaidana, dawak sarahwi yulna:

—¡Yang akat bik man blimasin kidika yatah, papang!

35Kaunah Isaac yaklauwi nangnitlana:

—Uman wirahma kaiwi alas yuyulwi, man blimasin dai kidika duwi kiuna.

36—¡Kidika bahang aitani witing ayangni kidika Jacob papakna! —kaput Esaú yulna—. ¡Uman wat bu alas yayamwi!#27.36 Talah 25:26 yakat. Tatuna witing yaklauwi walanbis tatuna rahmni kidika yadakyakna,#Gn 25:29-34. dawak waradika laih yang blisin dunik dai kidika yadakyakna. ¿Blisin ūk dismanh yang diki?

37Kaput laih Isaac yaklauwi kalyulna:

—Talah, yang lawik wirahma Jacob yakat la parasni kidika kalanayang man mamatyakat atnin, witing wanaihni balna bitik kidika witing dini yamyang atnin kalanayang, dawak bik kalanayang plawar minik kidika bik mahni palni duna atnin dawak wain bik. ¿Yang ais yamnik sipyah man dima atnin kidika, yang walakibis?

38Esaú watwi yulna:

—¿Blisin as bik yanam sip-awasyah, papangki? ¡Yang akat bik blisin yatah!

Dawak watwi parasni sarahwi kaidana.#Hib 12:17.

39Kaput laih Isaac yaklauwi kalyulna:

“Sau yayamni kidika kaupak naikau yawama

dawak makau kisang kaupak was lauwa kidika bik.

40Man ismaparah kaupak namatdakma

dawak man wirahma dini yamyang awama;

kaunah man parasni alahwama kat,

witing kaupak dakta alahwama.”#Gn 36:8; 2 Re 8:20. ,#Hib 11:20.

Jacob kiri wirahni Esaú muhni kaupak

41Kidika kaupak Esaú yaklauwi Jacob yak waihla talna, papangni blisin kalana kidika yulni kaupak, dawak bik kulwadai: “Sirihni makulnik bukna karangki papangki dauwarang mani kat, kidika kaupak usnit kat Jacob kidika ipamki ki.”

42Rebeca witing dakana kat walanibis Esaú yamnin kulwa kidika, Jacob yakat kalyulwak kiwak aput kalyulna:

—Talah, man wirahma Esaú kidika maīnin yamwi. 43Kaput bahang, walakbis dakah; Harán yakat īra yawah, yang wirahki Labán ūni yakat. 44Witing karak ma apis wattah, man wirahma kulnin daukalna kidika bayakwarang kat 45dawak datang damatkahwang kalyamnaman kidika. Kaput laih ismang pakting kat aiwama. ¡Yang walakbis bu dutayang kidika ma aslah pasyakat bupak disnik kidika dukih yāwaski!

46Usnit kat Rebeca yaklauwi Isaac yakat kalyulna:

—Yasuhdana sangkika adika Esaú witing hitita yalni as duna kidika yulni. Dawak Jacob bik sihm hitita yalni as karak kalduduwarang kat, Canaán akat yalalahwa balna kidika, tanit yamni karang dauki kat.

Currently Selected:

Génesis 27: SUMU

Highlight

Copy