Galacia 1
1
Parasnin
1Apostel Pal, witing kidika sihwaski dawak ayangni bik pakwaski muih ahal yaklauwi, kaunah Jisaskrais witing palni yaklauwi sihna, dawak Papang witing Jisas dauna kaupak watwi dulauna kidika bik, 2paraswi, muih ahal bitik Galacia sutsni kau bangyakat. 3Mayang Mapapangki, dawak Dawan Jisaskrais tingnikih kidika dawak kulnin aslah kidika mamatna yakat utuhwarang. 4Jisaskrais laih daunin yakat kana mayang madutki yulni,#Mt 20:28; Mk 10:45; 1 Tim 2:6; Tit 2:14. waradika sau dutni kidika kaupak mailaihwi yaknin yulni, kidika mayang Mapapangki kulnin lani. 5¡Alasnina yaksihni kidika Papang dini ban kaput karang! Amén.
Laihwi yaknin yulni kidika ūk diski
6Yang muihsak daunayang kapat ki, sirihni palni manna Papang kaupak naikau alahwanamana kidika, manayulna yawanamna dawak namangnakana minikun talna kidika Krais munah, dawak manna yul wisamni ūk yakat lāwanamana kidika. 7Rahm kidika laih yul wisamni yamni kidika ūk laih awaski. Kauna muih as as manna yakat manauhuswi, dawak Krais yulni wisamni yamni kidika daukalpamna atnin. 8Kaunah muih as kat yul wisamni yamni satuk manayulwarang kat, uman yang lawik manayulnayang kidika karak, kidika muihni minit yakat Papang latuhna kidika bukwang, kultasyang yang mikityakat karang bik bukwarang kat, kidika awasbik insal as makau kisang kidika kaupak kaina karang bik. 9Muhnilau kau bik yulnayang, dawak wattik yultayang: Yul wisamni yamni uman dunamana kidika kaupak ūk satuk manayuyulwarang kat, kidika muihni minit yakat Papang latuhna kidika bukwang.
10Yang laih muih ahal yaklauwi walwi yayakwa kidika waltasyang, kaunah Papang yaklauwi yamni talna kidika laih.#1 Ts 2:4. Dawak muih karak yamni alahwinik bik waltasyang. ¡Muih ahal karak yamni atnik kidika walki kat, Krais dini yamyang awas awaki!
Pal amput apostel kalna kidika
11Wirah balna adika dakanauh: yul yamni wisam manasumaltayang kidika muih kulnin kaupak walwi yakna awaski. 12Muih al as kaupak bik dutasyang dawak bik lan alahwasyang, kauna Jisaskrais yaklauwi nikingkana.
13Manna dakanamana kapatki yuyulwak yang amputyang dai kidika ju balna pasyakat, dawak amput Papang sutsni yakat uitik yawanayang kidika dispamna atnin yulni.#Ap.w 8:3; 22:4-5; 26:9-11. 14Ju balna pasyakat, sau aslah balna yangna kidika dawak kurihkina bik aslah yangna kidika manas witni yakat damuknayang, kat yang laih mamuihkibararak balna lānina kidika parasni laihtik dunayang dai.#Ap.w 22:3. 15Kaunah baisa batahndatas yang tanit kauh Papang yawalwi yakna, dawak witing minikun kulnin duwa kidika kau yayulna yawinik atnik witing yakat, 16walanibis kidika nikingkana,#Ap.w 9:3-6; 22:6-10; 26:13-18. kaput laih ju awas balna yakat yul wisamni yamni kidika sumalnik. Dawak muih kau yultik dakasyang dai; 17dawak bik Jerusalén yakat yawasyang dai yang takitkauh Apostel balna kakalna kidika talnik. Nawatkauh laih Arabia sauni yakat yawanayang, dawak kidika kaupak nawattik yawanayang Damasco yakat.
18Kurih bās bayakwak yawanayang Jerusalén#Ap.w 9:26-30. yakat Cefas kidika yakat talnik, bahang witing karak ma 15 sakyang dai. 19Kaunah kidika yakat apostel ūk balna talasyang dai, kaunah Jims manah talnayang,#1.19 Kaunah kidika yakat...Jims manah talnayang: satuk wirlanin sipki: Kaunah apostel ūk balna laih talasyang dai, Jims manah talnayang. Dawan wirahni al. 20Papang muhni kat rahm manayultayang, dawak adika wauhnitaya ultayang adika bik rahm palni ki.
21Kidika kaupak yawanayang Siria dawak Cilicia yakat. 22Nawatwak, wirah balna Krais sutsni yakat bangkidika Judea yakat amangkilalawasdai yang adika. 23Yul kau manah dakakawadai: “Muhnilau mailaihnin maiuhuiwi kaiwadai kidika waralaih yul wisamni yamni kidika sumalwalikki, ma bayakna balna yakat witing yaklauwi daukalwi dispamnin yamna dai kidika.” 24Yang yulki Papang ayangni nuhni yayamwādai.
Currently Selected:
Galacia 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
