Efesus 1
1
Paraswi
1Pal, Jisas aposnitel papang kulnin lani kaput, kidika balna Efeso#Ap.w 18:19-21; 19:1. tawanni nuhni kau tawan holi muihni balna, dawak witingna kidika kulyang balna bahang Krais Jisas karak aslah ki. 2Mayang Mapapangki dawak Dawan Jisaskrais, witingna tingninakih lani dawak kulnin aslah kidika manna mamatna yakat utuhwang.
Spirit blisinni kidika Krais yakat
3Ayangni nuhni yamna karang Papang dawak Dawan Jisaskrais yakat, kat Krais karak asla malahna kaupak#1.3 Krais karak aslah malahna kaupak: satuk wirlanin sipki: Krais muihni nuhni yakat. spirit blisinni satni kidika mayana. 4Papang maiwalwi yakna Krais munah, sau adika yamwas tanitkauh, kaput laih holi atnin, dawak witing muhni yakat wayakani as bik dis atnin. Witing dalani duwa kidika munah#1.4 Kaput laih holi atnin...Witing dalani lani duwa munah: satuk wirlanin sipki: witing dini atnin pāt dis, dalani lani kidika karak witing muhni yakat atnin. 5witing walanibis balna kapat maiduna atnin Jisaskrais munah, dawak kidika munah maipakna kidika, witing kulnin lani dalani duwa kidika munah yamna kidika. 6Adika yamna mayang ban kaput Papang ayangni nuhni yamnin, witing minikun talnin yaksihni duwa kidika munah, dawak kidika kau blismaiyamna kidika walanibis al dalani kulwa kidika munah. 7Witing dalani nuhni karak, Papang yaklauwi pri maiyakna, walanibis āni utuhna kidika munah,#Mk 10:45; 14:24; Hib 9:12-14. dawak madutki balna dāwak disna.#Col 1:14. 8Papang dalani lani duwa kidika manikingkana, witing mayana kidika sins lani nuhni dawak di amanglanin bik, 9dawak mayang adika sip maiyamna bahang witing kulnin lani malni kau duwa kidika manikingkanin, kidika awasbik witing warkni balna yamnin kulna dai kidika. 10Kidika warkni balna, yamna karang amput yamnin kulna yakat, mani kaiwi kawakat, dawak Papang yaklauwi uduhna karang Krais parasni dinit munah di balna bitik, ma kau kisang dawak sau akat balna kidika bitik.
11Krais yakat, Papang yaklauwi baisa kau maiwalwi yakwi maiduna, mayang duna atnin, dini pahni balna kidika,#1.11 Mayang duna atnin, dini pahni balna kidika: sipki satuk wirlanin: mayang adika witing dini pahni atnin. Papang yamnin kulna balna kaput, dawak yamwa balna kidika laih witing alas kulnin lani kat ki. 12Dawak witing dukih kalana mayang adika tatuna tahanin kidika Krais yakat āwi duna atnin, dawak kaput laih mayang bitik parasni nuhni yaksihni kidika nuhni dulauna atnin. 13Tingkih Krais yakat, manna bik yul rahm kidika dakanamana, laihwi yaknin yulni yamni kidika, dawak laihna mana kasak kulnin kidika, dawak Papang dini manayakwi tampni kau manataihna Spirit Holi karak, witing pramis yamna dai kidika.#Lc 24:49; Jn 14:26; 16:13-15; Ap.w 1:4; 2:33. 14Adika Spirit Holi kuduh rahm#2 Kor 1:22. maiyulwa kidika, Papang di mayanin yulna rahmni kidika, bitik palni pri maiyakwarang kat, dawak witing tawanni yakat maiāwarang kat, kaput laih mayang bitik witing parasni yaksihni kidika nuhni yamdarang.
Pal Papang kau minityulwi kulyang balna yakat sins nuhni kidika dianin
15Kaput bahang, amanglatayang manna Dawan Jisas yakat kasak kultamana, dawak dalani lani bik dutamana holi tawanni kidika karak bik, 16Papang yakat tingki kalyultayang kidika datasyang, isningpaktayang mikityultayang balna yakat. 17Madakiwan Jisaskrais Papangni yakat yultayang, Papang yakat, sins lani nuhni spiritni kidika mananin, kaput laih yamni palni amangnilana atnamna. 18Yultayang kulnamna kidika yaringni manawang, kaput laih amanglanamna tahanin yulni manayulna kidika angdikapa, ampus alasna yaksihni minit nuhniyah Papang yaklauwi tawan holi muihni balna yakat diawa kidika, 19dawak ampat nuhni dawak witni bik dis kidika witing parasni kidik, kulyang mayang akat wark kalahwa kidika. Sihm kidika parasni kuduh Papang yaklauwi manikingkana kidika parasni palni 20Krais dulauna, dawak witing tingnipal yakat yalahna kidika makau kisang yakat,#Sal 110:1. 21parasni balna bitik, lā muihni balna, dawan balna bitik minityakat āna kidika, dawak di balna yamna kidika bitik bik minityakat kidika, adika mani balna dawak ma balna kaiwarang yakat bik. 22Di bitik kidika Krais kalni dinit yakat āna,#Sal 8:6. dawak Krais witing palni yaklauwi suts kidika tunan āna di bitik yakat. 23kat suts kidika laih Krais muihni nuhni,#Col 1:18. dawak kidika laih bitik palni kalana, kat Krais kuduh di bitik palni yakat dukiwa kidika.#1.23 Kidika laih bitik palni...kidika: satuk wirlanin sipki: Yamwi papatwa kidika di balna bitik yakat.
Currently Selected:
Efesus 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
