Efesus 5
5
Papang walanibis balnaamput yalahnin kidika
1Manna, Papang walanibis witing dalani manatalwa kidika, witing yamwa kaput yamtanauh. 2Bitik kau dalani ditalnauh, Krais dalani maitalna kapat bitik kau, dawak mayang mayulki dauna kidika, sakripais walapni as kapat Papang muhni yakat.#Ex 29:18; Sal 40:6.
3Manna laih tawan holi balna kapat atnamna ki: Lā munah kalduduwas yulni kidika yulnamna bik awaski, maisihni satni balna dawak lalah dukihni kidika bik. 4Yul yamni awas kidika yuyulwinih, di dauh balna kidika dawak yul dutni balna kidika bik, kat kidika dini balna laih yamni awas bahang; tanit yamni ki Papang ayangni nuhni yamtanauh. 5Kat rahm kultanauh, wais kat lā munah kalduduwas kidika, dawak maisihni balna yayamwa kidika, kidika awas bik lalah dukih diawa kidika (kidika laih dawan dau as ki), Krais dawak Papang king kakawa lani yakat sip kakawas karang. 6Muih alas manayulnin bik awaski yul awas balna kidika kau, kat kidika munah kuduh wah yamadahngni kaiwa kidika Papang kaupak, kidika yul dakawi yayamwas balna minitna yakat. 7Manna kidika balna karak di as bik aslah duduwinih. 8Manna tanit kauh laih puksani yakat yalahtamana dai, kaunah waralaih Dawan karak aslah mana yulni, yaringni yakat yalahtamana. Yaringni muihni balna kapat awanauh, 9kat yaringni kidika laih, minikun talnin, barangni atnin dawak di rahm kidika minik yakwi. 10Laihta talnauh ais kidika Dawan dukih kalawa kidika. 11Dutni lapapakwa balna kidika karak manna kalpakta lan kakalwinih; tanit yamni ki lāih yulta yaktanauh. 12Asalni ki yulna atnin, witingna malnikau di yayamwa balna kidika; 13kaunah di balna kidika bitik yaringni yaklauwi lāih yakwi, 14kat di bitik dāwak lāih kalahwa kidika, yaringni yakat wark yamwi. Kidika bahang yulwi:
“Sahmuta, man amaman kidika;
lawah dadauna balna kidika paskaupak,
dawak Krais yaklauwi man yakatyaringni dahlwarang.”
15Kaput bahang, amungtalnauh yamtamana kidika. Tapadadas kapat laih yalalahwinih, kaunah sins lani karak. 16Adika mani balna yamni yusyamtanauh,#Col 4:5. kat mani balna adika laih dudutni bahang. 17Mutu kapat di yayamwinih; amanglatanauh angdika Dawan kulwa kidika. 18Wasak dadauwinih, kat kidika yaklauwi laih mailaihwatwas maiduwi kiwi; nawatkauh laih, Spirit Holi kidika manabuhng dawang. 19Biri biri yulbautanauh salmo, dawak spirit laniwana balna karak, unbautanauh, dawak ismangna bitik Dawan ayangni nuhni yamtanauh. 20Papang yakat ban kaput tingki kalatanauh, di bitik Papangni kidika, Madakiwan Jisaskrais ayangni yakat.#Col 3:16-17.
Kristian balna warknina kidika
21Manna biri biri kallaihnu awanauh, Krais risnipik kau.
22Yalnina balna#Col 3:18; 1 Pi 3:1. kidika witingna alnina yulni dakanin ki, sihm Dawan yulni dakawa kapat. 23Kat alni kidik laih yalni kidika tunan, sihm Krais kidika suts tunan kapat, dawak suts kidika laih muihni nuhni; dawak witing laih laihwi yakyang. 24Kaput, suts kidika Krais karak kapat, yalnina balna kidika bik alni yakat atnin ki.
25Alnina balna mana kidika, yalmana balna#Col 3:19; 1 Pi 3:7. yakat dalani talnauh, Krais suts yakat dalani talna kapat, dawak bik witing sangnika āna kidika. 26Adika laih holi yamnin yulni yamna, maisihni dis kalyamna was kau dawak yulni karak bik libitwi 27kaput witing muhni yakat duwi kiunin suts as alasna yaksihni kapat, sani laihwas, dawak bik misikwas, kaunah holi ki dawak yamni manah ki.#2 Kor 11:2; Rib 21:2,9. 28Sihm kaput bik laih alnina balna kidika yalnina yakat dalani talnin ki, sihm witing muihni kapat. Wais kat yalni yakat dalani talwa kidika laih witing muihni yakat dalani talwi. 29Kat muih as bik witing silp muihni yakat waihla talwas ki, nawatkauh laih di bayahwi, maintalwi, sihm Krais suts yakat yamwa kapat, 30kat kidika laih witing muihni nuhni.#5.30 Tingkau ulna kidika minitkau lakwi: muihni dawak wakalni. Dawak mayang laih muihni nuhni kidika tingni bikisni mayang. 31“Kidika bahang muih al kidika papangni dawak nanangni dawarang, yalni karak aslah kalahnin yulni, dawak muih bu kidika kaupak muihnina aslah kalalahwarang.”#Gn 2:24. 32Akat niningkawi nuhni ampusyah, malnikau Papang di duwa kidika. Dawak yang yultayang kidika laih, Krais dawak suts kidika ki. 33Kidika balna bitik yakat, man yalma yakat dalani talah, man muihma kapat, dawak bik yal kidika alni yakat rispik kalawang.
Currently Selected:
Efesus 5: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
