Deuteronomio 23
23
Tawan muihni awas kulnin muihni balna
1“Muih al as suman'minik labanni karang, kidika awas kat muih al muihni kidika dakpapamna karang kat, Dawan muihni balna pasyakat atnin sip awas karang.
2“Bastar walanbis as kidika, papang tawanni muihni dawi pasyakat bik dunin sip awas karang, adika lani kidika ban kukulna karang, sulamana balna kau bik.
3“Amonita dawi moabita kaupak balna kidika bik Dawan tawanni dawi pas yakat bik kanin sip awas karang, adika lani sulamana balna aiwarang kau bik ban kalkulna karang, 4kat manna, kidika balna saunina munah bayakna mana mani, was kat bik mananawas dai bahang, Egipto kaupak alahwa aiwanamana mani, witingna di kama bik mananawas dai bahang; kidika minit yakat, Beor walanbis al balaam, petor mesopotamia kaupak kaiwa dai yakat, lalah lauwi kalalana dai manna mamatna yakat pāt nuhni laknin yulni.#Nm 22:1-6. 5Kaput dai kaunah, manna papangmana yaklauwi Balaam yulni dakawasdai, manna mamatna yakat yamnin mana yamna,#Nm 23:7-24:9. kat yakat dalani matatalwa yulni.#Neh 13:1-2. 6kidika bahang manna sangmanaka bitik pas yakat, witingna yakat kulnin sanni dawi witingna kaupak di as yamni yaknin bik walnamna awaski.
7“Kaput ki kaunah, edomita sulani balna yakat laih dutni dikulnin awas ki, witingna kidika manna wanaihmana balna bahang, kaput bik Egipto muihni balna yakat bik dutni di kulnin awas ki, kat witingna saunina yakat bang mana dai bahang, 8manna sulamana balna bās kau tilahwi uiwarang bitik kidika, Dawan tawanni muihni balna kulna karang.
Klin atnin lani balna
9“Manna waihmanala balna niningna kauh war yamnin bangmana yulni ū labanni yakat awana bangmana pas yakat, traitala di dutni as bik yamnin awas palni ki papang dutni kulna dini balna kidika yamnin awaski. 10Manna pasmangna kaupak, muih as maisihni likkat, amana kau witing wasni kalahwi kalsuihna kat, kidika ū labanni balna paskaupak kalahnin ki, watwi kiunin awaski, mapiris kaupak masan kat. 11Mahka masan lakwa kat was kau kalsuhwi yakna karang dawi ma kawikiu dawak sip karang watwi kiwi kanin.
12“Adika muih al ahni kau kiunin want karang kat manna ū labanni kaupak nai kau pa as yaktanama bahang yakat kiuna karang. 13Pan subangni as duwarang dawi sau yakat kurwi dawi yakat balukwarang, usnit kat sau kau minit yakat mukwarang. 14Kat Dawan Papangmana kidika manna pasmangna yakat likkarang ki manna yakat tamatna dahwi minit bayaknin kidika manawarang bahang, kidika bahang manna ū labanni paknamana kidika, Dawan pāni as kulnamna karang kidika bahang kidika pāni yakat papang di as dutni talnin awaski, di dutni sak karang kat, manna kaupak mana dawi ahni yakat kalahwarang bahang
Sauni kaupak dawi kini pa ūk yakat sau yulni lani balna
15“Warau as kidika daniwan kaupak dawi pini kiwi man yakat ū walwarang kat, man lawa laihta tatuna daniwan yakat kalanam awaski. 16Kaunah datangkat man karak watwarang, angdika tawanni yakat watnin kulwarangkat datang yakat watna karang muih as bik witing yakat uswas karang.
Wayani dauh balna panina yakat kanin awas lani balna ulna kidika
17“Israel tawanni pas kaupak muih al dawi yal as bik wayani dauh balna panina yakat uiwi di dutni yamnin kidika lani diski, ban muihni bakannin pāni yakat uinin awaski.#Lv 19:29. 18Kidika bahang manna datanang kat, Dawan Papangmana ūni yakat pramis lalahni kidika diwi kiwi launin, al karak payahna kidika lalahni kau, kat kidika laih Dawan dutni talwa bahang.
19“Manna pasmangna kaupak, muih as bik wanaihni as kau lalah wayaki kalawa kidika yulni minitkau yakwi dunin, lalah manah awaski kaunah di ūk balna bik sihm kaput karang. 20Pa ūk muihni kidika laih paktanang minit kau lauwi manawarang, di as wayaki kalatanama kidika, kaunah pa aslah mana yakat laih kaput yamnin awaski.#Ex 22:25; Lv 25:36-37; Dt 15:7-11. Kaput laih Dawan Papangmana blisin manawarang sau manawarang yakat awa dutanama kat.
21“Manna papangmana kau di as pramis yamta mana kat, pranimis kidika laihwattas yamtanauh,#Nm 30:1-16; Mt 5:33. kaunah yamtas awanama kat, Dawan Papangmana kidika yaklauwi manalaihna karang, bahang kaput laih manna pāt dutanama. 22Kaunah manna pramis alahwa mana kat, manna dutmana yamta awanama Dawan muhni yakat, 23kaunah manna kulnamna lani pramis alahwana kat, traitala ais pramis yamnamana yakat yamnam karang.
24“Manna wanaihmana wainni yamak as kau awanama kat, minit ampus kasnin dukih mawa kidika kastanama, kaunah dutta ūma kau laih duta yawanam awaski, 25manna wanaihmana planiwar dahna yanimak as kau awanama kat, tingmana kau daktanama kaunah isparah kau laih daknamna awaski.
Currently Selected:
Deuteronomio 23: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
