2 Kurint 12
12
Sahmuhni amana kau kapat dawak di balna yakwi niningkana kidika
1Di as bik dudaski mayang alas maalaskina yaksihni yamnin kidika. Kaput bik, yang yulnik ki Dawan yaklau sahmuhni amana kau kapat dawak di balna yakwi nikingkana dini balna kidika. 2Krais usnit uiyang muihni as amanglatayang, kisang bās yakat kalduwi kiunadai kaupak kurih 14 bayakna. Yang amanglatasyang muihni nuhni kauna kidik awaskat spirit manah kalduwi kiuna dai pa; kidika laih Papang amanglawi. 3Kaunah amanglatayang kidika alni laih (muihni kauna kidik awaskat spirit kau, amanglatasyang, Papang manah amanglawi) 4paradais yakat duwi kiuna, kidika yakat malni yulni balna dakana muih as yakat bik sip kalyulwas yulni balna kidika. 5Yang bik sihm kidika alni kapat ayangki yaksihni yamnik sipyang, kaunah yang alas muihki yakat laih awas, kaunah sip wauhtik bayaktas yang dini balna kidika yakat laihtakat. 6Yang alaskina yaksihni yamnik kidika dukih yāwarang bik, kidika laih di dauh as bik awas karang ki, kat kidika laih di rahm kidika yulki bahang; kaunah yamtasyang, muih as bik yang ampatyang kidika baisa minityakat satuk kaldakayang kidik awas bik ais yultayang kidika baisa minitlaktik yultayang kapat kulwi, 7kidika di yayamni nikingkana kidika yulni laki yamna atnin. Kidika bahang, yang ampat yang kidika minityakat baisa kaldakanik awas yulni, wauhnin as dunayang, muihki nuhni yakat wakal as yapana, kidika laih sitan wark yamwa dini kidika kaiwi dutni yayamna. 8Dawan yakat wat bās kalyulnayang kidika wauhnin kaupak yayakna atnin; 9kaunah Dawan yaklau aput yayulna: “Yang dalani lani dutayang kidika manah duna atnamki; bahang yang paraski kidika laih lāih kalahwi sip wauhwi bayakwas atnin kidika yakat.” Kaput bahang paraski dis alaskina yaksihni yamna atnik kidika kauh dukih yawi, kaput karak yang mikityakat Krais parasni kidika kaiwi bukna atnin yulni. 10Dawak sip wauhwi bayakwas atnin dini balna, dutni yulnin lani balna, dukih atnin lani balna, dangnit kaupak uinin lani balna dawak Krais yulni trabil balna wauhtayang kidika yulni yang alasnayang, kat paraski dis kaldakayang mani kat kidika laih baisa dadasni kaltayang.
Pal kulwi kalbauwa kidika Kurint sutsni yulni
11Yang laih sihm muih tunani dutni kapat di yamnayang, kaunah manna lawa yapaknamana kaput yamna atnik. Kat manna kuduh yang yulki yamni yulnamna dai kidika, bahang yang laih di bik awasyang, kidika apostel dauh balna karak bik kuihtasyang. ¡Dawak yang laih di bik awasyang! 12Sain balna, di taldas dini balna dawak di amangladas dini balna bik manna pasmangna yakat kulnik laihwattinah yamnayang kidika, kidika balna yaklau lāih yayakna yang laih rahm apostel as yang kidika. 13Dutki datanangkat diswang dutni manayulnayang kat, kaunah manna laih di aslah yakat kuihtasmana suts ūk balna kidika karak dawakat: ¡yang laih manna truknamna dini awasyang dai kidika!
14Uman ridi yang wat bās yakat yawik manatalna atnik, dawak waradika bik manna truknamna dini awas awaki ki. Yang laih manna di dutamana kidika waltasyang, kaunah manna kidika manawaltayang; kat manna laih papangmana walabis balna dinina lalah uduhnamna kidika, dawak walabis balna yaklau papang balna dinina uduhninna laih awaski. 15Dawak yang laih kulnik yamni karuk ais dutayang balna kidika bitik diski ki, dawak yang muihki kat bik diski ki manna yamni atnamna yulni. Yang lawik manna kidika baisa manadukih yāwarang kat, ¿manna lawa ma bitik yakat kuihtas dalani yatalnamayah?
16Dikah, yang laih manna truknamna dini awasyang dai. Kaput bik, muih buas balna laih yang lawik alas diyultingkat laihnin dini yakat bubukna atwi. 17¿Ais muih balna buas manasihnayang kidika tingnina munah pa ūk kau manasihmuknayang katpah? 18Tito yakat kalyulnayang dai kiwi manatalna atnin, dawak witing karak sihnayang wanaih ūk kidika bik. ¿Ais Tito yaklau pa ūk kau manasihmukna katpah? ¿Rahm awasyah yangna albupak di balna kapapat yamnayangna dawak sihm spiritni karak?
19Manna kultanama pa yangna laih manna muhmana yakat dutkina disnin yultayangna, kaunah kaput awaski. Nawatkauh, Papang muhni yakat yulbautayangna dawak Krais dini balna kapat. Dawak wanaihki dalani balna adika dini bitik kidika, manna spirit niningyakat baraknamna yulni yamtayangna. 20Kat yamadutayang yawik manatalki mani kat, yang dukih yawa kaput manatalas awaki karang tik, dawak manna bik yang yakat yatalas awanama manna dukih manawa kaput. Yamadutayang sahwi kalahnin, tumnin, annin, kalsaranin, muih yulni yulwi karinin, niningkauh yaklaunin, nuhni kaldakanin dawak pini lani manah karang kidika yulni. 21Yamadutayang yang wattik yawaki kidika yakat, Papangki yaklau manna yulmana yayamwakat asalni dakaki kidika yulni, dawak bik manna mahni palni yulmana yayamwakat aidaki ki kidika, muhnilau kaupak dutni yamta aiwa warmani kat bik maisihni lani, la munah kalduwas atnin lani dawak di suhl suhl mana dai kidika kaupak datas mana kidika yulni.
Currently Selected:
2 Kurint 12: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
