Eclesiastés 5
5
Pramis yamda kidika kaput yamnin ki
1 # S.b. 5:1-20 kidika balna laih libitna ki S.b. 4:17—5:19 hib. kau ulna yakat.Papang ūni yakat yawama mani kat, di yamtaman balna kidika amungtalah: sakripais balna yamnin pāni yakat sihm muih mutu yamwa kapat dutni yamwa kidika amanglawas dawi, yaihnityak yawa yulni kat dakah.
2Sirihni palni, kungmamak balna dawak sinsma kau bik Papang yakat pramis yamwinih, kat Papang laih makau kisang yakat sakki dawak man laih sau akat sakman. Kidika bahang, ais sipman kidika manah yultah, 3kat uba yul kulda mani kat, makulnik kidika trabil dudi, dawak uba yulbaudak bik yul dauh balna manah yuldi.#Pro 10:19.
4Papang yakat pramis as yamma mani kat, yamwas laih atnah, kat witing laih tapdadas balna kidika yamni talwas ki. Ais pramis kalyamtaman kidika kat yamtah,#Dt 23:21-23; Sal 66:13-14. 5bahang tanit yamni ki pramis yamwas atnin, dawak pramis yamwi kidika kat yamwas atnin karak dawakat.
6Datang kat kungmamak balna kidika yaklau mayayamwak dutni yamwinih, dawak usnit kat Papang yaklau sihna muihni kidika muhni yakat yulnam mistik alahwa yamnaman. ¿Ais yulni yamdakat Papang yaklau kulnin daukalwarangyah yul balna yultaman kidika yulni dawak bik daukalwarangyah di yamnaman kidika? 7Kaput bahang, trabil balna manas, yul balna mahni dawak di balna sinsni lani dis balna kidika pasyakat, man laih Papang niningyak rispik nuhni yamnam ki.#5.7 Kaput bahang...rispik nuhni yamnam ki: kaput wirlana kidika yamni kapat ki. Hibru kau laih amangladaski.
Masangkika niningkauh balna kidika
8Muihsak kapat malaihnin awaski, sau as kau talang muih minikunni yakat taihwi duwak dawak la kat kidika yakat dawak muih rahmni yakat bik dutni yayamwak, kat kalbauyang tunan nuhni as kidika tunan muihni nuhni ūk yaklau yulni malwi, dawak ūk balna tanit nunuhni kidika yaklau kidika bu balna kidika yakat yulnina mamalwi. 9¡Dawak kidika ki sau baraknin kidika dawak king kidika laih di dahnin pāni wark kalahwa kidika!#5.9 Muihsak kapat malaihnin awaski...wark kalahwa kidika!: kaput wirlana kidika yamni kapat ki. Hibru kau laih amangladaski.
10Angdika muihni lalah yakat dalani talwa kidika laih, baisa mahni dukih kalawi; angdika muihni sau ritsni balna yakat dalani talwa kidika laih, wat as bik kulwas ki mahni dunin kidika. Adika bik sihm alas dauh manah ki, 11kat mahni duda mani kat, mahni palni disdi. ¿Dawak ais duwarangyah kidika minityak ūk duda kidika yakat lakdi taldinah? 12Wark kalahwa muihni kidika laih, di dibin kidik awaskat mahni kaswa karang bik, witing laih ban kaput yamni kami; di duyang kidika laih, nawatkauh, witing ritsni balna kidika yaklau kalyayamwak yamni kamas ki.
13Rahm palni adika sauni akat di dutni as talnayang: rits balna uduhnin kidika laih daniwan nining yakat dutni kiwi, 14kat lalah warkni dutni as yaklau sip ki kidika ritsni yakat dispamna atnin, dawak witing walabis al duwa karang kat, usnit kat di as bik dis karang ki walanibis yakat kalana atnin. 15Dawak sau akat amput kaiwi kalahna dai kaput, watwi kaput nawatwi kiuna karang ki: wahnidis palni sihm batahndana dai kapat, dawak di as bik duwi kiwas karang warkni balna minik kaupak.#Job 1:21; Sal 49:17; 1 Tim 6:7. 16Adika laih rahm dalani palni ki: sau akat amput kaiwi kalahna kaput nawatwi kiwarang kidika. ¿Dawak wark mahni yamna kidika kaupak ais yaknayah? 17Dutni kidika laih, witing sangnika bitik kidika puksani pasyakat manah bayakna,#5.17 Bayakna: Y.y. kasna. dawak kulnin trabil dawak dalani balna karak bik.
18Yang waltik yaknayang di yamni kidika laih di kaswi dawak dinin kidika manah ki, dawak adika sauni akat wark kalahwi kidika kaupak alasna dunin kidika manah ki Papang yaklau masangkika parahni mayana yakat, bahang mayang laih kidika yamnin maiwatna. 19Dawak ūk yakat laih, Papang yaklauwi angdika muihni balna yakat rits minitbayak diawa kidika, kidika kaupak di kasna atnin dawak bik dina atnin kalawi, bahang wark mahni kaupak alasna dunin kidika laih Papang kaupak kaiwi. 20Dawak Papang yaklau witing isning yakat alasna kidika āwi bangwa bahang, witing tanityak sangnika kiwarang kidika yulni kulwi kalbauwas ki.
Currently Selected:
Eclesiastés 5: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998