Galacia 4
4
1Yulkih yawa kidika laih adika ki: Di duwarang muihni kidika baisa walabis kat, satuk awaski muih dinina yamyang walanibis balna karak, di rahm kidika laih di bitik kidika laih witing daniwan. 2Muih buas laih maintatalwi, dawak papakwi maintalwi kalana atnin, papangni yaklauwi mani balna āna kidika kat. 3Mayang bik sihm kapat maibayakwi: walabis mayang dai mani balna yakat, adika sauni parasni dinit yakat mayang dai.#Col 2:8,20. 4Kaunah mani balna kaiwi kawakat, Papang witing walanibis kidika sihna, yal munah batahndana, Moses lāni dinit kat, 5lā dinitkau bangmayang kidika mailaihwi yaknin yulni, dawak papang walanibis balna rahmnina duduwa kidika duna atnin. 6Kat uman witing walanibis mayang bahang, Papang Walanibis Spiritni kidika makulnik yakat sihna; dawak Spirit kidika yulwi: “¡Yang Papangki!” 7Kaput bahang waralaih man laih muih dini yamyang awasman; kaunah Papang walanibis man; witing walanibis man bahang, Papang dukih kalawa kidika laih, di dianin pramis yamna kidika pasyakat atnin.#4.7 Tingkau ulna kidika laih minitkau lakwi: Krais munah.,#Rom 8:15-17.
Pal kulyang balna yulnina kulwi kalbauwi
8Tanit mani kau, Papang yakat amangnilatasmana dai yakat, dawan dauh balna dini yamyangmana dai. 9Kaunah waralaih Papang kidika amangnilanamana bahang, ¿amput sipkarangyah, kidika parasni dis kalni dinit yakat buknamna, dawak kidika dini yamyang alahwanamna? 10Manna ma as as, waiku, kurih balna pasyakat alasna yamtamana... 11¡Uba yamadutayang, manna pasmangna yakat wark yamnayang bitik kidika dauh kalahwarang!
12Wirah balna, kalmana dinityakat buktik yultayang, yang aput awanauh, kat yang laih manna kapat kalnayang. Manna dutni yāyamnamana laih awaski. 13Uman amanglatamana, tatuna yul wisamni yamni laihwi yakwa#Ap.w 16:6. kidika sumalnayang, ais sikninis wauhtamana dai kidika kaput. 14Dawak kidika sikninis laih manalaihwi talna as dai, kidika yulni laih yaruhmtasmana dai dawak bik dauh yakultasmana dai, kaunah nawatkauh laih, Papang innisal kapat yadunamana, ¡sihm Jisas Krais kapat! 15¿Ampatdawih kidika alasnina dakamana dai kidika? Manna ilpmana yulnik sipyang, dawak sipdai kat, manna mamaknapa bik sipdai yakta yanamna yang akat. 16Dawak waralaih ¿manna waihmanala kalnayang katpah, di rahm kidika manayulnayang yulni?
17Kidika muihni balna, manna yulmana uba kukulwi, kaunah witingna kulninna kidika yamni awaski. Dukih diawa kidika laih yangna kaupak manalanin kukulwi, kidika usnit kat witingna yakat kulnamna. 18Lāih laih yamni ki, muih ūk yulnina kulwi kalbaunin kidika, kaunah kulnin yamni kidika karak; dawak bik ban kaput yamwa atnin kidika, kaunah waradika yang manna pasmangna yakat sakyang kidika yulni manah laih awaski. 19Walakibis balna, wattik manna yulmana dalani dutayang, Krais kidika manna yakat kalwarangkat.#Rom 8:29; 2 Kor 3:18; Fil 3:10. 20¡Yamni dai, warminitni kidika yakat sak-atnik yul satuk yulmanabaunik, kaunah waralaih amanglatasyang ais kulnikpa manna yulmana!
Agar dawi Sara karak yulnimaisumalwa kidika
21Di as yayultanauh, manna, lā dinit yakat atnin kultamana kidika: ¿Manna dakasmanah, lā yulwa kidika? 22Yulwi Abraham laih walanibis ahal bu duna; as kidika laih dini yamyang kaupak,#Gn 16:15. dawak ūk kidika laih witing yalni kaupak, bahang kidika laih pri muihni dai.#Gn 21:2. 23Dini yamyang walanibis kidika laih batahnna muih tannika yakat; kaunah pri walanibis kidika laih batahndana Papang pramis yamna kaput kaiwi kalahna atnin. 24Adika kulnin lani as sainni duwi; yayal bu kidika tanka laih pramis aslah kalahna as: as kidika laih sinaí asangni, kidika kuduh Agar, muih dinina yamyang nanangni dai kidika. 25Kat Agar laih Sinaí asangni, Arabia yakat, kidika kuduh waradika Jerusalén kidik, kat kidika tawanni nuhni kidika laih dini yamyang kalna, witing walanibis al kidika karak. 26Kaunah Jerusalén makau kisang kidika laih pri ki, dawak mayang laih kidika walanibis mayang. 27Kat Ulna yakat yulwi:
“Yal walabis yaktasman kidika alasna alahwah,
man walabis disman kidika;
alasna dutah sarahtah,
walabis yaknin ampus dalani kidika dakasman kidik.
Kat yal as ruhmwi dapamna kidika laih
walanibis baisa mahni duwarang ki
yal as al duwa kidika karak dawakat.”#Is 54:1.
28Wirah balna, manna laih Isaac kapat mana: kidika laih Papang pramis yamna dai kidika walanibis balna kalanin. 29Kaunah bik, kidika mani balna dai kapat walanibis al as batahndana dai kidika sau muihni lani kat, laihkuhti uina walanibis batahndana kidika Spirit kau,#Gn 21:9. bahang waradika bik sihm kaput kalahwi. 30Kaunah, ¿Ulna yakat ais yulwih? Aput yulwi: “Ahni yakat ruhmyaktah muih dini yamyang kidika walanibis karak, kat muih dini yamyang walanibis kidika sip di kidika wayah yakwi duduwaski pri walanibis kidika karak.”#Gn 21:10. 31Kaput bahang wirah balna, muih dini yamyang walanibis awas mayang, kaunah pri kidika walanibis mayang.
Currently Selected:
Galacia 4: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998