Génesis 17
17
Papang sainni kidika laih pramis sainni
1Abram kidika kurih 99 duwa dai kat Dawan yaklauwi witing yakat lāih kalahwi, aput kalyulna:
—Yang kuduh Papang parasni nuhni bitik palni dutayang kidika; sangka awah, yang muhki yak dutni as bik yamwinih, 2dawak yang mankarak pramis as yamki: yang sulama balna kidika mahni palni yamki.
3Dawak Abram muhni kidika sau kat lakna, dawak Papang laih baisa aput kalyulwa sakdai:
4—Adika pramis kuduh mankarak yamtayang: Man laih nisan balna mahni papangnina awama, 5dawak ayangma kidika baisa Abram mayulwas karang. Warmani kaupak ayangma kidika mayulna karang Abraham,#17.5 Hibru kau, Abraham, kidika tanka laih nisan mahni papangni, sihm kapat paruh yulwi. kat yang lawik nisan mahni papangni mayamtayang bahang.#Rom 4:17-18. 6Yang lawik yamting kat sulama balna kidika mahni karang; man kaupak king balna dawak nisan balna kalalahna karang. 7Man karak, pramis yamtayang adika, man sulama balna karak bik yamki, ma balna kaiwarang yakat,#Lc 1:55. kat yang laih Papang ban awaki, dawak witingna Papangnina bik. 8Man yak, dawak witingna yak, bik Canaán sauni bitik manaki, waradika manna yalahtamana kidika, bahang manna dimana ban kaput karang;#Ap.w 7:5-6. dawak yang adika witingna Papangnina awaki.
9Baisa minit yakat Papang yaklauwi Abraham yakat kalyulna:
—Kaunah man, yang pramiski kat yamtah, dawak man sulama balna bitik bik kaput yayamwang. 10Adika pranimis kuduh man karak yamtayang kidika, dawak sulama balna bitik bik pramis yakat yamninki: manna pasmangna yak ahal balna kidika bitik bik Papang sainni kidika dunin karang.#Ap.w 7:8; Rom 4:11. 11Manna ahal mana muihmana unitak kidika daknamna karang, bahang kidika laih pramis sainni karang, yang dawak manna karak yamna mayang kidika. 12Warmani kaupak manna pasmangna yak walabis ahal batanh dadawa kidika ma tiaskaubās kat Papang sainni kalatanama, kaput bik muih dini yamyang as bakanna kidik walanibis bik Papang sainni kalana karang. 13Kaput bahang as adika dawak ūk yaka bik, rahm palni Papang sainni kalana karang. Kaput laih yang pramiski kidika manna muihmana yakat duwarang, dawak sangmanaka bitik yakat. 14Kaunah angdika muihni Papang sainni duwas kidika, manna pasmangna kaupak ipamna karang, yang prakimis yakat rispik kalawas kidika yulni.
15Yaka bik Papang yaklauwi Abraham yak kalyulna:
—Man yalma Sarai kidika bik watwi ayangni kidika kaput kalyulnin awas karang. Warmani kaupak laih witing ayangni kidika Sara#17.15 Hibru kau, Sara, kidika tanka laih, king walanibis yal tatuna kidika. Sarai kidika laih sara mani kau laih kaput yuyulwa dai. karang. 16Yang lawik blisin kalaki, dawak witing kaupak walakibis al as māki. Agha, yang lawik blisin kalaki. Witing nisan balna mahni nanangnina karang, dawak sulani balna kidika kaupak king kakawarang, dawak tawan balna bik kalalahna karang.
17Abraham witing muhni kidika sau kat lakna, dawak kulnin kau kulwi karana: “¿Muih al as kurih 100 laihna kidika sip katpah papang kalna atnin? ¿Dawak Sara kidika kurih 90 laihna kidika sip katpah walabis dunin?” 18Kaput laih Papang yakat kalyulna:
—¡Yamnikitdai Ismael kidika man blisinma kau sangka dai katlaih!
19Dawak Papang yaklauwi nangnitlana:
—Yang yultikda kidika laih, man yalma Sara yaklauwi walabis al as mawarang, dawak man lawa ayangni pakna Isaac.#17.19 Hibru kau, Isaac kidika yulni tanka laih, karinin, sihm kapat paruh yulwi. Witing karak, pramiski kidika wattik yamki, dawak kidika laih sulani balna kau bik ban kulna awaki. 20Ismael yulni bik madakanayang, bahang blisin kalaki ki; yamting kat walanibis mahni dunakarang, dawak sulani kidika mahni kalna karang. Dawak Ismael laih tunan nuhni 12 kidika papangnina karang. 21Kaunah yang pramiski laih Isaac karak yamna awaki, Sara yaklauwi walamabis al as mawarang kidika, kurih as laihwa kat, adika mani balna akat.
22Dawak Papang kidika Abraham karak yulbauwi dana usnit kat, kidika yakaupak mahka kiuna. 23Kidika mani Abraham yaklauwi walanbis Ismael yakat Papang sainni kalana, dawak witing ūnipas yakat batanh dadana kidika bitik laih Papang sainni diana dai, dawak dini yamyang balna lalah kau bakanna balna bitik. Muih ahal bitik witing ūni yakat yalalahwa balna dai kidika, dawak dini yayamwa balna dai kidika bitik laih Papang sainni diana dai, Papang yaklauwi kalyulna kaput. 24-25Abraham witing kurih 99 laihna dawak witing walanibis Ismael kidika laih kurih 13 laihna kat, witing muihni yakat Papang sainni yayamna dai. 26Abraham dawak witing walanibis Ismael karak sihm kidika mani Papang sainni duduna, 27dawak witing ūnipas kau balna dawak dini yamyang ūnipas kau batahnna balna kidika, dawak dini yamyang balna lalah kau bakanna kidika bitik sau ūk kaupak, witingna Papang sainni duduna.
Currently Selected:
Génesis 17: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
